1. Woo beauntwuat Jehova foaken siene Deena äare Jebäda?

 HAST du daut jewist, daut Jehova die brucken kaun toom wäm sien iernstet Jebäd beauntwuaten? Du kaust halpen, endoont aus du een Eltesta, een Deenstaumthelpa, een Pionia ooda een Vekjindja best. Du kaust daut uk doonen, aus du nu junk ooda oolt best ooda aus du een Brooda ooda eene Sesta best. Wan irjentwäa, waut Jehova leeft, am no Help frajcht, dan brukt hee foaken eenen Eltesten ooda eenen aundren truen Deena, om fa dänjanjen een Troost to sennen (Kol. 4:11). Daut es eene Iea fa ons, Jehova un onse Breeda opp soone Wajch to deenen. Wie kjennen onse Breeda uthalpen un treesten, wan doa eene Krankheit utbrakjt, een Owwada ooda Vefoljunk es.

2. Wuarom kaun daut schwoa sennen, aundre to halpen, wan eene Krankheit utbrakjt?

² Eene wiet vespreede Krankheit kaun ons daut schwoa moaken, aundre to halpen. Veleicht well wie dan no onse Frind wanken, oba wäajen de Krankheit es daut nich secha. Wie wellen veleicht wäm hankroagen fa eene Moltiet, waut daut knaup jeit, oba daut es uk nich mäajlich. Wie wellen veleicht aundre halpen, oba daut es schwierich, wan von onse Famielje uk wäa lieden mott. Oba wie wellen doawäajen onse Breeda halpen, un Jehova jefelt daut, wan wie fa dee daut doonen, waut wie kjennen (Spr. 3:27; 19:17). Waut kjenn wie doonen?

3. Waut lia wie von de Eltestasch äa Biespel en Desi äare Vesaumlunk? (Jeremia 23:4).

³ Waut Eltestasch doonen kjennen. Wan du een Eltesta best, dan lia de Breeda goot kjanen (läs Jeremia 23:4, NW b). Desi, eene Sesta, wua wie en dän väajen Artikjel aul von  räden, sajcht: “De Eltestasch en miene Deenstgrupp wieren ea aul foaken met mie un aundre Breeda em Deenst un uk sestwanea toop.” c Dit muak daut leichta fa de Eltestasch, Desi to halpen, nodäm de COVID-19-Krankheit utbruak un eenje von äare Famielje wäajen dän Virus storwen.

4. Woosoo kunnen de Eltestasch Desi halpen, un waut lia wie doavon?

⁴ Desi sajcht: “Wäajen ekj de Eltestasch aul kjand un daut miene Frind wieren, wia mie daut leichta, dee to vetalen, woo mie daut jinkj un äwa waut ekj mie Sorjen muak.” Waut es de Lia fa de Eltestasch? Moakt Hoadbesuchs bie dee, wua jie äwa aunjestalt sent, ea doa waut schlemmet passieet. Siet Frind met dee. Wan doa eene Krankheit utbrakjt un jie nich kjennen perseenlich no dee wanken, dan rät aundasch met dee. Desi sajcht: “Eenjemol fonden ooda schreewen mie mea aus een Eltesta dän Dach. Un de Bibelvarzhen, waut dee mie schekjten, jinjen mie sea to Hoaten, wan ekj dee uk aul goot kjand.”

5. Woo kjennen de Eltestasch enwoaren, waut de Breeda un Sestren fält un dee dan halpen?

⁵ Eene Wajch, woo du daut enwoaren kaust, waut diene Breeda un Sestren fält, es, wan du dee leeftolich Froagen stalst (Spr. 20:5). Haben dee jenuach Äten, Medizien ooda aundre Sachen? Es doa eene Jefoa, daut dee äare Oabeit ooda äa Hus velieren kunnen? Fält dee met waut to halpen, bie de Rejierunk Help to kjrieen? Desi kjrieech em tieteljen von äare Gloowesbreeda Help. Oba waut ar daut mieeschte holp, wia, daut de Eltestasch ar em jeisteljen unjastetten un Moot toospruaken. Daut holp ar besonda, derch äare Schwierichkjeiten to komen. See sajcht: “De Eltestasch bäden met mie toop. Wan ekj uk nich mea krakjt weet, waut dee säden, weet ekj oba noch krakjt, woo ekj mie feeld. Daut wia soo, aus wan Jehova to mie säd: ‘Du best nich auleen!’” (Jes. 41:10, 13).

6. Waut kjennen väle enne Vesaumlunk doonen toom aundre halpen? (See daut Bilt.)

⁶ Waut aundre doonen kjennen. Wie veloten ons doaropp, daut de Eltestasch woaren fa de Breeda un Sestren en de Vesaumlunk sorjen. Oba Jehova well haben, daut wie aula sellen aundre halpen un Moot toospräakjen (Gal. 6:10). Mau rajcht wan wie uk bloos waut kjlienet doonen fa wäm, waut krank es, kaun dee daut väl Moot jäwen. Een Kjint  kaun eene Koat schriewen ooda waut molen toom eenen Brooda Moot toospräakjen. Een Jugentlicha kaun veleicht eene Sesta halpen, waut to bestrieden ooda fa dee entokjeepen. Aundre enne Vesaumlunk kjennen veleicht wäm, waut krank es, eene Moltiet brinjen. Daut es kloa, wan daut eene wiet vespreede Krankheit jeft, dan fält aulem enne Vesaumlunk daut aun Moot. Veleicht kjenn wie no de Toopkomes een bät lenja bliewen un met onse Breeda un Sestren spazieren, endoont aus daut perseenlich es ooda äwa Video. De Eltestasch fält daut uk aun Moot. Eenje Breeda un Sestren haben de Eltestasch eene kjliene Koat jeschräwen toom an dankscheen sajen, wiels dee en de Tiet von eene wiet vespreede Krankheit väl drocka sent aus jeweenlich. Daut es sea fein, wan aule äa Poat doonen un daut nokomen, soo aus de daut Schreft sajcht: “Moakt junt unjarenaunda Moot un but junt unjarenaunda opp”! (1. Tess. 5:11).

7. Waut kaun schwoa sennen no een Owwada?

⁷ Wan een Owwada kjemt, kaun daut eenem sien Läwen en eenen Uagenblekj gaunz dral dreien. Eenje Menschen haben äa Hab un Goot, äa Tus ooda mau rajcht äare leewe Aunjehieeje veloaren. Soone schlemme Sachen kjennen uk onse Gloowesbreeda trafen. Waut kjenn wie doonen toom dee halpen?

8. Waut kjennen de Eltestasch un daut Famieljenhaupt doonen, ea een Owwada kjemt?

⁸ Waut Eltestasch doonen kjennen. Eltestasch, moakt june Breeda un Sestren reed, ea een Owwada kjemt. Seet doano, daut aule enne Vesaumlunk weeten, waut see doonen motten toom secha bliewen un uk woo see de Eltestasch fuaz weeten loten kjennen. Margaret, von dee wie aul en dän väajen Artikjel räden, sajcht: “Onse Eltestasch woarnden ons opp eene Sauz en daut Poat “Needjet fa de Vesaumlunk” un säden, daut de Tiet noch nich äwa wia, wua daut grootet Wooltfia jäwen kunn. Dee säden, daut wan de Rejierunk sajcht, daut wie motten ons Hus veloten ooda wan daut jefäadlich woat, dan must wie fuaz veloten.” De Breeda jeewen de Aunwiesungen krakjt to rajchte Tiet, wiels fief Wäakj lota kjeem doa een grootet Fia. Een Famieljenhaupt kaun em Famieljenstudium derchgonen, waut jieda eena von de Famielje en soone Loag doonen saul. Wan jie un june Kjinja reed sent, dan woa jie ruja bliewen, wan doa een Owwada kjemt.

9. Woo kjennen de Eltestasch aules plonen, ver un no een Owwada?

⁹ Wan du een Gruppenoppsechta best, dan see doano, daut du de Vekjindja von diene Deenstgrupp äare rajchte Fonnummasch un Adrassen hast, ea een Owwada kjemt. Moak eene List un see doano, daut dee emma oppjefrescht es. Soo woascht du kjennen om aule Vekjindja omweeten un seenen, waut dee fält, wan een Owwada kjemt. Wan du daut dan ieescht weetst, dan lot dän Plona von de Eltestasch daut weeten, un dee woat dan dän Kjreisoppsechta daut malden. Daut baste kjennen dise Breeda halpen, wan dee toopschaufen. No daut Fia haud Margaret äa Kjreisoppsechta 36 Stund nich jeschlopen, wäajen hee aul de Oabeit von de Eltestasch plonen deed. Dee proowden, om de 450 Breeda un Sestren omtoweeten un to halpen, waut hauden must äa Hus veloten (2. Kor. 11:27). Soo kunnen see fa aulem fa een Veblief sorjen, waut daut fäld.

10. Wuarom seenen de Eltestasch daut fa sea needich, sikj om de Breeda to kjemren? (Johanes 21:15).

¹⁰ De Eltestasch haben de Veauntwuatunk, de Breeda un Sestren ut de Schreft Moot tootospräakjen un soone to halpen, waut schwoaret derchmoaken (1. Pet. 5:2). Wan  doa een Owwada passieet, sellen de Eltestasch daut ieeschte doano seenen, daut jieda Brooda un Sesta secha es un daut dee Äten, Kjleedie un een Veblief haft. Oba daut kaun sennen, daut soone Breeda daut noch Moonaten lota em jeisteljen un uk äwajens aun Moot fält (läs Johanes 21:15). “Daut brukt Tiet, sikj to veholen”, sajcht Harold, waut en een Betelkommitee deent un waut aul väl soone Breeda un Sestren kjant, waut von een Owwada betroffen wieren. Hee sajcht: “Dee äa Läwen woat met de Tiet wada dolla normal, oba de Jedanken, daut doabie wäa jestorwen es un daut see äare wieetvolle Sachen veloaren haben ooda daut see en sea jefäadelje Omstend wieren, kjennen noch lang bliewen. Derch soone Jedanken kjennen dee veleicht wada gaunz truarich woaren. Daut meent nich, daut dee nich Gloowen haben. Daut es gaunz normal, daut een Mensch sikj soo feelt.”

11. Waut es daut fa Help, waut de Famieljes emma wada fält?

¹¹ Eltestasch komen dän Rot no, waut sajcht: “Hielt met dee met, dee doa hielen” (Reem. 12:15). Dee, waut von een Owwada betroffen sent, fält daut to hieren, daut Jehova un de Gloowesbreeda an leewen. De Eltestasch woaren de Famieljes wieda halpen, sikj aun jeistelje Jewanheiten to hoolen, soo aus bäden, studieren, no de Toopkomes wanken un prädjen. De Eltestasch kjennen de Elren uk Moot toospräakjen, äare Kjinja to halpen, soone Sachen em Uag to hoolen, waut kjeen Owwada venichten kaun. Elren, halpt june Kjinja denkjen, daut Jehova emma woat äa Frint sennen un an emma halpen woat. Lajcht dee uk ut, daut dee emma woaren eene Famielje von Breeda un Sestren oppe gaunze Welt haben, waut reed es, an to halpen (1. Pet. 2:17).

12. Waut kjennen aundre doonen toom em Nootfaul uthalpen? (See daut Bilt.)

¹² Waut aundre doonen kjennen. Wan een Owwada dicht bie junt passieet, dan froag de Eltestasch, woo du halpen kaust. Veleicht kaust du soone, waut äa Hus veloten musten ooda soone, waut jekomen sent toom em Nootfaul uthalpen, loten bie junt bliewen. Veleicht kaust du uk Äten ooda aundre Sachen no dee Vekjindja brinjen, waut daut fält. Wan een Owwada wieda auf passieet, kaust du doawäajen noch halpen. Woo? Wan du fa dee bätst, waut doavon betroffen sent (2. Kor. 1:8-11). Veleicht kaust du daut Woakj toom em Nootfaul uthalpen met Jelt unjastetten, wan du Gowen jefst fa daut Woakj oppe gaunze Welt (2. Kor.  8:2-5). Wan daut fa die mäajlich es, no soone Städen to reisen, waut betroffen sent, toom doa halpen, dan froag de Eltestasch, waut du doonen kaust. Wan se die enloden, doa mettohalpen, dan woaren se die secha en eenje Stekjen utlieren. Soo kaust du daut baste halpen, wan daut fält.

13. Waut vonne Schwierichkjeiten haben onse Breeda un Sestren en soone Lenda, wua ons Woakj veboden es?

¹³ En soone Lenda, wua ons Woakj veboden es, es daut Läwen bloos noch schwanda. De Breeda en dee Lenda haben uk Trubbels met daut Jelt, woaren krank un doa stoaft uk eenjemol wäa, wäm see väl räakjnen. Un wäajen ons Woakj doa veboden es, kjennen de Eltestasch doa nich frie no dee Breeda wanken, waut daut aun Moot fält, un met dee räden. Soo wia daut bie Andrei, von dän wie en dän väajen Artikjel aul räden. En siene Deenstgrupp haud eene Sesta Trubbels met daut Jelt. Dan veojjlekjt see noch met een Foatich. See must sikj miere Mol opperieren loten un kunn nich schaufen. Wan ons Woakj doa uk veboden wia un doa de wiet vespreede Krankheit wia, sach Jehova oba äare schwieeje Loag un brocht de Gloowesbreeda bat doa, ar to halpen.

14. Woo kjennen de Eltestasch een Biespel sennen, wan daut doarom jeit, sikj opp Jehova to veloten?

¹⁴ Waut Eltestasch doonen kjennen. Andrei bäd un hee deed aules fa de Sesta, waut hee kunn. Woo beauntwuat Jehova siene Jebäda? Hee sorjd fa Breeda un Sestren, waut mea doonen kunnen. Eenje neemen de Sesta met, wan see nom Dokta must, aundre holpen ar met Jelt, un Jehova säajend daut, waut aule Breeda un Sestren von de Vesaumlunk toop deeden (Heb. 13:16). Eltestasch, wan daut Woakj nich en aule Stekjen frie es, dan äwajäft uk aundre Breeda jewesse Oabeit (Jer. 36:5-6). Daut wichtichste es, sikj opp Jehova to veloten. Hee kaun junt halpen, fa aules to sorjen, waut onse Breeda un Sestren fält.

15. Woo kjenn wie met onse Breeda veeent bliewen, wan doa Vefoljunk es?

¹⁵ Waut aundre doonen kjennen. Wan ons Woakj veboden es, dan kjenn wie veleicht bloos met eene kjliene Grupp Breeda un Sestren toopkomen. Doawäajen es daut nu wichtja aus jeemols ea, daut wie unjarenaunda Fräd haben. Kjamft jäajen dän Soton, nich eena jäajen dän aundren. Äwaseet  de Breeda äare Fäla un prooft, de Trubbels unja junt bosich to fiksen (Spr. 19:11; Efs. 4:26). Siet reed, aundre to halpen (Tit. 3:14). Daut de Breeda reed wieren, eene Sesta to halpen, kjeem de gaunze Deenstgrupp togood. Dee wieren doaderch veeenda, soo aus eene Famielje (Psa. 133:1).

16. No Kolossa 4:3, 18 no, woo kjenn wie onse Breeda un Sestren halpen, waut Vefoljunk haben?

¹⁶ Tieendusende von onse Breeda un Sestren deenen Jehova, wan dee wäajen de Rejierungen uk nich en aule Stekjen Frieheit haben. Eenje von dise sent wäajen äaren Gloowen enjestopt. Wie kjennen fa dee un dee äare Famieljes bäden. Wie kjennen uk fa dee bäden, waut Moot wiesen un dee Breeda unjastetten, waut enjestopt sent, wan see doaderch uk kunnen äare ieejne Frieheit velieren (läs Kolossa 4:3, 18). d Dee spräakjen dise Breeda em jeisteljen Moot too, unjastetten dee met aundre Sachen un stonen fa dee em Jerecht en. Vejät kjeenmol, daut diene Jebäda diene Breeda un Sestren halpen kjennen (2. Tess. 3:1-2; 1. Tim. 2:1-2).

17. Woo kjenn jie junt nu aul fa Vefoljunk reedmoaken?

¹⁷ Jie aus Famielje kjennen nu aul reedmoaken fa Vefoljunk (Apj. 14:22). Prooft junt nich aul daut schlajchte väatostalen, waut passieren kunn. Enne Städ daut, woat jratre Frind met Jehova un halpt june Kjinja, daut uk to woaren. Wan jie eenjemol Angst kjrieen ooda Sorjen haben, dan schett junt bie Gott ut (Psa. 62:8-9). Rät aus Famielje äwa aul de Jrind, wuarom jie opp am vetruen kjennen. e Krakjt soo aus june Kjinja daut halpt, wan jie junt ver een Owwada reedmoaken, woat dee daut uk halpen, wan jie junt ver eene Vefoljunk reedmoaken. Dee woaren dan Moot haben un ruich bliewen, wiels jie dee jelieet haben, opp Jehova to vetruen.

18. Opp waut kjenn wie hopen?

¹⁸ Wan wie Gott sienen Fräd haben, dan feel wie ons secha (Filip. 4:6-7). Derch disen Fräd beruicht Jehova ons, wan daut uk Krankheiten, Owwadasch un Vefoljunk jeft. Hee brukt de Eltestasch, waut väl doonen toom fa ons sorjen. Hee jeft ons uk aula de Jeläajenheit, ons unjarenaunda to halpen. En de frädelje Tiet, waut wie nu haben, kjenn wie ons reedmoaken fa jratre Schwierichkjeiten, waut noch komen woaren, mau rajcht fa de “groote Liedenstiet” (Mat. 24:21, NW). En dee Tiet woat daut needich sennen, daut wie onsen Fräd hoolen un aundre uk halpen, dän to hoolen. Oba no daut woa wie nich mea schlemmet beläwen, waut ons Angst un Sorjen moakt. To goodalatst woa wie dan daut beläwen, waut Jehova aul emma fa ons wull – werkjeljen Fräd, waut fa emma bliewen woat (Jes. 26:3-4).