1-2. (a) Waut sullen dree von Jesus siene Apostel doonen, un woo kjeemen dee daut no? (b) Waut woa wie en disen Artikjel seenen?

NO DAUT Passafast aune 32 sagen de Apostel Petrus, Jakobus un Johanes eene besondre Vision. Opp eenen huagen Boajch, woomäajlich Poat von dän Hermon-Boajch, wort Jesus ver an vewaundelt. “Sien Jesecht jlenzt aus de Sonnenschien, un siene Kjleeda worden witt aus daut Licht” (Mat. 17:1-4). Meist opp Enj von de Vision hieeden see Gott siene Stemm, waut doa säd: “Dit es mien leewa Sän, met däm ekj sea tofräd sie. Horcht no am” (Mat. 17:5). De dree Apostel weesen daut en äa gaunzet Läwen, daut see no Jesus horchten. Wie wellen dee äa Biespel nodoonen.

² En dän väajen Artikjel hab wie jeseenen, wan wie no Jesus siene Stemm horchen, dan woa wie jewesse Sachen nich mea doonen. En disen Artikjel woa wie tweeatlei seenen, waut Jesus säd, waut wie doonen sullen.

3. Waut sell wie no Matäus 7:13-14 no doonen?

³ Läs Matäus 7:13-14. Jesus räd von twee Puaten, waut no twee veschiedne Wäaj fieeden; de breeda Wajch un de schmaula Wajch. Daut jeft kjeenen dredden. Wie motten entscheiden, opp woonen Wajch wie gonen wellen. Dit es de wichtichste Entscheidunk en ons Läwen, wua ons eewjet Läwen von aufhenjt.

4. Woo es daut opp dän breeden Wajch?

 ⁴ Wie motten em Denkj hoolen, waut de Unjascheet es tweschen dise beid Wäaj. Opp dän breeden Wajch sent väl Menschen, wäajen daut leicht es, doa bowen to gonen. Daut es truarich, oba väle woaren sikj eenich, opp dän breeden Wajch to bliewen, wäajen dee eefach daut doonen wellen, waut aule aundre doonen, waut doa bowen sent. Dee weeten nich, daut de Soton doahinja es, daut aule Menschen sellen opp disen Wajch gonen, un daut dee toom Doot fieet (1. Kor. 6:9-10; 1. Joh. 5:19).

5. Woo haben eenje jeprooft, dän schmaulen Wajch to finjen un opp dän to gonen?

⁵ Een Wajch es “breet” un de aundra es “schmaul” un Jesus säd, daut doa mau weinich sent, dee dän finjen. Wuarom? En dän näakjsten Varsch woarnt Jesus siene Nofolja fa de faulsche Profeeten (Mat. 7:15). Eenje Menschen sajen, daut daut dusende Gloowes jeft, un de mieeschte behaupten, daut see de Woarheit lieren. Wäajen daut soo väl Gloowes jeft, sent väl Menschen mootloos un derchenaunda un proowen nich mol, no dän Wajch to sieekjen, waut no daut Läwen fieet. Oba eena kaun disen Wajch finjen, wiels Jesus säd: “Wan jie bie dee Wieed bliewen, waut ekj junt jelieet hab, sent jie woarhauftich miene Jinja. Dan woa jie weeten waut Woarheit es, un de Woarheit woat junt frie moaken” (Joh. 8:31-32). Daut es sea to lowen, daut du nich eefach daut deist, waut aule aundre Menschen doonen, oba no de Woarheit sochst. Du fungst aun deep Gott sien Wuat to studieren un lieezhd, waut hee von die velangt, un horchst no Jesus siene Lia. Biejlikj lieezhd du, daut Jehova velangt, daut wie nuscht sellen met faulsche Lieren to doonen haben un daut wie nich sellen bie Heljedoag metmoaken, waut von de faulsche Gloowes komen. Du lieezhd uk, daut daut nich emma eefach wia, daut to doonen, waut Jehova haben wull, un Jewanheiten tochtoloten, waut am nich jefollen (Mat. 10:34-36). Daut es secha nich emma leicht jewast fa die, dise Endrungen to moaken, oba du proowsd daut wieda, wiels du dienen himlischen Voda leewsd un am schaftich moaken wust. Woo brow hee nich mott sennen met die! (Spr. 27:11).

6. Waut kaun ons no Psalm 119:9-10, 45, 133 no halpen, opp dän schmaulen Wajch to bliewen?

⁶ Waut kjenn wie doonen, om opp dän schmaulen Wajch to bliewen, wan wie doa ieescht bowen sent? Vejlikj wie daut mol. Een Tun aune Kaunt von eenen schmaulen Wajch enne Boaj deent toom Schutz fa dän Foara un daut Foatich. Dee es doatoo, daut dee nich too wiet no de Kaunt foat ooda von de Kaunt rauffoat. Kjeena wudd sajen, daut dis Tun an de Frieheit wajchneem. Jehova siene Jebooten un Gruntsauzen sent soo aus dis Tun. Dee beschitzen ons, daut wie kjennen opp dän schmaulen Wajch bliewen (läs Psalm 119:9-10, 45, 133).

7. Woo sullen de junge Menschen äwa dän schmaulen Wajch denkjen?

⁷ Jie junge Menschen, denkj jie eenjemol, daut Jehova siene Gruntsauzen junt de Frieheit wajchnämen? De Soton well, daut jie soont denkjen. Dee wudd jleichen, daut jie no daut kjikjen, waut deejanje doonen, waut opp dän breeden Wajch sent, un waut von Scheengonen dee haben. Dee well, daut jie sellen denkjen,  daut june Schoolpoatna ooda de Menschen, waut jie em Internet seenen, daut väl bäta jeit aus junt. Dee well uk, daut jie denkjen sellen, daut Jehova siene Jebooten un Gruntsauzen junt de Freid wajchnämen. * Oba denkjt doaraun: De Soton wiest deejanje, waut opp sienen Wajch gonen, nich, wua daut hanfieet. Oba Jehova lat junt weeten, waut hee fa junt reed haft, wan jie opp dän schmaulen Wajch bliewen (Psa. 37:29; Jes. 35:5-6; 65:21-23).

8. Waut kjennen junge Menschen von Olaf lieren?

⁸ See wie mol, waut wie von daut lieren kjennen, waut de junga Brooda Olaf beläwd. * Siene Schoolpoatna wullen am bat doa brinjen Sex to haben. Aus hee dee dan utläd, daut Jehova siene Zeijen no de Jebooten un Gruntsauzen von de Schreft läwden, proowden eenje Mejalen  von siene Klauss am noch dolla to vesieekjen. Oba Olaf stunt fa daut rajchte en. Un dit wia nich daut eensje schwoare, waut hee haud. Olaf sajcht: “Miene Lierasch wullen mie enjankren, daut ekj sull no de Uniwersität gonen, wiels dan wudden de Menschen mie achten. Dee säden uk to mie, wan ekj daut nich doonen wudd, dan wudd ekj kjeenmol eene feine Oabeit kjrieen un ekj wudd nich schaftich sennen.” Waut holp Olaf staunthauft to bliewen? Hee sajcht: “Ekj wort noch jratre Frind met deejanje von miene Vesaumlunk. Dee worden fa mie soo aus eene Famielje. Ekj funk uk aun, deepa de Schreft to studieren. Un je deepa ekj studieed, je dietelja wort mie, daut ekj werkjlich de Woarheit haud. Un dan wort ekj mie eenich, mie deepen to loten.”

9. Waut motten deejanje doonen, waut doa wellen opp dän schmaulen Wajch bliewen?

⁹ De Soton wudd daut jleichen, die von dän schmaulen Wajch auftobrinjen, waut toom Läwen fieet. Dee well, daut du eefach daut deist, waut de mieeschte Menschen doonen, un opp dän breeden Wajch jeist, “dee en daut vedoawen fieet” (Mat. 7:13). Oba wie kjennen opp dän schmaulen Wajch bliewen, wan wie wieda no Jesus horchen un dän Wajch aus eenen Schutz seenen. Nu woa wie noch äwa eenatlei räden, waut Jesus säd, waut wie doonen sullen.

10. Waut säd Jesus no Matäus 5:23-24 no, waut wie doonen sullen?

¹⁰ Läs Matäus 5:23-24. Jesus räd hia von eene Sach, waut de Juden, waut am toohorchten, sea wichtich wia. Stal die väa, doa kjemt wäa nom Tempel met een Tia un well de Priesta daut jäwen fa een Opfa. Wan dänjanjen dan biefelt, daut sien Gloowesbrooda waut jäajen am haft, dan mott hee daut Tia doa loten un wajchgonen. Wuarom? Na, wäajen daut noch waut wichtjeret jeft, aus Jehova een Opfa to brinjen. Jesus säd gaunz dietlich: “Moak ieescht Fräd met dienen Brooda”.

11. Waut deed Jakob, om met sienen Brooda Esau Fräd to moaken?

¹¹ Daut Biespel von Jakob wiest ons, woo wie kjennen met aundre Fräd moaken. Nodäm daut hee rom 20 Joa von daut Launt wajch wia, wua hee mol jebuaren wia, säd Gott derch eenen Enjel to am, daut hee wada sull trigjgonen (1. Mo. 31:11, 13, 38). Oba doa wia een Trubbel, wiels sien elra Brooda Esau haud je am wult doottomoaken (1. Mo. 27:41). Doawäajen haud Jakob “een grootet beduaren un hee enjst sikj”, daut sien Brooda noch emma wudd doll äwa am sennen (1. Mo. 32:8). Waut deed Jakob, om met sienen Brooda Fräd to moaken? Daut ieeschte bäd hee iernstlich to Jehova äwa dise Sach. Dan schekjt hee Esau een grootet Jeschenkj (1. Mo. 32:10-16). Un tolatst, aus hee Esau dan sach, ieed hee am. Hee kjneed sikj ver Esau nich bloos eemol ooda tweemol, oba säwen Mol! Wäajen hee deemootich wia un Esau respakjten deed, kunn hee met am Fräd moaken (1. Mo. 33:3-4).

12. Waut kjenn wie von Jakob lieren?

¹² Wie kjennen waut doavon lieren, waut Jakob deed, ea hee met sienen Brooda räd, un uk, woo hee met dän räd. Jakob fruach Jehova deemootich no Help. Dan wees hee, daut hee daut werkjlich soo meend, wua hee om jebät haud, un deed sien bastet, om met dän Fräd to moaken. Aus dee beid sikj tooptroffen, street Jakob sikj nich met Esau doaräwa, wäa em rajchten wia. Hee wull eefach Fräd  moaken met sienen Brooda. Woo kjenn wie Jakob nodoonen?

13-14. Wan wie eenen Brooda beleidicht haben, waut wudd wie dan sellen doonen?

¹³ Wan wie wellen opp dän Wajch gonen, dee toom eewjen Läwen fieet, dan mott wie met onse Breeda Fräd hoolen (Reem. 12:18). Waut wudd wie sellen doonen, wan wie enworden, daut wie onsen Brooda velatst hauden? Daut wie kjennen met dän Fräd moaken, wudd wie Jehova iernstlich sellen om Help froagen, soo aus Jakob daut deed.

¹⁴ Wie wudden ons uk sellen Tiet nämen, om ons selfst to unjasieekjen. Wie wudden kjennen doaräwa nodenkjen: “Sie ekj reed, miene Schult tootostonen un deemootich om Vejäwunk to froagen un Fräd to moaken? Woo woaren Jehova un Jesus sikj feelen, wan ekj daut ieeschte doaropp schauf, met eenen Brooda ooda eene Sesta Fräd to moaken?” De Auntwuaten fa dise Froagen kjennen ons halpen, no Jesus to horchen un deemootich no onsen Brooda to gonen un Fräd to moaken. Soo woa wie Jakob sien Biespel nodoonen.

15. Woo kaun daut, waut en Efeesa 4:2-3 steit, ons halpen, met eenen Brooda Fräd to moaken?

¹⁵ Stal die väa, waut doa haud kunt passieren, wan Jakob sikj met Esau doaräwa jesträden haud, wäa em rajchten wia. Daut wudd dan veleicht sennen gaunz aundasch utjekomen. Wan wie no eenen Brooda gonen un met dän waut beräden wellen, dan mott wie deemootich sennen (läs Efeesa 4:2-3). Spricha 18:19 sajcht: “Een vezoajda [ooda beleidichta] Brooda es schwanda to jewennen aus eene vesechade Staut, un Zank helt dee uteneen aus een met Stangen veräajeldet Paulaust Puat.” Wan wie deemootich sent un om togoodhoolen froagen, dan woat de aundra ea wellen met ons Fräd moaken.

16. Äwa waut sull wie nodenkjen, un wuarom?

¹⁶ Wie motten uk iernstlich doaräwa nodenkjen, waut wie to dän Brooda sajen woaren un woo wie daut sajen woaren. Wan wie daut jedonen haben, dan wudd wie sellen no dänjanjen gonen, waut wie beleidicht haben, un proowen wada Frind to woaren met dän. Veleicht sajcht dee aum Aunfank Sachen, waut ons weedoonen. Un daut kunn leicht sennen, daut wie ons doaräwa oajren un aunfangen ons to  rajchtfoadjen. Oba doaderch wudd daut bloos noch schlemma woaren. Denkj doaraun, daut et väl wichtja es, met dän Brooda Fräd to moaken, aus doaräwa to räden, wäa em rajchten wia (1. Kor. 6:7).

17. Waut kjenn wie von Gilbert lieren?

¹⁷ Een Brooda, waut Gilbert heet, schauft sea doaropp, daut hee wull Fräd moaken. Hee sajcht: “Tweschen mie un miene Dochta jeef daut een deel Trubbels. Ekj proowd fa äwa twee Joa, daut leeftolich met dee derchtoräden, daut wie ons wada kunnen eenich sennen.” Waut deed Gilbert noch? Hee sajcht: “Jiedatsmol, ea ekj met dee räd, bäd ekj to Jehova un docht doaräwa no, daut ekj nich wull doll woaren, wan dee waut säd, waut nich leeftolich wia. Ekj must reed sennen toom vejäwen. Ekj lieed daut, nich doaropp stonen to bliewen, daut ekj em rajchten wia, un ekj kunn uk vestonen, daut et miene Veauntwuatunk wia wada Fräd to moaken.” Woo kjeem daut ut? Gilbert sajcht: “Vondoag dän Dach hab ekj ennaliche Fräd un wie sent ons aus Famielje wada aula eenich.”

18-19. To waut sell wie ons gaunz eenich sennen, wan wie wäm beleidicht haben, un wuarom?

¹⁸ Waut wurscht du sellen doonen, wan du moakjst, daut du eenen Brooda beleidicht hast? Dan horch no Jesus sienen Rot un moak Fräd. Räd uk to Jehova äwa de Sach un velot die opp sienen heiljen Jeist, daut dee die halpen woat no Fräd to sträwen. Wan du daut deist, dan woascht du schaftich sennen un du woascht wiesen, daut du no Jesus horchst (Mat. 5:9).

¹⁹ Wie sent sea dankboa doafäa, daut Jehova derch Jesus Christus, daut Haupt von de Vesaumlunk, fa goode Aunleidunk jesorcht haft (Efs. 5:23). Wie wellen soo aus de Apostel Petrus, Jakobus un Johanes no Jesus horchen (Mat. 17:5). Wie haben nu jeseenen, woo wie daut doonen kjennen, wan wie met eenen Brooda Fräd moaken, dän wie beleidicht haben. Wan wie daut nokomen un uk opp dän schmaulen Wajch bliewen, dee toom Läwen fieet, dan woa wie nu aul sea jesäajent woaren un noch mol fa emma schaftich sennen.