1. Waut kaun Mootloosichkjeit aun ons doonen?

JIEDA Dach hab wie Trubbels un motten ons bastet doonen, daut wie doamet foadich woaren. Oba daut es väl schwanda, wan wie mootloos sent. Mootloosichkjeit es soo aus een Stäla, waut ons de Krauft un de Freid wajchnemt. En Spricha 24:10 (NW) sajcht daut: “Wan du en schwoare Tieden mootloos woascht, dan woascht du mau weinich Krauft haben.” Wan wie mootloos sent, dan hab wie nich de Krauft, waut ons fält toom fein met onse Trubbels foadich woaren.

2. Wäajen waut kjenn wie mol mootloos woaren, un waut woa wie en disen Artikjel seenen?

² Wie kjennen wäajen veschiednet mootloos woaren. Eenjet haft met ons selfst to doonen, soo aus onse Fäla, Schwakheiten ooda de Jesuntheit. Aundret haft biejlikj doamet to doonen, daut wie em Deenst fa Jehova nich krakjt de Oppgow kjrieen, waut wie ons wenschen, ooda daut de Menschen nich no ons horchen, wan wie prädjen. En disen Artikjel woa wie eenjet seenen, waut ons halpt, met Mootloosichkjeit foadich to woaren.

3. Waut kaun ons halpen, rajcht äwa onse Fäla to denkjen?

³ Wie kjennen leicht mootloos woaren wäajen onse Fäla un Schwakheiten. Veleicht jleew wie dan, daut wie soo schlajcht sent, daut Jehova ons en de niee Welt goanich well. Soo to denkjen kaun sea jefäadlich sennen. Woo sell wie dan äwa onse Fäla denkjen? De Schreft wiest, daut “aulemaun . . . jesindicht” haft, buta Jesus Christus (Reem. 3:23). Oba Jehova sieekjt nich no onse Fäla un velangt nich, daut wie volkomen sent. Hee es een leeftolja  Voda un well ons halpen un es uk jeduldich. Hee weet, woo schwoa daut es, daut rajchte to doonen un rajcht äwa sikj selfst to denkjen, un hee well ons doamet halpen (Reem. 7:18-19).

4-5. Waut holp twee Sestren nich opptojäwen, soo aus 1. Johanes 3:19-20 wiest?

⁴ See wie mol, woo Deborah un Maria daut jinkj. * Aus Deborah een Kjint wia, deed äare Famielje ar nich leeftolich behaundlen un see feeld sikj sea toom äwajen. See wort meist kjeenmol jeloft un met de Tiet docht see sea schlajcht äwa sikj selfst. Wan see uk bloos een bät waut orrajcht deed, docht see aul, daut see to nuscht to brucken wia. Maria jinkj daut meist krakjt soo. Äa Frintschoft tald ar emma fa läach un doawäajen feeld see sikj nuscht wieet. Un aus see dan de Woarheit kjanen lieed, feeld see sikj daut nich wieet, eent von Jehova siene Zeijen to sennen.

⁵ Oba dise beid Sestren hieeden nich opp Jehova to deenen. Wuarom nich? Dee bäden to Jehova un säden am krakjt, woo see sikj feelden (Psa. 55:23). Dee worden en, daut ons leeftolja himlischa Voda weet, woo sea ons daut toosaten kaun, waut wie ea beläft haben. Oba hee sitt uk daut goode en ons Hoat, wan wie daut selfst veleicht nich mol enwoaren (läs 1. Johanes 3:19-20).

6. Woo feelen eenje sikj, wan see wada dänselwjen Fäla moaken?

⁶ Veleicht es doa wäa, dee sikj sea aunstrenjt eene schlajchte Jewanheit tochtoloten. Un dee es dan gaunz mootloos, wan dee wada dänselwjen Fäla moakt. Daut es nuscht waut butajeweeneljet, daut wie ons schuldich feelen, wan wie jesindicht haben (2. Kor. 7:10). Oba daut saul kjeenmol soo wiet komen, daut wie denkjen: “Met mie helt daut aulmols nuscht en. Jehova kaun mie goanich vejäwen.” Daut stemt nich, un soo to denkjen wudd ons kjennen von Jehova aufbrinjen. Spricha 24:10 sajcht je, daut wie mau weinich Krauft haben, wan wie mootloos sent. Wan wie eenen Fäla jemoakt haben, dan sell wie daut met Jehova “derch räden” (Jes. 1:18). Daut bediet, daut wie am om Vejäwunk bäden. Wan hee sitt, daut ons daut opp iernst leet es, dan woat hee ons togood hoolen. Un wie sellen uk met de Eltestasch räden. Dee woaren ons jeduldich halpen em Gloowen wada jesunt to woaren (Jak. 5:14-15).

7. Wuarom sell wie nich mootloos woaren, wan ons daut schwoa felt, daut rajchte to doonen?

⁷ Jean-Luc, een Eltesta en Frankreich,  sajcht to soone, waut met eene Schwakheit to kjamfen haben: “Jehova talt nich dee fa jerajcht, waut kjeene Fäla moaken, oba dee, waut äare Fäla leet sent un dee gootmoaken” (Reem. 7:21-25). Denkj nich, daut et met die nuscht enhelt, wan du met eene Schwakheit to kjamfen hast. Wie aula moaken Fäla un kjennen nich ut onse ieejne Krauft ver Gott jerajcht sennen. Doawäajen bruck wie daut Leesjelt (Efs. 1:7-8; 1. Joh. 4:10).

8. Wäm kjenn wie no Help froagen, wan wie ommootich sent?

⁸ Onse Gloowesbreeda kjennen ons Moot toospräakjen. Wie kjennen ons to dee utschedden, un dee kjennen ons dan met äare Wieed Moot jäwen un treesten (Spr. 12:25; 1. Tess. 5:14). Joy es eene Sesta en Nigeria, waut met Mootloosichkjeit to kjamfen haud. See sajcht: “Waut wudd ekj onen miene Gloowesbreeda doonen? Daut dee mie Moot toospräakjen bewiest, daut Jehova no miene Jebäda horcht. Ekj hab uk von dee jelieet, woo ekj aundre kaun Moot toospräakjen, wan dee bedrekjt sent.” Wie motten oba em Denkj hoolen, daut onse Breeda un Sestren daut nich emma enwoaren, daut ons daut aun Moot fält. Doawäajen kaun daut needich sennen, daut wie eenen erfoarnen Brooda ooda Sesta no Help froagen.

9. Woo jäwen Psalm 41:4 un 94:19 ons Moot?

⁹ Froag Jehova no Help. Wan wie ons nich fein feelen un besonda, wan wie aul lenja krank sent, kaun daut schwoa sennen, mootich to bliewen. Jehova woat ons nu nich derch een Wunda jesunt moaken, oba hee treest un stoakjt ons, daut wie uthoolen kjennen (läs Psalm 41:4; 94:19). Hee kaun biejlikj Gloowesbreeda bat doa brinjen, daut dee ons tus waut halpen ooda fa ons enkjeepen ooda met ons toop bäden. Ooda hee halpt ons aun waut scheenet denkjen, waut wie en sien Wuat jeläst haben, biejlikj aun de volkomne niee Welt, waut noch komen woat un wua wie nich mea woaren krank sennen ooda Weedoag haben (Reem. 15:4).

10. Wuarom bleef Isang nich bedrekjt no sien Ojjlekj?

¹⁰ Isang, waut en Nigeria wont, haud een Ojjlekj un wia jelämt. De Dokta säd to am, daut hee kjeenmol mea wudd gonen kjennen. Isang sajcht: “Ekj wia sea truarich un bedrekjt.” Oba bleef hee bedrekjt? Nä! Waut holp am? Hee sajcht: “Ekj un miene Fru hieeden kjeenmol opp to bäden un Jehova sien Wuat to studieren. Wie wieren ons uk eenich no daut goode to kjikjen, biejlikj doano, daut wie noch mol en de niee Welt läwen kjennen.”

11. Waut jeef Cindy Freid, wan see uk sea krank wia?

¹¹ Cindy wont en Mexiko. De Dokta säd to ar, daut see eene Krankheit haud, wua see aun stoawen kunn. Woo kunn see doamet foadich woaren? Aus see met äare Krankheit doktren deed, neem see sikj väa jieda Dach Zeichnis to jäwen. See schrift: “Wiels ekj daut deed, docht ekj dolla aun aundre aus aun daut Oppereeschen un aun de Weedoag ooda woo schlajcht mie daut jinkj. Jeweenlich fruach ekj de Doktasch ooda de Nursen, woo äare Famielje daut jinkj. Un dan fruach ekj dee, wuarom see sikj soone schwoare Oabeit utjesocht hauden. Doaderch wort ekj en, waut dee intressieed. Eenje säden, daut de Kranke an nich foaken fruagen, woo an daut jinkj. Un väle bedankten sikj doafäa, daut ekj om an bekjemmat wia. Eenje jeewen mie mau  rajcht äare Adrass ooda Fonnumma. Jehova jeef mie en dise schwoare Tiet väl mea Freid, aus ekj mie väajestalt haud!” (Spr. 15:15).

12-13. Woo kunnen eenje Kranke ooda Schaubje Zeichnis jäwen, un woo kjeem daut ut?

¹² Kranke ooda Schaubje sent veleicht mootloos, wäajen dee nich soo väl em Deenst doonen kjennen. Oba väle von dee haben aul fein kunt Zeichnis jäwen. Enne Stäts wia eene Sesta, waut Laurel heet. See must 37 Joa en eene Maschien ligjen, waut ar holp to odmen. Butadäm haud see noch Kjräft un Hutkrankheiten un wort mieremol opperieet. Oba aul daut kunn ar nich vom prädjen aufhoolen. See jeef de Nursen Zeichnis un uk dee, waut ar besochten. Woo kjeem daut ut? See holp oppet weinichste 17 Stekj, Jehova kjanen to lieren! *

¹³ Richard es een Eltesta en Frankreich un hee haft eene goode Iedee fa soone, waut nich utem Hus kjennen ooda biejlikj en een Aultenheim sent. Hee sajcht: “Eena wudd sikj kjennen waut oppstalen toom onse Bieekja wiesen. Wan aundre dee seenen, woaren dee veleicht nieschierich un stalen Froagen. Daut kaun onse leewe Breeda un Sestren Moot jäwen, wan dee nich mea kjennen von Hus to Hus gonen.” Soone Breeda kjennen uk Breew schriewen ooda äwa Fon Zeichnis jäwen.

14. Waut kjenn wie von dän Kjennich David lieren?

¹⁴ Veleicht kjrie wie wäajen ons Ella ooda wäajen onse Jesuntheit ooda wäajen sestwaut nich de Oppgow em Deenst fa Jehova, waut wie ons wenschen. Dan kjenn wie väl von dän Kjennich David lieren. Hee wudd sea jejleicht haben dän Tempel to buen, oba Jehova wäld sikj nich am doatoo. Waut deed David dan? Hee deed wellich dänjanjen unjastetten, waut dän Tempel buen sull, un jeef soogoa väl Selwa un Golt doatoo. Es daut nich een goodet Biespel fa ons? (2. Sam. 7:12-13; 1. Chr. 29:1, 3-5).

15. Woo kunn Hugues wada mootich woaren?

¹⁵ Een Brooda en Frankreich, waut Hugues heet, kunn wäajen siene schlajchte Jesuntheit nich mea Eltesta sennen un uk tus nich mea väl doonen. Hee schreef: “Aum Aunfank feeld ekj mie sea mootloos un nuscht wieet. Oba met de Tiet wort ekj en, daut ekj nich mea truarich sennen sull äwa daut, waut ekj nich doonen kunn. Ekj freid mie dan leewa äwa  daut, waut ekj noch emma fa Jehova doonen kunn. Ekj sie mie gaunz eenich nich opptojäwen. Gideon un de 300 Mana worden meed, oba dee hieeden nich opp to kjamfen. Un ekj woa uk nich!” (Rech. 8:4).

16. Waut kjenn wie von de Enjel lieren?

¹⁶ Un uk de true Enjel sent een goodet Biespel fa ons. Jehova fruach dee mol, woo eena dän schlajchten Kjennich Ahab äwaräden kunn. Een schoof Enjel säden doa waut too. Oba Gott läsd sikj bloos de Iedee von eenen Enjel ut un säd dan, daut daut soo schaufen wudd (1. Kjen. 22:19-22). Worden de aundre Enjel dan mootloos un dochten: “To waut säd ekj verheipts noch waut?” Daut hieet sikj nich soo, wiels de Enjel opp iernst deemootich sent un emma Jehova ieren wellen (Rech. 13:16-18; Opb. 19:10).

17. Waut sell wie doonen, wan wie mootloos sent, wiels wie nich eene Oppgow kjrieen, waut wie ons wenschen?

¹⁷ Denkj doaraun: De jratste Iea es, daut wie Jehova siene Zeijen sennen un sien Kjennichrikj bekauntmoaken kjennen. Waut räakjent Jehova bie siene Deena daut mieeschte? Daut sent nich de veschiedne Oppgowen, waut dee kjrieen. Jehova jleicht daut, wan wie bescheiden un deemootich sent, un uk onse Breeda un Sestren woaren daut väl räakjnen. Froag Jehova doano, daut hee die halpt, deemootich to bliewen. Un denkj äwa aul de true Menschen von de Bibeltiet no, waut deemootich wieren. Sie reed, diene Breeda soo goot aus mäajlich to deenen (Psa. 138:6; 1. Pet. 5:5).

18-19. Woo kjenn wie Freid em Deenst haben, wan de Menschen veleicht uk nich horchen wellen?

¹⁸ Wieescht du mol mootloos, wäajen sikj daut soo späad, daut doa kjeena horcht, wua du prädichst, ooda daut doa meist kjeena tus wia? Waut kaust du dan doonen, daut du mea Freid kjrichst un nich diene Freid velieescht? Een poa goode Iedeeen sent en dän Kausten “ Woo eena mea Freid em Deenst haben kaun”. Daut es uk needich, daut wie rajcht äwa dän Deenst denkjen. Waut bediet daut?

¹⁹ Denkj doaraun, daut wie biem prädjen  Gott sienen Nomen un daut Kjennichrikj bekauntmoaken wellen. Jesus säd daut gaunz kloa, daut mau weinich dän Wajch toom Läwen finjen wudden (Mat. 7:13-14). Wan wie prädjen, dan kjenn wie met Jehova, met Jesus un met de Enjel toopschaufen (Mat. 28:19-20; 1. Kor. 3:9; Opb. 14:6-7). Jehova trakjt deejanje no sikj, waut daut wieet sent (Joh. 6:44). Un wan doa wäa nich horchen well, dan horcht dee veleicht lota.

20. Woo kaun Jeremia 20:8-9 ons halpen, wan wie mootloos sent?

²⁰ Wie kjennen von dän Profeet Jeremia väl lieren. Wua hee prädijd, wia daut sea schwoa, wiels de Menschen am “dän tietäwa” veachten un vespotten deeden (läs Jeremia 20:8-9). Opp eene Sauz wort hee soo mootloos, daut hee oppjäwen wull. Oba hee deed daut doch nich. Wuarom nich? Wiels “däm HARN sien Wuat” en am soo wia aus een Fia, kunn hee daut nich en sikj hoolen. Ons woat daut krakjt soo gonen, wan wie jieda Dach de Bibel studieren un doaräwa nodenkjen. Soo kaun onse Freid em Deenst toonämen un veleicht horchen uk mea Menschen no ons (Jer. 15:16).

21. Woo kjenn wie met Mootloosichkjeit foadich woaren?

²¹ Deborah, von dee wie aul ea jerät haben, sajcht: “Mootloosichkjeit es eent von daut baste, waut de Soton jäajen ons brucken kaun.” Oba Jehova Gott es väl stoakja aus aules, waut de Soton brukt. Wan du die wäajen irjentwaut mootloos feelst, dan froag Jehova no Help. Hee woat die halpen, met diene Fäla un Schwakheiten foadich to woaren. Hee woat die Krauft jäwen, wan du krank best. Hee woat die halpen, rajcht äwa de Oppgowen to denkjen, waut du em Deenst fa Jehova hast. Un hee woat die halpen, Freid em Deenst to haben. Schedd die to dienen himlischen Voda ut. Hee woat die halpen, met diene Mootloosichkjeit foadich to woaren.