De Apostel Paulus schreef Timotäus, waut uk een Eltesta wia: “Ekj saj die iernstlich ver Gott un Christus Jesus un de jewälde Enjel, die aun dise Aunwiesungen to hoolen. Unjasto die verhäa aules krakjt, ea du waut entscheiden deist, un moak kjeenen Unjascheet” (1. Tim. 5:21).

Well wie ons ieescht unjastonen, wäa nich mank dise Enjel sennen kaun. Dauts dietlich, daut dise Enjel nich von de 144,000 sent. Aus Paulus aun Timotäus schreef, wia noch kjeena von de Jesaulwde ooda de Apostel em Himmel. Doawäajen weet wie, daut dee nich kunnen “de jewälde Enjel” sennen (1. Kor. 15:50-54; 1. Tes. 4:13-17; 1. Joh. 3:2).

“De jewälde Enjel” kunnen uk nich dee sennen, waut bie de Sintflut wieren ojjehuarsom jeworden. Dee stalden je sikj opp dän Soton siene Sied un worden beese Jeista un wieren Jesus siene Fiend (1. Mo. 6:2, NW; Luk. 8:30-31; 2. Pet. 2:4). Dee woaren en de 1,000 Joa en eenen Aufgrunt jeschmäten woaren un doahinja woaren dee met dän Soton toop venicht woaren (Jud. 6; Opb. 20:1-3, 10).

“De jewälde Enjel”, von dee Paulus schreef, motten Enjel em Himmel jewast sennen, waut “Gott un Christus Jesus” unjastetten deeden, von dee daut en dänselwjen Varsch schrift.

Daut jeft väl dusende true Enjel (Heb. 12:22-23). Daut lat soo, daut Jehowa dee nich aula äwareene Oabeit jeft (Opb. 14:17-18). Biejlikj stald Jehowa bloos eenen Enjel aun toom de 185,000 assierische Soldoten ombrinjen (2. Kjen. 19:35). Oba hee jeef veleicht miere Enjel de Oppgow, “aul daut ut daut Kjennichrikj [von Jesus] ruttonämen, waut aundre tofaulbrinjt, un uk de Menschen, waut jesazloos haundlen” (Mat. 13:39-41). Aundre Enjel woaren veleicht doatoo aunjestalt woaren, de Jesaulwde fa dän Himmel tooptosaumlen (Mat. 24:31). Un noch aundre haben de Oppgow, ons opp aul onse “Wäaj to bewoaren” (Psa. 91:11; Mat. 18:10; vejlikj met Matäus 4:11; Luk. 22:43).

“De jewälde Enjel” von 1. Timotäus 5:21 wieren meist secha Enjel, waut eene besondre Oppgow jekjräajen hauden, waut met Gott siene Deena to doonen haud. En de Varzhen doaver un doahinja jeef Paulus gooden Rot fa Eltestasch, waut von de Vesaumlunk Respakjt vedeenen. Paulus säd, daut de Eltestasch “kjeenen Unjascheet” moaken sullen un nich Entscheidungen moaken, onen doa ieescht sea äwa notodenkjen. Dan jeef Paulus dee noch goode Uasoak, wuarom dee wudden sellen sienen Rot nokomen. Hee läd uk ut, daut de Eltestasch äare Breeda “ver Gott un Christus Jesus un de jewälde Enjel” deenen. Daut bediet, daut Jehowa, Jesus un de “jewälde Enjel” oppaussen, woo de Eltestasch sikj om de Vesaumlunk kjemren. Aulsoo: Eenje Enjel haben de Oppgow, de Vesaumlunk to halpen. Dee doonen biejlikj Gott siene Deena beschitzen, halpen dee met daut Prädichtwoakj un sajen Jehowa, waut dee beoobachten (Mat. 18:10; Opb. 14:6).