1. Äwa waut saul eene Sesta nodenkjen, ea see sikj befriet?

AULE Christen haben een volkomnet Haupt äwa sikj un daut es Jesus. Oba wan eene Sesta sikj befriet, dan es uk äa Maun äa Haupt un dee es onvolkomen. Daut es nich emma leicht. Doawäajen saul eene Sesta, waut sikj befrieen well, äwalajen: “Aun waut es daut to seenen, daut dis Brooda een feinet Famieljenhaupt sennen woat? Kjemt daut jeistelje daut ieeschte en sien Läwen? Wan nich, wuarom denkj ekj, daut dee lota een goodet Haupt sennen woat, wan wie ons ieescht befriet haben?” Un eene Sesta wudd uk sellen äwalajen: “Waut fa Ieejenschoften hab ekj, waut goot fa dän Ehestaunt sent? Sie ekj jeduldich un friejäwrich? Es Jehova mien basta Frint?” (Liera 4:9, 12). Wan eene Sesta goode Entscheidungen moakt, ea see sikj befriet, dan kaun ar daut halpen, daut see lota eenen gooden Ehestaunt haft.

2. Waut woa wie en disen Artikjel seenen?

² Millionende Sestren sent een sea goodet Biespel, wiels dee äaren Maun unjadon sent. Doafäa sent dee sea to lowen! Daut jeit ons sea scheen, Jehova met soone true Frues toop to deenen! En disen Artikjel woa wie äwa dree Froagen räden: (1) Waut vonne Schwierichkjeiten haben eenje Ehefrues? (2) Wuarom es eene Ehefru wellich reed, äaren Maun unjadon to sennen? (3) Waut kjennen Ehemana un Ehefrues lieren von Jesus un von Abigajil un Maria, waut Jesus siene Mutta wia?

3. Wuarom haben aule Ehepoaren mol Schwierichkjeiten?

³ De Ehestaunt es een volkomnet Jeschenkj von Gott, oba de Menschen sent aula onvolkomen (1. Joh. 1:8). Doawäajen  rät Gott sien Wuat von “dän Trubbel”, dee “äwa befriede Menschen komen woat” (1. Kor. 7:28). Well wie mol seenen, waut vonne Schwierichkjeiten eene Ehefru haben kaun.

4. Wuarom feelen eenje Frues sikj weinja wieet, wan see äaren Maun sellen unjadon sennen?

⁴ Eenje Ehefrues denkjen, daut see weinja wieet sent, wan see äaren Maun sellen unjadon sennen. Daut kaun doamet to doonen haben, woo dee oppjewossen sent. Marisol, waut en de Stäts wont, sajcht: “Bie ons sajen se emma to de Frues, daut see en aule Stekjen krakjt soo väl to sajen haben aus de Mana. Ekj weet, daut Jehova dän Ehemaun aus Haupt aunjestalt haft un daut dee siene Fru respakjten saul un de Fru saul dän unjadon sennen. Oba daut es nich emma leicht, rajcht äwa dise Sach to denkjen.”

5. Waut vonne orrajchte Iedeeen haben eenje äwa Frues?

⁵ Veleicht es eene Fru uk met eenen Maun befriet, waut denkjt, daut Frues weinja wieet sent. Eene Sesta, waut Ivon heet un en Sied-Amerika wont, sajcht: “En onse Jäajent äten ieescht de Mana un dan de Frues. De kjliene Mejalen sellen Äten moaken un reinmoaken, oba de kjliene Junges woaren von äare Mame un von de Sestren bedeent un dee kjrieen to hieren, daut see de Kjennichs em Hus sent.” Eene Sesta, waut Yingling heet un en Asien wont, sajcht: “Opp miene Sproak sajen se foaken, daut daut goanich fält, daut eene Fru sea kluak es ooda sikj met waut vesteit. Dee saul aulmols bloos aul de Husoabeit doonen un haft nich de Frieheit äaren Maun äare Meenunk to sajen.” Soon Ehemaun, waut nich Leew wiest un nich daut deit, waut de Schreft sajcht, moakt siene Fru daut Läwen schwoa. Dee deit uk nich Jesus no, un Jehova es nich tofräd met dän (Efs. 5:28-29; 1. Pet. 3:7).

6. Waut sellen Ehefrues doonen, daut see noch jratre Frind met Jehova woaren?

⁶ En dän väajen Artikjel hab wie jeseenen, daut Jehova haben well, daut de Ehemana em jeisteljen un em tieteljen fa äare Famielje sorjen sellen un uk doafäa, daut dee sikj jeleeft feelen (1. Tim. 5:8). Befriede Sestren sent uk drock, oba dee sellen sikj doawäajen jieda Dach de Tiet nämen, om Gott sien Wuat to läsen un doaräwa notodenkjen un opprechtich to Jehova to bäden. Daut es eenjemol goanich soo leicht. Veleicht sent de Ehefrues soo drock, daut see denkjen, see haben goanich mea de Tiet un de Krauft doatoo. Wuarom sellen dee sikj doawäajen de Tiet nämen? Wiels Jehova well, daut jieda eena von ons Frint met am woat un daut uk blift (Apj. 17:27).

7. Waut woat eene Fru daut leichta moaken, unjadon to sennen?

⁷ Eenjemol kaun daut fa eene Fru schwoa sennen, äaren onvolkomnen Ehemaun unjadon to sennen, soo aus Jehova daut haben well. Oba waut woat ar daut leichta moaken? Wan ar daut kloa es, wuarom see no de Schreft no saul unjadon sennen.

8. Wuarom es eene Fru reed, äaren Maun unjadon to sennen, soo aus Efeesa 5:22-24 daut sajcht?

⁸ Eene christelje Ehefru es äaren Maun wellich unjadon, wiels Jehova daut haben well (läs Efeesa 5:22-24). See vetrut äaren himlischen Voda, wiels see weet, daut hee ar leeft un daut hee nuscht von ar velangen wudd, waut nich goot fa ar wia (5. Mo. 6:24; 1. Joh. 5:3).

9. Woo woat daut utkomen, wan eene Sesta äaren Maun wellich unjadon es?

 ⁹ En de Welt denkjen se, daut de Frues weinja wieet sent, wan dee sellen unjadon sennen, un daut daut goanich needich es, daut to doonen, waut Jehova haben well. Oba dee, waut soo denkjen, kjanen nich onsen leeftoljen Gott. Jehova räakjent de Frues väl, un hee wudd dee kjeenmol een Jeboot jäwen, waut auntovestonen jeef, daut dee weinja wieet wieren. Wan eene Sesta sikj aunstrenjt, daut to doonen, waut Jehova haben well, dan woat daut en äare Famielje mea Fräd jäwen (Psa. 119:165). Daut kjemt äaren Ehemaun togood un ar un uk de Kjinja.

10. Waut lia wie von daut, waut Carol sajcht?

¹⁰ Eene Fru, waut äaren onvolkomnen Maun unjadon es, bewiest, daut see Jehova respakjt un leeft, wiels hee dän Maun aus Haupt aunjestalt haft. Carol, waut en Sied-Amerika wont, sajcht: “Ekj weet, daut mien Maun Fäla moaken woat. Un aun daut, woo ekj met siene Fäla omgo, es to seenen, woo sea ekj Jehova leew. Doawäajen schauf ekj doaropp unjadon to sennen, wiels ekj mienen himlischen Voda jefaulen well.”

11. Waut halpt Aneese to vejäwen, un waut kjenn wie von dee lieren?

¹¹ Fa eene Ehefru kaun daut schwoa sennen, respakjtvoll un unjadon to sennen, wan sikj ar daut soo späat, daut äa Maun nuscht om äare Jefeelen un Sorjen romjeft. Waut deit eene befriede Sesta, waut Aneese heet, wan soont oppkjemt? See sajcht: “Ekj proow nich doll to woaren; ekj denkj leewa doaraun, daut wie aula Fäla moaken. Ekj well krakjt soo vejäwen aus Jehova. Wan ekj daut doo, dan feel ekj mie wada ruich” (Psa. 86:5). Eene Fru, waut reed es to vejäwen, es daut foaken väl leichta, unjadon to sennen.

12. Waut fa Biespels finj wie enne Schreft?

¹² Eenje denkjen, daut eena schwak es, wan eena unjadon es. Oba daut stemt nich. De Schreft rät von väle, waut äwanäment wieren, oba waut doawäajen unjadon wieren. Well wie mol seenen, waut wie  von Jesus un von Abigajil un Maria lieren kjennen.

13. Wuarom es Jesus Jehova unjadon? Laj daut ut.

¹³ Jesus es Jehova unjadon. Bediet daut, daut hee nich kluak jenuach es ooda sikj selfst nich met väl vesteit? Nä, bloos eena, waut sea kluak es, kaun soo eefach un dietlich lieren aus Jesus (Joh. 7:45-46). Jehova haud soon grootet Vetruen opp Jesus, daut hee am methalpen leet, aus hee aules em Himmel un oppe Ieed muak (Spr. 8:30; Heb. 1:2-4). Un no sien oppstonen vom Doot haft Jehova Jesus “aule Jewault jejäft em Himmel uk oppe Ieed” (Mat. 28:18). Jesus vesteit sikj met väl, oba hee lat sikj doawäajen von Jehova leiden. Wuarom? Wäajen hee sienen Voda leeft (Joh. 14:31).

14. Waut kaun een Ehemaun (a) doavon lieren, woo Jehova äwa Frues denkjt? (b) von Spricha 31 lieren?

¹⁴ Waut Ehemana lieren kjennen. Jehova säd nich, daut eene Ehefru äaren Maun unjadon sennen sull, wäajen dee weinja wieet wia. Daut es doaraun to seenen, daut Jehova Mana un uk Frues utläsd toom met Jesus toop harschen (Gal. 3:26-29). Jehova stald sienen Sän äwa jewesset aun, wiels hee sikj opp am veleet. Krakjt soo woat een weisa Ehemaun siene Fru äwa jewesset aunstalen. Gott sien Wuat sajcht, daut eene feine Ehefru äwa daut aunjestalt es, waut em Hus jedonen woat, un daut dee Launt kjeepen un vekjeepen kaun un Jeschaften driewen (läs Spricha 31:15-16, 18). Dee es nich eene Sklow, waut nich sajen kaun, waut see denkjt. Äa Maun vetrut ar un horcht no äare Iedeeen (läs Spricha 31:11, 26-27). Wan een Maun siene Fru opp dee Wajch Respakjt wiest, dan woat dee am wellich unjadon sennen.

15. Waut kjennen Ehefrues von Jesus lieren?

¹⁵ Waut Ehefrues lieren kjennen. Jesus kunn väl doonen un hee docht nich, daut hee weinja wieet wia, wan hee Jehova unjadon wia (Luk. 22:42; 1. Kor. 15:28). Eene feine Ehefru, waut Jesus nodeit, denkjt uk nich, daut see weinja wieet es, wan see äaren Maun unjadon es. See woat dän nich bloos unjastetten, wäajen see dän leeft, oba wäajen see Respakjt fa Jehova haft un dän leeft.

16. Waut fa Schwierichkjeiten haud Abigajil no 1. Samuel 25:3, 23-28 no? (See daut Bilt oppe väaschte Sied.)

¹⁶ Abigajil haud eenen Maun, waut Nabal heet. Hee wia stolt un ondankboa un docht bloos aun sikj. Oba Abigajil proowd nich, dän loostowoaren. See haud bloos kunt wachten un nuscht doonen, bat David un siene Poatna äaren Maun dootmuaken. Enne Städ daut deed see waut, om Nabal un de aundre von äa Hus to beschitzen. Stal die väa, woo äwanäment Abigajil sennen must, daut see ver 400 Mana kjeem, waut Kjrichsjereetschoft hauden, un doa respakjtvoll met David räd. See wia mau rajcht reed sikj fa daut to entschuldjen, waut äa Ehemaun jedonen haud (läs 1. Samuel 25:3, 23-28). David wort en, daut Jehova dise äwanämende Fru jeschekjt haud, om am gooden Rot to jäwen, daut hee nich eenen grooten Fäla muak.

17. Waut kjennen Ehemana von David un Abigajil lieren?

¹⁷ Waut Ehemana lieren kjennen. Abigajil wia sea väabedocht. Un daut wia goot, daut David no ar horcht, wiels opp dee Wajch muak hee nich Menschen doot, waut nuscht veschulcht hauden. Een feina Ehemaun woat uk sea äwa daut nodenkjen, waut siene Fru sajcht, wan hee waut wichtjet entscheiden mott. Woomäajlich  woat am daut halpen, daut hee nich eene schlajchte Entscheidunk moakt.

18. Waut kjennen Frues von Abigajil lieren?

¹⁸ Waut Ehefrues lieren kjennen. Eene Fru, waut Jehova leeft un respakjt, kaun väl goodet fa äare Famielje doonen, endoont aus äa Maun no Jehova horcht un dän deent ooda nich. Dee woat nich proowen äaren Maun loostowoaren. See woat respakjtvoll un unjadon sennen un hopen, daut äa Maun Jehova kjanen lieren well (1. Pet. 3:1-2). Oba waut, wan dee de Woarheit nich aunnemt? Jehova woat daut doawäajen väl räakjnen, wan see am tru es un äaren Maun unjadon blift.

19. Wanea woat eene Fru daut nich doonen, waut äa Maun velangt?

¹⁹ Wanea woat eene feine Fru äaren Maun nich unjadon sennen? Wan dee waut von ar velangt, waut nich met biblische Jesazen ooda Gruntsauzen tooppaust. Saj wie mol, eene Sesta haft eenen Maun, waut nich aun Jehova jleeft, un dee sajcht, daut see lieejen saul ooda stälen ooda sestwaut doonen, waut jäajen de Schreft es. Aule Christen – uk de befriede Sestren – sellen daut ieeschte doarom todoonen sennen, Jehova to jehorchen. Wan eene Sesta waut doonen saul, waut nich met biblische Gruntsauzen tooppaust, dan wudd see daut leeftolich un dietlich utlajen sellen, wuarom see daut nich doonen kaun (Apj. 5:29).

20. Woo weet wie, daut Maria Jehova väl räakjend?

²⁰ Maria räakjend Jehova väl un daut späat sikj soo, daut see de Schreft goot kjand. Aus see met Elisabet räd, waut Johanes dän Deepa siene Mutta wia, räd Maria äwa 20 Mol von waut, waut en de Hebräische Schreften bennen stunt (Luk. 1:46-55). Maria haud sikj met Josef de Ehe vesproaken. Oba daut es oppfaulent, daut Jehova sien Enjel nich daut ieeschte no Josef kjeem. Hee kjeem no Maria un säd to ar, daut see wudd Jesus siene Mutta woaren (Luk. 1:26-33). Jehova kjand Maria goot un wist, daut see sienen Sän leewen wudd un goot no dän oppaussen. Un secha räakjend Maria Jehova uk dan noch  väl, aus Jesus aul vom Doot oppjestonen un nom Himmel jefoaren wia (Apj. 1:14).

21. Waut kaun een Ehemaun von Maria äare Jeschicht lieren?

²¹ Waut Ehemana lieren kjennen. Een kluaka Ehemaun es schaftich, wan siene Fru de Schreft goot kjant. Hee oajat sikj nich doaräwa un denkjt uk nich, daut see nu well daut Haupt sennen. Hee weet, daut et fa de gaunze Famielje toom gooden es, wan siene Fru de Schreft un de biblische Gruntsauzen goot kjant. Veleicht es siene Fru bäta utjelieet aus hee, oba daut es doawäajen siene Veauntwuatunk, de Famielje em jeisteljen veropptogonen un biejlikj daut Famieljenstudium to fieren (Efs. 6:4).

22. Waut kjennen Ehefrues von Maria lieren?

²² Waut Ehefrues lieren kjennen. Eene Fru saul äaren Maun unjadon sennen, oba see mott selfst doano seenen, daut see em Gloowen stoakj blift (Gal. 6:5). Doawäajen mott see sikj Tiet nämen toom fa sikj selfst studieren un nodenkjen. Daut woat ar halpen, Jehova to leewen un to respakjten un äaren Ehemaun wellich unjadon to sennen.

23. Woo kjemt eene Ehefru, dee äare Famielje un uk de Vesaumlunk daut togood, wan see unjadon es?

²³ Ehefrues, waut Jehova leewen un äaren Maun unjadon sent, woaren schaftja un tofrädna sennen aus dee, waut daut nich doonen. Dee sent uk een goodet Biespel fa junge Mana un junge Frues. Un dee halpen met, daut aule en de Famielje un en de Vesaumlunk sikj kjennen woolfeelen (Tit. 2:3-5). Vondoag dän Dach sent de mieeschte, waut Jehova tru deenen, Frues (Psa. 68:11, NW). Oba wie aula haben eene wichtje Oppgow en de Vesaumlunk. En dän näakjsten Artikjel woa wie seenen, woo Mana un Frues äare Oppgow nokomen kjennen.