1-2. (a) Woo denkjen väl Breeda doaräwa, jeistlich to sennen? (b) Äwa waut fa wichtje Froagen woa wie en disen Artikjel räden?

EENE Sesta en Kanada sajcht: “Jeistlich to sennen haft mie jeholpen, mea Freid to haben un met Trubbels em Läwen omtogonen.” Een Brooda en Brasilien vetalt: “Wäajen wie ons aunstrenjen, eene jeistelje Jesennunk to haben, hab wie een scheenet Eheläwen un daut aul fa 23 Joa.” Un een Brooda von de Filippinen sajcht: “Jeistlich to sennen halpt mie, ennalich Fräd to haben un bäta met Breeda omtogonen, waut veschieden oppjewossen sent.”

² Dit wiest ons, woo goot daut es, jeistlich to sennen. Doawäajen denkj wie veleicht soo: “Woo kaun ekj em jeisteljen veraunkomen un noch mea Nutzen doavon haben, soo aus de Erfoarungen daut wiesen?” Ea wie daut beauntwuaten, mott wie ieescht mol jeneiw weeten, waut de Bibel äwa soone sajcht, waut jeistlich jesonnen sent. En disen Artikjel woa wie äwa dree wichtje Froagen räden: (1) Waut bediet daut, jeistlich to sennen? (2) Woone Biespels woaren ons halpen, em jeisteljen wiedatokomen? (3) Wuarom es daut leichta, jeistlich to sennen, wan wie ons aunstrenjen, “Christus . . . siene Jesennunk” to haben?

3. Woo beschrift de Bibel dän Unjascheet tweschen fleeschelje Menschen un jeistelje Menschen?

³ De Apostel Paulus halpt ons to vestonen, waut de Unjascheet es tweschen eenen fleescheljen Mensch un eenen jeisteljen Mensch (läs 1. Korinta 2:14-15, NW *; 2:16). Waut es de Unjascheet? “De fleeschelja Mensch nemt de Dinj von Gott sienen Jeist nich aun, wiels dee talt dee fa eene Dommheit; dee kaun dee uk nich vestonen . . . Oba de jeistelja Mensch beuadeelt aule Dinj” un haft “Christus . . . siene Jesennunk”. Paulus rot ons too, jeistlich to sennen. En waut fa Stekjen sent fleeschelje Menschen un jeistelje Menschen noch veschieden?

4-5. Woo es een fleeschelja Mensch?

⁴ Well wie mol seenen, woo een fleeschelja Mensch es. De Welt äare Jesennunk dreit sikj bloos om daut fleeschelje. Paulus nand dise Jesennunk “dän Jeist, dee en dee wirkjt, dee Gott nich jehorchen” (Efs. 2:2). Dis Jeist brinjt de mieeschte bat doa, daut dee eefach daut doonen wellen, waut de Mierheit deit. Dee wellen äa Fleesch toom Jefaulen läwen. Dee doonen daut, waut see fa rajcht talen, un jäwen doa nuscht om rom, waut Gott fa rajcht talt. Fleeschelje Menschen sent foaken too sea doarom todoonen, daut see wellen aunjeseenen sennen, rikj sennen ooda opp äa Stekj stonen bliewen.

⁵ Aun waut es noch to seenen, aus wäa fleeschlich jesonnen es? Wan dee biejlikj irjent Woakjen von daut Fleesch deit (Gal. 5:19-21). Paulus sien ieeschta Breef aun de Christen en Korint rät noch von miere aundre Sachen, waut wiesen, woo soone sent, waut eene fleeschelje Jesennunk haben. Dee veuasoaken biejlikj Spoolungen un Oneenichkjeiten, brinjen sikj unjarenaunda ver Jerecht, achten nich dee, waut de Leidunk haben, un haben kjeene Mot biem äten un drinkjen. Wan fleeschelje Menschen vesocht woaren, kjennen dee daut nich wadastonen (Spr. 7:21-22). Judas räd von soone, waut doa wudden soo fleeschlich sennen, daut dee “nich dän Jeist von Gott haben” wudden (Jud. 18-19).

6. Aun waut es een jeistelja Mensch to kjanen?

⁶ Waut bediet daut dan, een “jeistelja Mensch” to sennen? Soona, waut jeistlich es, intressieet sikj fa Gott; dee es jroz aundasch aus dee, waut fleeschlich es. Dee, waut jeistlich jesonnen sent, sträwen doano, Gott “emma änelja to woaren” (Efs. 5:1). Dee proowen, soo to denkjen aus Jehova un Sachen soo to seenen, aus Jehova dee sitt. Dee feelen sikj met Gott vebungen un proowen emma, sikj no siene Jebooten to rechten. Daut es krakjt daut Jäajendeel, waut fleeschelje Menschen doonen (Psa. 119:33; 143:10). Soona, waut jeistlich jesonnen es, deit nich de Woakjen von daut Fleesch, oba bemieecht sikj, “dän Jeist siene Frucht” to wiesen (Gal. 5:22-23). Eena, waut sikj sea fa daut jeistelje intressieet, haft eene jeistelje Jesennunk.

7. Waut sajcht de Schreft äwa soone, waut jeistlich jesonnen sent?

⁷ De Schreft rät sea goot äwa soone, waut jeistlich jesonnen sent. Matäus 5:3 (NW) sajcht: “Jlekjlich sent dee, dee sikj doaräwa em kloaren sent, daut an daut jeistelje fält, wiels an jehieet daut Kjennichrikj em Himmel.” En Reema 8:6 woat de Nutzen jewäsen, wan eena jeistlich jesonnen es. Daut sajcht doa: “Wäa sikj bloos met daut Fleesch  beschafticht, fa däm meent daut de Doot. Wäa oba dän Jeist haft, fa däm meent daut Läwen un Fräd.” Wan wie no daut jeistelje sträwen, dan woa wie nu aul met Gott un met ons selfst en Fräd sennen un de Hopninj haben, eewich to läwen.

8. Wuarom mott wie ons aunstrenjen, jeistlich to woaren un uk to bliewen?

⁸ Wie läwen nu en eene jefäadelje Welt. Wäajen de fleeschelje Jesennunk aulawäajen es, mott wie ons aunstrenjen, jeistlich to woaren un uk to bliewen. Wan wäa nich mea jeistlich es, dan jeft dee de Welt de Jeläajenheit, sien Denkjen met äare fleeschelje Jesennunk to fellen. Waut kaun ons halpen, daut väatobieejen? Woo kjenn wie em jeisteljen veraunkomen?

9. (a) Waut kaun ons halpen, em jeisteljen verauntokomen? (b) Äwa woone goode Biespels woa wie en disen Artikjel räden?

⁹ Wan een Kjint siene Elren beoobacht, dan lieet daut von dee un kaun dee nodoonen. Krakjt soo kjenn wie jeistlich veraunkomen, wan wie von stoakje Christen lieren un dee nodoonen. Oba Menschen, waut fleeschlich jesonnen sent, sent fa ons eene Woarnunk (1. Kor. 3:1-4). En de Bibel finj wie goode uk schlajchte Biespels. Oba wäajen wie jeistlich veraunkomen wellen, woa wie mol äwa eenje goode Biespels räden, waut wie kjennen nodoonen. Daut sent Jakob, Maria un Jesus.

10. Woo wees Jakob, daut hee een jeistelja Mensch wia?

¹⁰ Räd wie daut ieeschte von Jakob. Hee haud daut nich leicht en sien Läwen, soo aus de mieeschte von ons. Hee must met sienen Brooda Esau foadich woaren, waut fleeschlich jesonnen wia un am dootmoaken wull. Un hee must uk doamet foadich woaren, daut sien bejieeja Schwieevoda am emma wada utnutzen wull. Oba wan Jakob uk met Menschen to doonen haud, waut fleeschlich wieren, wia hee doawäajen jeistlich. Hee jleewd aun daut Vespräakjen, waut  Jehova Abraham jeef, un hee sorjd fa siene Famielje, dee een wichtjet Poat en Jehova sien Väanämen haud (1. Mo. 28:10-15). Aun Jakob siene Wieed un sien haundlen es to seenen, daut Gott sien Wellen un siene Jebooten fa am wichtich wieren. Biejlikj aus Jakob docht, Esau wudd am aunjriepen, säd hee to Gott: “Mien Jebäd es, daut du mie . . . bewoaren muchst. . . . Du hast vesproaken daut du halpen woascht un miene Nokomen woascht soo väl moaken aus doa Saunt aum Mäa es” (1. Mo. 32:7-13) Daut wia to seenen, daut hee aun daut Vespräakjen jleewd, waut Jehova am un siene Väavodasch jeef, un daut hee Jehova sienen Wellen doonen wull.

11. Aun waut wia to seenen, daut Maria jeistlich wia?

¹¹ Een aundret Biespel es Maria. Wuarom wull Jehova, daut Maria Jesus siene Mutta wort? Secha wia daut, wäajen see jeistlich jesonnen wia. Woo weet wie daut? See bewees daut kloa derch de scheene Wieed, met dee see Gott lowd, aus see äa Frintschoft Zacharias un Elisabet besocht (läs Lukas 1:46-55). Äare Wieed wiesen, daut see Gott sea leewd un daut see sea bekaunt wia met de hebräische Schreften (1. Mo. 30:13; 1. Sam. 2:1-10; Mal. 3:12). Denkj wie uk doaraun, daut Josef un Maria ver Jesus siene Jeburt nich jeschlajchtlich toopkjeemen, wan see sikj uk korz befriet hauden. Waut wiest ons daut? Daut wiest, daut Jehova sien Wellen fa an beid wichtja wia, aus äa Velangen notogonen (Mat. 1:25). Maria wia sea oppmoakjsom, waut aules en Jesus sien Läwen aunjinkj un waut fa weise Wieed dee säd, un see “leet sikj aul dise Wieed to Hoaten gonen” (Luk. 2:51). See wia sea om Gott sien Väanämen met dän Messias todoonen. Maria äa Biespel halpt ons notodenkjen, woo Jehova sien Wellen fa ons uk kaun daut ieeschte sennen.

12. (a) Woo deed Jesus sienen Voda no? (b) Woo kjenn wie Jesus nodoonen? (See daut Bilt aum Aunfank.)

¹² Oba wäa es von aule Menschen, waut jeläft haben, daut baste Väabilt, wan daut doarom jeit, jeistlich to sennen? Daut es Jesus. En sien gaunzet Läwen un en sienen Deenst wees hee, daut hee sienen Voda Jehova nodoonen wull. Hee docht un feeld un haundeld soo aus Jehova. Hee deed Gott sienen Wellen un recht sikj no daut, waut dee fa rajcht tald (Joh. 8:29; 14:9; 15:10). See wie mol, woo de Profeet Jesaja Jehova siene Jefeelen un sien Erboarmen beschrift, un vejlikj wie daut doamet, waut Markus äwa Jesus siene Jefeelen schrift (läs Jesaja 63:9; Markus 6:34). Wan wie wäm seenen, waut Help fält, sent wie dan emma reed dän bietostonen, soo aus Jesus? Jesus jeef sien bastet, om de goode Norecht bekaunttomoaken un to lieren (Luk. 4:43). Aul dit wiest, woo jeistelje Menschen sent.

13-14. (a) Waut kjenn wie von Menschen en onse Tiet lieren, waut jeistlich jesonnen sent? (b) Jeff een Biespel.

¹³ Vondoag dän Dach hab wie uk goode Väabilda von Menschen, waut jeistlich jesonnen sent un soo goot aus mäajlich Christus nodoonen. Veleicht hast du beoobacht, woo flietich dee em Prädichtdeenst sent, woo oppnäment un metfeelent dee sent ooda waut fa aundre goode Ieejenschoften dee haben. Dee sent uk onvolkomen un motten met äare Schwakheiten foadich woaren, oba dee strenjen sikj aun, dise goode Ieejenschoften to haben. Rachel, eene Sesta en Brasilien, sajcht: “Ea jleicht ekj daut emma sea, de Mood enne Welt mettomoaken. Doawäajen trock ekj mie nich sea veninftich aun. Oba aus ekj de Woarheit kjanen lieed, wull ekj jeistlich sennen. Mie foll daut schwoa, mien Läwen to endren, oba  mie funk daut aun väl scheena to gonen un ekj kjrieech werkjlich eenen Senn em Läwen.”

¹⁴ Reylene von de Filippinen haud eenen aundren Trubbel. See schauft sea doaropp, sikj huach uttolieren un eene goode Oabeit to kjrieen, om em Läwen verauntokomen. See sajcht: “Daut, waut ekj mie em jeisteljen väajenomen haud, veschwunk soo bie sacht. Ekj wort en, en mien Läwen fäld waut, waut väl wichtja wia aus miene Oabeit. Doawäajen schauft ekj wada doaropp, daut Jehova daut ieeschte en mien Läwen wia.” Von dan aun vetrud Reylene opp Jehova sien Vespräakjen en Matäus 6:33-34. See sajcht: “Ekj sie mie secha, daut Jehova fa mie sorjen woat.” Veleicht hab jie en june Vesaumlunk uk soone Väabilda. Well wie dee nodoonen, soo aus dee Christus nodoonen (1. Kor. 11:1; 2. Tess. 3:7).

15-16. (a) Waut mott wie doonen toom soo sennen aus Christus? (b) Woo kjenn wie Christus siene Jesennunk haben?

¹⁵ Woo kjenn wie Christus nodoonen? En 1. Korinta 2:16 rät daut doavon, daut wie sellen soo jesonnen sennen aus Christus. Un en Reema 15:5 (NW) sajcht daut, wie sellen “deeselwje Jesennunk haben, aus Christus Jesus haud.” Daut wie kjennen soo sennen aus Christus, mott wie krakjt weeten, woo hee denkjt un woo hee es, un dan en siene Footspoaren gonen. Jesus wia daut ieeschte doarom todoonen, Frint met Gott to sennen. Wan wie Jesus nodoonen, dan woa wie emma dolla soo woaren aus Jehova. Dit wiest, woo wichtich daut es, daut wie lieren, soo to denkjen aus Jesus.

¹⁶ Woo kjenn wie daut? Jesus siene Jinja sagen siene Wunda, hieeden, woo hee aundre lieed, un beoobachten, woo hee met aule Sorten Menschen omjinkj un woo hee sikj aun Gott siene Gruntsauzen hilt. De Jinja säden: “Wie send Zeije von auldem, waut hee” deed (Apj. 10:39, Friesenbibel). Wie kjennen Jesus oba nich seenen. Jehova haft de Evangelien oppschriewen loten, daut wie weeten kjennen, woo Jesus krakjt es. Wan wie de Bibelbieekja Matäus, Markus, Lukas un Johanes läsen, dan lia wie, woo Christus denkjt. Daut halpt ons, daut wie “en siene Footspoaren gonen” un “soo jesonnen [sent]” aus Christus (1. Pet. 2:21; 4:1).

17. Woo woat ons daut halpen, soo to denkjen aus Christus?

¹⁷ Woo woat ons daut halpen, soo to denkjen aus Christus? Krakjt soo aus noarhauftet Äten onsen Kjarpa stoakjt, soo woa wie em jeisteljen jestoakjt, wan wie ons met Christus sien Denkjen aufjäwen. Met de Tiet lia wie dan, waut Christus en jieda Loag doonen wudd. Daut woat ons halpen, soo to entscheiden, daut wie een reinet Jewessen haben un daut Gott sikj äwa ons freit. Denkj jie nich uk, daut wie Uasoak haben, “dän Harn Jesus Christus gaunz de Kontroll äwa” ons haben to loten? (Reem. 13:14).

18. Waut hast du en disen Artikjel jelieet äwa jeistlich jesonnen sennen?

¹⁸ En disen Artikjel hab wie jeseenen, waut daut bediet, jeistlich to sennen. Wie haben uk jeseenen, waut wie von soone lieren kjennen, waut jeistlich sent. Dan hab wie noch jelieet, woo wie em jeisteljen veraunkomen kjennen, wan wie “Christus . . . siene Jesennunk” haben. Oba daut jeft noch mea, waut wie äwa jeistlich sennen lieren kjennen. Woo kjenn wie biejlikj unjasieekjen, woo stoakj wie em jeisteljen sent? Waut kjenn wie noch doonen toom jeistlich stoakja woaren? Un waut woat daut aun ons Läwen doonen? De näakjsta Artikjel woat ons dise Froagen beauntwuaten.