Best du reed toom “de Ieed oawen”?
WIE aula freien ons aul to daut, waut Jesus vesproaken haft: “Schaftich sent dee, dee saunftmootich sent, wiels dee woaren de Ieed oawen” (Mat. 5:5, NW). De Jesaulwde woaren de Ieed oawen, wan dee ieescht met Jesus toop em Himmel äwa de Ieed rejieren (Opb. 5:10, NW; 20:6). De aundre true Christen woaren de Ieed oawen, wan dee dan fa emma doabowen läwen. Dee woaren volkomen un schaftich sennen un Fräd haben. Oba daut jeft noch een deel to doonen, wan wie aul dit beläwen wellen. Unjasto wie ons mol dree Sachen: Dee woaren dan biejlikj motten de Ieed to een Paradies moaken un doano seenen, daut dee, waut vom Doot oppstonen, aules haben, waut dee brucken un dee uk lieren. Wie woaren uk seenen, woo du nu aul wiesen kaust, daut du die doatoo freist, lota noch mol mettohalpen.
BEST DU REED, DE IEED TO EEN PARADIES TO MOAKEN?
Aus Jehova to de Menschen säd, daut see sikj “äwa de gaunze Ieed vemieren, un äwa de Ieed rejieren” sullen, jeef hee auntovestonen, daut de gaunze Ieed wudd een Paradies woaren (1. Mo. 1:28). Dee, waut doa wellen fa emma oppe Ieed em Paradies läwen, motten dautselwje nokomen. Doa woat daut nich soo sennen, aus daut bie de ieeschte Menschen wia, dee aul dän Goaden Eden hauden, ea dee aunfungen, de Ieed to een Paradies to moaken. No Harmagedon woat daut sea väl to doonen jäwen, wäajen wie de gaunze Ieed reinmoaken motten. Doa woat sea väl Oabeit sennen!
Aus de Israeliten von Babel trigjkjeemen, wia doa sea väl to doonen. En äa Launt haud fa 70 Joa kjeena jewont. Oba Jesaja säd verut, daut see daut met Jehova siene Help wudden kjennen to eene schmocke Städ moaken. De Profezeiunk wia: “Hee woat de Wiltnis to een Goaden Eden moaken, un daut drieeje Launt aus däm HARN sien Goaden moaken” (Jes. 51:3). Krakjt soo aus de Israeliten daut Launt met Jehova siene Help wada schmock moaken kunnen, krakjt soo woa wie de Ieed uk to een Paradies moaken kjennen. Un du kaust nu aul wiesen, woo sea die doa jankat mettomoaken.
Eene Wajch, woo du daut wiesen kaust, daut du doa methalpen west, es, wan du daut bie die tus rein un ordentlich hast, wan june Nobasch daut uk nich soo haben. Du wurscht uk kjennen methalpen, daut Vesaumlungshus un daut Kongresshus reinmoaken un daut en Ordninj hoolen. Wan daut fa die mäajlich es, dan kaust du die uk aunjäwen, friewellich doa mettohalpen, wua daut derch een Owwada Schoden jejäft haft. Doaderch wiest du, daut du reed best, doa mettohalpen, wua daut needich fält. Du wurscht uk kjennen äwalajen, aus du die wurscht waut lieren kjennen, waut du uk en daut Paradies nutzen kust.
BEST DU REED, DEE TO HALPEN, WAUT VOM DOOT OPPSTONEN?
Denkj mol han, waut Jesus säd, aus hee Jairus siene Dochta vom Doot oppwuak. Hee säd, daut se dee waut toom äten jäwen sullen (Mar. 5:42-43). Daut jeft secha nich sea väl auf, fa eene 12-joasche Mejal to sorjen. Oba Jesus säd, daut “aul dee, dee en de Jräwa ligjen, siene Stemm hieren woaren … [un] dan verendach komen”. Woo väl Oabeit woat daut dan nich jäwen? (Joh. 5:28-29). De Bibel rät nich äwa väl Eenselheiten. Oba wie kjennen ons väastalen, daut dee, waut vom Doot oppstonen, woaren Äten, Kjleeda un een Dak äwarem Kopp brucken. Kaust du nu aul wiesen, daut du reed best mettohalpen? Well wie mol een poa Sachen seenen.
Waut kaust du nu aul doonen toom wiesen, daut du reed best, de Ieed to oawen?
Wan de Kjreisoppsechta kjemt diene Vesaumlunk besieekjen, best du dan reed, dän to eene Moltiet entoloden? Deist du methalpen, fa soone Voltietdeena een Veblief to finjen, waut von daut Betel no de Vesaumlunk jeschekjt woaren ooda fa soone, waut ea Kjreisoppsechta wieren? Ooda wan daut de Kongresstiet es, kaust du dan doa methalpen ooda de Jast welkom heeten?
BEST DU REED, DEE TO LIEREN, WAUT VOM DOOT OPPSTONEN?
No Aposteljeschicht 24:15 no velot wie ons doaropp, daut doa woaren millionende Menschen vom Doot oppstonen. Väle von dee haben nich de Jeläajenheit jehaut, Jehova kjanen to lieren. Dee woaren de Jeläajenheit noch kjrieen, nodäm dee woaren vom Doot oppjestonen sennen. a Gott siene true Deena, waut väl Erfoarunk haben, woaren dee lieren kjennen (Jes. 11:9). Charlotte, waut en Europa, Sied-Amerika un en Afrika prädjen deed, freit sikj aul doatoo un sajcht: “Woo scheen woat daut nich sennen, dee Menschen to lieren, waut vom Doot oppstonen woaren! Wan ekj von wäm läs, waut ieeschtemma jeläft haft, dan denkj ekj soo: ‘Wan dis Mensch Jehova kjanen jelieet haud, wudd dän sien Läwen woomäajlich gaunz aundasch jewast sennen.’ Ekj kaun daut aul meist nich aufluaren, bat ekj dee, waut vom Doot oppstonen, woa kjennen von Jehova vetalen, un woo väl bäta dee äa Läwen woat sennen, wan dee woaren Jehova deenen.”
Jehova siene true Deena, waut ver Jesus siene Tiet läwden, woaren uk een deel lieren motten. Kaust du die väastalen, woo schaftich ons daut moaken woat, wan wie Daniel daut woaren vetalen kjennen, woo de Profezeiungen sikj erfelden, waut hee oppschreef un oba nich vestonen kunn? (Dan. 12:8). Ooda woo woat ons daut gonen, wan wie Rut un Noomi daut woaren sajen kjennen, daut de Messias von äare Nokomen aufstaumd? Waut vonne groote Freid daut nich sennen woat, bie daut Liawoakj oppe gaunze Welt mettomoaken! Un daut woa wie doonen kjennen, onen daut wie aufjelenkjt woaren von aule Drockichkjeiten un daut schlajchte en dise Welt!
Woo kaust du nu aul wiesen, daut du reed best, soone to halpen, waut lota vom Doot oppstonen woaren? Eent es, wan du die aunstrenjst, een bätra Liera to woaren un räajelmässich prädjen deist (Mat. 24:14). Veleicht kaust du nu nich mea soo väl doonen, aus du wurscht wellen, wäajen du ella jeworden best ooda wäajen waut aundret. Oba wäajen du nu aul dien bastet biem prädjen deist, wiest du, daut du reed best, dee to lieren, waut vom Doot oppstonen.
Daut es goot, wan wie äwa een poa wichtje Froagen nodenkjen. Freist du die aul werkjlich toom de Ieed oawen? Freist du die uk aul doatoo, de gaunze Ieed to een Paradies to moaken un die om dee to kjemren un to lieren, waut vom Doot oppstonen? Du kaust nu aul dien bastet jäwen un bie soone Sachen methalpen, wua du uk lota methalpen woascht. Soo wiest du, daut du reed best, de Ieed to oawen.
a See dän Artikjel “Dee, dee väle to Jerajchtichkjeit brinjen” en dän Woaktorm vom Septamba 2022.
