Mary a un äa Maun, John, wonen en een Launt, wua sea väl Menschen von de Filippinen hankomen toom doa läwen un schaufen. Mary un John jleichen daut sea, met dee von de goode Norecht to räden. En de Tiet von de COVID-19-Krankheit kunn Mary nich bloos en daut Launt, wua see wond, Studiums aunfangen, oba mau rajcht en aundre Lenda. Woo schauft daut?

Mary fruach äare Bibelschiela: “Kjan jie sestwäm, waut daut uk jleichen wudd, de Schreft to studieren?” Wan dee jo säden, dan fruach see, aus dee ar halpen kunnen, met äant to räden. Dise Froag to stalen, haft aul väl Goodet jebrocht. Wuarom? Wäajen soone Menschen, waut Gott sien Wuat väl räakjnen, daut jeweenlich met äare Famieljes un Frind metdeelen wellen, waut dee lieren. Waut passieed, aus Mary äare Bibelschiela dise Froag stald?

Mary haud eenen Bibelschiela, waut Jasmin heet. Derch ar kunn see met vea aundre aunfangen, de Bibel to studieren. Eent von dee wia Kristine. Ar jinkj daut Studieren soo scheen, daut see Mary fruach, aus see nich kunnen twee Mol de Wäakj studieren. Aus Mary Kristine fruach, aus see sestwäm kjand, waut veleicht uk wudd wellen de Bibel studieren, säd see: “Jo, ekj woa doano seenen, daut du miene Frind kaust kjanen lieren.” En de näakjste poa Wäakj lieed Mary vea von Kristine äare Frind kjanen, waut uk studieren wullen. Lota lieed see aundre von Kristine äare Frind kjanen, un eenje von dee hauden noch aundre Frind, waut uk studieren wullen.

Kristine wull, daut äare Famielje opp de Filippinen uk von de Bibel lieeden. Doawäajen räd see to äare Dochta, Andrea, doavon. Aum Aunfank docht Andrea, daut Jehowa siene Zeijen eene fonnje Jemeent wieren, daut dee nich aun Jesus jleewden un daut dee bloos daut oole Tastament brukten. Oba no daut ieeschte Studium wort see aul en, daut et nich soo wia, waut see jedocht haud. Biem Studieren säd see mieremol: “Wan de Schreft daut sajcht, dan mott daut soo sennen!”

Eene Tiet lota lieed Mary derch Andrea twee von äare Frind un eenen Oabeitspoatna kjanen, waut uk aunfungen to studieren. Andrea äare blinje Taunte, waut Angela heet, horcht emma too, wan Mary met Andrea de Bibel studieed, oba Mary wist daut nich. Dan eenen Dach fruach Angela Andrea, aus see met Mary räden kunn, un fruach ar no een Bibelstudium. Angela jleicht daut sea, waut see lieed. Benna eene Moonat lieed see miere Bibelvarzhen utwendich un wull vea Mol de Wäakj studieren. Met Andrea äare Help kunn see pinkjlich bie de Toopkomes sennen äwa Internet.

 Aus Mary enwort, daut Kristine äa Maun, Joshua, doa uk emma rom wia, wan see studieeden, fruach Mary dän, aus hee nich wudd wellen metstudieren. Joshua säd: “Ekj woa bloos toohorchen; oba wan du mie irjentwaut frajchst, dan velot ekj.” En de ieeschte fief Minuten, aus see studieeden, haud hee mea Froagen aus Kristine un wull uk de Bibel studieren.

Derch eene eefache Froag funk Mary aun, met een schoof Menschen de Bibel to studieren. See beräd daut, daut aundre Zeijen met eenje von dise wieda studieren wudden. Aules toop kunn Mary 28 Bibelstudiums en vea veschiedne Lenda aunfangen.

Jasmin, de ieeschta Bibelschiela, von dee wie en dise Erfoarunk räden, leet sikj em Aprell 2021 deepen. Kristine leet sikj em Mei 2022 deepen, un see trock trigj no de Filippinen, om met äare Famielje toop to sennen. Angela leet sikj dan een poa Moonat lota deepen un es nu Pionia. Twee aundre Bibelschiela, waut Mary derch Kristine kjanen lieed, leeten sikj uk deepen. Kristine äa Maun, Joshua, un dee äare Dochta, Andrea, un noch väl aundre Bibelschiela komen em Jeisteljen fein wieda.

Bie de ieeschte Christen vespreed sikj de goode Norecht bosich mank äare Famieljes un Frind (Joh. 1:​41-42a; Apj. 10:​24, 27, 48; 16:​25-33). Wuarom frajchst nich mol diene Bibelschiela un aundre, waut mea von de Schreft lieren wellen: “Kjanst du wäm, waut uk jleichen wudd, de Schreft to studieren?” Wäa weet? Veleicht kaust du uk derch dise eefache Froag een deel Bibelstudiums aunfangen!