1. Waut säd Jesus to dän Vebräakja biesied am, jroz ea hee storf? (Lukas 23:39-43).

 JESUS un de twee Vebräakja biesied am musten sea lieden, aus dee doa langsom storwen (Luk. 23:32-33). De beid Vebräakja hauden äwa Jesus jespott, un daut wiest, daut daut nich siene Nofolja wieren (Mat. 27:44; Mar. 15:32). Oba eena von dee endad sien Denkjen un säd: “Har, denkj aun mie, wan du en dien Rikj nenn kjemst”. Un Jesus auntwuad am un säd: “Ekj vespräakj die vondoag: ‘Du woascht met mie em Paradies sennen.’” (Läs Lukas 23:39-42; 23:43, NW.) Nuscht jeft auntovestonen, daut disa de Norecht von “daut Himmelrikj” aunneem, von woont Jesus prädjen deed. Un Jesus säd nich, daut disa wudd en daut Kjennichrikj em Himmel komen (Mat. 4:17). Jesus räd hia von daut Paradies oppe Ieed. Wuarom kjenn wie daut sajen?

2. Waut wiest, daut de Vebräakja, waut een Leetsennen haud, een Jud wia?

² De Vebräakja, waut een Leetsennen haud, wia woomäajlich een Jud. Doawäajen säd hee to dän aundren: “Ferchst du nich emol Gott? Wiels du best unja de selwje Vedaumnis” (Luk. 23:40). De Juden deenden eenen Gott, oba de Menschen von de Velkja jleewden aun väl Jetta (2. Mo. 20:2-3; 1. Kor. 8:5-6). Wan dise Vebräakja wieren von de aundre Velkja jewast, dan wudd disa dän aundren woomäajlich jefroacht haben: “Ferchst du nich emol de Jetta?” Un dan uk noch wia Jesus nich no de Velkja jeschekjt, oba no “de veloarne Schop en Israel” (Mat. 15:24). Gott haud de Israeliten daut weeten loten, daut hee de Doodes wudd oppwakjen. Dit wist de Vebräakja woomäajlich, un soo aus siene Wieed auntovestonen  jäwen, docht hee, daut Jehova Jesus wudd vom Doot oppwakjen toom en Gott sien Kjennichrikj rejieren. Daut schient soo, daut dis Maun de Hopninj haud, daut Gott am uk wudd vom Doot oppwakjen.

3. Aun waut docht de Vebräakja woomäajlich, aus Jesus von daut Paradies räd? Laj daut ut (1. Mose 2:15).

³ Aus een Jud wudd de Vebräakja, waut een Leetsennen haud, waut von Adam un Eva un daut Paradies jewist haben, wua Jehova dee nennjesat haud. De Vebräakja jleewd woomäajlich doaraun, daut daut Paradies, wua Jesus von räd, een wundaschmocka Goaden oppe Ieed sennen wudd (läs 1. Mose 2:15).

4. To waut saul ons daut brinjen, wan wie aun daut denkjen, waut Jesus to eenen von de Vebräakja säd?

⁴ Daut, waut Jesus to dän Vebräakja säd, saul ons bat doa brinjen, doaräwa notodenkjen, woo daut Läwen em Paradies sennen woat. Wie kjennen uk eenjet äwa daut Paradies lieren, wan wie aun dän Kjennich Salomo siene frädelje Rejierunk denkjen. De Bibel sajcht, daut Jesus de jratra Salomo es. Un dee woat met siene Metharscha toop de Ieed to een wundaschmocket Paradies moaken (Mat. 12:42). Doawäajen saul de “aundre Schop” daut uk wichtich sennen to weeten, waut see doonen kjennen toom fa emma em Paradies läwen (Joh. 10:16).

5. Waut denkjst du, woo woat daut Läwen em Paradies sennen?

⁵ Waut kjemt die em Kopp, wan du aun daut Läwen em Paradies denkjst? Veleicht stalst du die eene schmocke Städ väa, waut soo es aus de Goaden Eden (1. Mo. 2:7-9). Veleicht denkjst du aun de Profezeiunk en Micha, wua en Gott sien Volkj “jieda eena woat bie siene Wienrank setten, ooda unja sienen Fiejenboom” (Micha 4:3-4). Du denkjst veleicht uk aun de Bibelvarzhen, wua daut sajcht, daut doa woat jenuach to äten sennen (Psa. 72:16, NW; Jes. 65:21-22). Soo, nu stalst du die veleicht eenen schmocken Goaden väa, wua du aun eenen Desch voll scheenet Äten setst. Un du rikjst de reine Loft, waut no Plaunten un Bloomen rikjt. Un meist secha hieescht du uk daut Lachen von de Famielje un Frind, wua uk dee mank sent, waut vom Doot oppjestonen sent, un aula toop eene scheene Tiet haben. Aul daut es nich mea bloos een Droom. Wie kjennen ons secha sennen, daut aul dit oppe Ieed soo romkomen woat. Un wie woaren em Paradies uk eene feine Oabeit haben.

6. Waut woa wie em Paradies doonen? (See daut Bilt.)

⁶ Jehova haft ons soo jemoakt, daut wie Freid haben aun de Oabeit (Liera 2:24). En de dusent Joa, wan Jesus rejieren woat, woa wie besonda väl Oabeit haben. Dee, waut de groote Liedenstiet äwaläwen  woaren, un uk de Millionende, waut vom Doot oppstonen, woat daut aun Kjleeda, Äten un eene Städ toom wonen fälen. Aul daut to doonen woat ons scheen gonen un woat sea väl Oabeit sennen. Adam un Eva kunnen en dän Goaden schaufen un sikj dän to äa Tus moaken. Krakjt soo woa wie de gaunze Ieed to een Paradies moaken kjennen. Denkj mol han, woo scheen daut gonen woat, de Millionende, waut vom Doot oppstonen, un bloos een bät waut von Jehova un sien Väanämen weeten, to lieren. Un wie woaren uk aul de true Menschen, waut lang ver Jesus siene Tiet jeläft haben, kjennen mea lieren.

7. Äwa waut kjenn wie ons secha sennen, un wuarom?

⁷ Wie kjennen ons gaunz secha sennen, daut daut Läwen em Paradies woat frädlich sennen. Wie woaren aules haben, waut ons fält, un doa woat goode Ordnunk sennen. Wuarom? Wiels Jehova haft ons daut aul een bät jewäsen, woo daut Läwen unja sien Sän siene Harschoft sennen woat. Daut kjenn wie aun de Jeschicht von dän Kjennich Salomo siene Rejierunk seenen.

8. Woo erfeld sikj daut lota, waut de Kjennich David en Psalm 37:10-11, 29 oppjeschräwen haud? (See “Waut Läsa weeten wellen” en disen Woaktorm.)

⁸ De Kjennich David schreef opp, woo daut Läwen sennen wudd, wan doa een weisa, trua Kjennich wudd rejieren (läs Psalm 37:10-11, 29). Wie läsen foaken Psalm 37:11, wan wie met aundre äwa daut komende Paradies räden. Wie haben uk goode Uasoak, daut to doonen, wiels Jesus räd von disen Varsch en siene Räd oppem Boajch un jeef auntovestonen, daut sikj daut lota erfellen wudd (Mat. 5:5). Oba daut, waut David schreef, wees uk, woo daut Läwen en dee Tiet sennen wudd, wan de Kjennich Salomo rejieren wudd. Aus de Kjennich Salomo äwa Israel rejieed, wieren Gott siene Deena en een Launt, “waut von Malkj un Honnich äwarant” un hauden werkjlich Fräd un een goodet Wiedakomen. Gott haud jesajcht: “Wan jie junt no miene Aunwiesungen rechten … woaren, [woa] ekj … doano kjikjen,  daut en jun Launt Fräd es. Wan jie schlopen gonen, bruck jie junt nich ferchten” (3. Mo. 20:24; 26:3, 6). Dit kjeem krakjt soo rom en dee Tiet, aus Salomo rejieed (1. Chr. 22:9; 29:26-28). Jehova haud vesproaken, daut aul de schlajchte Menschen, waut aundre Jetta deenen, “nich mea sennen” wudden (Psa. 37:10). Krakjt soo aus Psalm 37:10-11, 29 sikj don erfeld, woat sikj daut lota uk erfellen.

9. Waut säd de Kjennijin von Saba äwa dän Kjennich Salomo siene Rejierunk?

⁹ De Kjennijin von Saba hieed von dän Fräd un daut Wiedakomen un de Sechaheit en daut Launt Israel, aus Salomo rejieren deed. See kjeem von wiet auf no Jerusalem, om sikj de Loag selfst to unjastonen (1. Kjen. 10:1). Nodäm see Salomo sien Kjennichrikj jeseenen haud, säd see: “Mie wia nich emol de halft jesajcht. . . . Woo jlekjlich sent diene Menschen un diene Deena, dee emma ver die stonen un diene Weisheit hieren” (1. Kjen. 10:6-8). Oba de Rejierunk von Salomo wia bloos een Biespel fa daut, waut Jehova sikj fa de Menschen väajenomen haft, wan sien Sän Jesus äwa dee harschen woat.

10. En waut fa Stekjen es Jesus hecha aus Salomo?

¹⁰ Jesus es en aule Stekjen hecha aus Salomo. Salomo wia onvolkomen un muak groote Fäla, un daut brocht met de Tiet väl Schoden opp Gott sien Volkj. Oba Jesus es een volkomna Harscha, waut kjeene Fäla moakt (Luk. 1:32; Heb. 4:14-15). Jesus bewees, daut hee tru bleef, wan de Soton am uk grulich sea aufproowd. Christus haft bewäsen, daut hee kjeenmol sindjen woat ooda irjentwaut doonen woat, waut Schoden opp Gott sien Volkj brinjen kaun. Daut es eene groote Iea, daut wie am aus Kjennich haben kjennen.

11. Wäa woat Jesus en siene Harschoft halpen?

¹¹ Jesus woat 144 000 Metharscha haben, waut am halpen woaren, fa de Menschen to sorjen un Jehova sien Väanämen fa de Ieed to erfellen (Opb. 14:1-3). Dee haben väl schwoaret beläft, aus dee oppe Ieed wieren un doawäajen vestonen dee krakjt, woo daut fa deejanje es, waut oppe Ieed läwen. Waut krakjt woaren dise Metharscha doonen?

12. Waut fa Oabeit woat Jehova de 144 000 jäwen?

¹² Jesus un siene Metharscha haben väl mea to doonen, aus de Kjennich Salomo haud. De Kjennich Salomo kjemmad sikj om millionende Menschen bloos en een Launt. Oba dee, waut en Gott sien Kjennichrikj harschen woaren, woaren sikj om dusende Millionen Menschen kjemren äwa de gaunze Welt. Jehova jeft dise 144 000 eene besondre Iea!

13. Waut vonne besondre Oppgow woaren Jesus siene Metharscha haben?

¹³ De 144 000 woaren aus Kjennichs un Priestasch deenen krakjt soo aus Jesus (Opb. 5:10). Aus daut Jesaz Moses noch jeltich wia, hauden de Priestasch de jratste Veauntwuatunk, sikj om de Menschen äare Jesuntheit to kjemren un daut dee dicht bie Jehova bleewen. Daut Jesaz Moses wia “een Schauten von de goode komende Sachen”. Doawäajen weet wie, daut Jesus un siene Metharscha Gott siene Deena halpen woaren, daut dee jesunt un dicht bie Jehova bliewen (Heb. 10:1). Wie weeten nich, woo dise Kjennichs un Priestasch met deejanje, waut oppe Ieed unja dit Kjennichrikj läwen, sikj unjahoolen woaren. Oba wautemma Jehova enrecht, wie kjennen ons doa gaunz opp veloten, daut deejanje, waut oppe Ieed em Paradies läwen woaren, woaren gaunz kloare Aunwiesungen kjrieen (Opb. 21:3-4).

14. Woo es daut tweschen de “aundre Schop” un de “kjliene Häad”?

¹⁴ Jesus nand dee, waut met am toop harschen woaren, de “kjliene Häad” (Luk. 12:32). Hee räd uk von eene aundre Häad, waut hee de “aundre Schop” nand. Dise twee Gruppen sent eene veeende Häad (Joh. 10:16). Dise beid Gruppen schaufen nu aul toop un woaren daut wieda doonen en dee Tiet, wua de Ieed to een Paradies woat. Soo aus wie weeten, woaren dee von de “kjliene Häad” dan aul aula em Himmel sennen, un de “aundre Schop” woaren de scheene Hopninj haben, fa emma oppe Ieed to läwen. Oba doa es waut, waut de “aundre Schop” nu aul doonen motten, daut dee woaren fa emma em Paradies läwen kjennen.

15. (a) Woo schaufen de “aundre Schop” met Christus siene Breeda toop? (b) Woo kjenn wie dän Brooda nodoonen, waut doa em Opptieekj es? (See daut Bilt.)

¹⁵ De Vebräakja, waut een Leetsennen haud, storf, ea hee de Jeläajenheit haud, Christus to wiesen, daut hee dankboa wia fa daut, waut Christus fa am jedonen haud. Wie aus Jesus siene “aundre Schop” haben nu väl Jeläajenheiten to wiesen, woo wie äwa Jesus denkjen. Doano, woo wie siene jeistjesaulwde Breeda behaundlen, wies wie, woo sea wie Jesus leewen, un krakjt doano woat hee de Schop uk rechten (Mat. 25:31-40). Wie kjennen Christus siene Breeda unjastetten, wan wie soo goot aus mäajlich bie daut Prädichtwoakj methalpen un Jinja moaken (Mat. 28:18-20). Doawäajen well wie daut Jereetschoft, waut dee ons jäwen toom de Bibel studieren, soo goot aus mäajlich brucken, soo aus daut Buak Een scheenet Läwen fa emma!. Wan du nu nich met wäm de Bibel studieescht, wuarom nemst die dan nich väa, soo väl Menschen aus mäajlich een Bibelstudium auntobeeden?

16. Waut kjenn wie nu aul doonen, om ons reedtomoaken toom em Paradies läwen?

¹⁶ Wie brucken nich wachten, bat wie em Paradies läwen toom soone Sort Menschen woaren, aus Jehova em Paradies well. Wie kjennen nu aul doaraun schaufen, daut wie en ons Räden un en onse Woakjen opprechtich  sent. Wie kjennen Jehova, onsen Ehepoatna un onse Gloowesbreeda tru sennen. Wan wie Gott en dise schlajchte Welt aul jehuarsom sent, dan woat ons daut leichta sennen, wan wie ieescht em Paradies läwen. Wie kjennen ons uk Sachen lieren un aun onse Ieejenschoften schaufen, om to wiesen, daut wie ons reedmoaken toom lota em Paradies läwen. See dän Artikjel “Best du reed toom ‘de Ieed oawen?’” en disen Woaktorm.

17. Sell wie ons noch lang schlajcht feelen äwa de Sinden, waut wie ea jedonen haben? Laj daut ut.

¹⁷ Wie sellen uk proowen, onse Schultjefeelen loos to woaren von groote Sinden, waut wie veleicht ea jedonen haben. Secha woa wie daut Leesjelt nich utnutzen toom “mootwellens wieda sindjen” (Heb. 10:26-31). Oba wan ons onse Sinden werkjlich leet sent un wie bie Jehova no Help jesocht haben un onse Enstalunk jeendat haben, dan kjenn wie ons secha sennen, daut onse Sinden aul lang vejäft sent (Jes. 55:7; Apj. 3:19). Denkj aun Jesus siene Wieed, waut hee to de Farisäa säd: “Ekj sie nich jekomen de jerajchte entoloden oba de Sinda” (Mat. 9:13). Daut Leesjelt es stoakj jenuach toom aul onse Sinden vejäwen.

18. Äwa waut wurscht du jleichen met dän Vebräakja to räden, waut biesied Jesus storf?

¹⁸ Kaust du die daut väastalen, woo du em Paradies met dän Vebräakja vetalen woascht, waut met Jesus räd? Jie woaren beid secha sajen, daut jie sea dankboa sent fa Jesus sien Opfa. Du woascht dän veleicht froagen, aus hee die mea doavon vetalen well, woo daut en de latste Stunden wia, aus Jesus oppe Ieed läwd. Veleicht frajchst du dän uk, woo hee sikj feeld, daut Jesus am daut vespruak, wua hee no fruach. Veleicht es daut uk omjedreit un dee frajcht die, woo daut wia, en de latste Tiet en dän Soton siene Welt to läwen. Daut woat eene sea groote Iea sennen, met soonen Mensch de Bibel to studieren! (Efs. 4:22-24).

19. Wuarom woat ons daut Läwen em Paradies kjeenmol enoolent woaren? (See daut Bilt oppe väaschte Sied.)

¹⁹ Ons woat daut Läwen em Paradies nich enoolent woaren. Wie woaren eene goode Oabeit haben un emma wada veschiedne Menschen trafen. Daut baste von aules es, daut wie onsen himlischen Voda jieda Dach woaren emma bäta kjanen lieren un ons daut scheen gonen loten met daut, waut hee ons jejäft haft. Daut woat emma mea jäwen, äwa am to lieren un wie woaren uk sea väl äwa siene Schepfunk lieren kjennen. Je lenja wie läwen, je jrata woat onse Leew woaren fa Gott. Wie sent Jehova un Jesus sea dankboa fa daut Vespräakjen, waut dee ons jejäft haben, fa emma em Paradies to läwen!