51. ARTIKJEL FA DAUT STUDIUM
Diene Hopninj woat sikj secha erfellen
“Hopninj lat ons nich toschaund woaren” (REEM. 5:5)
LEET 142 Ons aun de Hopninj hoolen
WAUT WIE SEENEN WOAREN a
1. Wuarom kjenn wie sajen, daut Abraham sikj met siene Hopninj nich aunjeschmäat haud?
JEHOWA vespruak sienen Frint Abraham, daut hee eenen Sän haben wudd un daut aule Velkja oppe Welt derch dän wudden jesäajent woaren (1. Mo. 15:5; 22:18). Wäajen Abraham eenen grooten Gloowen aun Gott haud, wia hee sikj secha, daut Gott sien Vespräakjen sikj soo romnämen wudd. Oba aus Abraham 100 Joa wia un siene Fru aul 90 wia, hauden dise true Lied noch emma nich eenen Sän jehaut (1. Mo. 21:1-7). Un doch sajcht de Bibel: “[Abraham] haud Hopninj un Gloowen doaraun, daut hee wudd de Voda äwa väl Velkja sennen, wan daut uk ommäajlich leet” (Reem. 4:18, NW). Abraham jleewd doaraun, wäajen Jehowa am daut vesproaken haud un hee kjrieech daut, opp waut hee hopt: Hee kjrieech dän Sän, Isaak, wua hee lang no jeluat haud. Oba wuarom kunn Abraham sikj secha sennen, daut Gott sien Vespräakjen erfellen wudd?
2. Wuarom wia Abraham sikj secha, daut Jehowa sien Vespräakjen sikj erfellen wudd?
2 Wäajen Abraham Jehowa goot kjand, wia hee “sikj gaunz secha daut Gott am daut jäwen . . . [wudd], waut hee am vesproaken haud” (Reem. 4:21). Wäajen Abraham sienen Gloowen haud Jehowa eenen Jefaulen aun am un säd, daut hee jerajcht wia (Jak. 2:23). Soo aus Reema 4:18 wiest, schauften Abraham sien Gloowen un siene Hopninj toop. Well wie nu mol seenen, waut de Apostel Paulus äwa de Hopninj säd en Reema, Kapitel 5.
3. Waut läd Paulus äwa de Hopninj ut?
3 Paulus säd, onse “Hopninj lat ons nich toschaund woaren” (Reem. 5:5). Hee erkjläad, wuarom wie ons kjennen secha sennen, daut wie ons nich aunschmäaren woaren. Un hee halpt ons uk to vestonen, woo onse Hopninj kaun stoakja woaren. Wan wie nu Reema 5:1-5 derchgonen, dan denkj doaräwa no, woo diene Hopninj aul stoakja jeworden es. Daut woat die uk wiesen, waut du doonen kaust, daut diene Hopninj noch stoakja woat, aus dee aul es. Oba daut ieeschte well wie von de wundascheene Hopninj räden, waut ons nich lat toschaund woaren, soo aus Paulus säd.
ONSE WUNDASCHEENE HOPNINJ
4. Om waut jeit daut en Reema 5:1-2?
4 Läs Reema 5:1-2. Paulus schreef dise Wieed aun de Vesaumlunk en Room. De Breeda un Sestren doa hauden Jehowa un Jesus kjanen jelieet un jleewden aun äant un wieren Christen jeworden. Wiels dee “derch dän Gloowen jerajcht jeworden” wieren, saulwd Gott äant met dän heiljen Jeist. Dee hauden dan eene wundascheene Hopninj un wieren sikj secha, daut see dee wudden kjrieen.
5. Waut vonne Hopninj haben de Jesaulwde?
5 Paulus schreef lota to de jesaulwde Christen en Efesus äwa de Hopninj, waut see jekjräajen hauden. Bie dise Hopninj wia daut “Oafgoot fa de Heilje” met en, waut see kjrieen wudden (Efs. 1:18, NW). Un Paulus wees de Kolossa uk, wua dee äare Hopninj sikj erfellen wudd. Hee säd, daut doa “eene Hopninj fa . . . [dee] em Himmel reed” wia (Kol. 1:4-5). De jesaulwde Christen haben de Hopninj, daut dee woaren vom Doot oppstonen un fa emma em Himmel läwen un met Jesus toop rejieren (1. Tes. 4:13-17; Opb. 20:6).
Brooda F. W. Franz räd doavon, woo secha de Jesaulwde sikj äwa äare Hopninj sent (See Varsch 6)
6. Waut säd een jesaulwda Brooda äwa siene Hopninj?
6 De jesaulwde Christen räakjnen äare Hopninj sea väl. Eena von dee, Brooda Frederick Franz, säd von Hoaten: “Onse Hopninj woat sikj secha erfellen. Jieda eena von de 144,000 woat daut kjrieen, waut Gott ons vesproaken haft. Onse Beloonunk woat väl bäta sennen, aus wie ons verheipts kjennen väastalen.” Nodäm daut hee Gott aul fa väle Joaren tru jedeent haud, säd Brooda Franz aune 1991: “Wie räakjnen onse Hopninj noch emma sea väl. . . . Un je lenja wie no onse Hopninj luaren, je mea räakjen wie dee. Daut loont sikj no dee to wachten, wan daut uk wudden eene Million Joa sennen. Nu schaz ekj onse Hopninj noch väl dolla aus jeemols ea.”
7-8. Woone Hopninj haben de mieeschte von Jehowa siene Deena? (Reema 8:20-21).
7 De mieeschte von Jehowa siene Deena vondoag dän Dach haben eene aundre Hopninj. Daut es de Hopninj, waut Abraham haud: daut wie kjennen fa emma oppe Ieed läwen unja Gott sien Kjennichrikj (Heb. 11:8-10, 13). Paulus säd, woo wundascheen daut woat fa dee sennen, waut dise Hopninj haben (läs Reema 8:20, NW b; 8:21). Waut hast du daut dolste jejleicht, aus du daut ieeschte mol von de Hopninj ut de Schreft hieezhd? Wia daut, daut du eenen Dach woascht volkomen un onen Sind sennen? Ooda freidsd du die sea, aus du lieezhd, daut diene leewe Aunjehieeje woaren vom Doot oppstonen un oppe Ieed em Paradies läwen? Doa sent sea väl Sachen, wuatoo du die freien kaust, wäajen “de Hopninj”, waut Gott ons jejäft haft.
8 Wie kjennen ons to onse wundascheene Hopninj freien, endoont aus wie fa emma em Himmel ooda oppe Ieed läwen woaren. Un onse Hopninj kaun noch stoakja woaren. Paulus schreef, woo daut schauft. Well wie mol seenen, waut hee äwa onse Hopninj schreef. Doaderch woa wie ons noch sechra sennen, daut onse Hopninj kaun stoakja woaren un daut dee sikj erfellen woat.
WOO ONSE HOPNINJ STOAKJA WOAT
Jieda Christ mott met Schwierichkjeiten räakjnen (See Varsch 9-10)
9-10. Met waut motten Christen räakjnen, soo aus Paulus sien Biespel wiest? (Reema 5:3). (See uk de Bilda.)
9 Läs Reema 5:3. De Apostel Paulus säd, daut onse Hopninj stoakja woat, wan wie lieden motten. Veleicht wundat ons daut. Oba jieda eena von Christus siene Nofolja mott met Schwierichkjeiten räakjnen. Bie dän Apostel Paulus biejlikj wia daut soo. Hee säd to dee en Tessalonich: “Dit hab wie junt aul don jesajcht aus wie bie junt wieren, daut wie wudden lieden motten. Un jrod soo haft sikj daut uk romjenomen” (1. Tess. 3:4). Un to de Korinta schreef hee uk: “Breeda, wie wellen junt äwa daut schwoare, daut ons . . . troff, nich em onkloaren loten . . . Wie vezoagden aum Läwen” (2. Kor. 1:8; 11:23-27).
10 Christen vondoag dän Dach motten uk opp irjenteene Wajch lieden (2. Tim. 3:12). Woo es daut bie die? Haben se die mol schlajcht behaundelt, wäajen du aun Jesus jleefst un am nofoljen deist? Veleicht haben diene Frind ooda dien Frintschoft sikj domm jehaut äwa die ooda dee haben die soogoa schlajcht behaundelt. Ooda haben se die bie de Oabeit toojesat, wäajen du en aules west opprechtich sennen? (Heb. 13:18, NW). Hast du von de Rejierunk Jäajenstaunt jehaut, wäajen du to aundre äwa diene Hopninj rädsd? Paulus sajcht, daut wie sellen froo sennen, endoont waut wie fa Schwierichkjeiten haben. Oba wuarom?
11. Wuarom mott wie ons eenich sennen, bie Schwierichkjeiten staunthauft to bliewen?
11 Wie kjennen froo sennen, wan wie wäajen Schwierichkjeiten lieden motten, wiels daut halpt ons, eene wichtje Ieejenschoft to kjrieen. Reema 5:3 sajcht, daut wie “derch lieden lieren . . . staunthauft to sennen”. Jieda Christ woat Schwierichkjeiten haben. Doawäajen mott wie ons eenich sennen, bie jieda Schwierichkjeit staunthauft to bliewen. Bloos dan woa wie onse Hopninj beläwen kjennen. Wie wellen nich soo sennen aus deejanje, aun dee Jesus docht, aus hee von de Sot räd, waut opp steenaje Ieed foll. Dise Menschen neemen daut Wuat fuaz met freiden aun. Oba aus doa ieescht “Trubbels un Vefoljunk” oppkjeemen, kjeemen dee fuaz tofaul (Mat. 13:5-6, 20-21, NW). Daut stemt, met Jäajenstaunt ooda met Vefoljunk foadich to woaren, jeit nich scheen. Oba wan wie staunthauft bliewen, dan kjemt ons daut sea togood. Woo krakjt?
12. Woo kjemt ons daut togood, wan wie bie Schwierichkjeiten staunthauft bliewen?
12 Jakobus räd doavon, woo ons daut togood kjemt, bie Schwierichkjeiten staunthauft to bliewen. Hee schreef: “Siet wieda en aule Stekjen staunthauft, soo daut jie en aules kjennen volkomen un onen Fäla sennen un junt daut aun nuscht fält” (Jak. 1:2-4, NW). Jakobus sajcht, daut wan wie wieda en aule Stekjen staunthauft bliewen, kaun ons daut halpen, jeduldja to sennen, mea Gloowen to haben un dolla opp Gott to vetruen. Un daut kjemt ons uk noch opp eene aundre Wajch togood.
13-14. (a) Woo kjemt daut ut, wan wie staunthauft bliewen? (b) Waut deit daut aun onse Hopninj? (Reema 5:4).
13 Läs Reema 5:4, NW c. Paulus sajcht, “staunthauft sennen halpt ons, bie Gott aunjenäm to sennen”. Dit meent nich, daut Jehowa daut jefelt, daut wie Schwierichkjeiten un Trubbels haben. Gott haft eenen Jefaulen aun die, wiels du staunthauft blifst. Jeft ons dit nich väl Moot? (Psa. 5:12, NW).
14 Denkj doaraun, daut Abraham bie Gott aunjenäm wia, wiels hee bie Schwierichkjeiten staunthauft bleef. Jehowa säd, daut Abraham sien Frint wia un tald am fa jerajcht (1. Mo. 15:6; Reem. 4:13, 22). Krakjt soo kaun daut uk bie ons sennen. Aus Gott met ons tofräd es ooda nich, haft nuscht doamet to doonen, woo väl wie em Deenst fa am doonen ooda woo väl Väarajchten wie haben. Daut haft doamet to doonen, daut wie bie Schwierichkjeiten staunthauft bliewen. Wie aula kjennen daut, endoont woo oolt wie sent, met waut wie ons vestonen ooda en waut vonne Loag wie sent. Jeist du nu jroz waut schwoaret derch un blifst staunthauft? Dan vejät nich, daut Jehowa eenen Jefaulen aun die haft. Wan wie daut weeten, daut wie bie Gott aunjenäm sent, dan woat onse Hopninj aun Jehowa siene Vespräakjungen noch stoakja sennen.
EENE STOAKJRE HOPNINJ
15. (a) Waut säd Paulus en Reema 5:4-5? (b) Wuarom es eenje daut veleicht schwoa to vestonen?
15 Paulus säd, daut wie bie Jehowa aunjenäm sent, wan wie bie Schwierichkjeiten staunthauft bliewen. Hee säd wieda: “Bie Gott aunjenäm to sennen jeft ons Hopninj, [un] Hopninj lat ons nich toschaund woaren” (Reem. 5:4, NW; 5:5). Oba en Reema 5:2 haud Paulus jesajcht, daut de Christen en Room aul eene Hopninj hauden, daut wia “de Hopninj, [von] Gott siene Harlichkjeit”. Doawäajen wundren eenje veleicht: “Wan dise Christen aul eene Hopninj hauden, wuarom säd Paulus dan lota wada, daut dee eene Hopninj kjrieen?”
Met de Tiet best du die sechra jeworden, daut diene Hopninj sikj erfellen woat. Du räakjenst dee nu väl mea un freist die uk dolla doatoo (See Varsch 16-17)
16. Wuaderch woat eenem siene Hopninj stoakja? (See uk de Bilda.)
16 Wan wie doaraun denkjen, daut onse Hopninj kaun stoakja woaren, dan kjenn wie vestonen, wuarom Paulus wada von de Hopninj räd. Toom Biespel: Denkjt die daut noch, aus du daut ieeschte mol von de wundascheene Hopninj ut Gott sien Wuat hieezhd? Veleicht dochst du dan, daut wudd scheen sennen, fa emma em Paradies oppe Ieed to läwen, oba daut et soont nich jäwen wudd. Oba je mea du äwa Jehowa un äwa siene Vespräakjungen ut de Schreft lieren deetst, je sechra wieescht du die, daut dise Hopninj sikj erfellen wudd.
17. Woo woat eenem siene Hopninj stoakja no eenem siene Doop?
17 Mau rajcht no diene Doop wort diene Hopninj stoakja, wiels du mea äwa Jehowa lieezhd un eene jratre Leew fa am kjrieechst (Heb. 5:13 – 6:1). Veleicht hast du daut beläft, waut Reema 5:2-4 sajcht. Du hast veschiedne Schwierichkjeiten jehaut, oba du best staunthauft jebläwen un hast jespäat, daut Jehowa met die tofräd wia. Wäajen du nu weetst, daut du bie Gott aunjenäm best, kaust du die noch sechra sennen, daut du daut kjrieen woascht, waut hee vesproaken haft. Diene Hopninj es nu noch stoakja aus aum Aunfank un du schazt dee noch väl dolla. Dise Hopninj deit nu waut aun dien gaunzet Läwen un woo du diene Famielje behaundelst, waut vonne Entscheidungen du moakst un mau rajcht, woo du diene Tiet brukst.
18. Waut vesechat Jehowa ons?
18 Paulus moakt noch eene wichtje Sach dietlich äwa de Hopninj, waut du hast, nodäm du späaren kust, daut du bie Gott aunjenäm best. Hee wiest, daut dee sikj werkjlich erfellen woat. Wuarom kaust du die soo secha sennen? Wiels Gott derch Paulus oppschriewen leet: “Hopninj lat ons nich toschaund woaren, wiels ons derch dän Heiljen Jeist, dee ons jejäft es, Gott siene Leew en onse Hoaten jegoten es” (Reem. 5:5). Du hast aulsoo goode Uasoak, die äwa de Hopninj secha to sennen, waut Jehowa die jejäft haft.
19. Äwa waut kjenn wie ons secha sennen?
19 Denkj doaräwa no, waut Jehowa Abraham vespruak un daut hee met am tofräd wia un am aus sienen Frint tald. Abraham siene Hopninj wia nich fa Dommheit. De Bibel sajcht: “Abraham wacht jeduldich doaropp, un soo kjrieech hee, waut am vesproaken wia” (Heb. 6:15; 11:9, 18; Reem. 4:20-22). Abraham schmäad sikj nich aun. Du kaust die uk krakjt soo secha sennen, daut diene Hopninj sikj erfellen woat, wan du tru blifst. Du kaust schaftich sennen, wiels du weetst, daut du nich woascht toschaund gonen doamet! (Reem. 12:12). Paulus schreef: “Mucht dee Gott, von däm aule Hopninj kjemt, junt derch junen Gloowen en am, vollopp Freid un Fräd schenkjen, daut june Hopninj derch dän Heiljen Jeist siene Krauft, en junt waussen mucht” (Reem. 15:13).
LEET 139 Stal die de niee Welt väa
a En disen Artikjel woa wie seenen, waut vonne Hopninj wie aus Christen haben un wuarom wie ons kjennen secha sennen, daut dee sikj erfellen woat. Reema, Kapitel 5 woat ons halpen to seenen, daut onse Hopninj nu aundasch es aus don, aus wie de Woarheit kjanen lieeden.
b Reema 8:20 (NW): “De Schepfunk es de Nutzloosichkjeit unjadon jemoakt worden, nich derch äaren ieejnen Wellen, oba derch dän sienen, waut dee unjadon jemoakt haft, oba opp de Hopninj”.
