1-2. Woo sellen de Elren doa naunkjikjen, wan de Kjinja Froagen haben äwa daut, waut wie jleewen?

 VÄLE wudden doamet envestonen sennen, daut et väl opp sikj haft, Kjinja opptotrakjen. Wan jie Kjinja haben, dan strenj jie junt secha aun, dee to halpen, eenen stoakjen Gloowen to haben (5. Mo. 6:6-7). Oba wan de Kjinja jrata woaren, fangen dee veleicht aun to froagen, wuarom wie jewesset jleewen ooda wuarom Jehowa ons jewesse Jesazen jejäft haft.

² Wan june Kjinja soone Froagen stalen, dan moak jie junt veleicht fuaz Sorjen ooda denkjen, daut dee nich jenuach Gloowen haben. Oba wan de Kjinja jrata woaren, dan motten dee Froagen stalen, daut see sikj kjennen selfst secha sennen, waut see jleewen (1. Kor. 13:11). Doawäajen sell jie nich Angst haben. Wan june Kjinja Froagen stalen, dan seet daut aus eene Jeläajenheit, dee to lieren, Sachen selfst to bedenkjen.

3. Waut woa wie en disen Artikjel seenen?

³ En disen Artikjel woa wie doaräwa räden, woo de Elren äare Kjinja halpen kjennen, (1) sikj secha to sennen äwa daut, waut see jleewen, (2) de Jesazen ut de Bibel wieettoschazen un (3) fa äaren Gloowen entostonen. Wie woaren uk seenen, wuarom daut goot es, daut de Kjinja Froagen stalen, un wie woaren von eenjet räden, waut jie met june Kjinja toop doonen kjennen, daut jie de Jeläajenheit haben, met dee von daut to vetalen, waut wie jleewen.

HALPT JUNE KJINJA, SIKJ SELFST SECHA TO SENNEN

4. Met waut vonne Froagen komen de Kjinja veleicht opp, un wuarom?

⁴ Christelje Elren weeten, daut see nich met eenen Gloowen aun Jehowa jebuaren sent, un äare Kjinja uk nich. Dee weeten uk, daut äare Kjinja nich woaren eenen Gloowen haben,  bloos wiels see eenen haben. Doawäajen komen de Kjinja veleicht met soone Froagen aus dit opp: “Woo weet ekj, daut et eenen Gott jeft? Kaun ekj daut werkjlich jleewen, waut de Bibel sajcht?” De Bibel rot ons too, onse “Fäichkjeit to denkjen” to brucken un ons daut to unjastonen, “woo daut met aules steit” (Reem. 12:1; 1. Tes. 5:21). Soo, woo kjenn jie june Kjinja halpen, eenen stoakjen Gloowen to kjrieen?

5. Woo kjennen de Elren äare Kjinja halpen, eenen stoakjen Gloowen aun de Bibel to kjrieen? (Reema 12:2).

⁵ Rot june Kjinja too, sikj daut selfst secha to moaken, woont de Woarheit es (läs Reema 12:2). Wan june Kjinja Froagen stalen, dan nämt de Jeläajenheit woa, om dee to wiesen, woo see sikj de Auntwuaten selfst nosieekjen kjennen biejlikj en de Help toom nosieekjen fa Jehowa siene Zeijen. Bie daut Teema “De Schreft”, bie “Von Gott enjejäft” kjennen dee mea Bewies finjen, daut de Bibel nich bloos een feinet Buak es, waut Menschen jeschräwen haben, oba “Gott sien Wuat” es (1. Tes. 2:13). Dee wudden sikj en onse Bieekja uk waut nosieekjen kjennen äwa de Staut Niniwe en daut ieeschtemmasche Assierien. Ea säden eenje Bibel-Jelieede, daut et dise Staut kjeenmol jejäft haud. Oba romme 1850 haben se de vekjeiwelde Staut Niniwe väajegroft. Daut bewiest, daut de Bibel rajcht es (Zef. 2:13-15). Wan dee noch mea weeten wellen, woo de Venichtunk von Niniwe de biblische Profezeiungen erfeld, kjennen dee sikj dän Artikjel “Hast du daut jewist?” em Woaktorm von Nowamba 2021 noläsen. Wan june Kjinja daut, waut dee en onse Bieekja lieren, met daut vejlikjen, waut dee en aundre Bieekja läsen, wua opp to veloten es, dan woat dee daut halpen, eenen stoakjen Gloowen to kjrieen aun daut, waut de Bibel sajcht.

6. Woo kjennen de Elren äare Kjinja halpen, sikj selfst de Sachen to derchdenkjen? Jeff een Biespel. (See uk daut Bilt.)

⁶ Lieet june Kjinja, sikj selfst Sachen to derchdenkjen. De Elren haben veschiedne Mäajlichkjeiten, met äare Kjinja äwa de Bibel un äwa Gott to räden. Dise Mäajlichkjeiten komen veleicht opp, wan jie junt een Museum beseenen ooda eenen grooten, schmocken Goaden ooda eene Utstalinj en een Betel von Jehowa siene Zeijen. Biejlikj wan jie junt een Museum äwa Internet ooda perseenlich beseenen, kjenn jie june Kjinja oppmoakjsom moaken opp Dinja ooda Sachen, waut ieeschtemma passieet sent, un waut daut met de Bibel to doonen haft. Daut kaun dee halpen, een jratret Vetruen to kjrieen, daut et werkjlich soo es, waut de Bibel sajcht. Weeten june Kjinja,  daut Gott sien Nomen opp eenen Steen es, waut Moabitischa-Steen jenant woat un 3,000 Joa oolt es? De Moabitischa-Steen es en daut Louvre-Museum en Paris, Frankreich. Bie de Utstalinj “De Bibel un Gott sien Nomen” en de Hauptoffiz von Jehowa siene Zeijen en Warwick, New York es uk een nojemoakta Moabitischa-Steen. De Moabitischa-Steen wiest uk, daut de Kjennich Mescha von Moab sikj jäajen Israel stald. Dit stemt krakjt met de Bibel toop (2. Kjen. 3:4-5). Wan june Kjinja met äare ieejne Uagen dän Bewies seenen, daut de Bibel krakjt un opp to veloten es, woat dee äa Gloowen stoakja woaren (see uk 2. Chronik 9:6).

7-8. (a) Waut kjenn wie von de intressaunte Natua-Jesazen lieren? Jeff een Biespel. (See uk de Bilda.) (b) Woo kjenn jie june Kjinja äaren Gloowen aun eenen Schepfa stoakjen?

⁷ Rot june Kjinja too, äwa daut notodenkjen, waut see enne Natua seenen. Wan jie buten oppem Launt sent ooda toop eenen Goaden moaken, dan moakt de Kjinja oppmoakjsom, woo intressaunt eenje Sachen enne Natua jemoddelt sent. Dise Natua-Jesazen sent een Bewies, daut et eenen sea kluaken Schepfa jeft. Biejlikj sent väle Sachen soo jemoddelt aus eene Kroll. Opp de Bilda sent eenje to seenen: De Galaxieen, de Schnigjen, woo de Bläda ut jewesse Plaunten rutkomen un de Sonnbloomen. De Forscha haben soone Natua-Jesazen aul fa väle Joaren studieet. Eena von dee, waut Nicola Fameli heet, sajcht biejlikj, daut wan eena sikj de Krollen en jewesse Sachen vonne Natua besitt, dan es daut sea oppfaulent, daut dee krakjt opp deeselwje Wajch jemoddelt sent. Woo sikj de Krollen utbreeden, kaun eena mau rajcht uträakjnen. a

⁸ Wan june Kjinja enne School noch mea äwa de Natua lieren, dan woaren dee veleicht en, daut et en väl Stekjen Natua-Jesazen jeft. Räd wie mol von eenen Boom: De Staum deelt sikj en dikje Asta un de Asta deelen sikj en dendre Asta un dan jeft daut de kjliene Astakjes. Dit Natua-Jesaz kaun eena en veschiedne Sachen enne Natua seenen (daut nant sikj fractal). Oba wäa haft sikj dit intressaunte Natua-Jesaz utjedocht? Je dolla june Kjinja äwa soone Sachen nodenkjen, je sechra woaren dee eenen stoakjen Gloowen doaraun kjrieen, daut Gott aules jemoakt haft (Heb. 3:4). Irjentwanea wudd jie june Kjinja kjennen froagen: “Wan Gott ons jemoakt haft, wudd dee dan nich daut baste weeten, woo wie läwen sellen, daut ons daut scheen jeit?” Dan kjenn jie dee daut utlajen, daut hee ons daut derch de Bibel weeten lat.

 HALPT JUNE KJINJA, DE JESAZEN UT DE SCHREFT ÄWA RAJCHT UN ORRAJCHT WIEETTOSCHAZEN

9. Wuarom twiewlen june Kjinja veleicht aun de Jesazen ut de Schreft?

⁹ Wan june Kjinja aun de Jesazen ut de Schreft äwa rajcht un orrajcht twiewlen, dan prooft ruttofinjen, wuarom. Es daut, wiels dee nich jleewen, daut et werkjlich soo es, waut de Schreft lieet, ooda es daut wäajen dee aundre nich äaren Gloowen utlajen kjennen? Endoont woo daut es, jie kjennen june Kjinja halpen, de Jesazen ut de Schreft wieettoschazen, wan jie met dee toop daut Buak Een scheenet Läwen fa emma! studieren. b

10. Woo kjenn jie june Kjinja halpen, daut väl to räakjnen, met Jehowa Frind to sennen?

¹⁰ Halpt june Kjinja, daut väl to räakjnen, met Jehowa Frind to sennen. Wan jie met june Kjinja de Bibel studieren, dan brukt de Froagen un de Bilda von ut daut Buak Een scheenet Läwen fa emma!, om ruttofinjen, woo dee äwa veschiednet denkjen (Spr. 20:5). Biejlikj en daut 8. Kapitel woat Jehowa met eenen gooden Frint vejlikjt, waut ons halpt, aun soont to denkjen, waut ons toom Gooden es un ons beschizt. Nodäm daut jie äwa 1. Johanes 5:3 jerät haben, wudd jie dee froagen kjennen: “Wan Jehowa soon gooda Frint es, woo sell wie dan äwa daut denkjen, waut hee ons sajcht?” Veleicht es daut mau eene leichte Froag, oba daut kaun dee halpen to vestonen, daut Jehowa ons Jesazen jeft, wiels hee ons leeft (Jes. 48:17-18).

11. Woo kjenn jie june Kjinja halpen, dän Rot ut de Schreft noch mea to räakjnen? (Spricha 2:10-11).

¹¹ Rät doaräwa, woo goot daut es, daut notokomen, waut de Schreft lieet. Wan jie toop de Schreft ooda dän Varsch fa dän Dach läsen, rät doaräwa, woo june Famielje daut aul es togood jekomen, daut notokomen, waut de Schreft lieet. Weeten june Kjinja biejlikj, woo goot daut es, flietich un opprechtich to sennen? (Heb. 13:18). Jie kjennen dee uk utlajen, woo äant daut halpt, jesunda un schaftja to sennen, wan dee sikj no daut rechten, waut de Schreft sajcht (Spr. 14:29-30). Äwa soone Sachen to räden, woat june Kjinja halpen, dän Rot ut de Schreft noch mea to räakjnen (läs Spricha 2:10-11, NW).

12. Woo halpt een Voda sienen Sän, dän Rot ut de Schreft väl to räakjnen?

¹² Steve, een Voda en Frankreich, sajcht, woo hee un siene Fru äaren 16-joaschen Sän Ethan halpen to vestonen, daut Jehowa ons Jesazen jeft, wäajen hee ons leeft. Dee froagen am biejlikj: “Wuarom well Jehowa, daut wie disen Rot nokomen? Woo wiest ons dit, daut hee ons leeft? Woo wudd daut utkomen, wan wie disen Rot nich nokjeemen?” Äwa soont to vetalen, haft Ethan jeholpen, sikj secha to sennen, daut daut, waut Jehowa sajcht, rajcht es. Steve sajcht noch: “Wie wellen Ethan halpen to vestonen, daut de Weisheit ut de Schreft väl hecha es aus de Menschen äare.”

13. Woo kjenn jie june Kjinja lieren, daut notokomen, waut de Schreft lieet? Jeff een Biespel.

¹³ Lieet june Kjinja, daut notokomen, waut de Schreft sajcht. Veleicht motten june Kjinja enne School een Buak derchläsen. Woo kjenn jie dise Jeläajenheit dan nutzen? De Menschen, wua daut Buak von rät, sent veleicht grausom ooda haben sintelje Sorten Sex. Un daut Buak es veleicht soo jeschräwen, daut sikj daut soo hieet, daut met soone Sachen nuscht orrajcht es. Jie wudden june Kjinja kjennen tooroden, doaräwa notodenkjen, woo Jehowa denkjt, wan de Menschen soont doonen (Spr. 22:24-25;  1. Kor. 15:33; Filip. 4:8). Wan de Liera ooda de Schoolpoatna dee dan froagen, woo dee daut Buak jejleicht haben, woaren dee bäta reed sennen, fa äaren Gloowen entostonen.

LIEET JUNE KJINJA, FA DAUT ENTOSTONEN, WAUT DEE JLEEWEN

14. Woon Teema moakt eenje Jugentliche Angst, un wuarom?

¹⁴ De Jugentliche fält eenjemol dän Moot, fa äaren Gloowen entostonen. Veleicht kjrieen dee Angst, wan doa enne School von de Ewoluzion jerät woat. Wuarom? Wiels de Schoollierasch veleicht soo äwa de Ewoluzion räden, aus wan daut werkjlich soo wia. Wan jie Kjinja haben, woo kjenn jie dee halpen, sikj äwa daut secha to sennen, waut dee jleewen?

15. Waut kaun eenen Jugentlichen halpen, sikj noch sechra to sennen, waut hee jleeft?

¹⁵ Halpt june Kjinja, sikj noch sechra to sennen, waut see jleewen. June Kjinja brucken sikj nich schämen, wiels see aun eenen Schepfa jleewen (2. Tim. 1:8). Wuarom nich? Wiels doa soogoa een deel Forscha sent, waut daut vestonen kjennen, daut daut Läwen nich von veselfst kjeem. Dee kjennen dän Bewies seenen, daut doa een kluaka Schepfa es, dee aul daut Butajeweenelje jemoakt haft, waut läft. Doawäajen jleewen dee nich aun de Lia von de Ewoluzion, waut en väle Schoolen oppe Welt jelieet woat. Waut kaun june Kjinja halpen, sikj noch sechra to sennen, waut see jleewen? Dee kjennen doaräwa nodenkjen, waut aundre Breeda un Sestren bat doa jebrocht haft, daut to jleewen, daut daut Läwen jemoakt wort. c

16. Woo kjennen de Elren äare Kjinja halpen, fa äaren Gloowen aun eenen Schepfa entostonen? (1. Petrus 3:15). (See uk daut Bilt.)

¹⁶ Moakt june Kjinja reed, fa äaren Gloowen aun eenen Schepfa entostonen (läs 1. Petrus 3:15). Daut kaun eene Help sennen, met dee toop soone Artikjels opp jw.org derchtogonen, waut äwa de Schepfunk un de Ewoluzion räden. Froacht june Kjinja, woone Iedee aundre daut baste halpen kunn, aun eenen Schepfa to jleewen, un rät toop mea äwa dise Iedee. Halpt dee, doaraun to denkjen, daut see sikj nich brucken met äare Schoolpoatna strieden. Rot dee too, daut Teema opp soone Wajch uttolajen, waut leicht to vestonen es un Senn  moakt, wan doa wäa nieschierich es. Veleicht sajcht een Schoolpoatna to dee: “Ekj jleew bloos daut, waut ekj seenen kaun, un Gott hab ekj kjeenmol jeseenen.” Dee wudden dan sajen kjennen: “Stal die väa, du jeist en eenen Woolt, waut wiet auf es von doa, wua Menschen wonen, un du sitst doa een sea schmocket Hus. Wurscht du nich uk denkjen, daut daut Hus wäa jemoakt haft? Krakjt soo es daut met onsen Ieedbaul un aules, waut doa bowen es – daut mott wäa jemoakt haben!”

17. Woo kjennen de Elren äare Kjinja Moot moaken, no Jeläajenheiten to sieekjen, aundre de Woarheit ut de Bibel to vetalen? Jeff een Biespel.

¹⁷ Rot june Kjinja too, no Jeläajenheiten to sieekjen, aundre de Woarheit ut de Schreft to vetalen (Reem. 10:10). Jie kjennen dee wiesen, daut aundre von äaren Gloowen to vetalen een bät soo es, aus wan eena lieet, een Instrument to spälen. Aum Aunfank eeft eena bloos eene eefache Mellodie, oba met de Tiet woat eenem daut leichta, Musikj to moaken. Krakjt soo woat een Jugentlicha aum Aunfank veleicht opp eene leichte Wajch aundre von sienen Gloowen vetalen. Veleicht frajcht dee eenen Schoolpoatna: “Hast du daut jewist, daut de Forscha foaken waut ut de Natua nomoaken? Kaun ekj die doatoo mol een sea intressauntet Video wiesen?” Nodäm daut dee dän eent von de Videos Wort daut jemoakt? jewäsen haft, kaun dee dän froagen: “Wan de Forscha aul doafäa jeloft woaren, daut dee waut ut de Natua nomoaken, wäa saul dan fa daut jeloft woaren, waut en de Natua es?” Veleicht rieekjt dit aul too, om dän Schoolpoatna noch nieschieeja to moaken un daut dee mea doaräwa lieren well.

HALPT JUNE KJINJA WIEDA, ÄAREN GLOOWEN TO STOAKJEN

18. Woo kjennen de Elren äare Kjinja wieda halpen, eenen stoakjen Gloowen aun Gott to haben?

¹⁸ Wie läwen en eene Welt, wua de mieeschte Menschen nich aun Jehowa jleewen (2. Pet. 3:3). Soo, waut sell jie Elren doonen, wan jie met june Kjinja toop de Bibel studieren? Rot dee too, soone Teemasch deepa to studieren, waut äant halpen kjennen, Gott sien Wuat un daut, waut hee fa rajcht un orrajcht talt, dolla to achten. Lieet dee, sikj selfst Sachen to derchdenkjen, doaderch daut jie toop von besondre Sachen en Jehowa siene Schepfunk räden. Halpt dee, de butajeweenelje biblische Profezeiungen to vestonen, waut sikj aul erfelt haben. Un daut Wichtichste es: Bät met june Kjinja toop un bät fa dee. Wan jie dit doonen, dan kjenn jie junt secha sennen, daut Jehowa daut säajnen woat, waut jie aules doonen, om june Kjinja to halpen, eenen stoakjren Gloowen to kjrieen (2. Chr. 15:7).