1. Waut deit daut aun die, wan du doaräwa nodenkjst, daut Jehova die well eewjet Läwen jäwen?

 JEHOVA vesprakjt aul dee, waut am jehorchen, “daut eewje Läwen” (Reem. 6:23). Wan wie doaräwa nodenkjen, daut Jehova ons daut eewje Läwen jäwen well, dan woat onse Leew fa am bloos noch jrata. Denkj mol äwa no: Ons himlischa Voda leeft ons soo sea, daut hee ons daut eewje Läwen aunbeeden deit, daut wie emma kjennen met am toop sennen.

2. Woo halpt ons onse Hopninj nu aul?

² Wie kjennen nu aul met onse Trubbels bäta foadich woaren, wäajen wie de Hopninj haben, eewich to läwen. Mau rajcht wan onse Jäajna sajen, daut see ons woaren dootmoaken, woa wie oba nich opphieren, Jehova to deenen. Wuarom nich? Eent es, wäajen wie weeten, daut Jehova ons wada vom Doot oppwakjen woat, wan wie tru stoawen. Dan woa wie uk de Hopninj haben, kjeenmol mea to stoawen (Joh. 5:28-29; 1. Kor. 15:55-58; Heb. 2:15). Wuarom kjenn wie ons secha sennen, daut daut fa ons mäajlich es, eewich to läwen? Well wie ons daut mol unjastonen.

3. Wuarom kjenn wie ons secha sennen, daut Jehova ons kaun fa emma aum Läwen hoolen? (Psalm 102:13, 25, 28).

³ Wie weeten, daut Jehova emstaunt es, ons fa emma aum Läwen to hoolen, wäajen von am aulet Läwen kjemt un hee selfst läft fa emma (Psa. 36:10). See wie mol een poa Bibelvarzhen, waut wiesen, daut Jehova aul fa emma jeläft haft un fa emma läwen woat. Psalm 90:2 sajcht, daut Jehova von “aule Eewichkjeit” es. Un Psalm 102 sajcht sea soowaut (läs Psalm 102:13, 25, 28). Aus de Profeet Habakuk von onsen himlischen Voda schreef, fruach hee: “Best du nich von Eewichkjeit häa, oo Jehova? Oo mien Gott, mien Heilja, du stoafst nich” (Hab. 1:12, NW).

4. Wuarom sell wie ons daut nich schwoa moaken, wan wie daut uk nich bejriepen kjennen, daut daut Jehova aul emma jeef?

 ⁴ Es daut fa die schwoa to vestonen, daut daut Jehova aul fa emma jeef? (Jes. 40:28). Bie väle es daut soo. Mau rajcht Elihu säd von Gott: “Daut es nich to vestonen woo lang hee läft” (Hiob 36:26). Oba bloos wäajen wie daut nich vestonen kjennen, meent daut nich, daut daut nich soo es. Biejlikj vesto wie veleicht uk nich krakjt, woo daut met daut Licht schauft, oba daut meent doawäajen nich, daut et daut Licht nich jeft! Krakjt soo kjenn wie uk nich gaunz vestonen, woo daut doamet es, daut daut Jehova aul emma jejäft haft un emma jäwen woat. Oba daut meent nich, daut Jehova nich fa emma es. Bie am henjt daut nich doavon auf, waut wie vestonen kjennen un waut nich (Reem. 11:33-36). Am jeef daut aul ea, ea doa irjentwaut jemoakt wia, soogoa ea daut de Sonn un de Stierns jeef. Hee wia aul doa, ea hee “dän Himmel [utspreed]”. Wie weeten, daut Jehova “de Ieed jemoakt [haft], met siene Krauft” (Jer. 51:15; Apj. 17:24). Waut es doa noch, daut wie ons kjennen secha sennen, daut daut mäajlich es, daut wie kjennen fa emma läwen?

5. Waut vonne Hopninj hauden de ieeschte Menschen?

⁵ Jehova haft aules soo jemoakt, daut daut bloos fa eene jewesse Tiet läft. Hee haft bloos de Menschen soo jemoakt, daut dee de Mäajlichkjeit haben, eewich to läwen. Jehova jeef Adam eene Woarnunk un säd: “Von däm Boom, dee daut Vestentnis jäwen kaun, waut goot un schlajcht es, von däm saust du nich äten, wiels daut woat onbedinjt dienen Doot brinjen” (1. Mo. 2:17). Wan Adam un Eva Jehova wieren jehuarsom jewast, wudden dee kjeenmol haben durf stoawen. Daut es goot mäajlich, daut Jehova daut wudd haben toojeloten, daut dee lota “von däm Boom, dee Läwen jeft”, äten kunnen. Dit wudd an de Sechaheit jejäft haben, daut see wudden haben kunt “opp emma läwen” (1. Mo. 3:22). b

6-7. (a) Wuarom kjenn wie sajen, daut de Menschen fa daut eewje Läwen jemoakt sent? (b) Waut wurscht du die em Paradies jleichen to lieren? (See de Bilda.)

⁶ Daut es toom bewundren, daut de Forscha sajen, daut wie en ons Vestaunt väl mea oppnämen kjennen, aus waut wie en eene Läwestiet beläwen. Aune 2010 säd eene Tietschreft, daut en ons Vestaunt  ojjefäa soo väl Rum es, daut doa een Video wudd nennkjennen von dree Millionen Stund. Dit Video to kjikjen wudd äwa 300 Joa dieren. Daut es goot mäajlich, daut ons Vestaunt noch väl mea oppnämen kaun. Oba dit wiest een bät, woo Jehova ons Vestaunt jemoakt haft un daut daut wudd väl mea oppnämen kjennen, aus waut wie en 70 ooda 80 Joa beläwen (Psa. 90:10).

⁷ Jehova haft ons soo jemoakt, daut wie jieren wellen aum Läwen bliewen. De Bibel sajcht äwa de Menschen, daut Gott an “de Eewichkjeit en äa Hoat jelajcht” haft (Liera 3:11, NW). Daut es eent, wuarom de Doot fa ons soo es aus een Fient (1. Kor. 15:26). Wan wie sea krank woaren, dan foa wie jeweenlich nom Dokta un nämen uk Medizien en. Wie setten nich eefach bloos tus un luaren, daut wie stoawen. Wie doonen aules, waut wie kjennen, daut wie aum Läwen bliewen! Woo feel wie ons doaräwa, wan doa wäa stoaft, dän wie sea väl jeräakjent haben? Wie sent sea truarich, endoont aus dee oolt ooda junk wia (Joh. 11:32-33). Ons leeftolja Schepfa haft ons soo jemoakt, daut wie eewich wiedalieren kjennen un dän Wensch haben, fa emma to läwen – un hee woat daut uk mäajlich moaken. Oba daut jeft noch mea, wuarom wie daut jleewen kjennen. Well wie mol seenen, waut Jehova ea aul jedonen haft un nu noch deit, waut bewiest, daut hee siene Meenunk noch kjeenmol jeendat haft.

8. Waut lieet Jesaja 55:11 ons doaräwa, waut Jehova sikj fa ons väajenomen haft?

⁸ Wäajen Adam un Eva jesindicht haben, brochten see dän Doot äwa äare Kjinja.  Oba Jehova haft siene Meenunk nich jeendat (läs Jesaja 55:11). Sien Väanämen es noch emma, daut true Menschen fa emma läwen sellen. Daut weet wie, wäajen aul daut, waut hee säd un deed, om sien Väanämen derchtofieren.

9. Waut haft Gott vesproaken? (Daniel 12:2, 13).

⁹ Jehova haft vesproaken, daut hee de Doodes woat oppwakjen un dee de Mäajlichkjeit jäwen, fa emma to läwen (Apj. 24:15; Tit. 1:1-2). Hiob wia sikj secha, daut Jehova de Doodes oppwakjen wull (Hiob 14:14-15). De Profeet Daniel wist, daut de Menschen kjennen vom Doot oppjewakjt woaren un de Jeläajenheit kjrieen, fa emma to läwen (Psa. 37:29; läs Daniel 12:2, 13). De Juden en Jesus siene Tiet wisten daut uk, daut Jehova siene true Deena “daut eewje Läwen” jäwen kunn (Luk. 10:25; 18:18). Jesus räd emma wada von dit Vespräakjen, un hee selfst wort von sienen Voda vom Doot oppjewakjt (Mat. 19:29; 22:31-32; Luk. 18:30; Joh. 11:25).

10. Waut bewiest daut, daut doa ieeschtemma aul Menschen vom Doot oppjewakjt worden? (See daut Bilt.)

¹⁰ Jehova es dee, von dän aul daut Läwen kjemt, un doawäajen haft hee de Macht, de Menschen wada toom Läwen to brinjen. Hee jeef uk dän Profeet Elia de Macht, de Wätfru von Zarpat äaren Sän vom Doot opptowakjen (1. Kjen. 17:21-23). Lota kunn de Profeet Elisa met Gott siene Help dän Sän von de Fru von Schunem oppwakjen (2. Kjen. 4:18-20, 34-37). Dit bewiest, daut Jehova de Macht haft, Menschen wada toom Läwen to brinjen. Aus Jesus oppe Ieed wia, wees hee, daut sien Voda am de Macht jejäft haud, Doodes opptowakjen (Joh. 11:23-25, 43-44). Nu es Jesus em Himmel un am wort “aule Jewault … em Himmel uk oppe Ieed” jejäft. Doaderch kaun hee dit Vespräakjen erfellen, “daut aul dee, dee en de Jräwa ligjen” vom Doot oppstonen woaren un de Jeläajenheit kjrieen, fa emma to läwen (Mat. 28:18; Joh. 5:25-29).

11. Woo muak daut Leesjelt daut mäajlich, daut wie fa emma läwen kjennen?

¹¹ Wuarom leet Jehova too, daut sien Sän soo grausom stoawen must? Daut säd Jesus en Johanes 3:16, wua daut sajcht: “Gott seine Leew fa dise Welt es soo groot, daut hee sienen eensjen Sän jeef, daut aul dee, dee aun am jleewen, nich veloaren gonen, oba daut eewje Läwen haben.” Doaderch, daut sien Sän aus Leesjelt fa onse Sinden storf, muak Gott daut mäajlich, daut wie eewich läwen kjennen (Mat. 20:28). De Apostel Paulus muak dietlich, woo wichtich daut Leesjelt es, wan daut om Gott sien Väanämen jeit. Hee schreef: “Wiels de Doot derch eenen Mensch jekomen es, mott daut uk derch eenen Mensch komen, daut de Doodes wada oppstonen. Soo aus en Adam aule Menschen stoawen, soo komen see uk derch Christus wada aula toom läwen” (1. Kor. 15:21-22).

12. Woo woat Jehova sien Väanämen derchfieren?

¹² Jesus lieed siene Nofolja, om daut Kjennichrikj to bäden un daut Gott sien Wellen oppe Ieed sull jedonen woaren (Mat. 6:9-10). Een Poat von Gott sienen Wellen es, daut Menschen fa emma oppe Ieed läwen. Hee haft 144 000 Menschen jewält, om met Jesus toop Gott sienen Wellen derchtofieren (Opb. 5:9-10).

13. Waut deit Jehova nu aul, un waut kjenn wie doonen?

¹³ Jehova saumelt nu “eene [groote] Häad” Menschen toop un lieet dee, unja de Harschoft von sien Kjennichrikj to läwen (Opb. 7:9-10; Jak. 2:8). De Menschen  sent sikj oneenich, wäajen doa enne Welt soo väl Hauss un Kjrich es. Oba de groote Häad schauft sea doaropp, sikj von disen Hauss frietomoaken. Dee doonen nu aul soo to sajen von äare Schwieets Pluachschoaren moaken (Micha 4:3). Enne Städ daut dee bie eenen Kjrich metmoaken, wua daut soo väl Doodes jeft, halpen dee de Menschen, “daut woare Läwen” to finjen. Dee lieren dee äwa dän woaren Gott un äwa sien Väanämen (1. Tim. 6:19). Wäajen dee Gott sien Kjennichrikj unjastetten, haben dee woomäajlich nich een goodet Wiedakomen un haben veleicht eenje von äare Famielje jäajen an. Oba Jehova vesprakjt, daut hee fa daut sorjen woat, waut dee fält (Mat. 6:25, 30-33; Luk. 18:29-30). Dit wiest, daut Gott sien Kjennichrikj werkjlich rejieet un daut et daut erfellen woat, waut Jehova sikj väajenomen haft.

14-15. Woo woat sikj Jehova sien Vespräakjen erfellen, daut daut met dän Doot een Enj nämen woat?

¹⁴ Jesus es nu de Kjennich en Gott sien Kjennichrikj un woat aules erfellen, waut Jehova sikj väajenomen haft (2. Kor. 1:20). Von aune 1914 aun haft Jesus siene Fiend unjadon jemoakt (Psa. 110:1-2). Jesus un siene Metharscha woaren boolt aule schlajchte Menschen venichten (Opb. 6:2).

¹⁵ En de dusent Joa, wan Jesus rejieren  woat, woaren de Doodes oppjewakjt woaren, un de Jehuarsome woaren volkomen jemoakt woaren. No de latste Proow woaren deejanje, waut Jehova fa jerajcht talt, “daut Launt oawen un eewich doabennen bliewen” (Psa. 37:10-11, 29). Dan woat de Doot, “de latsta Fient”, venicht woaren (1. Kor. 15:26).

16. Waut saul ons daut ieeschte bat doa brinjen, Jehova to deenen?

¹⁶ Soo aus wie bat nu jeseenen haben, stett sikj daut eewje Läwen gaunz faust opp Gott sien Wuat. Dise Hopninj halpt ons nu en de latste Doag, waut soo schwoa sent, tru uttohoolen. Oba es daut jenuach, Jehova tru to deenen, bloos wäajen wie wellen aum Läwen bliewen? Nä! De wichtichsta Grunt, daut wie Jehova un Jesus tru sent, es, daut wie dee grulich sea leewen (2. Kor. 5:14-15). Dise Leew brinjt ons bat doa, daut wie dee soo goot aus mäajlich nodoonen wellen un aundre von onse scheene Hopninj vetalen (Reem. 10:13-15). Wan wie lieren, nich bloos aun ons to denkjen un friejäwrich to sennen, dan woa wie soone Sort Menschen woaren, waut Jehova fa emma aus siene Frind haben well (Heb. 13:16).

17. Fa waut mott wie ons selfst entscheiden? (Matäus 7:13-14).

¹⁷ Woa wie mank dee sennen, waut daut eewje Läwen kjrieen? Jehova haft dise Däa fa ons opjemoakt. Nu es daut aun ons, aus wie opp disen Wajch bliewen, waut to daut eewje Läwen fieet (läs Matäus 7:13-14). Woo woat daut sennen, wan wie ieescht eewich läwen? Daut woa wie en dän näakjsten Artikjel seenen.