Nä, no de Schreft un no de Jeschichtsforscha no deeden de Christen daut ieeschtemma nich.

Wuarom jleewen dan eenje, daut de Christen en Paulus siene Tiet sikj en de Doodje äare Städ deepen leeten? Daut kjemt doavon, woo 1. Korinta 15:29 en väl Biblen äwasat es. En de Plautdietsche Bibel sajcht daut biejlikj: “Wan de Doodes nich oppstonen, waut stalen dee sikj väa, dee sikj en de Doodje äare Städ deepen loten?”

See wie mol, waut twee Bibeljelieede doaräwa sajen. Dr. Gregory Lockwood säd, daut de Jeschichtsforscha bat nu nuscht doavon jehieet hauden, daut “de Menschen ieeschtemma” sikj “en de Doodje äare Städ” hauden deepen loten, un “daut de Schreft doa uk nuscht von säd”. Biejlikj soowaut säd de Jelieeda Gordon D. Fee. Hee schreef: “Daut jeft en de Schreft ooda sestwua kjeenen Bewies fa soone Doop. Daut N[iee] T[astament] rät opp sest kjeene Städ von soowaut, un doa es uk nuscht von bekaunt, daut se en irjenteene Kjoakj ooda Christenjemeent de Menschen soo aus dit deepen deeden von don, aus daut mol oppjeschräwen wort.”

De Schreft sajcht, daut Jesus to siene Nofolja säd: “Got nu no de Velkja von de Welt un moakt an to Lieelinja un deept an . . . lieet an aules to doonen, waut ekj junt befolen hab” (Mat. 28:19-20). Ea eena sikj kunn deepen loten, must eena Jehova un sienen Sän kjanen lieren, aun dee jleewen un dee jehorchen. Soone, waut aul jestorwen un begroft wieren, kunnen daut nich mea doonen un de Christen, waut noch läwden, kunnen daut uk nich en dee äare Städ doonen (Liera 9:5, 10; Joh. 4:1; 1. Kor. 1:14-16).

Von waut räd Paulus doa dan?

Eenje en Korint säden, daut de Doodes nich wudden oppstonen (1. Kor. 15:12). Oba Paulus wull dee daut utlajen, woo daut werkjlich wia. Hee säd: “Ekj [hab] dän Doot aule Dach ver mie.” Paulus sien Läwen wia foaken en Jefoa. Oba hee veleet sikj doaropp, daut hee wudd vom Doot oppjewakjt woaren un dan em Himmel läwen, soo aus Jesus (1. Kor. 15:30-32, 42-44).

De Christen en Korint musten vestonen, waut doa aules met en wia, wan eena jesaulft wort. De Jesaulwde musten jieda Dach met Schwierichkjeiten foadich woaren un dee musten uk stoawen, daut dee kunnen oppjewakjt woaren. Wan eena “en Christus Jesus jedeept” wort, bedied daut, daut eena en dän “sienen Doot nenn jedeept” wort (Reem. 6:3). Daut bedied, daut de Jesaulwde krakjt soo aus Jesus wudden väl lieden un stoawen motten, ea dee oppjewakjt worden toom em Himmel komen.

Mea aus twee Joa no siene Doop säd Jesus to twee von siene Apostel: “Jie woaren . . . met de Doop jedeept woaren, met dee ekj jedeept woa” (Mar. 10:38-39). Jesus räd hia nich von de Doop em Wota, oba von de Doop “en sienen Doot”. Daut bedied, daut hee wudd stoawen motten, wiels hee Gott tru bleef. Un Paulus schreef, daut de Jesaulwde wudden met Jesus toop lieden motten, daut dee uk kunnen “met am toop veharlicht woaren” (Reem. 8:16-17; 2. Kor. 4:17). Dee wudden uk stoawen motten, daut dee kunnen oppjewakjt woaren toom em Himmel läwen.

Doawäajen wudd daut fein sennen, Paulus siene Wieed soo aus dit to äwasaten: “Waut woaren deejanje sest doonen, waut jedeept woaren toom Doodje sennen? Wuarom loten dee sikj soo aus dit deepen, wan de Doodje doch goanich oppjewakjt woaren?” (1. Kor. 15:29, NW).