1-2. (a) Wanea kaun daut besonda schwoa sennen, wäm to vejäwen? (b) Woo wees Denise, daut see reed wia to vejäwen?

 FELT die daut schwoa, aundre to vejäwen? De Mieeschte es daut schwoa, besonda wan doa wäa waut sajcht ooda deit, waut eenem sea wee deit. Soo, kjenn wie waut doonen, daut wie nich beleidicht bliewen, oba leewa vejäwen? Jo, wie kjennen. Eene Sesta biejlikj, waut Denise a heet, deed mol waut Butajeweeneljet vejäwen. Aune 2017 fuaren Denise un äare Famielje no de Hauptoffiz von Jehowa siene Zeijen kjikjen, waut korz foadich wia. Oppem Trigjwajch fua een aundret Foatich en dee nenn. Denise wort besennungsloos. Aus see oppwuak, wort see en, daut äare Kjinja sea velazt wieren un daut äa Maun, Brian, jestorwen wia. Woo feeld see sikj dan? Denise sajcht: “Ekj wia gaunz dol un derchenaunda.” Lota wort see en, daut de Foara nich aufjelenkjt ooda besopen wia; daut wia eefach een Ekjsident. Un doch must see Jehowa no sienen Fräd froagen, daut see met de veschiedne Jefeelen kunn foadich woaren, waut see haud.

² De Foara must verem Jerecht, wäajen hee wäm dootjemoakt haud, wan daut uk nich met Fliet wia. Wan daut Jerecht entscheiden wudd, daut hee schuldich wia, dan wudd hee woomäajlich enjestopt woaren. Eena, waut em Jerechtshus schauft, säd to Denise, daut et väl aun dän Rechta siene Entscheidunk doonen wudd, waut see doa ver daut Jerecht säd. Denise sajcht: “Fa mie wia daut soo, aus wudden se miene Wund fresch opjeräten un doa Solt noppjeschett haben, wäajen ekj wada von daut Schlemste vetalen must, waut ekj jeemols beläft haud.” Een poa Wäakj lota must Denise em Jerechtshus ver dän Maun räden, waut äare Famielje soo väl  Lieden veuasoakt haud. Waut säd see doa? Denise fruach dän Rechta doano, daut dän Maun sull Metleet jewäsen woaren. b Aus see ieescht utjerät haud, funk de Rechta aun to roaren. Wuarom? Hee säd: “Ekj sie aul 25 Joa Rechta jewast un ekj hab noch kjeenmol ea soont aus dit beläft. Kjeena frajcht doano, daut dänjanjen sull Metleet jewäsen, waut beschulcht woat. Doa rät kjeenmol wäa von Leew ooda von vejäwen.”

 3. Waut holp Denise, dän Maun to vejäwen?

³ Waut holp Denise, dän Maun to vejäwen? See docht doaräwa no, daut Jehowa ons uk vejäwen deit (Micha 7:18). Wan wie werkjlich dankboa sent doafäa, daut Jehowa ons vejäwen deit, dan woa wie aundre uk wellich vejäwen.

 4. Waut well Jehowa von ons haben? (Efeesa 4:32).

⁴ Jehowa well, daut wie aundre wellich vejäwen, soo aus hee ons uk wellich vejäft haft (läs Efeesa 4:32). Hee well, daut wie reed sent, deejanje to vejäwen, waut ons weedoonen (Psa. 86:5; Luk. 17:4). En disen Artikjel woa wie von dreeatlei räden, waut ons halpen woat, aundre leichta to vejäwen.

WAUT DEIT DAUT AUN DIE, WAN DIE WÄA SCHLAJCHT BEHAUNDELT?

 5. Woo kunn wie ons no Spricha 12:18 no feelen, wan ons wäa schlajcht behaundelt?

⁵ Waut aundre sajen ooda doonen, kaun ons sea weedoonen, besonda wan daut wäa von onse Famielje ooda een gooda Frint es (Psa. 55:​13-15). Eenjemol kaun daut soo weedoonen, aus wudd ons wäa metem Massa jespekjt haben (läs Spricha 12:18). Veleicht doo wie ons soo, aus wudd ons daut nich weedoonen. Oba daut wudd soo sennen, aus wan wie wudden jespekjt kjrieen un daut Massa doa bloos bennen loten. Wie brucken nich denkjen, daut et woat bäta woaren, wan wie ons bloos soo doonen, aus wudd ons daut nuscht baudren, wan aundre ons schlajcht behaundlen.

 6. Woo feel wie ons, wan ons wäa beleidicht?

⁶ Doll woaren, wan ons wäa beleidicht, es gaunz jeweenlich. De Bibel rät doavon, daut wie veleicht mol doll woaren. Oba dee woarnt ons doafäa, daut wie nich sellen doll bliewen (Psa. 4:​5, JHF; Efs. 4:26). Wuarom? Wiels wie jeweenlich doano haundlen, woo wie ons dan jroz feelen. Un doa kjemt uk meist kjeenmol waut Goodet bie rut, wan wie doll sent (Jak. 1:20). Hool em Denkj: Dauts gaunz jeweenlich, noch mol doll to woaren, oba aus wie doll bliewen, daut kjenn wie selfst entscheiden.

 7. Opp waut vonne veschiedne Wäaj kaun ons daut noch toosaten, wan ons wäa weedeit?

⁷ Wan ons wäa schlajcht behaundelt, dan kaun ons daut noch opp veschiedne Wäaj toosaten. Eene Sesta biejlikj, waut Ann heet, sajcht: “Aus ekj kjlien wia, veleet mien Voda miene Mame un befried sikj met dee Fru, waut mie tushoolen deed. Ekj feeld mie veloten. Un aus dee Kjinja hauden, feeld ekj mie soo, daut mien Voda mie nich mea leewd; un met daut Jefeel woss ekj dan opp.” Georgette, eene aundre Sesta, vetalt, woo see sikj feeld, aus äa Maun ar ontru wort. See sajcht: “Wie wieren von kjlien aun Frind un wieren toop em Pioniadeenst! Mien Hoat wia nu gaunz tweijebroaken.” Naomi, noch eene aundre Sesta, sajcht: “Ekj wudd kjeenmol jedocht haben, daut mien Maun mie wudd weedoonen. Soo, aus hee mie säd, daut hee fa eene Tiet em Plietschen  Pornografie jekjikjt haud, feeld ekj mie soo, aus wan hee mie väajeloagen haud un mie ontru jewast wia.”

 8. (a) Waut es eenjet, wuarom wie aundre vejäwen sellen? (b) Woo kjemt ons daut togood, aundre to vejäwen? (See daut Hock “ Waut kjenn wie doonen, wan ons wäa sea weedeit?”)

⁸ Wie kjennen doa nuscht met doonen, waut aundre to ons sajen ooda doonen, oba wie kjennen proowen, doa rajcht met omtogonen. Vejäwen es foaken daut baste. Wuarom? Wiels wie Jehowa leewen, un hee well, daut wie aundre vejäwen. Wan wie bloos doll bliewen un nich vejäwen, dan woa wie veleicht waut doonen, waut wie lota beschoden motten, un mau rajcht onse Jesuntheit schoden (Spr. 14:​17, 29-30). See wie mol, woo eene Sesta daut jeit, waut Christine heet. See sajcht: “Wan ekj doll ooda beleidicht sie, dan kaun ekj bloos nich schaftich kjikjen. Jeweenlich ät ekj uk waut ojjesundet un kaun nich fein schlopen. Dauts dan schwoa fa mie, miene Jefeelen unja Kontroll to hoolen, un daut deit uk väl doaraun, woo ekj mienen Maun un aundre behaundel.”

 9. Wuarom sell wie nich vebettat bliewen?

⁹ Mau rajcht wan deejanja ons nich om togoodhoolen frajcht, kjenn wie oba waut doonen, daut ons daut nich soo toosat, waut dee ons aunjedonen haft. Waut kjenn wie doonen? Georgette, wua wie aul ea von räden, sajcht: “Daut dieed een Stoot, bat ekj nich mea vebettat wia äwa mienen jewäsnen Maun. Oba doahinja späad ekj grooten Fräd.” Wan wie nich vebettat bliewen, dan kaun de Wutt nuscht doaraun doonen, woo wie aundre behaundlen. Un daut kjemt ons uk selfst togood: Wie hieren opp, äwa de Sach notodenkjen un ons kaun daut wada scheen gonen (Spr. 11:17). Oba waut es, wan du doawäajen noch nich reed best to vejäwen?

SCHAUF DOAROPP, NICH VEBETTAT TO BLIEWEN

10. Wuarom sell wie eene jewesse Tiet vegonen loten, wan ons wäa beleidicht haft? (See uk de Bilda.)

¹⁰ Waut kaun ons halpen, nich vebettat to bliewen? Biejlikj kjenn wie eene jewesse Tiet vegonen loten. Wäa sikj sea velazt haft, lat sikj biem Hospitol halpen, oba doa mott doawäajen eene jewesse Tiet vegonen,  bat dee wada jesunt es. Krakjt soo mott wie uk eene jewesse Tiet vegonen loten, bat wie ons bäta feelen un reed sent, wäm von Hoaten to vejäwen (Liera 3:3; 1. Pet. 1:22).

11. Woo kaun daut Jebäd die halpen to vejäwen?

¹¹ Bäd Jehowa doarom, daut hee die halpt, wellich to vejäwen. c Ann, von dee wie ea aul räden, vetalt, woo daut Jebäd ar holp. See sajcht: “Ekj fruach Jehowa doano, daut hee jiedrem eenen en onse Famielje daut vejäwen sull, waut dee orrajcht säden ooda deeden. Dan schreef ekj noch mienen Voda un siene fresche Fru eenen Breef un säd dee, daut ekj äant vejäft haud.” Ann steit too, daut et nich leicht wia, dee eenen Breef to schriewen. Oba see sajcht: “Ekj proowd, dee wellich to vejäwen, soo aus Jehowa daut met ons deit, un ekj hop, daut mien Voda un siene Fru doaderch mea von am lieren wellen.”

12. Wuarom sell wie doaropp vetruen, daut Jehowa rajcht es, un nich onse Jefeelen? (Spricha 3:​5-6).

¹² Vetru doaropp, daut Jehowa rajcht es, un nich diene Jefeelen (läs Spricha 3:​5-6). Jehowa weet emma, waut daut Baste fa ons es (Jes. 55:​8-9). Un hee woat kjeenmol waut von ons velangen, waut ons schoden woat. Soo, wan hee ons toorot to vejäwen, dan kjenn wie ons secha sennen, daut ons daut toom Gooden es (Psa. 40:5; Jes. 48:​17-18). Oba wan wie denkjen, daut wie daut Rajcht haben, vebettat to sennen, dan woa wie veleicht kjeenmol vejäwen kjennen (Spr. 14:​12, NW; Jer. 17:​9, NW). Naomi, von dee wie ea aul räden, sajcht: “Ieeschtlich docht ekj, daut ekj mienen Oomkje daut nich vejäwen brukt, daut hee Pornografie jekjikjt haud. Ekj docht, daut hee lota veleicht wada dautselwje doonen wudd ooda daut hee daut vejäten wudd, woo wee mie daut deed. Ekj docht soo, Jehowa wudd daut aul vestonen, woo ekj mie feeld. Oba dan wort mie dietlich, daut wan Jehowa daut uk vestonen kaun, woo ekj mie feel, bediet daut oba nich, daut hee daut fa goot talt. Hee weet, woo mie daut jeit, un daut et Tiet brukt, bat de Oaja äwajeit. Oba hee well doawäajen, daut ekj vejäwen saul.” d

 VETUSCH DÄN OAJA MET GOODET

13. Waut mott wie doonen no Reema 12:​18-21 no?

¹³ Wan wie wäm vejäwen, waut ons sea weejedonen haft, bediet daut nich bloos, daut wie nich mea doavon räden woaren, waut doa passieet es. Wie wellen uk Fräd moaken, besonda wan deejanja, waut ons weejedonen haft, een Brooda ooda eene Sesta es (Mat. 5:​23-24). Enne Städ daut wie doll ooda vebettat bliewen, well wie ons eenich sennen, Metleet to wiesen un to vejäwen (läs Reema 12:​18-21; 1. Pet. 3:9). Waut kaun ons doabie halpen?

14. Waut sell wie proowen to doonen, un wuarom?

¹⁴ Jehowa kjikjt no de goode Sieden von de Menschen. Wie sellen am nodoonen un uk no de goode Sieden kjikjen, waut de Persoon haft, dee ons beleidicht haft (2. Chr. 16:9; Psa. 130:​3, NW). Wan wie denkjen, daut dee schlajchte Sieden haft, dan woa wie soo lang sieekjen, bat wie dee finjen; un krakjt soo es daut met de goode Sieden. Wan wie bie aundre no de goode Sieden kjikjen, dan es ons daut leichta, dee to vejäwen. Biejlikj sajcht een Brooda, waut Jarrod heet: “Mie es daut leichta, eenen Brooda to  vejäwen, wan ekj äwa aul dän siene goode Sieden nodenkj, enne Städ äwa daut, waut dee mie aunjedonen haft.”

15. Wuarom kaun daut goot sennen, dänjanjen daut to sajen, daut wie dän vejäft haben?

¹⁵ Dänjanjen daut sajen, daut wie am vejäft haben, es uk eene wichtje Sach, waut wie doonen kjennen. Wuarom? Kjikj mol, waut Naomi sajcht, wua wie aul ea von räden: “Aus mien Maun mie fruach, aus ekj am vejäft haud, wull ekj am sajen, daut ekj am vejäft haud, oba ekj kunn nich. Ekj wort en, daut ekj am noch nich von Hoaten vejäft haud. Oba met de Tiet kunn ekj am dise dree Wieed sajen: ‘Ekj vejäw die.’ Aus ekj daut säd, kjrieech mien Maun Tronen enne Uagen. Ekj kunn daut nich jleewen, woo jeloten hee sikj feeld un woo väl Fräd mie daut brocht. Doahinja funk ekj wada aun, opp am to vetruen, un wie wieren wada baste Frind.”

16. Waut hast du äwa vejäwen jelieet?

¹⁶ Jehowa well, daut wie wellich vejäwen (Kol. 3:13). Oba daut kaun schwoa sennen. Soo, waut kaun ons doabie halpen? Wie motten ons em Kloaren sennen, waut daut aun ons deit, wan ons wäa schlajcht behaundelt, un ons aunstrenjen, nich vebettat to bliewen. Un dan mott wie uk dän Oaja met waut Goodet vetuschen. (See daut Hock “ Dreeatlei, waut die halpen kaun to vejäwen”.)

WAUT FA GOODET KJEMT DOABIE RUT, WAN WIE VEJÄWEN?

17. Wuarom sell wie aundre vejäwen?

¹⁷ Wie haben väl Uasoak, aundre to vejäwen. Well wie mol eenje von dee seenen. Ieeschtens: Wie sent soo metliedent aus ons Voda Jehowa, un hee es tofräd met ons (Luk. 6:36). Tweedens: Wie wiesen, daut wie werkjlich doafäa dankboa sent, daut Jehowa ons vejäft haft (Mat. 6:12). Un dreddens: Wie bliewen met aundre goode Frind un haben eene bätre Jesuntheit.

18-19. Woo kjeem daut ut, wiels Denise reed wia to vejäwen?

¹⁸ Wan wie aundre vejäwen, dan kjenn wie veleicht Goodet beläwen, wua wie nich aun jedocht hauden. See wie mol, woo Denise daut jinkj, wua wie ea aul von räden. See wist daut to dee Tiet nich, daut de Maun, waut daut Ekjsident veuasoakt haud, sikj daut äwajetalt haud, sikj no daut Jerecht daut Läwen to nämen. Oba am jinkj daut soo to Hoaten, daut Denise am vejeef, daut hee aunfunk, met Jehowa siene Zeijen toop de Bibel to studieren.

¹⁹ Ons jeit daut veleicht uk soo aus Denise, daut aundre to vejäwen eent von daut Schwanste em Läwen es. Oba daut kaun uk eent sennen, waut ons daut mieeschte Freid jeft (Mat. 5:7). Well wie doawäajen ons Bastet doonen toom aundre vejäwen, soo aus Jehowa ons vejäwen deit.