1-2. Waut fa besondret passieed aum Pinjstdach aune 33?

WAUT passieed eenen Sindach zemorjes aune 33 en Jerusalem? Daut wia de Pinjstdach un ojjefäa 120 Jinja wieren oppem Bän en eene Stow (Apj. 1:13-15; 2:1). Een poa Doag ea haud Jesus jesajcht, daut dee en Jerusalem bliewen sullen, wiels dee doa waut besondret kjrieen wudden (Apj. 1:4-5).

² “Plazlich hieeden see, soo aus em Storm, een ruzhendet Jelud vom Himmel”. Daut wia aulawäajen em Hus to hieren. Dan wieren bowa de Jinja äare Kjap “Tungen, aus von Fia” to seenen un “see worden aula met däm Heiljen Jeist jefelt” (Apj. 2:2-4). Daut wia sea besonda, woo de heilja Jeist äwa an kjeem (Apj. 1:8). Dee wieren de ieeschte, waut met dän heiljen Jeist jesaulft worden * un de Hopninj kjrieejen, noch mol met Jesus toop em Himmel to rejieren.

3. Wuarom wieren de Jinja sikj aum Pinjstdach gaunz secha, daut see jesaulft wieren?

³ Wan wie aum Pinjstdach mank dee Jinja jewast wieren, waut doa oppem Bän en de Stow wieren, dan wudd wie doa secha kjeenmol von vejäten. Dan wia doa bowa ons Kopp uk waut jewast, waut no eene Fiaflaum leet, un wie hauden kunt opp eene aundre Sproak räden (Apj. 2:5-12). Wie wudden ons sennen gaunz secha jewast, daut wie uk wieren met  dän heiljen Jeist jesaulft worden. Oba es daut bie aulem soo oppfaulent, wan dee jesaulft woaren? Un es daut bie aulem äwareen, wanea dee jesaulft woaren? Nä. Woo weet wie daut?

4. Worden de Christen ieeschtemma aula to deeselwje Tiet en äa Läwen jesaulft? Laj daut ut.

⁴ Wanea worden de Menschen ieeschtemma jesaulft? De 120 Jinja wieren nich de eensje, waut Pinjsten aune 33 jesaulft worden. Dänselwjen Dach kjrieejen noch ojjefäa 3 000 aundre dän vesproaknen heiljen Jeist. Dee worden bie äare Doop jesaulft (Apj. 2:37-38, 41). Oba en de Joaren no daut worden nich aule jesaulft, aus dee sikj deepen leeten. De Samarita worden een Stoot no äare Doop jesaulft (Apj. 8:14-17). Un bie Kornelius un dee, waut bie am wieren, wia daut gaunz butajeweenlich, wiels dee aul jesaulft worden, ea dee sikj deepen leeten (Apj. 10:44-48).

5. Waut passieet no 2. Korinta 1:21-22 no, wan doa wäa jesaulft woat?

⁵ Woo es daut dan, wan eena jesaulft woat? Eenje kjennen daut aum Aunfank meist nich jleewen, daut Jehova an utjeläst haft. Dee denkjen woomäajlich: “Wuarom ekj?” Oba nich aule denkjen soo. De Apostel Paulus moakt dietlich, woo daut bie aulem es, waut jesaulft woaren. Hee säd: “Jie . . . jleewden. Dan tieekjend * Gott junt met däm Heiljen Jeist. De Heilja Jeist bircht doafäa, daut wie daut kjrieen, waut Gott ons vesproaken haft” (Efs. 1:13-14). Jehova brukt sienen heiljen Jeist, om dise Christen daut gaunz dietlich to moaken, daut hee an utjewält haft. Opp dee Wajch “bircht” de heilja Jeist doafäa, ooda jeft dee eene Garantie ooda een Vespräakjen, daut dee lota noch mol fa emma em Himmel läwen woaren un nich oppe Ieed (läs 2. Korinta 1:21-22).

6. Waut mott een Jesaulwda doonen toom sienen Loon em Himmel kjrieen?

⁶ Es daut aul secha, daut een Christ nom Himmel komen woat, wan dee jesaulft es? Nä. Dee es sikj bloos secha, daut Gott am  doafäa utjeläst haft. Oba dee mott daut doonen, waut 2. Petrus 1:10 sajcht. Doa steit: “Breeda, moakt junt doarenn emma fausta, daut jie beroopen un utjewält sent. Wiels, wan jie daut doonen woaren, woa jie nich faulen.” No daut no sent de Jesaulwde beroopen, ooda utjewält, toom em Himmel läwen, oba dee woaren disen Loon mau dan kjrieen, wan dee tru bliewen (Filip. 3:12-14; Heb. 3:1; Opb. 2:10).

7. Woo woaren de Jesaulwde daut en, daut see noch mol kjennen em Himmel komen?

⁷ Oba woo woat eena daut en, daut eena de Hopninj haft, noch mol em Himmel to läwen? Paulus siene Wieed jäwen ons de Auntwuat. Hee schreef aun deejanje en Room, “dee doa beroopen . . . [wieren], heilje to sennen”, un säd to dee: “Jie haben nich een Sklowenjeist jekjräajen, daut jie junt ferchten motten. Jie haben een Jeist jekjräajen derch dän Gott junt aunnemt aus siene Kjinja, un jie am aunroopen aus Voda, leewa Voda. De Jeist selfst jeft onsen Jeist daut Zeichnis, daut wie Gott siene Kjinja sent” (Reem. 1:7; 8:15-16). Gott moakt de Jesaulwde daut derch sienen heiljen Jeist dietlich, daut see noch mol kjennen em Himmel komen (1. Tess. 2:12).

8. Woo wiest 1. Johanes 2:20, 27, daut de Jesaulwde daut nich fält, daut an wäa secha moakt, daut see jesaulft sent?

⁸ Wan Jehova wäm enlot nom Himmel to komen, dan sorcht hee doafäa, daut deejanje en äa Hoat un en äare Jedanken kjeenen Twiewel mea haben (läs 1. Johanes 2:20, Friesenbibel *; 2:27). De Jesaulwde motten krakjt soo derch de Vesaumlunk von Jehova belieet woaren aus aule aundre. Oba dee brucken kjeenem, waut an daut secha moakt, daut see jesaulft sent. Jehova haft sienen heiljen Jeist jebrukt toom dee daut gaunz kloa moaken – un daut es de stoakjste Krauft, waut et jeft!

9. Waut endat sikj bie de Menschen, wan dee jesaulft woaren, soo aus Efeesa 1:18 sajcht?

⁹ Daut es fa de mieeschte von Gott siene Deena nich leicht to vestonen, woo daut krakjt es, wan Gott wäm met sienen heiljen Jeist saulwen deit. Un daut es uk nich toom wundren, wiels dee daut selfst kjeenmol beläft haben. Gott muak de Menschen toom fa emma oppe Ieed läwen un nich em Himmel (1. Mo. 1:28; Psa. 37:29). Oba Jehova haft sikj eenje utjeläst toom em Himmel läwen. Un wan hee dee saulwen deit, dan endat hee väl aun dee äa denkjen un äare Hopninj, daut dee sikj to daut Läwen em Himmel freien (läs Efeesa 1:18).

10. Wanea woat eena “noch eemol jebuaren”? (See uk de Footnoot.)

¹⁰ Wan Christen jesaulft woaren, dan woaren dee “noch eemol jebuaren”, ooda “von bowen jebuaren”. * Jesus jeef uk auntovestonen, daut daut nich mäajlich es, eenen, waut nich jesaulft es, daut krakjt uttolajen, woo daut es, wan eena “noch eemol jebuaren” woat, ooda “vom Jeist jebuaren” (Joh. 3:3-8; Fn.).

11. Woo endat deejanje äa denkjen sikj, waut jesaulft woaren? Laj daut ut.

¹¹ Woo endat deejanje äa denkjen sikj, waut jesaulft woaren? Ea Jehova dee saulwen  deed, hopten dee, noch mol fa emma oppe Ieed to läwen. Dee freiden sikj sea to de Tiet, wua Jehova wudd aulet schlajchte oppriemen un de Ieed to een Paradies moaken. Veleicht stalden dee sikj väa, woo see dan wäm von äare Famielje ooda eenen Frint bejreessen wudden, waut vom Doot oppstonen wudd. Oba nodäm daut dee jesaulft worden, endad äa denkjen sikj rein gaunz. Woo kjeem daut? Daut wia nich, daut an daut nich jenuach wia, fa emma oppe Ieed to läwen. Dee äa denkjen endad sikj nich, wäajen dee betriept wieren ooda sea väl derchmoaken musten. Un dee dochten uk nich, daut an daut wudd enoolent woaren, fa emma oppe Ieed to läwen. Enne Städ daut brukt Jehova sienen heiljen Jeist, om dee äa denkjen un äare Hopninj to endren.

12. Woo jeit de Jesaulwde daut no 1. Petrus 1:3-4 no, wan dee aun äare Hopninj denkjen?

¹² Eena, waut jesaulft woat, feelt sikj daut veleicht nich mol wieet. Oba dee twiewelt nich een bät, aus Jehova am jewält haft. Dee freit sikj sea un es sea dankboa, wan dee aun siene Hopninj denkjt (läs 1. Petrus 1:3-4).

13. Woo denkjen de Jesaulwde äwa daut Läwen oppe Ieed?

¹³ Bediet daut dan, daut de Jesaulwde sikj dän Doot wenschen? De Apostel Paulus beauntwuat dise Froag un sajcht: “Soo lang aus wie noch opp dise Ieed wonen, hab wie secha noch to stänen, wiels wie doaräwa sorjen onsen irdischen Kjarpa nich to velieren. Wie muchten leewa, daut ons de himlische Woninj äwajetrocken wort, daut daut stoafliche aun ons vom Läwen äwanomen wort” (2. Kor. 5:4). Dise Christen sent nich saut von dit Läwen un wellen uk nich fuaz stoawen. Dee haben Freid aum läwen un wellen jieda Dach nutzen toom met äare Famielje un Frind toop Jehova deenen. Oba dee vejäten kjeenmol von äare scheene Hopninj, waut see fa lota haben (1. Kor. 15:53; 2. Pet. 1:4; 1. Joh. 3:2-3; Opb. 20:6).

14. Waut wudd nich een Bewies doafäa sennen, daut wäa jesaulft es?

¹⁴ Veleicht wundascht du, aus du uk mank dee best, waut met dän heiljen Jeist jesaulft worden. Dan wurscht du kjennen äwa de Froagen hia nodenkjen: Hast du een grootet Velangen, Jehova sienen Wellen to doonen? Jleefst du, daut du besonda flietich prädjen deist? Deist du flietich Gott sien Wuat studieren un west jieren mea äwa “Gott siene deepste Jeheemnisen” lieren? (1. Kor. 2:10). Jleefst du, daut Jehova dienen Deenst sea jesäajent haft? Späat sikj die daut soo, daut du daut schuldich best, aundre em jeisteljen to halpen? Best du daut enjeworden, woo Jehova die bie veschiednet jeholpen haft? Wan daut bie die soo es, bediet daut dan, daut du de himlische Hopninj hast? Nä. Wuarom nich? Wäajen daut bie jiedrem eenen von Gott siene Deena soo sennen kaun, endoont aus dee jesaulft es ooda nich. Un Jehova kaun uk jiedrem eenen von siene Deena derch sienen heiljen Jeist deeselwje Krauft jäwen, endoont waut fa eene Hopninj dee haft. Wan du wundascht, aus du jesaulft best ooda nich, dan wiest daut rajcht jesajcht aul, daut du nich best. Deejanje, waut Jehova saulwen deit, wundren doa nich äwa. Dee weeten daut!

15. Woo weet wie, daut nich jieda eena, waut Gott sienen Jeist kjricht, de Hopninj haft em Himmel to komen?

¹⁵ En de Schreft rät daut von väl true Menschen, waut dän heiljen Jeist kjrieejen,  oba dee hauden nich de Hopninj, noch mol em Himmel to läwen. David biejlikj wort vom heiljen Jeist jeleit (1. Sam. 16:13). De heilja Jeist holp am, Jehova sea goot kjanen to lieren un een Poat von de Bibel opptoschriewen (Mar. 12:36). Un doch säd de Apostel Petrus: “David es nich nom Himmel jefoaren” (Apj. 2:34). Johanes de Deepa kjrieech uk “dän Heiljen Jeist” (Luk. 1:13-16). Jesus säd: “Doa es nich een Mensch . . ., dee doa jrata es aus Johanes”, oba hee säd uk, daut dee nich wudd en daut Himmelrikj nenkomen (Mat. 11:10-11). Jehova jeef dise Menschen derch sienen heiljen Jeist de Krauft, butajeweeneljet to volbrinjen, oba hee wäld dee nich derch sienen Jeist ut toom em Himmel komen. Bediet daut dan, daut dee nich soo tru wieren aus aundre, waut utjewält worden toom em Himmel rejieren? Nä. Daut bediet eefach, daut Jehova dee vom Doot oppwakjen woat, daut dee em Paradies oppe Ieed läwen kjennen (Joh. 5:28-29; Apj. 24:15).

16. To waut freien de mieeschte von Gott siene Deena sikj vondoag dän Dach?

¹⁶ Vondoag dän Dach haben de mieeschte von Gott siene Deena nich de Hopninj, em Himmel to läwen. Dee freien sikj doatoo, daut see noch mol unja Gott sien Kjennichrikj eewich oppe Ieed läwen kjennen, krakjt soo aus Abraham, Sara, David, Johanes de Deepa un väl aundre Mana un Frues von de Bibeltiet (Heb. 11:10).

17. Waut woa wie en dän näakjsten Artikjel seenen?

¹⁷ Vondoag dän Dach jeft et mank Gott siene Deena noch emma eenje Jesaulwde un doawäajen komen woomäajlich veschiedne Froagen opp (Opb. 12:17). Woo sellen de Jesaulwde biejlikj äwa sikj selfst denkjen? Woo sell wie met wäm von onse Vesaumlunk omgonen, waut bie daut Owentmol met eenst von daut Broot un von dän Wien nemt? Un sell wie ons doaräwa Sorjen moaken, daut doa emma mea sikj manke Jesaulwde talen? Daut woa wie en dän näakjsten Artikjel seenen.