Hast du dit Joa de Woaktorms oppmoakjsom jeläst? See mol, aus du de Froagen hia beauntwuaten kaust:

Woo sell wie met de Jesaulwde omgonen?

Wie räakjnen dee väl wäajen äaren Gloowen, oba wie woaren dee nich äwamotich erhäwen. Wie paussen opp, daut wie nich Menschen veieren (Jud. 16, NW, Fn.). Wie sent uk nich too nieschierich, wan wie met dee äwa äare Hopninj räden (w20.01, S. 29).

Wuarom kjenn wie ons secha sennen, daut Jehova aun jieda eenem von ons denkjt?

De Schreft sajcht, daut Jehova ons aul sach, ea wie jebuaren wieren. Hee horcht no onse Jebäda un weet, waut wie en ons Hoat haben un waut wie denkjen. Waut wie doonen, moakt am schaftich ooda truarich (1. Chr. 28:9; Spr. 27:11). Un hee haft ons no sikj jetrocken (w20.02, S. 12).

Wanea sell wie räden un wanea sell wie stell sennen?

Wie räden wellich von Jehova. Wie bliewen nich stell, wan wie enwoaren, daut doa wäa waut schlajchtet doonen woat. De Eltestasch jäwen Rot, wan daut fält. Wie forschen kjeenem ut, woo ons Woakj en soone Lenda krakjt jedonen woat, wua daut veboden es, un wan wie daut weeten, dan saj wie daut uk to kjeenem. Wie pludren nich Sachen ut, wua aundre nich derwen omweeten (w20.03, S. 20-21).

En waut sent de Grausshoppasch en Joel, Kapitel 2 veschieden von dee en Openboarunk, Kapitel 9?

Joel 2:20 bat 3:2 wiest, daut Gott de Grausshoppasch wajchjajcht un daut dee vesprakjt, dän Schoden wada goottomoaken, waut dee aunjerecht haben. No daut jeft Gott sienen heiljen Jeist. Daut erfeld sikj, aus de babelonische Soldoten en Israel nenkjeemen un uk lota. Openboarunk 9:1-11 wiest, waut de Jesaulwde vondoag dän Dach doonen. Dee sent soo aus Grausshoppasch, wan dee bekauntmoaken, daut Gott dise beese Welt bestrofen woat. Deejanje, waut dise Welt unjastetten, jleichen daut nuscht (w20.04, S. 3-6).

Wäa es vondoag dän Dach de Kjennich vom Nuaden?

Russlaunt un siene Poatna. Dee haben väl met Gott sien Volkj to doonen un haben daut Prädichtwoakj veboden un haussen Jehova siene Zeijen. De Kjennich vom Nuaden well emma dän Kjennich vom Sieden jewennen (w20.05, S. 13).

Sent bie “dän Jeist siene Frucht” bloos de näajen Ieejenschoften met en, wua Galata 5:22-23 von rät?

Nä. De heilja Jeist halpt ons uk, daut wie noch aundre feine Ieejenschoften haben, soo aus Jerajchtichkjeit (Efs. 5:8-9) (w20.06, S. 17).

Fa waut mott eena oppaussen, wan eena von sikj selfst waut em Internet nendeit?

Daut kaun leicht doano loten, daut eena puchen well un nich deemootich es (w20.07, S. 6-7).

Waut kjenn wie von feine Fescha lieren?

Dee kjikjen, wua de Fesch sent un wanea. Dee vestonen sikj met äa Jereetschoft. Un dee sent uk en schwoare Tieden äwanäment. Krakjt soo kjenn wie daut en onsen Deenst doonen (w20.09, S. 5).

Woo kjenn wie eenen Bibelschiela halpen, Jehova noch dolla to leewen?

Wie kjennen dän tooroden, jieda Dach de Schreft to läsen un doaräwa notodenkjen. Un wie kjennen dän lieren to bäden (w20.11, S. 4).

Von wäm rät daut, wan daut sajcht, daut de Menschen “derch Christus wada aula toom läwen” komen? (1. Kor. 15:22).

De Apostel Paulus wull doamet nich sajen, daut jieda Mensch wudd vom Doot oppstonen. Hee räd von de jesaulwde Christen; daut sent dee, “dee derch Christus Jesus jeheilicht un aunjestalt sent, Gott siene heilje to sennen” (1. Kor. 1:2; 15:18) (w20.12, S. 5-6).

Waut vonne Oppgow kjrieen de Jesaulwde, waut “en eenem Uagenblekj, wan de latste Trompeet blosen woat” veendat woaren? (1. Kor. 15:51-53).

Dee woaren met Christus toop met eene Iesastang äwa de Menschen harschen (Opb. 2:26-27) (w20.12, S. 12-13).