1. Wanea woaren aule Jesaulwde nom Himmel jenomen woaren?

 JOAREN trigj haben Jehowa siene Deena jewundat, wanea de latste jesaulwde Christen wudden nom Himmel jenomen woaren. Wie dochten, daut eenje Jesaulwde veleicht noch wudden fa een Stootje oppe Ieed bliewen no dän Kjrich von Harmagedon. Oba derch dän Woaktorm vom 15. Juli 2013 hab wie jelieet, daut aule jesaulwde Christen, waut noch oppe Ieed sent, woaren nom Himmel jenomen woaren, ea de Kjrich von Harmagedon aunfangen woat (Mat. 24:31).

2. Waut vonne Froagen komen veleicht opp, un waut woa wie en disen Artikjel seenen?

² Oba nu denkjen eenje veleicht: Waut woat met Christus siene “aundre Schop” en de “groote Liedenstiet” woaren, waut Jehowa hia oppe Ieed tru deenen? (Joh. 10:16; Mat. 24:21). Eenje moaken sikj vondoag dän Dach veleicht Sorjen, daut doa kjeena woat sennen toom äant halpen un Rot jäwen, wan de jesaulwde Breeda un Sestren nom Himmel jenomen woaren. Well wie mol twee biblische Jeschichten seenen, wuarom dee veleicht soo denkjen. Un dan woa wie seenen, wuarom daut nich needich es, sikj doaräwa Sorjen to moaken.

WOO WOAT DAUT NICH SENNEN?

3-4. Äwa waut moaken eenje sikj Sorjen, un wuarom?

³ Eenje moaken sikj veleicht Sorjen, daut de aundre Schop woaren opphieren met Jehowa deenen, wan de jesaulwde Breeda vom Väastaunt nich mea doa sent toom äant aunleiden. Veleicht denkjen dee soo wäajen eenje Jeschichten, waut enne Bibel sent. Räd wie mol von twee soone Jeschichten. De ieeschte haft met dän huagen Priesta Jojada to doonen. Hee deend Jehowa tru. Hee un siene Fru Joscheba deeden dän naten Jung Joasch beschitzen un holpen am, een gooda un trua Kjennich to sennen. Soo lang aus de elra Jojada läwd, wia Joasch Jehowa tru. Oba hee funk boolt aun, schlajchtet to  doonen, aus Jojada ieescht jestorwen wia. Hee horcht no de schlajchte, väaschte Mana von Juda un hieed opp met Jehowa deenen (2. Chr. 24:2, 15-19).

⁴ De aundre Jeschicht es dee von de Christen, waut no de Aposteltiet läwden. De Apostel Johanes storf daut latste von aule Apostel. Aus hee noch läwd, holp hee een deel Christen, Jehowa tru to deenen (3. Joh. 4). Krakjt soo aus de aundre Apostel daut uk jedonen hauden, schauft Johanes sea schwoa toom de Vesaumlunk von de Aufjefolne un dee äare Lieren beschitzen (1. Joh. 2:18; see de Erkjläarungen toom studieren von 2. Tes. 2:7 en de Studiabibel). Oba aus Johanes ieescht jestorwen wia, jinjen väle de Aufjefolne hinjaraun. En de näakjste Joaren wieren en jieda Vesaumlunk Aufjefolne bennen un lieeden faulsche Iedeeen.

5. Waut wiesen ons dise beid Jeschichten nich?

⁵ Wiesen dise beid biblische Jeschichten, woo daut woat met Christus siene aundre Schop sennen, wan de Jesaulwde ieescht nom Himmel jenomen sent? Woaren de Christen, waut dan oppe Ieed sent, aunfangen, waut schlajchtet to doonen soo aus Joasch ooda woaren dee vom Gloowen auffaulen, soo aus väle deeden, nodäm de Apostel jestorwen wieren? Gaunz secha nich! Wie kjennen ons secha sennen, daut de aundre Schop Jehowa wieda oppe rajchte Wajch deenen woaren, wan de Jesaulwde nich mea oppe Ieed sent, un daut Jehowa fa dee sorjen woat. Wuarom kjenn wie ons doaräwa secha sennen?

WIE WOAREN JEHOWA WIEDA OPPE RAJCHTE WAJCH DEENEN

6. Woone dree veschiedne Tieden woa wie ons nu unjastonen?

⁶ Wuarom kjenn wie ons soo secha sennen, daut wie Jehowa wieda oppe rajchte Wajch deenen woaren, wan doa uk schwoare Tieden ver ons sent? Wäajen de Bibel sajcht, daut dee Tiet, en woone wie nu läwen, gaunz veschieden es von dee Tiet, wua de Israeliten läwden ooda dee Tiet, nodäm de Apostel jestorwen wieren. Well wie ons dise dree veschiedne Tieden noch mol een bät dolla unjastonen: (1) De Tiet von de Israeliten, (2) de Tiet, nodäm de Apostel jestorwen wieren, un (3) onse Tiet – de Tiet, wan aules wada fresch oppjestalt woat (Apj. 3:21).

7. Wuarom brukten de true Israeliten nich mootloos woaren, wan de Kjennichs un väle aundre uk schlajchtet deeden?

⁷ De Tiet von de Israeliten. Een Stootje ea Moses storf, säd hee to de Israeliten: “Ekj weet daut no mienen Doot woa jie onbedinjt orrajchtet doonen un junt von däm Wajch, dän ekj junt väajesajcht hab, wajch dreien” (5. Mo. 31:29). Moses woarnd de Israeliten doafäa, daut see wudden aus Jefangne no een aundret Launt jefieet woaren, wan dee sikj wudden jäajen Jehowa stalen (5. Mo. 28:35-36). Kjeem daut soo rom? Jo. Fa hundade Joaren deeden väle Kjennichs schlajchtet un brochten Gott siene Deena bat doa, dautselwje to doonen. Doawäajen deed Jehowa de Israeliten bestrofen un leet daut nich mea too, daut irjenteen israelitischa Kjennich wieda äwa äant rejieren kunn (Hes. 21:30-32). Oba de true Israeliten jeef daut Moot, wan dee sagen, daut Gott sien Wuat sikj krakjt erfeld (Jes. 55:10-11).

8. Wuarom wundat ons daut nich, daut de Vesaumlungen Jehowa nich mea oppe rajchte Wajch deenden, nodäm de Apostel jestorwen wieren?

⁸ De Tiet, nodäm de Apostel jestorwen wieren. Wundat ons daut, daut de Vesaumlungen Jehowa nich wieda oppe rajchte Wajch deenden, aus de Apostel ieescht jestorwen wieren? Nä, nuscht. Jesus haud je verutjesajcht,  daut doa wudden een deel vom Gloowen auffaulen (Mat. 7:21-23; 13:24-30, 36-43). De Apostel Paulus, Petrus un Johanes säden daut aula, daut Jesus siene Profezeiunk sikj en äare Tiet aul haud aunjefongen to erfellen (2. Tes. 2:3, 7; 2. Pet. 2:1; 1. Joh. 2:18). Een Stootje nodäm de latsta Apostel jestorwen wia, worden de aufjefolne Christen Poat von daut groote Babel, waut aule faulsche Gloowes oppe Welt väastalt. Doaderch erfeld sikj daut wada, waut verutjesajcht wia!

9. Wuarom es onse Tiet aundasch aus de Tiet von de Israeliten un de Tiet, aus de Apostel jroz jestorwen wieren?

⁹ De Tiet, wan aules wada fresch oppjestalt woat. Onse Tiet es gaunz aundasch aus de Tiet von de Israeliten un de Tiet, aus de Apostel jroz jestorwen wieren un doa soo väle vom Gloowen auffollen. Woo woat onse Tiet jenant? Wie nanen dee jeweenlich “de latste Doag” von dän Soton siene schlajchte Welt (2. Tim. 3:1). Oba de Bibel wiest, daut aus de latste Doag aunfungen, uk eene aundre Tiet aunfunk. Daut es eene wichtjere un lenjre Tiet. Dee woat wieda gonen, bat Gott sien Kjennichrikj de Menschen wada volkomen jemoakt haft un de Ieed to een Paradies jemoakt haft. Dit heet “de Tiet . . . , aules wada fresch opptostalen” (Apj. 3:21). Dise Tiet funk aune 1914 aun. Oba waut wort doa wada oppjestalt? Eent es: Jehowa muak Jesus em Himmel toom Kjennich. Nu wia doa wada een Kjennich, waut Jehowa siene Rejierunk väastald un waut een Nokomen von dän truen Kjennich David wia. Oba Jehowa haft nich bloos dit Kjennichrikj wada oppjestalt. Hee sorjd uk doafäa, daut siene Deena am meist fuaz doahinja uk wada soo deenen kunnen, aus hee daut haben wull! (Jes. 2:2-4; Hes. 11:17-20). Woat daut nu soo bliewen?

10. (a) Waut sajcht de Bibel äwa dän Deenst fa Jehowa en onse Tiet? (Jesaja 54:17). (b) Wuarom jäwen ons dise Profezeiungen Moot?

¹⁰ Läs Jesaja 54:17. Denkj mol äwa dise Profezeiunk no: “Kjeena kaun soont häastalen, waut junt venichten woat”! Dise Profezeiunk erfelt sikj vondoag dän Dach. De Bibel rät noch von eene aundre Profezeiunk fa onse Tiet, waut ons Moot jeft. Daut sajcht: “Aul diene Kjinja woaren sikj vom HARN lieren loten, un dee woaren tofräd un sea jlekjlich sennen. Daut woat bie die von Grunt opp rajcht häagonen. Doa woat kjeena sennen waut die unjadrekjt, die woat kjeena enjsten ooda grulen” (Jes. 54:13-14). Mau rajcht de Soton, “de Gott äwa dise Welt”, woat daut nich opphoolen kjennen, daut Gott siene Deena aundre von Jehowa lieren woaren (2. Kor. 4:4). Nu  deen wie Jehowa wada soo, aus hee daut haben well, un daut woat soo bliewen bat en aule Eewichkjeit. Kjeena kaun soont häastalen, waut ons venichten woat!

WOO WOAT DAUT SENNEN?

11. Wuarom sent wie ons secha daut de aundre Schop nich woaren auleen jeloten woaren, wan de Jesaulwde ieescht nom Himmel jenomen sent?

¹¹ Woo woat daut sennen, wan de Jesaulwde ieescht nom Himmel jenomen sent? Denkj doaraun, daut Jesus ons Hoad es. Hee es uk daut Haupt von de Christenvesaumlunk. Jesus säd gaunz kloa: “Jie haben bloos eenen Leida un dauts de Christus” (Mat. 23:10). Jesus rejieet aul em Himmel un hee woat emma siene Oppgow nokomen. Jesus siene Nofolja hia oppe Ieed brucken nich Angst haben, wäajen hee äant selfst leiden deit. Wie weeten nich krakjt, woo Jesus siene Nofolja leiden woat, wan de Jesaulwde ieescht wajch sent. Doawäajen well wie ons eenje Jeschichten en de Bibel unjastonen, waut ons Vetruen stoakjen kjennen.

12. Woo deed Jehowa fa siene Deena sorjen, (a) aus Moses storf? (b) aus Elia eene aundre Oppgow kjrieech? (See uk daut Bilt.)

¹² Moses storf, ea de Israeliten en daut vesproakne Launt nennkjeemen. Waut passieed dan met Gott sien Volkj? Veleet Gott dee? Nä. Soolang aus dee am tru wieren, sorjd Jehowa fa äant. Ea Moses storf, säd Jehowa to am, hee sull Josua aunstalen toom daut Volkj aunleiden. Moses haud Josua aul fa Joaren utjelieet (2. Mo. 33:11; 5. Mo. 34:9). Un doa wieren uk aundre erfoarne Mana, waut Josua halpen deeden. Dee wieren aunjestalt äwa dusent, äwa hundat, äwa feftich un äwa tieen Menschen (5. Mo. 1:15). Om Gott sien Volkj wort goot jekjemmat. To Elia siene Tiet wia daut krakjt soo. Hee haud aul Joaren de Israeliten jeholpen, Jehowa to deenen. Oba lota jeef Jehowa am eene aundre Oppgow en Juda (2. Kjen. 2:1; 2. Chr. 21:12). Wieren de true Menschen von daut Kjennichrikj Israel met de tieen Stam nu auleen jeloten? Nä. Elia haud Elisa fa väle Joaren utjelieet. Un doa wieren uk noch “de Profeeten äare Jinja”, dee uk utjelieet wieren derch irjent eene School (2. Kjen. 2:7). Soo, doa wieren väl true Mana, waut halpen kunnen, Gott sien Volkj auntoleiden. Jehowa fieed sienen Wellen wieda derch un hee sorjd fa siene true Deena.

13. Waut vesechat Hebräa 13:5b ons? (See uk daut Bilt.)

¹³ Wan wie aun dise Biespels denkjen, waut denkjst du dan, woo woat daut sennen, wan de latste Jesaulwde woaren nom Himmel  jenomen woaren? Wie brucken ons kjeene Sorjen moaken. De Bibel lieet ons waut, waut ons Vetruen stoakjt. Daut sajcht: Jehowa woat siene Deena oppe Ieed kjeenmol veloten (läs Hebräa 13:5b). Krakjt soo aus Moses un Elia es de kjliene Grupp jesaulwde Breeda, waut daut Woakj vondoag dän Dach leit, sikj doa gaunz em kloaren äwa, woo wichtich daut es, aundre uttolieren. Fa Joaren haft de Väastaunt Mana von mank de aundre Schop utjelieet toom de Leidunk äwanämen. Biejlikj haben dee väle Schoolen oppjestalt, wua Eltestasch un Kjreisoppsechtasch, Betelkommitee-Breeda, Oppsechtasch em Betel un aundre utjelieet woaren. De Väastaunt haft selfst Breeda utjelieet, waut aul en veschiedne Kommitees vom Väastaunt deenen, daut dee äant halpen kjennen. Dise Helpa haben nu aul väl Veauntwuatungen en de Organisazion. Dee sent fein utjelieet toom sikj wieda om Gott siene Deena kjemren, wan de Jesaulwde ieescht nom Himmel jenomen sent.

14. Waut es de Hauptlia von disen Artikjel?

¹⁴ De Hauptlia von disen Artikjel es dit: Wan de latste von de Jesaulwde nom Himmel jenomen woaren, aum Enj von de groote Liedenstiet, woat Jesus Christus Gott siene Deena oppe Ieed wieda halpen, daut see Jehowa tru deenen kjennen. Wie weeten, daut de Velkja, waut sikj toopstonen woaren, en dise Tiet Gott siene Deena aunjriepen woaren. Dise Velkja nant de Bibel Gog von Magog (Hes. 38:18-20). Oba dee woaren Gott siene Deena doa nich von aufhoolen kjennen, Jehowa wieda to deenen. Hee woat äant secha raden! De Apostel Johanes sach en eene Wision “eene Häad, dee kjeena talen kunn”. Dit sent Jesus siene aundre Schop, “dee ut de groote Vefoljunk jekomen sent” (Opb. 7:9, 14). Doawäajen weet wie daut neiw, daut Gott siene Deena raden woat!

15-16. (a) Waut woaren de Jesaulwde no Openboarunk 17:14 no doonen en dän Kjrich von Harmagedon? (b) Wuarom jeft ons dit Moot?

¹⁵ Eenje wundren veleicht: “Waut woaren de Jesaulwde doonen, wan dee ieescht em Himmel sent?” De Bibel jeft ons eene kloare Auntwuat. Dee sajcht, daut de Rejierungen von dise Welt “jäajen daut Laum kjriejen”  woaren. Oba dee woaren secha vespälen. Daut sajcht: “Daut Laum woat jewennen”. Un wäa woat daut Laum halpen? De Bibelvarsch sajcht, daut sent de “beroopne, utjewälde un true jleewende” (läs Openboarunk 17:14). Wäa sent dee? Daut sent de Jesaulwde, waut vom Doot oppjestonen sent! Soo, wan de latste von de Jesaulwde nom Himmel jenomen woaren, aum Enj von de groote Liedenstiet, woaren dee eent von daut ieeschte Kjrich fieren. Dauts werkjlich eene butajeweenelje Oppgow! Eenje von de Jesaulwde jleichten daut, sikj met aundre to feiten, ea dee Jehowa siene Zeijen worden. Eenje von dee wieren mau rajcht Soldoten. Oba lota, aus dee woare Christen worden, lieeden dee daut, met aundre Fräd to hoolen (Gal. 5:22; 2. Tes. 3:16). Un dee muaken nich mea bie irjenteenen Kjrich met. Oba wan dee ieescht em Himmel sent, dan woaren dee met Christus un siene heilje Enjel toop toom latste mol Kjrich fieren jäajen Gott siene Fiend.

¹⁶ Denkj doaräwa no! Eenje von de Jesaulwde hia oppe Ieed, sent aul oolt ooda schaubich. Oba wan dee ieescht woaren em Himmel sennen, dan woaren dee stoakje, onstoafelje Jeista sennen, dee de Oppgow haben, met äaren Kjennich Jesus Christus toop Kjrich to fieren. No dän Kjrich von Harmagedon woaren dee methalpen, de Menschen wada volkomen to moaken. Gaunz secha woaren dee von em Himmel äare leewe Breeda un Sestren oppe Ieed väl bäta halpen kjennen, aus dee jeemols aus onvolkomne Menschen kunnen!

17. Woo weet wie, daut aul Jehowa siene Deena en dän Kjrich von Harmagedon woaren beschizt sennen?

¹⁷ Best du eena von de aundre Schop? Wan jo, waut woascht du motten doonen, wan de groota Kjrich von Harmagedon aunfangt? Eefach opp Jehowa vetruen un siene Aunwiesungen nokomen. Waut woat doa veleicht met en sennen? De Bibel treest ons met dise Wieed: “Go en diene Bennastowen un schlut de Däaren hinja die too. Vestäakj die fa een kjlienet Stootje, bat de Oaja vebie es” (Jes. 26:20, NW). Gott siene true Deena em Himmel un oppe Ieed woaren en dise Tiet aula beschizt sennen. Krakjt soo aus de Apostel Paulus sent wie ons uk secha, daut nich “Jewaulten, nich Jäajenwuat ooda Tookunft . . . ons von Gott siene Leew scheeden kaun” (Reem. 8:38-39). Hool dit emma em Denkj: Jehowa leeft die un hee woat die kjeenmol veloten!