1-2. Woo sell wie no Matäus 5:11 no äwa Schwierichkjeiten denkjen?

JESUS vespruak, daut siene Nofolja wudden werkjlich schaftich sennen. Oba hee säd uk, daut dee wudden motten schwoaret beläwen (Mat. 10:22-23; Luk. 6:20-23). Fa ons es daut eene Freid, daut wie kjennen Christen sennen. Oba woo wudd ons daut gonen, wan wie Jäajenstaunt von onse Famielje ooda von de Rejierunk hauden ooda wan onse Schoolpoatna ooda Oabeitspoatna ons to waut schlajchtet veleiden wullen? Secha wudd wie ons dan Sorjen moaken.

² Jeweenlich freit een Mensch sikj nich, wan dee vefolcht woat. Un doch sajcht Gott sien Wuat, daut wie daut doonen sellen. De Jinja Jakobus muak dietlich, daut wie bie Schwierichkjeiten nich brucken mootloos woaren, oba daut wie ons freien kjennen (Jak. 1:2, 12). Un Jesus säd uk, daut wie sullen seelich, ooda schaftich, sennen, wan wie vefolcht worden (läs Matäus 5:11). Oba woo paust daut toop? Daut lia wie von Jakobus sienen Breef. Well wie nu mol seenen, met waut fa Schwierichkjeiten de Christen to jane Tiet musten foadich woaren.

3. Waut wort nich lang nodäm daut Jakobus een Christ wort?

³ Jesus sien Haulfbrooda Jakobus wia noch nich lang een Christ, aus doa en Jerusalem Vefoljunk oppkjeem (Apj. 1:14; 5:17-18). Un aus de Jinja Stefanus omjebrocht wort, musten väl Christen sikj fuatbrinjen un “see worden äwa gaunz Judäa un Samaria vestreit”. Soo kjeemen eenje von dee soogoa bat Ziepern ooda Antiochia (Apj. 7:58–8:1; 11:19). Daut wia  secha nich eene leichte Tiet. Un doch prädijden dee flietich aulawäajen un opp väl Städen jeef daut dan Vesaumlungen (1. Pet. 1:1). Oba doa wudden noch väl schwandre Tieden komen.

4. Met waut fa aundre Trubbels musten de Christen foadich woaren?

⁴ De Christen musten met veschiedne Trubbels foadich woaren. Ojjefäa aune 50 n. Chr. schekjt de reemischa Kjeisa Klaudius aule Juden von Room fuat. Soo musten uk Christen, waut Juden wieren, äa Tus veloten (Apj. 18:1-3). Un dan ojjefäa aune 61 schreef de Apostel Paulus, daut se von siene Gloowesbreeda schlajcht jerät un dee faustjenomen hauden un äa Hab un Goot wajchjenomen (Heb. 10:32-34). Un krakjt soo aus aundre Menschen wieren uk eenje Christen oam ooda krank (Reem. 15:26; Filip. 2:25-27).

5. Waut fa Froagen woa wie nu derchgonen?

⁵ Jakobus schreef sienen Breef irjentwanea ver daut Joa 62 n. Chr. un hee wist, waut fa Schwierichkjeiten siene Gloowesbreeda derchmuaken. Doawäajen wull Jehova dise Christen derch Jakobus Rot jäwen, daut dee kunnen Freid haben. Well wie ons nu mol Jakobus sienen Breef unjastonen un äwa een poa Froagen nodenkjen: Von waut fa eene Sort Freid schreef Jakobus? Waut wudd eenem kjennen de Freid wajchnämen? Woo kaun Weisheit, Gloowen un Moot ons halpen, en schwoare Tieden nich de Freid to velieren?

6. Wuarom kjenn wie no Lukas 6:22-23 no Freid haben, wan wie Schwierichkjeiten haben?

⁶ Eenje Menschen denkjen veleicht, daut dee bloos dan kjennen schaftich sennen,  wan dee jesunt sent, rikj sent ooda wan de Famielje daut scheen jeit. Oba de Freid, wua Jakobus von schreef, haft nuscht met onse Omstend to doonen. Dee es Poat von dän heiljen Jeist siene Frucht (Gal. 5:22). Een Christ haft Freid ooda es schaftich, wiels dee weet, daut Jehova eenen Jefaulen aun am haft un daut dee Jesus nodeit (läs Lukas 6:22-23; Kol. 1:10-11). Onse Freid es soo aus eene Flaum en eene Laump. Dee jeit nich ut, wan et Trubbel met de Jesuntheit jeft ooda daut Jelt knaup es. Un dee jeit uk nich ut, wan se äwa ons spotten ooda wan wie von de Famielje vefolcht woaren. Un wan Jäajna dee wellen utmoaken, dan brent dee bloos noch dolla. Wan wie Schwierichkjeiten wäajen onsen Gloowen haben, dan bewiest daut, daut wie werkjlich Jesus siene Nofolja sent (Mat. 10:22; 24:9; Joh. 15:20). Doawäajen schreef Jakobus: “Miene Breeda, nämt daut met Freiden aun, wan jie opp veschiedne Wäaj jeprooft un vesocht woaren” (Jak. 1:2).

7-8. Waut deit daut aun onsen Gloowen, wan wie Schwierichkjeiten haben?

⁷ Jakobus sajcht, wuarom Christen reed sent, soogoa groote Schwierichkjeiten uttohoolen. Hee schrift: “Doaderch daut jun Gloowen en de Vesieekjungen bestonen blift, lia jie jeduldich sennen” (Jak. 1:3). Schwierichkjeiten sent soo aus een Fia, waut eena brukt toom een Schwieet moaken. Wan eena daut heet moakt un dan aufkjeelt, dan woat daut Schwieet hoada. Un krakjt soo es daut met onsen Gloowen. Wan wie Schwierichkjeiten jeduldich uthoolen, dan woat ons Gloowen stoakja. Doawäajen schreef Jakobus uk: “Derch jeduldich sennen sell jie bat aum Enj behoolen bliewen, daut jie fälaloos un onbeschädicht sent” (Jak. 1:4). Wan wie seenen, woo de Schwierichkjeiten ons halpen eenen stoakjren Gloowen to kjrieen, dan kjenn wie dee met Freiden uthoolen.

⁸ En sienen Breef säd Jakobus uk, waut ons wudd kjennen de Freid wajchnämen. Waut es daut un woo kjenn wie doamet foadich woaren?

9. Wuarom fält ons daut aun Weisheit?

⁹ Waut ons schwoa sennen kaun: Wan wie nich weeten, waut wie doonen sellen. Wan wie en Schwierichkjeiten komen, dan well wie, daut Jehova ons halpt goode Entscheidungen to moaken. Wie wellen am tru bliewen un am jefaulen. Un wie wellen, daut daut fa onse Breeda un Sestren goot utkjemt, waut wie doonen (Jer. 10:23, NW). Ons fält daut aun Weisheit, daut wie weeten, waut wie doonen sellen un waut wie to onse Jäajna sajen sellen. Sest wudd wie  leicht kjennen mootloos woaren ooda de Freid velieren.

10. Waut sell wie no Jakobus 1:5 no doonen, daut wie Weisheit kjrieen?

¹⁰ Waut wie doamet doonen kjennen: Froag Jehova no Weisheit. Daut wie en schwoare Tieden de Freid hoolen kjennen, mott wie Jehova no Weisheit froagen, daut wie kjennen goode Entscheidungen moaken (läs Jakobus 1:5). Oba waut sell wie doonen, wan wie jleewen, daut Jehova nich fuaz no onse Jebäda horcht? Jakobus rot ons too, daut wie Jehova emma wada sellen no Weisheit froagen. Jehova woat daut nich too väl un am woat daut uk nich oajren. Ons himlischa Voda woat ons jieren de Weisheit jäwen, waut ons fält toom uthoolen (Psa. 25:12-13). Jehova weet, waut wie derchmoaken. Hee es metliedent un wellich reed ons to halpen. Jeft ons daut nich groote Freid? Oba woo jeft Jehova ons Weisheit?

11. Waut mott wie noch doonen toom Weisheit kjrieen?

¹¹ Jehova jeft ons derch sien Wuat Weisheit (Spr. 2:6). Doawäajen mott wie enne Bibel studieren un uk en onse Bieekja. Oba daut jeit doa nich bloos om mea to weeten; wie motten uk daut nokomen, waut Gott ons sajcht. Jakobus schreef: “Jie motten oba uk doonen waut daut Wuat sajcht, wiels bloos hieren, rieekjt nich too” (Jak. 1:22). Wan wie ons aun daut hoolen, dan woa wie noch frädelja woaren, mea Metleet haben un noch derchjedochta sennen (Jak. 3:17). Soone goode Ieejenschoften woaren ons halpen, met aule Schwierichkjeiten foadich to woaren un de Freid nich to velieren.

12. Wuarom sell wie de Schreft goot kjanen?

¹² Krakjt soo aus een Spieejel wiest Gott sien Wuat ons, wua wie ons noch vebätren motten un woo wie daut doonen kjennen (Jak. 1:23-25). Wan wie Gott sien Wuat  studieren, dan woa wie veleicht en, daut wie noch aun onse Natua schaufen motten. Jehova kaun ons halpen, daut wie eenen gooden Waundel haben un met Sachen ooda met Menschen jeduldich sent, waut ons wudden kjennen doll moaken. Dan kjenn wie uk leichta met Schwierichkjeiten foadich woaren, kloara denkjen un bätre Entscheidungen moaken (Jak. 3:13). Daut wiest, woo wichtich daut es, de Schreft goot to kjanen.

13. Wuarom sell wie von de Menschen von de Bibeltiet studieren?

¹³ Eenjemol es daut soo, daut wie ut onse ieejne Fäla lieren motten. Oba daut jeit nich scheen. Daut es väl bäta, wan wie doavon lieren, woo daut bie aundre utkjeem, wan dee waut rajchtet ooda orrajchtet deeden. Doawäajen säd Jakobus, daut wie sullen äwa Menschen von de Bibeltiet nodenkjen, soone aus Abraham, Rahab, Hiob un Elia (Jak. 2:21-26; 5:10-11, 17-18). Dise true Menschen kunnen met äare Schwierichkjeiten foadich woaren un äare Freid hoolen. Un daut wiest ons, daut wie daut met Jehova siene Help krakjt soo goot kjennen.

14-15. Wuarom sell wie met onsen Twiewel waut doonen?

¹⁴ Waut ons schwoa sennen kaun: Wan wie aun waut twiewlen. Veleicht felt ons daut eenjemol schwoa, waut en de Schreft to vestonen. Ooda Jehova horcht nich soo no onse Jebäda, aus wie ons väajestalt haben. Dan wudd wie leicht kjennen oppem Twiewel komen. Wan wie doamet nuscht doonen, dan woa wie ons nich mea soo sea met Jehova vebungen feelen un ons Gloowen woat schwak woaren (Jak. 1:7-8). Un wie kjennen soogoa onse Hopninj velieren.

¹⁵ De Apostel Paulus säd, daut onse Hopninj soo es aus een Anka (Heb. 6:19). Jeweenlich haft een Schepp eenen Anka, daut daut bie eenen Storm opp siene Städ blift un nich jäajen de Steenakaunt däwat. Oba de Anka halpt bloos waut, wan de Kjäd tweschen daut Schepp un dän Anka nich aufritt. De Kjäd wudd uk kjennen rostren un schwak woaren. Soo kaun ons Gloowen uk schwak woaren, wan wie twiewlen. Een Mensch, waut twiewelt un dan Jäajenstaunt kjricht, dee beduat veleicht, aus Jehova aules doonen woat, waut dee vesproaken haft. Un dan velieet dee uk de Hopninj. Jakobus säd je: “Een Twiewla es soo aus eene Wal oppem Mäa, dee vom Wint han un häa jedräwen woat” (Jak. 1:6). Soon Mensch woat secha kjeene Freid haben.

16. Waut sell wie doonen, wan wie twiewlen?

¹⁶ Waut wie doamet doonen kjennen: Doo waut met dienen Twiewel un stoakj dienen Gloowen. Schuw daut nich opp! En dän Profeet Elia siene Tiet wieren Jehova siene Deena oppem Twiewel jekomen. Elia säd: “Woo lang well jie junt opp beid Sieden delenjd schlapen? Wan de HAR Gott es, dan deent am, oba wan Baal es, dan deent däm” (1. Kjen. 18:21). Un wie sellen uk nich siemen. Wie motten ons daut unjastonen, aus Jehova de woara Gott es, aus de Bibel sien Wuat es un aus Jehova siene Zeijen siene Deena sent (1. Tess. 5:21). Doaderch woa wie onsen Twiewel oppem kloaren brinjen un onsen Gloowen stoakjen. Wan ons doamet Help fält, dan kjenn wie de Eltestasch froagen. Wie motten doa fuaz waut met doonen, daut wie nich de Freid velieren, Jehova to deenen.

17. Waut woat passieren, wan wie mootloos woaren?

¹⁷ Waut ons schwoa sennen kaun: Wan wie mootloos woaren. En Gott sien Wuat sajcht daut: “Wan du en schwoare Tieden mootloos woascht, dan woascht du mau weinich Krauft haben” (Spr. 24:10, NW). Un wan  wie ieescht mootloos sent, dan kjenn wie uk leicht de Freid velieren.

18. Waut bediet daut, uttohoolen?

¹⁸ Waut wie doamet doonen kjennen: Velot die opp Jehova un hee woat die Moot jäwen toom uthoolen. Onen Moot kjenn wie en schwoare Tieden nich jeduldich uthoolen (Jak. 5:11). Daut Wuat, waut Jakobus hia fa “jeduldich doabie bliewen” brukt, bediet, daut doa wäa krakjt doa blift, wua dee eemol es. Veleicht denkj wie dan uk aun eenen äwanämenden Soldot, waut nich een Enjskje bekjt, wan siene Fiend jäajen am komen.

19. Waut kjenn wie von dän Apostel Paulus lieren?

¹⁹ De Apostel Paulus wia een sea goodet Biespel fa Moot haben un uthoolen. Daut jeef Tieden, wua hee sikj mol schwak feeld. Oba hee kunn uthoolen, wäajen hee sikj opp Jehova veleet un dee am Krauft jeef (2. Kor. 12:8-10; Filip. 4:13, JHF). Un wan wie Jehova deemootich no Help froagen, dan kjenn wie uk Krauft un Moot kjrieen (Jak. 4:10).

20-21. Äwa waut kjenn wie ons gaunz secha sennen?

²⁰ Wan wie schwoaret beläwen, kjenn wie ons secha sennen, daut daut nich eene Strof von Jehova es. Jakobus sajcht: “Wan een Mensch vesocht woat, saul hee niemols sajen, daut Gott am vesieekjt. Gott kaun nich toom beesen vesocht woaren, un hee vesieekjt uk kjeenem” (Jak. 1:13). Wan wie ons doaräwa gaunz secha sent, dan woa wie onsen leeftoljen himlischen Voda noch noda komen (Jak. 4:8).

²¹ Jehova “veendat sikj nich” (Jak. 1:17). Hee holp de Christen en de Aposteltiet met äare Schwierichkjeiten, un krakjt soo woat hee uk ons halpen. Froag Jehova no Weisheit, no Moot un no eenen stoakjen Gloowen. Hee woat no diene Jebäda horchen. Dan kaust du die secha sennen, daut du en schwoare Tieden diene Freid nich velieren woascht.