Onse wieren sea katoolsch. Oba aus dee von de Schreft lieeden, daut Gott sien Nomen Jehowa es, worden dee beid Jehowa siene Zeijen un wieren sea flietich. Onse Pape wia een Descha, un hee jleicht Bilda von Jesus uttohaken. Oba hee hieed doamet opp un bud leewa daut ieeschte Stock von ons Hus om, un daut wort daut ieeschte Vesaumlungshus en San Juan del Monte, waut en Manila, de Hauptstaut von de Filippinen, es.

Ekj wort aune 1952 jebuaren. Onse lieeden mie von Jehowa, krakjt soo aus dee miene vea Breeda un dree Sestren, waut aula ella sent aus ekj, aul jelieet hauden. Aus ekj oppwoss, rood miene Pape mie too, jieda Dach een Kapitel enne Schreft to läsen, un hee studieed uk väl Bieekja von de Organisazion met mie toop. Bieaun looden miene Elren Kjreisoppsechtasch ooda Breeda, waut em Betel schauften, en, bie ons to sennen. Daut muak ons aus Famielje väl Moot, un ons jinkj daut sea scheen, de Erfoarungen von dise Breeda to hieren. Daut holp ons, Jehowa sienen Deenst daut ieeschte en ons Läwen to stalen.

Miene Elren deenden Jehowa tru, un ekj hab een deel von äa Biespel jelieet. Nodäm daut miene leewe Mame wäajen eene Krankheit storf, fungen ekj un miene Pape aune 1971 toop met dän Pioniadeenst aun. Aune 1973, aus ekj 20 wia, storf miene Pape. Wäajen ekj miene beid Elren em Doot velua, feeld ekj mie gaunz veloten. Oba de Hopninj ut de Schreft, waut “secha un faust” es, holp mie, dicht bie Jehowa to bliewen un wieda no daut Goode to kjikjen, soo daut ekj nich äwamotich truarich wort (Heb. 6:19). Een Stoot nodäm daut miene Pape jestorwen wia, neem ekj de Oppgow aun, aus Sondapionia to deenen opp de Insel Coron, en de Prowins Palawan.

Ekj wia 21 Joa, aus ekj no Coron kjeem. Ekj wia enne Staut oppjewossen, un doawäajen must ekj mie wundren, daut et opp dee Insel nich väl Foatieja jeef un daut väl Hiesa nich Fia un Wota hauden. Wan  doa uk een poa Breeda wieren, haud ekj nich eenen Pionia-Poatna, un doawäajen must ekj eenjemol auleen prädjen. De ieeschte Moonat bangd ekj mie sea no miene Famielje un Frind. De Nacht kjikjt ekj no de Stierns aum Himmel un road. Ekj wull bloos oppjäwen un trigj no Hus.

Wan ekj mie soo feeld, schedd ekj mien Hoat to Jehowa ut. Ekj docht aun soont, waut ekj en de Bibel ooda en onse Bieekja jeläst haud, waut mie väl Moot muak. Ekj docht foaken aun Psalm 19:14 (NW). Ekj wist, daut Jehowa “mien Groota Steen” sennen wudd, “waut mie friekjeepen” wudd, wan ekj äwa soont nodocht, waut am jefelt, biejlikj waut hee deit un woo hee es. De Woaktorm-Artikjel “Du bist nie allein” a haft mie sea jeholpen. Ekj läsd dän emma wada derch. Wan doa kjeena wia, feeld sikj mie daut soo, aus wudd ekj met Jehowa auleen sennen, un daut wia eene wieetvolle Tiet, daut ekj bäden, studieren un nodenkjen kunn.

Nich lang nodäm daut ekj no Coron kjeem, wort ekj een Eltesta. Wiels ekj de eensja Eltesta wia, deed ekj jieda Wäakj de School fa dän christeljen Deenst, daut Deensttoopkomen, daut Buakstudium von de Vesaumlunk un daut Woaktorm-Studium leiden. Ekj hilt uk jieda Wäakj de biblische Räd fa aulemaun. Dan haud ekj weens nich Tiet, mie auleen to feelen!

En Coron prädjen kjeem sea goot ut. Eenje, met dee ekj de Bibel studieed, leeten sikj met de Tiet deepen. Oba doa wieren uk Schwierichkjeiten. Eenjemol must ekj dän gaunzen Vermeddach gonen, om bat doa to komen, wua ekj prädjen wull. Un wan ekj doa aunkjeem, wist ekj nich, wua ekj to Nacht bliewen wudd. De Vesaumlunk wia uk veauntwuatlich, opp väl kjliene Inslen to prädjen. Ekj fua foaken metem Boot bat doa, wan daut Mäa uk sea orruich wia un ekj nich mol schwamen kunn! Daut wia nich emma leicht, oba Jehowa holp un beschizt mie. Lota kunn ekj vestonen, daut Jehowa mie reedmoaken deed fa miene näakjste Oppgow, waut noch schwanda sennen wudd.

Aune 1978 wort ekj no Papua-Nie-Guinea jeschekjt, waut Nuaden von Australien es. Papua-Nie-Guinea haft väl Boaj, un es meist krakjt soo groot aus Spaunien. Ekj wia sea vewundat, aus ekj enwort, daut doa rom dree Millionen Menschen wonden un daut doa äwa 800 Sproaken jerät worden. Daut Goode wia, daut de mieeschte Menschen doa uk melanesischet Pidgin räden; dise Sproak woat uk Tok Pisin jenant.

Ekj wort fa eene Tiet no eene enjlische Vesaumlunk en de Hauptstaut, Port Moresby, jeschekjt. Oba dan deed ekj no eene Tok Pisin Vesaumlunk un haud Klaussen toom de Sproak lieren. Daut, waut ekj bie dise Klaussen lieed, brukt ekj dan em Prädichtdeenst. Dit holp mie, de Sproak bosja to lieren. Daut dieed nich lang, bat ekj eene Räd fa aulemaun opp dee Sproak hoolen kunn. Stal die mol väa, woo mie daut jinkj, nich mol een Joa nodäm daut ekj no Papua-Nie-Guinea kjeem, daut ekj doa nu aus Kjreisoppsechta deenen sull fa de Tok Pisin Vesaumlungen, waut en veschiedne sea groote Prowinsen wieren.

Wäajen de Vesaumlungen soo wiet uteneen wieren, must ekj väl Kongressen plonen un uk wiet foaren. Aum Aunfank feeld ekj mie sea auleen, wiels daut een aundret Launt wia un wiels de Menschen eene aundre Sproak räden un aundre Jewanheiten hauden. Ekj kunn uk nich von eene Vesaumlunk no de aundre foaren, wiels daut eene boaje Jäajent  wia un doa kjeene Wäaj wieren. Doawäajen must ekj meist jieda Wäakj metem Äarplän met. Eenjemol wia ekj de eensja, waut en eenen eefachen Äarplän metfluach, waut nich sea secha wia. Soo aus dit to reisen deed mie krakjt soo aune Narfen, aus wan ekj metem Boot met must!

Daut jeef doa nich väl Menschen, waut een Fon hauden, doawäajen must ekj met de Vesaumlungen äwa Breew räden. Foaken kjeem ekj doa ea han aus miene Breew, un doawäajen must ekj de Menschen doa froagen, wua Jehowa siene Zeijen wonden. Oba jiedatsmol, wan ekj de Breeda funk, wieren dee soo oppnäment un dankboa, un daut holp mie, doaraun to denkjen, daut et daut wieet wia, daut ekj mie soo aunstrenjd. Ekj kunn opp veschiedne Wäaj beläwen, woo Jehowa mie holp, un ekj kjeem am väl noda.

Aus ekj daut ieeschte Mol bie een Toopkomen opp de Insel Bougainville wia, kjeemen eene Lied no mie. Dee kjikjten schaftich un fruagen mie: “Kjanst du ons noch?” Mie docht daut noch doavon, daut ekj dise Lied jeprädicht haud, aus ekj en Port Moresby aunkjeem. Ekj haud aunjefongen, met äant de Bibel to studieren, un ekj fruach eenen Brooda, aus dee met äant wiedastudieren kunn. Nu wieren dee beid jedeept! Daut wia bloos eent von aul de Säajnungen, waut ekj en miene dree Joa en Papua-Nie-Guinea kjrieech.

Ea ekj von Coron aune 1978 veleet, lieed ekj Adel kjanen; see wia leeftolich un docht emma aun aundre. See wia Pionia un trock äare twee Kjinja opp, waut Samuel un Shirley heeten. To deeselwje Tiet kjemmad see sikj uk om äare elre Mame. Em Mei aune 1981 reisd ekj trigj no de Filippinen, om mie met Adel to befrieen. Nodäm daut wie ons befriet hauden, wia wie toop Pionia un sorjden fa de Famielje.

Wan ekj uk eene Famielje haud, wort ekj aune 1983 aus Sondapionia no de Insel Linapacan jeschekjt, waut en de Prowins Palawan es. Onse gaunze Famielje trock doa han, wua daut kjeene aundre Breeda jeef. Adel äare Mame storf rom een Joa lota. Oba wie bleewen drock em Deenst, un daut holp ons, met dän Trua foadich to woaren. Wie fungen met soo väle aun, de Bibel to studieren, waut uk no de Toopkomes komen wullen, daut ons boolt een kjlienet Vesaumlungshus fäld. Doawäajen deed wie ons selfst eent buen. Aus wie noch mol dree Joa en Linapacan jewast wieren, kjeemen doa 110 Menschen no daut Owentmol. Daut freid ons sea! Väle von dee leeten sikj lota deepen.

Aune 1986 wort ekj no de Insel Culion jeschekjt, eene Städ, wua Menschen met de Leprakrankheit wieren. Een poa Joa lota wort Adel uk Sondapionia. Aum Aunfank haud wie Angst, soone Menschen to prädjen, waut schlajcht leet wäajen de Leprakrankheit. Oba de Breeda doa vesechaden ons, daut de Menschen, waut dise Krankheit hauden, aul jedoktat hauden un daut et nich soo leicht äwaschlapen deed. Eenje Leprakranke kjeemen no de Toopkomes, waut bie eene Sesta äa Tus aufjehoolen worden. Boolt feeld wie ons nich mea ommaklich rom dee un ons jinkj daut scheen, dise Menschen to prädjen, waut sikj von aundre un uk von Gott aufjewäsen feelden. Daut jeef ons groote Freid to seenen, daut dise Menschen, waut soo krank wieren, schaftich  worden, wäajen dee lieeden, daut see eenen Dach nich mea wudden krank sennen (Luk. 5:​12-13).

Woo kunnen onse Kjinja sikj to daut Läwen en Culion wanen? Ekj un Adel fruagen twee junge Sestren von Coron, aus dee wullen no Culion trakjen, soo daut onse Kjinja kunnen goode Frind haben. Samuel, Shirley un de twee junge Sestren jinkj daut scheen em Prädichtdeenst un kunnen met väle Kjinja studieren, äwadäm daut ekj un Adel met de Kjinja äare Elren studieeden. To eene Tiet deed wie met 11 Famieljes studieren. Boolt deed wie met soo väle de Bibel studieren, waut goot veraunkjeemen, daut wie eene fresche Vesaumlunk oppstalen kunnen!

Aum Aunfank wia ekj de eensja Eltesta en dee Jäajent. Doawäajen fruach daut Betel mie, aus ekj de Toopkomes enne Wäakj aufhoolen kunn fa de acht Vekjindja en Culion un fa de näajen Vekjindja von de Renzh Marily, waut metem Boot dree Stund auf wia. Nodäm daut wie de Toopkomes doa hauden, jinj wie aus Famielje fa miere Stunden derch de Boaj, om met de Menschen en de Renzh Halsey de Bibel to studieren.

Met de Tiet neemen soo väl Menschen en Marily un en Halsey de Woarheit aun, daut wie en beid Renzhen Vesaumlungshiesa buen kunnen. Krakjt soo aus en Linapacan jeewen de Breeda un dee, waut de Bibel studieeden, de mieeschte Sachen toom buen un deeden de mieeschte Oabeit. En daut Vesaumlungshus en Marily kunnen 200 Menschen nenn, un daut jinkj jrata to moaken, soo daut wie doa Kongressen aufhoolen kunnen.

Aune 1993, aus onse Kjinja aul groot wieren, wieren ekj un Adel em Kjreisdeenst opp de Filippinen. Dan, aune 2000, wia ekj bie de School toom em Deenstaumt utlieren. Doa wort ekj utjelieet, een Liera bie dise School to sennen. Ekj feeld mie nich goot jenuach fa dise Oppgow, oba Adel spruak mie emma Moot too. See holp mie emma wada doaraun denkjen, daut Jehowa mie de Krauft jäwen wudd, dise niee Oppgow to doonen (Filip. 4:13). Adel räd ut Erfoarunk, wäajen see selfst äare Oppgow doonen kunn, wan see uk Trubbels met de Jesuntheit haud.

Aune 2006, aus ekj Liera wia, word wie en, daut Adel de Parkinson-Krankheit haud. Wie vefieeden ons sea! Ekj räd doavon, onse Oppgow to veloten,  daut ekj fa Adel sorjen kunn, oba see auntwuad: “Toom Jefaulen sieekj bloos eenen Dokta, waut mie met miene Krankheit halpen kaun, un Jehowa woat ons halpen, onse Oppgow wieda to doonen.” Fa de näakjste sas Joa deend Adel Jehowa wieda, onen to jaumarieren. See prädicht wieda, wan see uk nich mea gonen kunn un oppem Foastool wia. Un aus see ieescht meist nich räden kunn, jeef see doawäajen Auntwuaten en de Toopkomes, wan daut uk bloos eent ooda twee Wieed wieren. Bat see aune 2013 storf, bedankten de Breeda un Sestren sikj foaken äwa Fon ooda Breew bie Adel, wiels see een goodet Biespel en uthoolen wia. Ekj wia äwa 30 Joa met Adel toop, miene true un leewe Fru. Oba aus see storf, funk ekj wada aun, mie sea truarich un auleen to feelen.

Adel wull haben, daut ekj bie miene Oppgow bliewen sull, un dauts, waut ekj deed. Ekj hilt mie drock, un daut holp mie, mie nich soo auleen to feelen. Von 2014 bat 2017 besocht ekj soone Vesaumlungen en Lenda, wua dee Tagalog räden, wua ons Woakj nich en aule Stekjen frie wia. Nodäm besocht ekj tagalogsche Vesaumlungen en Taiwan, de Stäts un Kanada. Aune 2019 wia ekj een Liera bie waut enjlische Klaussen von de School fa Kjennichrikjsvekjindja en Indien un en Tailaunt. Aul dise Oppgowen haben mie groote Freid jebrocht. Wan ekj sea drock sie en Jehowa sienen Deenst, dan sie ekj gaunz schaftich.

Bie aule Städen, wua ekj hanjeschekjt wort, leewd ekj de Breeda un Sestren, waut ekj doa kjanen lieed, un mie es daut schwoa, doa to veloten. En soone Tieden hab ekj jelieet, mie gaunz opp Jehowa to veloten. Ekj hab daut foaken beläft, woo Jehowa mie unjastett haft, un daut haft mie jeholpen, daut wellich auntonämen, wan sikj en mien Läwen waut endad. Ekj deen nu aus Sondapionia opp de Filippinen, un ekj feel mie tusich en miene fresche Vesaumlunk. De Breeda doa sent soo aus eene Famielje; dee sent behelplich un om mie bekjemmat. Ekj sie uk brow met Samuel un Shirley, wäajen dee krakjt soonen Gloowen haben aus äare Mutta (3. Joh. 4).

Jo, ekj hab väl Schwoaret en mien Läwen beläft, biejlikj daut miene leewe Fru lieden un lota stoawen must, wäajen eene Krankheit, waut ar emma schwaka muak. Ekj hab mie uk to veschiedne Omstend wanen must. Oba ekj hab jeseenen, daut Jehowa “von jiedrem eenen nich wiet auf es” (Apj. 17:27). Jehowa siene Haunt es “nich too kort”, om siene Deena to unjastetten un to stoakjen, mau rajcht soone, waut en eene Jäajent wonen, waut wiet auf es (Jes. 59:1). Jehowa, mien Groota Steen, es mien Läwen lank bie mie jewast, un ekj sie am dankboa doafäa. Ekj wia kjeenmol auleen.