1. Waut mott wie doonen, om een riepa Christ to woaren?

 FOAKEN sent wie vewundat, woo bosich Kjinja groot woaren. Daut lat soo, daut deit eefach von veselfst. Oba een riepa Christ to woaren, daut kjemt nich von veselfst (1. Kor. 13:11; Heb. 6:1). b Daut wie kjennen een riepa Christ woaren, mott wie goode Frind met Jehowa woaren. Wie brucken Jehowa sienen heiljen Jeist, daut wie kjennen goode Ieejenschoften kjrieen, ons soone Sachen lieren, waut ons em auljemeenen togood komen un ons fa daut reedmoaken, waut komen woat (Spr. 1:5).

2. (a) Waut lia wie von 1. Mose 1:27? (b) Waut woa wie en disen Artikjel seenen?

² Jehowa haft Maunsmenschen un Frumenschen jemoakt (läs 1. Mose 1:27). Dauts gaunz kloa to seenen, daut dee beid en väl Stekjen veschieden sent. Biejlikj haft Jehowa daut soo jemoakt, daut jieda eena siene Oppgowen haft. Doatoo brucken dee goode Ieejenschoften un motten sikj uk waut lieren, waut äant halpt, dise Oppgowen notokomen (1. Mo. 2:18). En disen Artikjel woa wie seenen, woo eene junge Sesta kaun een riepa Christ woaren un en dän näakjsten Artikjel woa wie seenen, woo een junga Brooda daut kaun.

3-4. Wua kjennen de junge Sestren goode Biespels finjen, waut see nodoonen kjennen? (See uk daut Bilt.)

³ De Schreft rät von een deel feine Frues, waut Jehowa leewden un am deenden. (See dän Artikjel opp jw.org “Frauen  in der Bibel – was können wir von ihnen lernen?”) Soo aus de Teemavarsch sajcht, kunnen dee “sikj beharschen” un wieren “en aules tru”. Enne Vesaumlungen kjennen de Sestren oba uk goode Biespels finjen von riepe, christelje Frues, waut see nodoonen kjennen.

⁴ Junge Sesta, kjanst du soone Sestren, waut een feinet Biespel sent fa die? Kjikj no dee äare goode Ieejenschoften un dan denkj doaräwa no, woo du dee kaust nodoonen. En de näakjste Varzhen woa wie von dree wichtje Ieejenschoften räden, waut riepe Frues haben motten.

5. Wuarom es deemootich sennen sea wichtich fa eene riepe Sesta?

⁵ Deemootich sennen es sea wichtich fa riepe Christen. Wan eene Fru deemootich es, woat see een goodet Veheltnis haben met Jehowa un uk met aundre (Jak. 4:6). Eene Fru, waut Jehowa leeft, nemt daut biejlikj deemootich aun, daut doa een Haupt äwa ar es, soo aus Jehowa daut enjerecht haft (1. Kor. 11:3). Un dit es besonda en de Vesaumlunk un enne Famielje soo. c

6. Waut kjennen junge Sestren von Rebecka äare Deemoot lieren?

⁶ Well wie mol Rebecka äa Biespel seenen. See wia eene kluake Fru, waut dän Moot haud, Sachen to entscheiden, un see wist emma krakjt, wanea un waut see doonen must (1. Mo. 24:58; 27:5-17). Un doch wia see oba uk unjadon un deed aundre Menschen achten (1. Mo. 24:17-18, 65). Wan du krakjt soo aus Rebecka deemootich best un deejanje unjastetst, waut Veauntwuatunk haben, dan woascht du een goodet Biespel sennen fa aule en diene Famielje un en diene Vesaumlunk.

7. Woo kjennen junge Sestren Ester nodoonen un bescheiden sennen?

⁷ Bescheiden sennen es noch eene Ieejenschoft, waut aule riepe Christen fält. De Schreft sajcht “bie de Bescheidne es Weisheit” (Spr. 11:2, JHF). Ester wia bescheiden  un deed Gott tru deenen. Doawäajen wort see nich stolt, aus see Kjennijin wort. See horcht no dän Rot von äaren elren Vada Mordechai (Est. 2:10, 20, 22). Du kaust krakjt soo bescheiden sennen, doaderch daut du die gooden Rot sieekjst un dän uk nokjemst (Tit. 2:3-5).

8. Woo woat bescheiden sennen eene Sesta halpen, sikj aunstendich auntotrakjen un opptofiksen no 1. Timotäus 2:9-10 no?

⁸ Ester wees uk noch opp eene aundre Wajch, daut see bescheiden wia. De Schreft sajcht, “see haud een feinet Jeschekj un leet schmock”, oba see deed sikj nich groot doamet (Est. 2:7, 15). Woo kjennen Sestren Ester nodoonen? 1. Timotäus 2:9-10 (läs) wiest ons eene Wajch. De Apostel Paulus sajcht hia to de Frues, daut see derch äare Kjleedie wiesen sellen, daut see Gott achten. De griechische Wieed, waut hee brukt, wiesen tweeatlei: Daut eene Fru sikj emma aunstendich kjleeden saul un daut see aundre äare Meenunk achten saul. Wie schazen onse Sestren sea, waut disen Rot nokomen!

9. Waut lia wie von Abigajil?

⁹ Derchjedocht sennen es noch eene Ieejenschoft, waut aun aule riepe Sestren to seenen es. Waut meent derchjedocht sennen? Daut es, wan eena weet, waut rajcht un orrajcht es, un sikj dan wält, daut rajchte to doonen. Well wie doatoo mol Abigajil äa Biespel seenen. Äa Ehemaun muak eene sea schlajchte Entscheidunk, waut aule von äa Hus en Jefoa brocht. Abigajil deed fuaz waut un doaderch kunn see een deel Läwes raden (1. Sam. 25:14-23, 32-35). Derchjedocht sennen halpt ons to weeten, wanea daut Tiet es toom räden un toom stell sennen. Un daut halpt ons uk, daut wie ons nich too sea en aundre äa Läwen nennmischen, soo daut dee daut ommaklich woat, wan wie uk om dee bekjemmat sent (1. Tess. 4:11).

10-11. Woo woat die daut selfst un uk aundre togood komen, wan du goot läsen un schriewen kaust? (See uk daut Bilt.)

¹⁰ Fa eene christelje Fru es daut goot, wan dee sikj Sachen lieet. Eenjet, waut eene Mejal von kjlien aun lieet, kaun dee fa äa gaunzet Läwen halpen. See wie mol een poa Biespels.

¹¹ Lia die, fein to läsen un to schriewen. Bie eenje Menschen es daut nich wichtich, daut de Frues goot läsen un schriewen kjennen. Oba fa ons aus Christen es daut sea wichtich, daut wie daut aula lieren (1. Tim. 4:13). d Wan daut uk eenjemol schwoa es, proow die wieda, fein läsen un schriewen to lieren. Woo woat die daut togood komen? Doaderch kaust du woomäajlich leichta  eene Oabeit finjen. Du woascht uk bäta Gott sien Wuat studieren un aundre lieren kjennen. Un daut baste von aules es, daut du Gott emma noda komen woascht, wan du sien Wuat läsen deist un doaräwa nodenkjst (Jos. 1:8; 1. Tim. 4:15, NW).

12. Waut kaust du von Spricha 31:26 lieren?

¹² Lia daut, aundre goot tootohorchen un fein met dee to räden. Fa ons aus Christen es daut sea needich, daut wie met aundre fein räden. De Jinja Jakobus jeft ons eenen feinen Rot, wua hee sajcht: “Siet schwind bie de Sach toom horchen, äwalajcht goot ea jie räden” (Jak. 1:19). Wan du aundre oppmoakjsom toohorchst, dan wiest du, daut du om dee waut romjefst un “metlieden” deist (1. Pet. 3:8). Wan du die nich secha best, aus du daut vestonen kaust, waut de aundra sajcht ooda woo dee sikj feelt, dan kaust du dän väasechtich Froagen stalen. Dan nemm die een bät Tiet, ea du waut sajchst (Spr. 15:28). Äwalaj: “Es daut, waut ekj nu sajen well, werkjlich Woarheit un toom oppbuen? Es daut respakjtvoll un leeftolich?” Lia von riepe Sestren, waut goot toohorchen un leeftolich räden kjennen (läs Spricha 31:26). Horch oppmoakjsom too, woo dee daut doonen. Je bäta du dise Sachen lieescht, je bäta woascht du met aundre foadich woaren.

13. Woo kaust du lieren, de Husoabeit fein to doonen? (See uk daut Bilt.)

¹³ Lia die, de Husoabeit fein to doonen. Opp väl Städen es daut soo, daut de mieeschte Husoabeit von Frues jedonen woat. Diene Mame ooda eene aundre Sesta wudd die veleicht halpen kjennen, soone Sachen to lieren. Eene Sesta, waut Cindy heet, sajcht: “Eent von daut baste, waut miene Mame mie lieed es, daut flietich schaufen Freid brinjt. Daut ekj lieed, äten to moaken, rein to moaken, to neien un uk entokjeepen, haft mie daut Läwen leichta jemoakt un doaderch kunn ekj uk mea em Deenst fa Jehowa doonen. Miene Mame lieed mie uk, woo ekj kunn oppnäment sennen, un doaderch hab ekj een deel feine Breeda un Sestren kunt kjanen lieren, waut goode Biespels fa mie wieren” (Spr. 31:15, 21-22). Eene flietje, oppnämende Fru, waut daut jelieet haft, äare Husoabeit fein to doonen, es eene groote Help fa äare Famielje un uk fa de Vesaumlunk (Spr. 31:13, 17, 27; Apj. 16:15).

14. Waut kaust du von Crystal lieren, un waut saust du em Denkj hoolen?

¹⁴ Lia, selfststendich to sennen. Dauts sea needich, daut aule riepe Christen daut lieren, “tofräd”, ooda selfststendich, to sennen (Filip. 4:11). Eene Sesta, waut Crystal heet, sajcht: “Miene Elren wullen, daut ekj enne Huachschool soont lieed, waut mie uk lota togood kjeem. Mien Voda rod mie too, mie fa soont utlieren to loten, daut ekj lota fa eene Kompanie de Räakjninj fieren kunn. Un daut kjeem mie sea togood.” Dauts sea goot to lieren, woo eena Jelt vedeenen  kaun, oba dauts nich aules. Proow uk lieren, woo eena doa rajcht met omgonen kaun, daut eena nich mea utjeft, aus waut eena haft (Spr. 31:16, 18). Hool em Denkj, daut wan du met een eefachet Läwen tofräd best un die nich onneedich enne Schult endukst, dan woascht du daut leichta nokomen kjennen, waut du die em jeisteljen väajenomen hast (1. Tim. 6:8).

15-16. Wuarom sent de onbefriede Sestren eene groote Help fa aundre? (Markus 10:29-30).

¹⁵ Wan du soone Ieejenschoften kjrichst, waut Jehowa jefaulen, un die soont lieescht, waut die em auljemeenen togood kjemt, dan woascht du reed sennen, fa de Entscheidungen, waut du lota moaken woascht. Well wie mol seenen, waut daut biejlikj sennen kunn.

¹⁶ Fa eene jewesse Tiet onbefriet bliewen. Krakjt soo aus Jesus säd, wälen eenje Sestren sikj onbefriet to bliewen, wan daut mank dee äare Menschen uk nich jeweenlich es (Mat. 19:10-12, NW). Un aundre befrieen sikj veleicht ut aundre Jrind nich. Du kaust die secha sennen, daut Jehowa un Jesus de onbefriede Christen nich fa weinja wieet talen. Oppe gaunze Welt sent soone Sestren eene groote Help en äare Vesaumlunk. Väle seenen dee aus Sestren un Mitta aun, wiels dee aundre Leew wiesen un om aundre bekjemmat sent (läs Markus 10:29-30, NW; 1. Tim. 5:2).

17. Waut kaun eene junge Sesta nu aul doonen toom lota em Voltietdeenst sennen?

¹⁷ Voltietdeena woaren. De Sestren doonen de mieeschte Oabeit en daut Prädichtwoakj äware gaunze Welt (Psa. 68:11, NW). Kaust du die daut nu aul väanämen, Voltietdeena to woaren? Du wurscht kjennen Pionia sennen ooda die fa een Buwoakj aunjäwen ooda fa dän Beteldeenst. Bäd doarom, waut du die väajenomen hast. Räd met aundre doaräwa, waut daut aul jedonen haben un finj ut, waut du doatoo noch doonen kaust. Un dan doo die daut krakjt äwakalendren. Wan du een Voltietdeena woascht, woascht du väl scheenet em Deenst fa Jehowa beläwen kjennen.

18. Wuarom saul eene Sesta daut goot äwalajen, met wäm see sikj befriet? (See uk daut Bilt.)

¹⁸ Sikj befrieen. Hia räd wie von Ieejenschoften un Sachen, waut du die lieren kaust. Dit woat die halpen, eene goode Ehefru to woaren. Oba denkj doaraun, daut du die eenen feinen Ehepoatna sieekjst, wan du die west befrieen, wiels dauts eent von  de wichtichste Entscheidungen, waut du jeemols moaken woascht. Hool em Denkj, daut deejanja dien Haupt sennen woat, wan du die befriest (Reem. 7:2; Efs. 5:23, 33). Soo, denkj mol äwa dit no: “Es hee een riepa Christ? Sat hee Jehowa aune ieeschte Städ? Moakt hee kluake Entscheidungen? Steit hee siene Fäla too? Deit hee Frues achten? Haft hee sikj aul soont jelieet, daut hee fa mie em jeisteljen un uk em tieteljen sorjen kaun un woat hee een gooda Frint sennen fa mie? Kjemt hee siene Veauntwuatungen goot no? Biejlikj waut fa Oppgowen haft hee aul enne Vesaumlunk un woo jeit hee doamet om?” (Luk. 16:10; 1. Tim. 5:8). Wan du west eenen gooden Ehemaun finjen, dan woascht du die uk motten aunstrenjen, eene goode Ehefru to woaren.

19. Wuarom kaun eene Fru schaftich sennen, daut see kaun een Helpa sennen fa äaren Maun?

¹⁹ De Schreft sajcht, daut eene feine Ehefru een gooda Helpa es fa äaren Ehemaun un krakjt paussent es fa am (1. Mo. 2:18). Meent daut dan nu, daut de Fru doaderch weinja wieet es? Verheipts nich! De Oppgow aus Helpa es sea väl wieet. De Schreft sajcht mau rajcht von Jehowa, daut hee een “Halpa” es (Psa. 54:6, JHF; Heb. 13:6). De Fru kaun eene groote Help sennen fa äaren Maun, wan see dän unjastett un methalpt, daut siene Entscheidungen fa de Famielje goot utkomen. Un wäajen see Jehowa leeft, halpt see uk met, daut aundre goot von äaren Maun denkjen (Spr. 31:11-12; 1. Tim. 3:11). Du kaust die nu aul reedmoaken, eene goode Ehefru to woaren, wan du eene jratre Leew fa Jehowa kjrichst un aundre en diene Famielje un enne Vesaumlunk halpen deist.

20. Waut fa goodet kaun eene Mame fa äare Famielje doonen?

²⁰ Kjinja haben. Wan jie ieescht befriet sent, woa jie veleicht Kjinja haben (Psa. 127:3). Doawäajen es daut goot, em verut aul doaräwa notodenkjen, waut daut meent, eene goode Mame to sennen. Aules, waut wie en disen Artikjel derchjenomen haben, woat die halpen, wan du die befrieen west un Kjinja haben west. Wan du leeftolich, frintlich un jeduldich best, woascht du methalpen, daut aule en diene Famielje sikj wool feelen un daut de Kjinja sikj secha un jeleeft feelen (Spr. 24:3).

21. Woo denkj wie äwa onse Sestren, un wuarom? (See daut Bilt oppe väaschte Sied.)

²¹ Sestren, wie leewen junt sea fa aules, waut jie fa Jehowa un sien Volkj doonen (Heb. 6:10). Jie schaufen sea doaropp, goode Ieejenschoften to kjrieen un junt soont to lieren, waut junt selfst un uk de aundre daut Läwen leichta moaken woat. Un jie moaken junt uk fein reed fa soont, waut lota noch oppkomen kunn. Jie sent werkjlich sea wieetvoll en Jehowa siene Organisazion!