1. Wuarom kjrie wie eenjemol Rot, un wuarom bruck wie daut aula?

 WIE aula brucken eenjemol Rot. Daut kaun sennen, daut wie mol wäm no Rot froagen, opp dän wie een Vetruen haben. Ooda een Brooda, waut om ons bekjemmat es, woarnt ons fa waut orrajchtet, waut wie doonen wellen un lota beschoden wudden (Gal. 6:1). Ooda wie kjrieen eenen Rot toom ons trajchtwiesen, nodäm daut wie eenen grooten Fäla jemoakt haben. Wooemma daut uk es, wie sellen no Rot horchen. Wan wie daut doonen, dan woat ons daut togood komen un wie woaren ons Läwen raden! (Spr. 6:23).

2. Wuarom sell wie no Rot horchen, soo aus Spricha 12:15 wiest?

² Ons Teemavarsch sajcht: “Horcht emol waut de Weise to sajen haben” (Spr. 22:17). Kjeen Mensch weet aules. Daut jeft emma irjentwäm, dee doa mea weet un mea Erfoarunk haft aus wie (läs Spricha 12:15). Wan wie no Rot horchen, dan wiest daut, daut wie deemootich sent. Daut wiest uk, daut wie ons doaräwa em kloaren sent, daut wie nich aules kjennen un daut wie Help brucken daut to volbrinjen, waut wie ons väajenomen haben. Jehova leet derch dän weisen Kjennich Salomo oppschriewen: “Derch väl Rotjäwa kjennen Plons toom gooden deenen” (Spr. 15:22).

3. Opp waut vonne veschiedne Wäaj kaun doa Rot fa ons sennen?

³ Veleicht finj wie eenen Rot ooda wie kjrieen eenen Rot. Waut meent daut, eenen Rot to finjen? Veleicht läs wie waut en de Bibel ooda en onse Bieekja, waut ons bat doa brinjt doaräwa notodenkjen, waut wie en ons Läwen endren sellen (Heb. 4:12). To dit saj wie Rot finjen. Waut meent daut dan, eenen Rot kjrieen? Een Eltesta ooda een erfoarna Brooda rät die von eene Sach aun, wua du die noch vebätren saust. To daut saj wie  eenen Rot kjrieen. Wan ons wäa soo sea leeft, daut dee ons eenen biblischen Rot jeft, dan sell wie dankboa sennen doafäa un doano horchen, waut dee sajcht, un ons daut to Hoaten nämen.

4. Waut sell wie no Liera 7:9 no nich doonen, wan wie eenen Rot kjrieen?

⁴ Daut kaun eenjemol sea schwoa sennen daut notokomen, wan wie eenen Rot kjrieen. Veleicht sent wie soogoa beleidicht. Wuarom? Wan wie uk selfst toostonen, daut wie onvolkomen sent, es daut doawäajen veleicht schwoa daut auntonämen, wan ons wäa wäajen eenen Fäla aunrät (läs Liera 7:9). Veleicht sieekj wie no eene Uträd. Ooda wie twiewlen doaraun, aus dee daut utem rajchten Senn deed. Ooda wie stieren ons doaraun, woo dee ons dän jeef. Veleicht denkj wie schlajcht äwa dänjanjen, waut ons dän Rot jeft un sajen: “Waut von Rajcht haft dee, mie eenen Rot to jäwen? Hee moakt je selfst Fäla!” Soo, wan wie dän Rot nich jleichen, dan woa wie dän veleicht uk nich aunnämen ooda wie woaren eenen aundren froagen, waut ons daut sajcht, waut wie hieren wellen.

5. Waut woa wie en disen Artikjel seenen?

⁵ En disen Artikjel woa wie von soone ut de Bibeltiet räden, waut nich Rot aunneemen, un von soone, waut Rot aunneemen. Wie woaren uk seenen, waut ons halpen kaun Rot auntonämen un woo ons daut togood komen kaun.

6. Waut kjenn wie doavon lieren, waut de Kjennich Rehabeam met dän Rot deed, waut hee kjrieech?

⁶ See wie mol daut Biespel von Rehabeam. Aus hee de Kjennich en Israel wort, kjeem daut Volkj no am un fruach, aus hee an de Laust leichta moaken wudd, waut sien Voda Salomo an oppjelajcht haud. Rehabeam jinkj dan no de elre Mana en Israel un fruach dee, waut hee to daut Volkj sajen sull. De elre Mana säden dan to dän Kjennich, daut hee daut doonen sull, no waut daut Volkj fruach, wiels dan wudden dee am emma unjastetten (1. Kjen. 12:3-7). Daut lat soo, daut Rehabeam met disen Rot nich tofräd wia. Doawäajen fruach hee uk dee, waut met am toop oppjewossen wieren. Dise Mana wieren veleicht soo romme 40 un hauden aul een bät Erfoarunk (2. Chr. 12:13). Oba ditmol jeewen dee Rehabeam eenen schlajchten Rot. Dee säden, daut hee de Lausten bloos noch schwanda moaken sull fa daut Volkj (1. Kjen. 12:8-11). Nu haud hee twee Meenungen jehieet. Rehabeam haud kunt Jehova froagen, no woonen Rot hee horchen sull. Oba enne Städ daut neem hee dän Rot aun, waut hee daut dolste jleicht un horcht no de jinjre Mana. Daut haud sea schlemme Foljen fa am un daut Volkj Israel. Wie jleichen dän Rot veleicht uk nich emma, waut wie kjrieen, oba wan dee sikj opp Gott sien Wuat stett, dan sell wie dän aunnämen.

7. Waut wiest ons dän Kjennich Usija sien Biespel?

⁷ De Kjennich Usija neem uk nich Rot aun. Hee jinkj en Jehova sienen Tempel no dee Städ, wua bloos de Priesta hangonen kunnen un wull doa Ruakopfa vebrennen. De Priesta säden to am: “Daut jehieet sikj die nich, Usija, däm HARN Ruakopfa to brinjen! Daut es bloos de Priesta, Aaron siene Nokomen erlaupt, waut doatoo jeweit sent, daut Ruakopfa to brinjen.” Waut deed Usija dan? Hee “wort wuttich”. Wan hee wia deemootich jewast un Rot aunjenomen haud un fuaz von dee Städ wajchjegonen wia, wudd Jehova am veleicht togood jehoolen haben. Wuarom neem hee dän Rot nich aun? Hee docht woomäajlich, daut hee aus Kjennich to aules Rajcht haud, waut hee wull. Oba fa Jehova wia daut nich  soo. Wiels hee waut deed, wua hee nich daut Rajcht to haud, schluach Jehova am met de Leprakrankheit, un hee bleef soo “bat sienen Doot” (2. Chr. 26:16-21). Waut wiest ons Usija siene Jeschicht? Krakjt endoont wäa wie sent, wan wie biblischen Rot nich aunnämen, woat Jehova nich mea eenen Jefaulen aun ons haben.

8. Waut deed Hiob, aus hee Rot kjrieech?

⁸ De Bibel rät nich bloos von soone, waut nich Rot aunneemen, oba uk von soone, waut daut deeden un jesäajent worden. See wie mol daut Biespel von Hiob. Wan hee Gott uk leewd un am jefaulen wull, wia hee oba nich volkomen. Aus hee daut sea schwoa haud, säd hee eenjet, waut nich rajcht wia. Doawäajen kjrieech hee Rot von Elihu un von Jehova. Waut deed Hiob dan? Hee wia deemootich un neem dän Rot aun. Hee säd: “Nu weet ekj daut ekj von waut räd, von waut ekj nuscht wist”. Hee säd uk: “[Ekj] bekjan . . ., woo schuldich ekj sie, un pracha en Ieed un Ausch auf.” Jehova säajend Hiob doafäa, daut hee soo deemootich wia (Hiob 42:3-6, 12-17).

9. Waut deed Moses, aus hee Rot kjrieech, un wuarom es daut een goodet Biespel fa ons?

⁹ Moses es een goodet Biespel fa ons, wäajen hee daut aunneem, aus hee wäajen eenen grooten Fäla trajchtjewäsen wort. Opp eene Sauz wort hee doll un jeef nich Jehova de Iea. Wäajen dit kunn Moses nich en daut vesproakne Launt nenn (4. Mo. 20:1-13). Aus Moses met Jehova siene Entscheidunk nich envestonen wia, säd Jehova to am: “Räd nich noch een mol to mie wäajen dit” (5. Mo. 3:23-27). Moses leet sikj nich vebetren. Hee neem daut aun, soo aus daut wia, un Jehova kunn am wieda brucken toom daut Volkj Israel leiden (5. Mo. 4:1). Hiob un Moses sent goode Biespels, wan daut doarom jeit Rot auntonämen. Hiob endad sien denkjen un proowd sikj nich to rajchtfoadjen. Moses bleef Jehova wieda tru un bewees doaderch, daut hee dän Rot aunneem, wan hee uk waut sea wieetvollet vespäld.

10. (a) Waut lieet Spricha 4:10-13 ons doaräwa, woo ons daut togood kjemt, wan wie Rot aunnämen? (b) Waut vonne goode Enstalunk hauden eenje äwa Rot?

¹⁰ Fa ons es daut sea goot, wan wie soone true Mana aus Hiob un Moses nodoonen (läs Spricha 4:10-13). Väle von onse Breeda un Sestren haben daut krakjt soo jedonen aus dee. See wie mol, waut een Brooda, waut Emmanuel heet un en Kongo wont, sajcht, aus hee eene Woarnunk kjrieech: “Een poa erfoarne Breeda von miene Vesaumlunk sagen, daut ekj meist von Jehova aufjekomen wia, un dee proowden mie to halpen. Ekj kjeem dän Rot no, un daut spoad mie een deel Trubbels.” b Megan, eene Pioniasesta en Kanada, rät äwa Rot un sajcht: “Daut wia nich emma krakjt daut, waut ekj mie wenscht, oba daut wia krakjt daut, waut ekj brukt.” Marko, een Brooda von Kroazien, sajcht: “Ekj velua een Väarajcht. Oba wan ekj soo trigjkjikj, dan see ekj, daut de Rot, waut ekj kjrieech, mie holp em jeisteljen wada stoakj to sennen.”

11. Waut säd Brooda Karl Klein äwa Rot aunnämen?

¹¹ Brooda Karl Klein, waut eena vom Väastaunt wia, kjeem daut uk sea togood, daut hee Rot aunneem. En siene Läwesjeschicht rät Brooda Klein doavon, daut hee von sienen Frint Joseph F. Rutherford eenen strenjen Rot kjrieech. Aum Aunfank wia hee beleidicht äwa dän Rot. Hee säd: “Daut näakjste Mol aus [Brooda Rutherford] mie sach, säd hee schaftich: ‘Hey Karl!’ Oba ekj wia noch emma beleidicht un bejreest dän mol sea afens. Brooda  Rutherford säd dan: ‘Karl, pauss opp, de Fient es die hinjaraun!’ Daut wia mie lang nich goodjenuach, un ekj säd: ‘Oh, daut es aula fein, Brooda Rutherford.’ Oba dee wist, daut ekj noch emma beleidicht wia, un säd doawäajen noch eemol: ‘Daut es goot. Pauss oba opp, de Fient es die hinjaraun.’ Hee haud gaunz rajcht! Wan wie äwa eenen Brooda doll bliewen, un besonda äwa daut, waut hee sajcht un daut Rajcht doatoo haft, . . . dan es daut fa dän beesen Fient leicht ons en siene Faul to kjrieen” (Efs. 4:25-27). c Brooda Klein neem dän Rot von Brooda Rutherford aun, un soo kunnen see wieda goode Frind bliewen.

12. Woo kaun ons daut halpen Rot auntonämen, wan wie deemootich sent? (Psalm 141:5).

¹² Waut kaun ons halpen Rot auntonämen? Wie motten deemootich sennen un em Denkj hoolen, daut wie sea onvolkomen sent un eenjemol Sachen doonen, waut sea onkluak sent. Soo aus wie ea aul säden, docht Hiob mol nich rajcht. Oba hee endad lota sien denkjen un Jehova säajend am doafäa. Wuarom? Wäajen Hiob deemootich wia. Doaderch, daut Hiob dän Rot von Elihu aunneem, waut väl jinja wia aus hee, bewees hee, daut hee deemootich wia (Hiob 32:6-7). Soo woat ons de Deemoot uk halpen dän Rot notokomen, wan wie uk denkjen, daut dee ons nich traft ooda wan dee von wäm kjemt, waut noch jinja es aus wie. Een Eltesta en Kanada sajcht: “Wäajen wie ons nich soo seenen aus aundre, bruck wie Rot, om em jeisteljen verauntokomen.” Un es daut nich soo, daut wie aula motten wieda aun dän Jeist siene Frucht schaufen un em Prädichtdeenst bäta woaren? (Läs Psalm 141:5.)

13. Woo sell wie äwa dän Rot denkjen, waut wie kjrieen?

¹³ Denkj doaraun, daut Rot een Bewies von Gott siene Leew es. Jehova well daut baste fa ons (Spr. 4:20-22). Wan hee ons derch sien Wuat ooda derch biblische Bieekja ooda derch erfoarne Breeda Rot jeft, dan bewiest daut, daut hee ons leeft. Hebräa 12:9-10 wiest, daut “Gott . . . ons belieet to ons aulabastet”.

14. No waut sell wie kjikjen, wan wie eenen Rot kjrieen?

¹⁴ Kjikj no dän Rot un nich, woo dee jejäft woat. Eenjemol denkj wie veleicht, daut dee ons dän Rot hauden kunt opp eene bätre Wajch jäwen. Oba secha well wie aula oppaussen, wan wie wäm Rot jäwen, daut daut soo leicht es aus mäajlich dän notokomen (Gal. 6:1). d Wan wie dee sent, waut doa Rot kjrieen, dan sell wie doano kjikjen, waut wie doavon lieren kjennen, uk wan wie denkjen,  daut dee ons dän haud kunt opp eene bätre Wajch jäwen. Wie kjennen mol doaräwa nodenkjen: “Stemt daut en jewesse Stekjen noch, waut hee säd, uk wan ekj daut nich jleich, woo hee daut säd? Kaun ekj dän siene Onvolkomenheit tosied schuwen un bloos waut ut dän Rot lieren?” Daut wudd weis sennen, wan wie ons ut jieda Rot, waut wie kjrieen, emma eene Lia rutneemen (Spr. 15:31).

15. Wuarom sell wie aundre no Rot froagen?

¹⁵ De Bibel rot ons too, aundre no Rot to froagen. Spricha 13:10 (NW) sajcht: “Wäa no Rot sieekjt, es weis.” Daut es werkjlich soo. Soone, waut aundre no Rot froagen, komen em jeisteljen foaken bosja veraun aus soone, waut no Rot luaren. Nemm de Jeläajenheit woa un froag aundre no Rot!

16. Wanea wudd wie kjennen wäm no Rot froagen?

¹⁶ Wanea wudd wie kjennen wäm no Rot froagen? See wie mol een poa Biespels. (1) Eene Sesta frajcht eenen erfoarnen Vekjindja, aus dee well bie äa Studium met bie sennen. Lota frajcht see dan no Rot, en waut vonne Stekjen see sikj noch vebätren kaun. (2) Eene onbefriede Sesta haft sikj een Poa Bekjsen utjeläst un nu frajcht see eene erfoarne Sesta, waut see doaräwa denkjt. (3) Een Brooda saul toom ieeschte Mol eene Räd fa aulemaun haben. Hee frajcht eenen erfoarnen Rädna, aus dee am oppmoakjsom toohorchen well un am dan lota sajen, en waut hee sikj vebätren saul. Uk wan een Brooda aul fa Joaren Räden jehoolen haft, es daut doawäajen emma goot, erfoarne Rädna no Rot to froagen un daut dan uk notokomen.

17. Woo kaun ons Rot toom gooden sennen?

¹⁷ Wie aula woaren en de näakjste Wäakjen ooda Moonaten mol Rot kjrieen ooda finjen. Wan daut soo es, dan denkj doaraun, waut wie jroz jelieet haben. Sie deemootich. Kjikj no dän Rot un nich, woo dee jejäft woat. Un komm daut no, wan du Rot kjrichst. Kjeena von ons es weis jebuaren. Oba Gott sien Wuat vesprakjt: “Horch wan du Rot kjrichst un belieet woascht, daut du no däm kaust weis sennen” (Spr. 19:20).