1-2. (a) Waut deeden de Wieed ut Jesaja 41:10 aun eene Sesta, waut Yoshiko heet? (b) Wäm sullen dise Wieed togood komen?

EENE true Sesta, waut Yoshiko heet, kjrieech eene schlajchte Norecht. Äa Dokta säd to ar, daut see bloos noch een poa Moonat läwen wudd. Waut deed see dan? Yoshiko docht aun eenen feinen Bibelvarsch. Daut wia Jesaja 41:10 (läs). Dan säd see ruich to dän Dokta, daut see nich Angst haud, wäajen Jehova ar soo to sajen aune Haunt hilt. * Dis Bibelvarsch treest onse leewe Sesta un holp ar gaunz opp Jehova to vetruen. Dee Varsch kaun ons uk halpen ruich to bliewen, wan wie groote Schwierichkjeiten haben. Dit woa wie noch bäta vestonen, wan wie seenen, wuarom Gott Jesaja dise Wieed oppschriewen leet.

² Jehova leet Jesaja dise Wieed ieeschtlich oppschriewen, om de Juden to treesten, waut se lota wudden met no Babel nämen. Oba dee sullen nich bloos dee togood komen, oba uk aul siene Deena nohäa (Jes. 40:8; Reem. 15:4). Vondoag dän Dach läw wie en “jreslich schwoare Tieden” un ons fält de Troost von daut Buak Jesaja dolla aus jeemols ea (2. Tim. 3:1).

3. (a) Waut vonne Vespräakjungen sent en Jesaja 41:10, waut ons Varsch fa daut Joa 2019 es? (b) Wuarom fälen ons dise Vespräakjungen?

³ En disen Artikjel woa wie dree von Jehova siene Vespräakjungen en Jesaja 41:10 derchnämen, waut ons Moot jäwen: 1. Jehova woat met ons sennen, 2. hee es ons Gott un 3. hee woat ons halpen. Ons fälen dise Vespräakjungen, *  wäajen wie uk Trubbels haben, soo aus Yoshiko. Wie motten uk doamet foadich woaren, daut daut Läwen en dise Welt emma schwanda woat. Eenje von ons woaren mau rajcht von majchtje Rejierungen vefolcht. Well wie mol Jehova siene Vespräakjungen eent no daut aundre derchgonen.

4. (a) Waut es daut ieeschte Vespräakjen, waut wie seenen woaren? (See uk de Footnoot.) (b) Woo lat Jehova ons daut weeten, woo hee äwa ons denkjt? (c) Waut deit daut aun die?

⁴ Daut ieeschte treest Jehova ons met de Wieed: “Enjst die nich, wiels ekj sie met die”. * Daut Jehova met ons es, es doaraun to seenen, daut hee emma om ons todoonen es un ons siene Leew wiest. Hee leeft ons sea un doawäajen sajcht hee: “Jie [sent] mie soo väl wieet . . . ekj [räakjen] junt soo väl . . . un [sie] junt soo goot” (Jes. 43:4). Nuscht em Himmel ooda oppe Ieed kaun daut bat doa brinjen, daut Jehova siene Deena nich mea leeft; hee woat emma tru opp onse Sied sennen (Jes. 54:10). Daut jeft ons Moot, daut hee ons leeft un ons Frint es. Jehova beschizt ons nu krakjt soo, aus hee sienen Frint Abram (Abraham) ieeschtemma deed. Hee säd to am: “Hab nich Angst Abram. Ekj woa die Schutz jäwen” (1. Mo. 15:1).

5-6. (a) Woo weet wie, daut Jehova ons met onse Schwierichkjeiten halpen well? (b) Waut kjenn wie von Yoshiko lieren?

⁵ Wie weeten, daut Jehova ons met onse Schwierichkjeiten halpen well, wiels hee siene Deena vesprakjt: “Wan jie woaren motten derch deepet Wota gonen, woa ekj junt biestonen. Wan de Riefa junt metrieten well, woat dee junt nich unjakjrieen. Un wan jie em Fia nenn komen, woa jie junt nich brennen” (Jes. 43:2). Waut meent daut?

⁶ Jehova vesprakjt nich, daut hee fuaz aul onse Schwierichkjeiten woat wajchnämen. Oba hee woat daut nich tooloten, daut de Trubbels ons unjaschälen, soo aus  een Riefa, ooda daut dee ons, soo aus een grootet Fia, Schoden aundoonen, waut fa emma blift. Hee vesprakjt, daut hee met ons sennen woat un ons halpen woat, wan wie Schwierichkjeiten haben. Woo woat hee daut doonen? Hee woat ons halpen, daut wie nich too Angst haben; soo kjenn wie am mau rajcht dan tru bliewen, wan ons Läwen en Jefoa es (Jes. 41:13). Bie Yoshiko, wua wie aul ea von räden, wia daut soo. Äare Dochta sajcht: “Wie wundaden ons, woo ruich Mame wia. Wie sagen, daut Jehova ar werkjlich ennalich Fräd jeef. See räd bat aun dän Dach, aus see storf, met de Nursen un de aundre Kranke äwa Jehova un siene Vespräakjungen.” Waut kjenn wie von Yoshiko lieren? Wan wie ons doaropp veloten, daut Gott met ons es, soo aus hee daut vesproaken haft, dan woa wie uk en schwoare Tieden mootich un stoakj sennen.

7-8. (a) Waut es daut tweede Vespräakjen, waut wie derchgonen woaren? (b) Waut bediet dit Vespräakjen? (c) Wuarom säd Jehova, daut de Juden sikj nich ferchten sullen? (d) Woo holpen de Wieed von Jesaja 46:3-4 de Juden woomäajlich, daut dee sikj nich ferchten?

⁷ Daut tweede Vespräakjen, waut Jesaja oppschreef, wia: “Fercht die nich, wiels ekj sie dien Gott.” Waut bediet daut? Opp de Sproak, waut dis Varsch mol jeschräwen wort, jäwen de Wieed “sikj ferchten” auntovestonen, “daut eena sikj emma wada omkjikjt, wäajen eena sikj fa waut jefäadeljet fercht”, ooda “sikj romkjikjt, wäajen eena sikj fa irjentwaut sea grult”.

⁸ Wuarom säd Jehova to de Juden, waut se met no Babel nämen wudden, see sullen sikj nich ferchten? Wäajen hee wist, daut de Enwona von Babel sikj ferchten wudden. Fa waut wudden dee sikj ferchten? Meist aum Enj von de 70 Joa, waut de Juden wudden en Babel sennen, wudden de stoakje Soldoten von Medien un Persien jäajen Babel komen. Jehova wudd dee brucken toom sien Volkj friemoaken (Jes. 41:2-4). Aus de Babelonia un de Menschen von aundre Velkja, waut don läwden, daut enworden, daut äare Fiend emma noda kjeemen, wullen see sikj omzajcht Moot toospräakjen. See muaken sikj uk noch mea Aufjetta, wiels see hopten, daut dee an wudden beschitzen (Jes. 41:5-7). Oba Jehova beruijd de Juden, waut en Babel wieren, un säd to dee: “Du, Israel, [un nich de aundre Velkja, best] mien Kjnajcht, . . . fercht die nich, wiels ekj sie dien Gott” (Jes. 41:8-10). Daut es oppfaulent, daut Jehova säd: “Ekj sie dien Gott.” Met dise Wieed treest Jehova siene true Deena un wees dee, daut hee nich von an vejäten haud. Hee wia noch emma äa Gott un see wieren noch emma sien Volkj. Hee säd to dee: “Ekj woa junt droagen un raden.” Secha jeef de Juden daut väl Krauft un Moot (läs Jesaja 46:3-4).

9-10. Wuarom derw wie ons nich ferchten? Jeff een Biespel.

⁹ Noch kjeenmol ea hauden de Menschen rom ons soo väl Angst aus nu, wäajen daut oppe Welt emma schlemma woat. Daut sat ons uk too, oba wie derwen ons nich ferchten. Jehova sajcht to ons: “Ekj sie dien Gott.” Wuarom halpt ons daut sea, daut wie ruich bliewen kjennen?

¹⁰ See wie mol een Biespel: Twee Metfoara, waut Jim un Ben heeten, foaren met eenen Zhett met. Daut scheddat sea un deit sea opp un dol, wäajen doa soon stoakja Wint es. Dan sajcht eene Stemm derch dän Lautspieker: “Blieft aunjeschnalt. Wie woaren nu een Stootje derch Owwada flieejen.” Jim sorcht sikj sea. Oba dan sajcht de  Stemm noch: “Ekj sie de Pieloot. Fercht junt nich, ekj hab dän Zhett unja Kontroll.” Aus Jim daut hieet, dreikopt dee un sajcht: “Woo kaun dee sikj soo secha sennen?” Dan sitt hee, daut Ben gaunz ruich es un hee frajcht am: “Woo kaust du bloos soo ruich sennen?” Ben kjikjt schaftich un sajcht: “Wiels ekj dän Pieloot sea goot kjan. Daut es miene Pape!” Hee sajcht uk noch: “Ekj woa die mol waut von dän vetalen. Ekj sie mie secha, du woascht uk ruich sennen, wan du weetst, woo dee es un waut dee aules kaun.”

11. Waut kjenn wie von daut Biespel von dän Zhett lieren?

¹¹ Waut kjenn wie von dit Biespel lieren? Soo aus Ben sent wie uk ruich, wäajen wie kjanen onsen himlischen Voda Jehova sea goot. Wie weeten, daut hee ons nu ver daut Enj von dise Welt derch onse Trubbels derchhalpen woat, waut soo sent aus een grootet Owwada (Jes. 35:4). Wie vetruen opp Jehova un doawäajen kjenn wie ruich bliewen, wan de aundre uk fa Angst nich ut noch en weeten (Jes. 30:15). Wie sent uk soo aus Ben, wan wie aundre utlajen, wuarom wie ons opp Gott veloten kjennen. Dan kjennen dee sikj uk secha sennen, daut Jehova an halpen woat, endoont waut fa Schwierichkjeiten see haben.

12. (a) Waut es daut dredde Vespräakjen, waut wie seenen woaren? (b) Waut bediet daut, wan daut von Jehova sienen “stoakjen Oarm” rät?

¹² Daut dredde Vespräakjen, waut Jesaja oppschreef, wia: “Ekj woa die stoakj moaken, un die halpen”. Jesaja haud aul ea jesajcht, woo Jehova sien Volkj wudd stoakjen. Hee schreef: “De HAR kjemt met Krauft, un hee woat met eenen stoakjen Oarm rejieren” (Jes. 40:10). De Schreft brukt daut Wuat “Oarm” foaken aus een  Bilt fa Krauft. Wan daut aulsoo sajcht, daut Jehova “met eenen stoakjen Oarm rejieren” woat, dan wiest ons daut, daut hee een majchtja Kjennich es. Hee brukt siene butajeweenelje Krauft ieeschtemma toom siene true Deena halpen un biestonen un daut deit hee uk noch (5. Mo. 1:30-31; Jes. 43:10, NW, Fn.).

13. (a) Wanea woat Jehova ons besonda stoakjen, soo aus hee daut vesproaken haft? (b) Waut von Vespräakjen jeft ons Krauft un Moot?

¹³ Jehova woat sien Vespräakjen besonda dan hoolen, wan onse Fiend ons vefoljen. Hee säd je: “Ekj woa die stoakj moaken”. Opp eenje Städen oppe Welt schaufen onse Fiend sea doaropp, daut ons Prädichtwoakj opphieren saul ooda daut onse Organisazion veboden woat. Oba nich mol dan fercht wie ons sea. Jehova haft ons waut vesproaken, waut ons Krauft un Moot jeft. Hee säd: “Kjeena kaun soont häastalen, waut junt venichten woat” (Jes. 54:17). Von dit Vespräakjen kjenn wie dreeatlei lieren, waut sea wichtich es.

14. Wuarom wundat ons daut nich, daut Gott siene Fiend jäajen ons komen?

¹⁴ Daut ieeschte es, daut wie aus Jesus siene Nofolja doamet räakjnen, daut wie vestat, ooda jehaust, woaren (Mat. 10:22). Jesus säd verut, daut se siene Nofolja en de latste Tiet sea vefoljen wudden (Mat. 24:9; Joh. 15:20). Daut tweede es, daut Jesaja siene Profezeiunk ons wiest, daut onse Fiend ons nich bloos haussen woaren. Dee woaren veschiednet proowen toom ons venichten, biejlikj ons teischen, Läajes von ons vetalen un ons grausom vefoljen (Mat. 5:11). Jehova woat onse Fiend nich doavon aufhoolen, opp soone Wajch Kjrich jäajen ons to fieren (Efs. 6:12; Opb. 12:17). Oba wie derwen ons nich fa dee ferchten. Wuarom nich?

15-16. (a) Waut es daut dredde, waut wie em Denkj hoolen sellen, un woo woat daut uk en Jesaja 25:4-5 jewäsen? (b) Waut sajcht Jesaja 41:11-12, woo daut met dee utkomen woat, waut jäajen ons kjamfen?

¹⁵ Waut es daut dredde, waut wie sellen  em Denkj hoolen? Jehova säd: “Kjeena kaun soont häastalen, waut junt venichten woat”. Soo aus eene Mia ons bie een grootet Owwada schizt, soo schizt Jehova ons, wan “de hunjsche Fiend” ons äwafaulen (läs Jesaja 25:4-5). Onse Fiend woaren ons nuscht aundoonen kjennen, waut ons fa emma schot (Jes. 65:17).

¹⁶ Jehova lat ons nu aul krakjt weeten, woo daut met aul deejanje woat utkomen, “dee jäajen . . . [ons] schaufen”, un daut halpt ons, noch dolla opp am to vetruen (läs Jesaja 41:11-12). Krakjt endoont, woo sea onse Fiend jäajen ons kjamfen ooda woo stoakj de Kjrich jäajen ons woat, daut es aul secha, woo dee utkomen woat: Aule Fiend von Gott sien Volkj “woaren enne Grunt jebrocht woaren un omkomen”.

17-18. (a) Woo kaun daut Bibel läsen ons halpen, noch dolla opp Jehova to vetruen? Jeff een Biespel. (b) Woo kaun ons daut halpen, wan wie äwa dän Varsch fa daut Joa 2019 nodenkjen?

¹⁷ Wie woaren noch dolla opp Jehova vetruen, wan wie am bäta kjanen lieren. Un wie kjennen am bloos dan goot kjanen lieren, wan wie de Schreft oppmoakjsom läsen un doaräwa nodenkjen. En de Schreft es daut krakjt oppjeschräwen, woo Jehova siene Deena ieeschtemma beschizt haft, un daut wiest ons kloa, daut Jehova uk no ons oppaussen woat.

¹⁸ Jesaja brukt een wundascheenet Jlikjnis toom wiesen, woo Jehova ons beschizt. Hee vejlikjt Jehova met eenen Hoad un siene Deena met Schopkjes un sajcht: “De Lama woat hee em Oarm oppnämen un aun de Brost hoolen” (Jes. 40:11). Wan wie Jehova siene stoakje Oarms rom ons späaren, dan feel wie ons ruich un secha. De trua un weisa Kjnajcht haft Jesaja 41:10 aus Varsch fa daut Joa 2019 utjeläst, om ons to halpen ruich to bliewen, wan wie uk Trubbels haben. Doa sajcht daut: “Fercht die nich, wiels ekj sie dien Gott”. Denkj äwa dise leeftolje Wieed no. Dee woaren die Krauft jäwen fa de Schwierichkjeiten, waut noch komen.