1-2. Aun waut es daut to seenen, daut Jehova väl toom äwajen haft?

JEHOVA es een Gott, waut väl toom äwajen haft. Aules, waut wie haben, kjemt von am. Aulet Golt un Selwa un uk aulet aundre en de Natua es sient, un hee brukt daut doatoo, daut daut Läwen oppe Ieed mäajlich es (Psa. 104:13-15; Hag. 2:8). En de Schreft kjenn wie foaken läsen, woo Jehova daut, waut hee haft, brucken deed, om derch Wunda fa sien Volkj to sorjen.

² Fa 40 Joa jeef Jehova daut Volkj Israel en de Wiltnis Wota un Mauna, “soo daut an daut aun nuscht fäld” (Neh. 9:20-21; 2. Mo. 16:35). Jehova holp uk derch een Wunda eene Wätfru, waut Gloowen haud. Hee jeef Elisa de Krauft, daut dee kunn dee äa beskje Fat to väl moaken. Doaderch kunn see äare Schult betolen un hilt noch jenuach Jelt äwa, daut see un äare Säns doavon läwen kunnen (2. Kjen. 4:1-7). Jehova jeef uk Jesus de Krauft, derch een Wunda fa Äten to sorjen un mau rajcht fa Jelt, wan daut needich wia (Mat. 15:35-38; 17:27).

3. Waut woa wie en disen Artikjel seenen?

³ Jehova haft äwajenuach, daut hee aules oppe Ieed kaun aum  läwen hoolen. Oba hee well doawäajen haben, daut siene Deena von äa Hab un Goot brucken, om daut Woakj von siene Organisazion to unjastetten (2. Mo. 36:3-7; läs Spricha 3:9). Wuarom well Jehova haben, daut wie am waut trigjäwen? Woo deeden Jehova siene Deena ieeschtemma dee unjastetten, waut Jehova sien Woakj deeden? Woo brukt de Organisazion de Gowen, waut vondoag dän Dach jejäft woaren? Daut woa wie en disen Artikjel seenen.

4. Waut wies wie Jehova, wan wie sien Woakj unjastetten?

⁴ Wie jäwen Jehova waut, wiels wie am leewen un am dankboa sent. Wie kjennen ons Wunda nich utspräakjen, wan wie doaraun denkjen, waut Jehova aules fa ons jedonen haft. Aus de Kjennich David doavon räd, waut doa needich wia toom dän Tempel buen, säd hee, daut aules, waut wie haben, von Jehova kjemt un daut uk aul daut, waut wie am jäwen, rajcht jesajcht von am es (läs 1. Chronik 29:11-14).

5. Woo wiest de Schreft, daut et een wichtjet Poat von de woare Aunbädunk es, friejäwrich to sennen?

⁵ Jäwen jehieet uk to onsen Deenst fa Jehova. En eene Vision hieed de Apostel Johanes Jehova siene himlische Deena sajen: “Du best daut wieet, oo Har, Harlichkjeit un Iea un Krauft to nämen, wiels du aules jemoakt hast. Derch dienen Wellen es aules doa un jemoakt worden” (Opb. 4:11). Wurscht du nich uk sajen, daut Jehova daut wieet es, aul de Harlichkjeit un Iea to kjrieen? Doawäajen well wie am daut baste jäwen, waut wie haben. Derch Moses jeef Jehova de Israeliten daut Jeboot, no de Fasten to gonen, waut et dreemol daut Joa jeef. To de Aunbädunk opp dise Fasten jehieed uk, “nich onen eene Gow” ver Jehova to komen (5. Mo. 16:16). Wie sent uk friejäwrich, wäajen wie dankboa sent fa daut Woakj, waut Jehova siene Organisazion hia oppe Ieed deit un wäajen wie daut unjastetten wellen. Daut es een wichtjet Poat von onsen Deenst fa Gott.

6. Wuarom es daut goot fa ons, wan wie waut jäwen? (See daut Bilt aum Aunfank.)

⁶ Jäwen es goot fa ons. Daut es väl wieet, wan eena lieet, friejäwrich to sennen un nich bloos emma von aundre to kjrieen (läs Spricha 29:21, NW *). Saj wie mol, een Kjint kjricht Fupjejelt von de Elren un kjaft dee von daut een Jeschenkj. Secha woaren de Elren sikj sea doaräwa freien! Un wan biejlikj een Jung ooda eene Mejal Pionia es un noch tus wont, dan wudd daut fein sennen, wan dee metholp, de Onkosten to betolen. De Elren velangen daut veleicht goanich, oba dee nämen daut doawäajen aun, wiels doaderch kjennen de Kjinja wiesen, woo dankboa dee fa aul daut sent, waut de Elren fa an doonen. Krakjt soo weet Jehova, daut ons daut toom gooden es, wan wie von ons Hab un Goot jäwen.

7-8. (a) Woo deeden Jehova siene Deena en de Bibeltiet fa waut bestemdet Gowen jäwen? (b) Woo unjastetten dee Jehova sien Woakj?

⁷ En de Schreft läs wie foaken, daut Gott siene Deena von äare Sachen jeewen. Eenjemol wia daut fa waut bestemdet, biejlikj fruach Moses no Gowen toom daut Aunbädungszelt moaken un de Kjennich David fruach no Gowen toom dän Tempel buen (2. Mo. 35:5; 1. Chr. 29:5-9). En de Tiet von dän Kjennich Joasch wort doa Jelt toopjekollakjt un de Priestasch brukten daut  toom Jehova sien Hus repäaren (2. Kjen. 12:5-6). Un aus de Christen en de Aposteltiet hieeden, daut en Judäa eene Hungaschnoot wia, “worden [dee] sikj eenich, daut een jiedra doano aus hee kunn, de Breeda en Judäa methalpen wudd” (Apj. 11:27-30).

⁸ Jehova siene Deena jeewen uk Gowen toom deejanje unjastetten, waut en Gott sienen Deenst veroppjinjen. Biejlikj säd daut Jesaz Moses, daut de Israeliten de Leviten sullen dän Tieenden jäwen, wiels dee kjeen Oafgoot kjrieejen, soo aus de aundre Stam. Soo kunnen dee äare Oabeit bie daut Aunbädungszelt fein doonen (4. Mo. 18:21). Biejlikj soo wia daut bie Jesus un siene Apostel. Dee worden von Frues unjastett, dee wellich “von äa Vemieejen jejäft hauden, fa an to sorjen” (Luk. 8:1-3, Fn.).

9. Waut fa Gowen worden ieeschtemma jejäft?

⁹ Waut wieren daut fa Gowen, waut ieeschtemma jejäft worden? Toom daut Aunbädungszelt en de Wiltnis moaken jeewen de Israeliten woomäajlich von daut, waut see von Ägipten metjebrocht hauden (2. Mo. 3:21-22; 35:22-24). En de Aposteltiet deeden eenje Christen äare Sachen vekjeepen, biejlikj Launt ooda Hiesa, un brochten daut Jelt no de Apostel. De Apostel deelden daut dan aun deejanje ut, waut daut fäld (Apj. 4:34-35). Aundre läden waut Jelt tosied, daut see pinkjlich fa daut Woakj Gowen jäwen kunnen (1. Kor. 16:2). Soo kunn jieda eena waut jäwen, aus dee nu sea rikj wia ooda sea oam (Luk. 21:1-4).

10-11. (a) Woo kjenn wie uk soo friejäwrich sennen aus Jehova siene Deena enne Bibeltiet? (b) Woo denkjst du doaräwa, daut du Gowen jäwen kaust fa daut Kjennichrikjswoakj?

¹⁰ Vondoag dän Dach kjenn wie uk eenjemol jefroacht woaren, fa eene bestemde Sach Gowen to jäwen. Haben se bie junt biejlikj jeräakjent, een Vesaumlungshus to buen? Ooda woat jun Vesaumlungshus oppjefrescht? Veleicht fält doa uk Jelt toom daut Betel oppfreschen ooda fa eenen Kongress, waut bie junt sennen woat, ooda toom Breeda uthalpen, waut Schoden jekjräajen haben derch een grootet Owwada. Wie jäwen uk Gowen toom de Missionoaren, de Sondapionieren un de Kjreisoppsechtasch unjastetten un uk fa dee, waut en de Hauptoffiz un en de Betels oppe gaunze Welt schaufen. Un june Vesaumlunk jeft secha uk pinkjlich eene jewesse Somm, daut doa kjennen Kongresshiesa un Vesaumlungshiesa jebut woaren, waut onse Breeda oppe gaunze Welt togood komen.

¹¹ Wie aula kjennen daut Woakj unjastetten, waut Jehova nu en de latste Tiet deit. Mieeschtens es nich bekaunt, wäa Gowen jejäft haft. Wie lajen dee en de Gowenkaustes em Vesaumlungshus en, onen daut et oppfelt. Woomäajlich jäw wie uk Gowen äwa Internet opp jw.org. Veleicht denkj wie, daut daut beskje, waut wie jäwen, nich väl enhelt. Oba de mieeschte Gowen, waut doa nenkomen, komen nich doavon, wäajen een poa Breeda een deel enlajen, oba wäajen een deel Breeda een bät enlajen. Mau rajcht soone Breeda, waut mau weinich haben, doonen daut, waut de Breeda en Mazedonien deeden. Dee wieren “sea oam”, oba see prachaden, daut see kunnen waut jäwen, un see jeewen rikjlich (2. Kor. 8:1-4).

12. Woo kjikjt de Organisazion doano, daut de Gowen daut baste jebrukt woaren?

¹² De Breeda vom Väastaunt gonen tru un weis met de Gowen om (Mat. 24:45). Dee froagen Jehova no Help, daut see rajcht entscheiden kjennen, un talen sikj  daut goot äwa, woo daut Jelt jebrukt saul (Luk. 14:28). En de Bibeltiet pausten dee, waut äwa de Gowen aunjestalt wieren, sea opp, daut dee bloos fa daut jebrukt worden, wuafäa dee jedocht wieren. Toom Biespel reisd Esra trigj no Jerusalem un neem Gowen met, waut de persischa Kjennich jejäft haud. Daut wia Golt, Selwa un aundret, waut vondoag dän Dach äwa 100 Millionen stätsche Dola em Wieet wia. Esra tald daut aules fa friewelje Gowen fa Jehova un säd krakjt, woo se no dee oppaussen sullen, aus see dise jefäadelje Reis muaken (Esra 8:24-34). De Apostel Paulus deed Jelt toopkollakjten toom de Breeda en Judäa halpen. Hee sach doano, daut dee, waut daut Jelt doa hanbrochten, aules opprechtich deeden, soo daut et “nich mau ver Gott, oba uk ver Menschen rajcht” wia (läs 2. Korinta 8:18-21). Vondoag dän Dach deit de Organisazion daut krakjt soo aus Esra un Paulus. Dee paussen sea doano opp, woo dee met de Gowen omgonen un fa waut dee jebrukt woaren.

13. Wuarom haft de Organisazion de lotre Tiet eenje Sachen jeendat?

¹³ Eene Famielje mott veleicht waut endren, wan dee seenen, daut see mea Jelt vebrucken, aus see vedeenen. Ooda veleicht wellen dee äa Läwen uk eefacha moaken, daut dee nich soo väl Onkosten haben un mea kjennen fa Jehova doonen. Krakjt soo es daut bie Jehova siene Organisazion. En de latste Joaren jeef daut väl nieet un eenjemol wieren doa mea Onkosten aus Ennomen. Doawäajen kjikjt de Organisazion doano, wua dee kjennen spoaren un Sachen eefacha moaken, daut aul de Gowen, waut jie soo wellich jäwen, daut baste kjennen jebrukt woaren.

14-16. (a) Fa waut woaren de Gowen jebrukt, waut jie jäwen? (b) Woo kjemt die daut togood, waut met de Gowen aules jedonen woat?

¹⁴ Väl Breeda, waut aul lang en de Woarheit sent, sajen, daut wie nu soo väl veschiednet em jeisteljen kjrieen aus noch kjeenmol ea. Denkj mol han! Een poa Joa trigj hab wie jw.org un JW Broadcasting jekjräajen. De Neue-Welt-Übersetzung der Heiligen Schrift jeft et opp emma mea Sproaken. Un aune 2014 ooda 2015 haud wie en 14 Städa de groote internazionale Kongressen “Sieekjt daut ieeschte no Gott sien Rikj”, un doatoo deed wie waut von de jratste Plaza doa renten. Dee, waut doa wieren, wieren sea schaftich!

 ¹⁵ Väle haben jesajcht, woo dankboa see fa aul daut scheene sent, waut see von Jehova siene Organisazion kjrieen. Biejlikj schreef een Poa Lied en Asien: “Wie deenen en eene kjliene Staut un doawäajen feel wie ons eenjemol een bät auleen un vejäten dan, woo groot Jehova sien Woakj es. Oba wan wie de veschiedne Videos opp JW Broadcasting seenen, dan es ons wada kloa, daut wie aulawäajen oppe Ieed Gloowesbreeda haben. De Breeda un Sestren bie ons jleichen JW Broadcasting sea. Dee sajen foaken, daut see sikj wäajen de Moonatsprograms nu väl dolla met de Breeda vom Väastaunt vebungen feelen. Noch kjeenmol ea wieren dee soo schaftich, een Poat von Gott siene Organisazion to sennen.”

¹⁶ Oppe gaunze Welt woaren nu dicht bie 2 500 Vesaumlungshiesa jebut ooda oppjefrescht. Aus eene Vesaumlunk en Honduras aunfunk, äa nieet Vesaumlungshus to brucken, schreewen see: “Wie sent soo schaftich, daut wie kjennen to Jehova siene groote Famielje jehieren un daut wie Gloowesbreeda oppe gaunze Welt haben. Soo es daut mäajlich jeworden, daut wie hia bie ons kjennen een Vesaumlungshus haben. Daut haud wie ons aul lang emma jewenscht!” Biejlikj soo dankboa sent uk väle, waut de Bibel un uk aundre Bieekja opp äare Sproak kjrieen ooda waut Help kjrieen no een grootet Owwada. Un dee, waut seenen, woo väl goodet daut besondre prädjen en groote Städa un daut effentliche prädjen en äare Jäajent brinjt, freien sikj uk sea.

17. Aun waut es to seenen, daut Jehova de Organisazion halpen deit?

¹⁷ Väl Menschen kjennen daut nich vestonen, woo aul dit kaun jedonen woaren bloos met friewelje Gowen. Een Wieet von eene groote Kompanie besach sikj eent von onse Drekjarieen. Dee tieed sikj sea, daut doa aules friewelje Oabeida wieren, daut aules met friewelje Gowen betolt wort un daut doa nuscht vekoft wort uk nich Jelt jekollakjt. Fa am to beseenen wia daut ommäajlich, daut soont schaufen kunn. Un daut stemt uk. Wie weeten, daut daut bloos mäajlich es, wiels Jehova methalpt (Hiob 42:2).

18. (a) Woo woa wie jesäajent woaren, wan wie fa daut Kjennichrikj Gowen jäwen? (b) Woo kjenn wie onse Kjinja un uk de Niee lieren, waut to jäwen?

¹⁸ Jehova ieet ons doaderch, daut wie daut groote Woakj unjastetten kjennen, waut nu jedonen woat. Hee vesechat ons, daut wie väl Säajen kjrieen woaren, wan wie fa daut Kjennichrikj Gowen jäwen (Mal. 3:10). Jehova vesprakjt, daut deejanje goot doonen woaren, waut rikjlich jäwen (läs Spricha 11:24-25). Jäwen moakt ons uk schaftich, wäajen “jäwen es seelja aus nämen” (Apj. 20:35). Derch daut, waut wie sajen ooda doonen, kjenn wie onse Kjinja un uk de Niee lieren, woo dee waut jäwen kjennen, soo daut dee uk kjennen sea jesäajent woaren.

19. Waut hast du von disen Artikjel jelieet?

¹⁹ Aules, waut wie haben, kjemt von Jehova. Wan wie am waut trigjäwen, dan wies wie, daut wie am leewen un sea dankboa sent fa aules, waut hee fa ons jedonen haft (1. Chr. 29:17). Aus de Tempel jebut wort, “freid [daut gaunze Volkj] sikj doaräwa daut soo väle reed wieren toom jäwen, un see wieren met äa gaunzet Hoat doabie un jeewen daut friewellich däm HARN” (1. Chr. 29:9). Well wie uk wieda Freid doaraun haben, Jehova von daut trigjtojäwen, waut hee ons jejäft haft.