JEHOWA haft ons soo väl goodet jejäft un wie freien ons, daut hee ons uk lat selfst entscheiden, woo wie dee Sachen brucken wellen. Dauts intressaunt, daut de Bibel sajcht, daut Wien een Jeschenkj von Gott es. Dee sajcht mau rajcht: “Goot äten es eene Freid, un Wien moakt däm Mensch lostich”, ooda mootich (Liera 10:19; Psa. 104:15). Veleicht hast du daut aul jeseenen, daut eenje Menschen Trubbel haben met Alkohol ooda Stoakjet drinkjen. Un daut jeft uk veschiedne Meenungen äwa Stoakjet drinkjen, doano von wua eena es ooda von woone Kultua eena kjemt. Oba waut kaun Christen halpen, goode Entscheidungen to moaken?

Krakjt endoont wua wie wonen ooda woo wie oppjewossen sent, well wie ons emma doano rechten, woo Gott denkjt, wan wie waut entscheiden. Wan wie daut soo doonen, dan woa wie nu aul een schaftjet Läwen haben un uk lota.

Soo aus du veleicht aul jeseenen hast, drinkjen väl Menschen enne Welt too väl Stoakjet, un dee doonen daut uk foaken. Eenje doonen daut, wiels dee sikj dan jeloten feelen. Aundre doonen daut, om äare Trubbels to vejäten. Un noch aundre haben daut soo tohoolen, daut soone, waut väl Stoakjet drinkjen, groote Junges sent.

Jehowa siene Deena oba kjrieen gooden Rot von am. Hee haft ons biejlikj weeten jeloten, woo schlajcht daut utkjemt, wan eena too väl Stoakjet drinkjt. Veleicht hast du daut jeläst, waut Spricha 23:29-35 aules von soonen Mensch sajcht, waut besopen es, un waut vonne Trubbels dee haft. a Daniel, een Eltesta en Europa, denkjt daut noch, woo sien Läwen wia, ea hee een woara Christ wort. Hee sajcht: “Wäajen ekj too väl drinkjen deed, muak ekj schlajchte Entscheidungen. Doaderch hab ekj väl schlajchtet beläft un mie sat daut noch emma too, wan ekj doaraun denkj.”

Woo kjennen Christen äaren frieen Wellen opp soone Wajch brucken, daut dee de Trubbels utem Stich gonen, waut doavon komen, too väl Stoakjet to drinkjen? Wan wie Entscheidungen moaken äwa Stoakjet drinkjen, dan sell wie ons doano rechten, woo Gott daut sitt.

Well wie mol seenen, waut de Bibel äwa Stoakjet sajcht un wuarom eenje Stoakjet drinkjen.

Gott sien Wuat sajcht eenem daut nich auf, met Mot Stoakjet to drinkjen. Daut sajcht mau rajcht, daut Wien drinkjen waut scheenet sennen kaun. En Liera 9:7 sajcht daut: “Frei die to daut, waut du to äten hast, un drinkj dienen Wien met scheenschmak”. Jesus deed eenjemol Wien drinkjen un aundre true Deena von Jehowa deeden uk (Mat. 26:27-29, NW; Luk. 7:34, NW; 1. Tim. 5:23).

Gott sien Wuat moakt daut gaunz kloa, daut doa een Unjascheet es tweschen een beskje Stoakjet drinkjen ooda sikj besupen. Daut sajcht gaunz kloa: “Bedrinkjt junt nich aun Wien” (Efs. 5:18). Un daut sajcht uk mau rajcht, daut soone, waut “sikj besupen, . . . woaren en Gott sien Kjennichrikj nich nenkomen” (1. Kor. 6:10, NW). Jehowa sajcht gaunz kloa, daut et orrajcht es, too väl to drinkjen ooda sikj to besupen. Doawäajen well wie nich bloos daut doonen, waut de Menschen rom ons doonen, oba leewa soone Entscheidungen moaken, waut Jehowa jefaulen.

Eenje jleewen, daut see väl Stoakjet drinkjen kjennen, onen sikj to besupen. Oba soo to denkjen, es sea jefäadlich. De Schreft moakt daut gaunz kloa: “Aum Wien veskloft sennen” kaun eenen Maun (ooda eene Fru) bat doa brinjen, daut dee groote Fäla moakt un jäajen Jehowa sindicht (Tit. 2:3; Spr. 20:1). Jesus säd, daut soone, waut “too väl drinkjen”, woaren nich kjennen en Gott siene niee Welt  nennkomen (Luk. 21:34-36, NW). Waut kaun eenen Christ halpen, de Trubbels utem Stich to gonen, waut von Stoakjet drinkjen komen?

Wan wie waut entscheiden äwa Stoakjet drinkjen, dan es daut jefäadlich, sikj bloos doano to rechten, waut de mieeschte Menschen en onse Jäajent doonen. Wan daut om äten un drinkjen jeit, doonen Christen leewa daut, waut Jehowa jefelt. De Bibel halpt ons doaraun denkjen: “Auf jie äten ooda drinkjen ooda waut jie doonen, doot aules om Gott to ieren” (1. Kor. 10:31). Hia sent eenje Froagen un biblische Gruntsauzen, wua wie äwa nodenkjen sellen:

Drinkj ekj Stoakjet, daut aundre sikj nich domm haben äwa mie? 2. Mose 23:2 sajcht: “Lot die nich met eene Grupp metrieten”. Doamet wull Jehowa de Israeliten sajen, daut dee nich sullen soone nodoonen, waut soon Läwen fieeden, waut am nich jefoll. Dit es uk een feina Rot fa Christen vondoag dän Dach. Wan wie daut nodoonen, woo aundre Menschen äwa Stoakjet denkjen un woo dee daut brucken, dan kunn wie soo bie sacht von Jehowa aufkomen un nich mea no siene Jesazen läwen (Reem. 12:2, NW).

Drinkj ekj Stoakjet toom wiesen, daut ekj groot ooda stoakj sie? En eenje Kulturen es daut gaunz jeweenlich un dee talen daut nich fa orrajcht, foaken un too väl Stoakjet to drinkjen (1. Pet. 4:3). Oba en 1. Korinta 16:13 woat ons toojerot: “Siet waka, stot faust em Gloowen, siet mootich un siet stoakj!” Halpt eenem Stoakjet drinkjen werkjlich, stoakj to woaren? Nä, daut deit nich. Stoakjet drinkjen kaun leicht wäm bat doa brinjen, daut dee nich kloa denkjt un nich goode Entscheidungen moakt. Too väl Stoakjet drinkjen es aulsoo nich een Bewies, daut wäa stoakj es. Rajcht jesajcht bewiest daut, daut deejanja schwak es. Jesaja 28:7 wiest, daut wan wäa too väl jedrunken haft, sikj vestaupt un nich jlikj gonen kaun.

Bloos met Jehowa siene Help kjenn wie werkjlich daut rajchte doonen un stoakj sennen. Doa es met en, waka to bliewen un faust em Gloowen to stonen (Psa. 18:33). Daut doo wie, wan wie emma waka sent un fuaz aule Jefoaren utem Stich gonen, waut ons em jeisteljen schoden kunnen. Jesus deed daut krakjt soo, aus hee oppe Ieed wia. Soo wees hee, daut hee stoakj wia. Väl Menschen hilden waut von am, wiels hee äwanäment wia un sikj eenich wia, daut rajchte to doonen.

 Drinkj ekj Stoakjet, om miene Trubbels to vejäten? Een Psalmenschriewa schreef mol: “Aus ekj mie wäajen miene Angst un Sorjen nich mea Rot wist, deetst du [Jehowa] mie treesten un berujen” (Psa. 94:19 NW). Wan diene Trubbels die unjadrekjen, dan sieekj bie Jehowa no Help – nich bie de Buddel. Foakna to Jehowa bäden, kaun die halpen, met diene Trubbels foadich to woaren. Eenje haben uk von eenen gooden Frint von de Vesaumlunk feinen Rot jekjräajen. Stoakjet to drinkjen, om met diene Trubbels foadich to woaren, kaun die daut enne Werkjlichkjeit schwanda moaken, die eenich to sennen, wieda daut rajchte to doonen (Hos. 4:11). Daniel, von dän wie ea aul räden, stunt too: “Ekj haud groote Sorjen un feeld mie foaken schuldich. Ekj deed Stoakjet drinkjen toom doamet foadich woaren, oba daut brocht mie bloos noch mea Trubbels. Ekj velua eenje Frind un feeld mie nuscht wieet.” Waut holp Daniel, entlich doavon loostokomen? Hee sajcht: “Ekj wort en, daut mie daut aun Jehowa siene Help fäld – nich aun de Buddel. Entlich kunn ekj met miene Trubbels foadich woaren un dee äwastonen.” Well wie nich vejäten, daut Jehowa emma reed es, ons to halpen, wan onse Loag uk sea diesta lat (Filip. 4:6-7; 1. Pet. 5:7).

Wan du bieaun Stoakjet drinkjen deist, dan wurscht du doaräwa nodenkjen kjennen, aus du waut endren sust. Du wurscht biejlikj kjennen doaräwa nodenkjen: “Haben miene Frind ooda miene Famielje waut doaräwa jesajcht, daut ekj väl Stoakjet drinkjen doo?” Wan jo, dan kaun daut een Bewies sennen, daut du eenen Trubbel hast, waut du nich mol jewist hast. “Doo ekj nu mea Stoakjet drinkjen, aus ekj ea deed?” Wan du nu uk noch nich aufhenjich doavon best, kaun daut oba een Bewies sennen, daut du oppem Wajch doahan best. “Es daut fa mie schwoa, wan ekj een poa Doag ooda lenja nich waut Stoakjet drinkjen doo?” Wan jo, dan hast du die daut secha aul sea aunjewant ooda du best mau rajcht aufhenjich doavon. Dan kaun die daut veleicht aul aun eenen Dokta fälen, om von disen Trubbel loostokomen.

Väl Stoakjet drinkjen kaun jefäadlich sennen un väl Trubbels brinjen, un doawäajen sent eenje Christen sikj eenich jeworden, kjeen Stoakjet to drinkjen. Aundre drinkjen nich Stoakjet, wäajen dee daut eefach  nich jleichen, woo daut schmakjt. Wan du wäm kjanst, dee sikj eenich jeworden es, nich Stoakjet to drinkjen, dan saust du dän Leew wiesen un siene Entscheidunk respakjten, enne Städ schlajcht doaräwa to räden.

Veleicht best du enjeworden, daut et kluak es, sikj Jrensen to saten äwa Stoakjet drenkjen. Veleicht hast du die daut uk faustjesat, woo foaken du west Stoakjet drinkjen; biejlikj een mol de Wäakj ooda een bät bie eene Moltiet. Aundre haben veleicht Jrensen jesat, waut vonne Sort Stoakjet see drinkjen woaren, biejlikj een beskje Wien ooda Bea, oba nich waut, waut noch stoakja es; nich mol, wan daut met waut aundret toopjerieet es. Wan eena sikj ieescht eenich es, woo väl Stoakjet eena drinkjen well, dan es daut leichta, sikj doaraun to hoolen. Un wan een Christ soone Entscheidunk jemoakt haft un sikj doaraun helt, dan brukt dee sikj nich doamet schämen.

Wan eena eene Entscheidunk moakt äwa Stoakjet drinkjen, dan wudd eena uk sellen doaraun denkjen, waut daut aun aundre deit. Reema 14:21 sajcht: “Daut es bäta nich Fleesch to äten ooda Wien to drinkjen ooda irjent sest waut to doonen, wuaraun dien Brooda sikj stat.” Woo kaust du disen Rot nokomen? Wies Leew. Wan du denkjst, daut aundre daut stieren kaun, wan du waut Stoakjet drinkjst, wudd de Leew die dan nich sellen bat doa brinjen, nich Stoakjet to drinkjen? Wan du dit deist, dan wiest du, daut du aundre leefst un respakjten deist, un dolla om aundre bekjemmat best aus om die selfst (1. Kor. 10:24).

De Rejierunk haft veleicht uk Jesazen äwa Stoakjet drinkjen, un een Christ wudd sikj sellen doaraun hoolen. Doa es veleicht met en, woo oolt eena sennen mott ooda daut eena nich foaren kaun ooda aundre Maschienen brucken, wan eena Stoakjet jedrunken haft (Reem. 13:1-5).

Jehowa haft ons soo väl goodet jejäft un doa es uk de Frieheit met en, woo wie dise Sachen brucken sellen. Wie kjennen biejlikj selfst entscheiden, waut wie äten ooda drinkjen wellen. Wie wellen soone Entscheidungen moaken, waut onsen himlischen Voda froo moaken un waut wiesen, daut wie onse Frieheit waut räakjnen.