Hast du dit Joa de Woaktorms oppmoakjsom jeläst? See mol, aus du de Froagen hia beauntwuaten kaust:

Waut es doa met en, “eene niee Enstalunk to kjrieen”? (Reem. 12:2, NW).

Doa es mea met en, aus bloos goodet doonen. Wie motten uk doaräwa nodenkjen, woo wie en ons bennen sent un aules endren, daut wie soo goot aus mäajlich soo läwen, aus Jehowa daut fa rajcht talt (w23.01, S. 8-9).

Woo kjenn wie utjejlikjt bliewen, wan wie uk seenen, waut en de Welt passieet?

Wie sent nieschierich, waut nu enne Welt passieet un woo sikj de Profezeiungen erfellen. Oba wie wellen nich roden, waut noch komen woat. Daut kaun de Eenichkjeit enne Vesaumlunk schoden. Wie stetten ons leewa opp daut, waut Jehowa siene Organisazion sajcht (1. Kor. 1:10) (w23.02, S. 16).

Waut es de Unjascheet tweschen Jesus siene Doop un de Doop von siene Nofolja?

Wiels Jesus von een Volkj wia, waut Jehowa hanjejäft wia, must hee sikj nich hanjäwen soo aus wie. Jesus wia onen Fäla un must nich om Vejäwunk froagen (w23.03, S. 5).

Woo kjenn wie aundre halpen, enne Vesaumlunk eene Auntwuat to jäwen?

Wie kjennen korte Auntwuaten jäwen, daut aundre uk noch waut sajen kjennen. Wie sellen uk nich von too väl Sachen räden, soo blift doa noch waut fa de aundre (w23.04, S. 23).

Waut stalt de heilja Wajch väa en Jesaja 35:8?

Dis biltelja Heiwä stald ieeschtlich dän Wajch väa, opp dän de Juden jinjen von de Staut Babel no äa Launt. Waut stalt dis Wajch en onse Tiet väa? Aul hundade Joaren ver 1919 wort dis Wajch reedjemoakt. Biejlikj worden Biblen äwasat un jedrekjt. Gott siene Deena reisen soo to sajen opp “dän heiljen Wajch”, waut no aul de Säajnungen fieet, waut daut Kjennichrikj noch brinjen woat (w23.05, S. 15-19).

Om woone twee biltelje Frues jeit daut en Spricha, Kapitel 9?

Spricha rät von de Enlodunk von een onkluaket “Frumensch”, waut “em Grauf” nennfieet. Un von de Enlodunk von de woare “Weisheit”, waut uk met eene Fru vejlikjt woat. Dee fieet no “vestendje Wäaj” un nom Läwen (Spr. 9:1, 6, 13, 18) (w23.06, S. 22-24).

Woo wees daut, daut Gott deemootich un derchjedocht wia, soo aus hee met Lott omjinkj?

Jehowa säd to Lott, daut dee von Sodom veloten sull un en de Boaj nennflichten. Aus Lott oba fruach, aus hee nich kunn no Zoar flichten, leet Jehowa daut (w23.07, S. 21).

Waut kaun eene Fru doonen, wan äa Ehepoatna sikj Pornografie aunkjikjt?

See mott doaraun denkjen, daut et nich äare Schult es. See saul dolla aun äa Veheltnis met Jehowa denkjen un äwa biblische Jeschichten von Frues nodenkjen, waut von Jehowa jetreest worden. See kaun am halpen, jefäadelje Loagen utem Stich to gonen (w23.08, S. 14-17).

Woo kaun Weisheit ons halpen, leeftolich to sennen, wan doa wäa met ons äwa onsen Gloowen strieden well?

Wie kjennen derch siene Froag proowen to vestonen, waut deejanja denkjt un waut dän intressieet. Doaderch woa wie dän kjennen leeftolich auntwuaten (w23.09, S. 17).

Waut lieet ons daut, woo Maria Krauft kjrieech?

Aus see enwort, daut see wudd de Mutta von dän Messias woaren, kjrieech see Help von aundre. Maria kjrieech Krauft derch Gabriel un Elisabet. Wie kjennen uk derch onse Breeda un Sestren jestoakjt woaren (w23.10, S. 15).

Woo kaun Jehowa onse Jebäda beauntwuaten?

Hee vesprakjt, no onse Jebäda to horchen un doabie aun sien Väanämen to denkjen (Jer. 29:12). Hee kaun äwareene Jebäda opp veschiedne Wäaj beauntwuaten, oba hee woat ons emma biestonen (w23.11, S. 21-22).

Waut bediet daut, daut en Reema 5:2 un lota uk em Varsch 4 (NW) von de Hopninj jerät woat?

Wan wäa de goode Norecht hieet, kjricht dee veleicht de Hopninj, fa emma em Paradies to läwen. Oba wan doa Schwierichkjeiten oppkomen un dee staunthauft blift un späat, daut Gott am leeft, dan woat siene Hopninj stoakja un dee schazt dee noch dolla (w23.12, S. 12-13).