HAFT sikj die daut mol soo jespäat, daut du met diene Trubbels gaunz auleen best? Wie läwen en “schwoare Tieden ..., met dee meist nich woat foadich to woaren sennen” (2. Tim. 3:1). Daut kaun ons bat doa brinjen, daut wie mootloos woaren un ons auleen feelen. Oba wie brucken nich auleen met onse Trubbels foadich woaren. De Schreft sajcht, daut een gooda Frint ons “em Trubbel biestonen” kaun (Spr. 17:17).

De Apostel Paulus reisd opp siene Missionsreis met eenje Frind toop, waut am holpen (Kol. 4:​7-11). Aus Paulus en Room faustjenomen wia, holpen siene Frind am met eenje Sachen ut, waut hee selfst nich doonen kunn. Biejlikj brocht Epafroditus eenje Sachen no Paulus, waut de Breeda un Sestren en Filippi am jeschekjt hauden (Filip. 4:18). Un Tiechikus brocht Paulus siene Breew no veschiedne Vesaumlungen (Kol. 4:7; see de Erkjläarunk toom studieren en de Studiabibel). Wiels Paulus siene Frind am holpen, kunn hee de Vesaumlungen Moot toospräakjen, wan hee uk em Jefenkjnis ooda en sien Hus faustjenomen wia. Woo kaust du uk een gooda Frint sennen?

Vondoag dän Dach jeft daut Breeda un Sestren, waut wiesen, woo wieetvoll daut es, een gooda Frint to sennen. Elisabet, eene Pionia-Sesta en Spaunien, sajcht, woo eene Sesta ar en schwoare Tieden holp. Aus de Doktasch Elisabet säden, daut äare Mame aun Kjräft stoawen wudd, schreef dise Sesta ar foaken äwa Fon soont, waut sikj opp Bibelvarzhen stett un ar Moot jeef. Elisabet sajcht: “Dit jeef mie Krauft fa dän Dach, un ekj wist, daut doa wäa aun mie docht” (Spr. 18:24).

Wie kjennen goode Frind met onse Gloowesbreeda woaren, wan wie dee halpen, nom Prädichtdeenst ooda no de Vesaumlunk to komen. Wurscht du biejlikj kjennen eenen elren Brooda ooda eene elre Sesta aunbeeden, äant met daut to halpen? Wan du daut deist, dan woa jie junt omzajcht Moot toospräakjen kjennen (Reem. 1:12). Oba eenje Gloowesbreeda kjennen nich von tus. Woo kaust du fa dee een gooda Frint sennen?

Eenje Gloowesbreeda kjennen nich no de Toopkomes em Vesaumlungshus komen, wäajen dee veleicht sea krank sent ooda aundre Trubbels haben. Eent von dise Breeda es David, waut eene schlemme Sort Kjräft haud. Hee must fa äwa sas Moonat Jeft enlakjen. En dise gaunze Tiet kunnen hee un siene Fru Lidia bloos äwa Internet bie de Toopkomes sennen.

Waut deeden de Breeda un Sestren enne Vesaumlunk, om äant to halpen? No jieda Toopkomen wieren eenje von dee, waut em Vesaumlungshus wieren, wellich reed, met David un Lidia äwa  Video to vetalen. Un wan dee eene Auntwuat jeewen, dan jeef daut emma een poa Breeda un Sestren, waut äant lota schreewen un säden, daut see äare Auntwuaten sea jejleicht hauden. Waut deed daut aun äant? Dee feelden sikj jeleeft un nich soo auleen.

Wurscht du kjennen met soone toop prädjen, waut nich von tus kjennen? Wan du die daut bloos een bät aundasch enrechst, dan kaust du soone Breeda un Sestren wiesen, daut du äant nich vejäten hast (Spr. 3:27). Du wurscht biejlikj kjennen met dee toop Breew schriewen ooda äwa Fon prädjen. Soone, waut nich von tus kjennen, kjennen veleicht bie de Toopkomes fa dän Prädichtdeenst äwa Internet bie sennen. David un Lidia wieren sea dankboa, daut äare Vesaumlunk daut soo deed. David säd: “Daut wie bloos kunnen met onse Gloowesbreeda toop sennen fa eene korte Räd un een Jebäd, haft ons sea väl Moot jemoakt.” Un bieaun wurscht du uk kjennen eenen Gloowesbrooda, waut nich von tus kaun, froagen, aus du met dienen Bibelschiela toop kaust hankomen toom doa studieren.

Wan wie met onse Breeda un Sestren, waut nich von tus kjennen, toop Tiet vebrinjen un äare feine Ieejenschoften beoobachten, dan woa wie jratre Frind met dee. Wan du biejlikj doano kjikjst, woo fein dee de Bibel brucken, om wäm to halpen, Jehowa bäta kjanen to lieren, woascht du dee noch mea räakjnen. Wan du de Breeda un Sestren halpst to prädjen un bie de Toopkomes to sennen, kaust du niee Frind kjrieen (2. Kor. 6:13).

Paulus treest daut sea, daut sien Frint Titus bie am wia (2. Kor. 7:​5-7). Dise Jeschicht wiest ons, daut wie aundre nich bloos derch onse Wieed treesten kjennen, oba uk doaderch, daut wie bie dee sent un dee unjastetten (1. Joh. 3:18).

Onse Breeda un Sestren en Russlaunt haben ons een goodet Biespel jejäft, woo wie ons omzajcht halpen kjennen. See wie mol, waut Sergey un dän siene Fru, Tatyana, beläwden. De Poliezen sochten äa Hus gaunz derch un neemen äant met toom äant befroagen. Tatyana kunn daut ieeschte trigj no Hus. Sergey vetalt: “Aus [Tatyana] ieescht tus wia, kjeem doa fuaz eene äwanämende Sesta han. Daut dieed nich lang, un doa kjeemen mea Breeda un Sestren un holpen ons, ons Tus wada en Ordninj to brinjen.”

Sergey sajcht noch: “Ekj hab aul emma Spricha 17:17 jejleicht, wua daut sajcht: ‘Een Frint woat emma Leew bewiesen, un een Brooda es jebuaren toom em Trubbel biestonen.’ Aus wie vefolcht worden, hab ekj beläft, daut dise Wieed werkjlich stemmen. Mie haft daut sea aun de Help von miene Frind jefält, un Jehowa haft mie soone äwanämende Frind jejäft, waut mie emma halpen.” a

Ons fält daut aun de Help von onse Frind en dise schwoare Tieden. Un ons woat daut noch dolla aun dee äare Help fälen, wan wie ieescht en de groote Liedenstiet sent. Doawäajen strenj die nu aul aun, een gooda Frint to sennen! (1. Pet. 4:​7-8).