5. ARTIKJEL FA DAUT STUDIUM
Wie woaren met junt gonen
“Wie wellen met junt gonen. Wie haben jehieet, daut Gott met junt es!” (SACH. 8:23)
LEET 124 Emma tru sennen
WAUT WIE SEENEN WOAREN *
De aundre Schop (de “tieen Menschen”) feelen sikj jeieet, daut see met de Jesaulwde (dän “Jud”) toop Jehova deenen kjennen (See Varsch 1-2)
1. Waut säd Jehova von onse Tiet verut?
JEHOVA säd von onse Tiet verut: “Tieen Menschen von veschiedne Velkja [woaren] sikj aun jieda Jud aunhenjen un sajen: Wie wellen met junt gonen. Wie haben jehieet, daut Gott met junt es!” (Sach. 8:23). De “Jud”, wua daut hia von rät, stalt deejanje väa, waut Gott met dän heiljen Jeist jesaulft haft. Dee woaren uk “Gott sien Israel” jenant (Gal. 6:16). Un de “tieen Menschen” stalen deejanje väa, waut hopen noch mol fa emma oppe Ieed to läwen. Dee weeten, daut Jehova de Jesaulwde utjewält haft, un seenen daut aus eene Iea, daut see met an toop Jehova deenen kjennen.
2. Woo kjennen de “tieen Menschen” “met . . . [de Jesaulwde] gonen”?
2 Vondoag dän Dach weet wie nich de Nomes von aule Jesaulwde, waut oppe Ieed läwen. * Woo kjennen deejanje, waut de Hopninj haben oppe Ieed to läwen, dan “met . . . [de Jesaulwde] gonen”? De Schreft sajcht, de “tieen Menschen” wudden “sikj aun jieda Jud aunhenjen un sajen: Wie wellen met junt gonen. Wie haben jehieet, daut Gott met junt es!” Daut et hia von “jieda Jud” rät, jeft auntovestonen, daut et miere sent un nich bloos eene Persoon. Daut wiest, daut de Juden en disen Varsch een Jlikjnis fa aule Jesaulwde sent. Un deejanje, waut nich jesaulft sent, kjennen “met . . . [dee] gonen”, wiels dee Jehova met de Jesaulwde toop deenen. Oba dee weeten, daut nich de Jesaulwde äare Meistasch, ooda Leidasch, sent, oba Jesus (Mat. 23:10).
3. Waut vonne Froagen woa wie en disen Artikjel derchgonen?
3 En onse Tiet jeft et mank Gott siene Deena noch emma Jesaulwde un doawäajen wundren eenje: (1) Woo sellen de Jesaulwde äwa sikj selfst denkjen? (2) Woo saul eena met deejanje omgonen, waut biem Owentmol von daut Broot un dän Wien nämen? (3) Sell wie ons Sorjen moaken, wan doa emma mea vom Broot un Wien nämen? Dise Froagen woa wie en disen Artikjel derchgonen.
WOO SELLEN DE JESAULWDE ÄWA SIKJ SELFST DENKJEN?
4. Fa waut woarnt 1. Korinta 11:27-29 de Jesaulwde, un wuarom sellen dee sikj daut to Hoaten nämen?
4 De Jesaulwde sellen sikj daut to Hoaten nämen, waut 1. Korinta 11:27-29 sajcht (läs). Woo wudd een Jesaulwda sikj bie daut Owentmol kjennen veschuldjen? Wan dee von daut Broot un dän Wien neem, oba nich soo läwen wudd, aus Jehova daut fa rajcht tald (Heb. 6:4-6; 10:26-29). De Jesaulwde weeten, daut see tru bliewen motten, om “dän Pries to kjrieen, wuatoo Gott . . . [an] vom Himmel en Christus Jesus jeroopen haft” (Filip. 3:13-16).
5. Woo sellen de Jesaulwde äwa sikj selfst denkjen?
5 Jehova sien heilja Jeist halpt siene Deena, daut dee deemootich un bescheiden sent un nich stolt (Efs. 4:1-3; Kol. 3:10, 12). Doawäajen talen de Jesaulwde sikj nich fa hecha aus aundre. Dee weeten, daut Jehova de Jesaulwde nich onbedinjt mea heiljen Jeist jeft aus siene aundre Deena. Dee denkjen nich, daut see de Woarheit ut de Schreft bäta vestonen kjennen aus aule aundre. Un see wudden kjeenmol eenen aundren tooroden, daut dee bie daut Owentmol uk saul von daut Broot un dän Wien nämen, wäajen see denkjen, daut dee uk jesaulft es. Dee sent deemootich un denkjen doaraun, daut Jehova deejanje utwält, waut nom Himmel komen.
6. Woo sellen jesaulwde Christen sikj no 1. Korinta 4:7-8 no vehoolen?
6 De Jesaulwde feelen sikj jeieet, daut see utjewält worden toom em Himmel läwen, oba dee velangen nich, daut aundre an besonda ieren sellen (Filip. 2:2-3). Dee weeten uk, daut Jehova daut nich wiet un breet bekauntmuak, aus dee an saulwen deed. Doawäajen wundren dee sikj nich, wan aundre an daut nich fuaz jleewen, daut see nu jesaulft sent. De Schreft sajcht je, daut eena oppaussen saul, wan doa wäa sajcht, daut Gott am eene besondre Oppgow jejäft haft (Opb. 2:2). Un wan de Jesaulwde aundre kjanen lieren, sajen dee daut nich fuaz, daut see jesaulft sent, wiels dee nich de Oppmoakjsomkjeit opp sikj lenkjen wellen. Un gaunz secha woaren dee nich met sikj puchen (läs 1. Korinta 4:7-8).
7. Waut woaren de Jesaulwde nich doonen, un wuarom nich?
7 De jesaulwde Christen denkjen nich, daut see bloos wudden sellen met aundre Jesaulwde toop sennen, soo aus wan see wudden to eene Grupp jehieren, waut sikj von aundre sull oppoat hoolen. Dee sieekjen nich no aundre Jesaulwde, om met dee äwa äare Hopninj to räden ooda om unjarenaunda de Bibel to studieren (Gal. 1:15-17). Wan see soont deeden, dan wudd de Vesaumlunk nich veeent sennen. Dan wudden see uk jäajen dän heiljen Jeist schaufen, dee Gott siene Deena halpt, Fräd to haben un veeent to sennen (Reem. 16:17-18).
WOO SELL WIE MET DE JESAULWDE OMGONEN?
Wie sellen de Jesaulwde ooda aundre, waut äwa ons aunjestalt sent, nich äwamotich erhäwen (See Varsch 8) *
8. Wuarom mott wie oppaussen, woo wie met deejanje omgonen, waut bie daut Owentmol vom Broot un von dän Wien nämen? (See uk de Footnoot.)
8 Woo sell wie met onse jesaulwde Breeda un Sestren omgonen? Daut wudd nich rajcht sennen, wäm äwamotich to erhäwen, nich mol wan daut eent von Jesus siene jesaulwde Breeda es (Mat. 23:8-12). De Schreft sajcht von de Eltestasch: “Jleeft soo aus dee”, oba dee jeft ons nich de Frieheit, eenen Mensch to onsen Leida to moaken un notofoljen (Heb. 13:7). Daut stemt, daut eenje Menschen no de Schreft no “dobbelde Iea traft”. Oba daut es, wiels dee ons “goot väastonen” un “aum prädjen un lieren schwoa oabeiden”, un nich, wiels dee jesaulft sent (1. Tim. 5:17). Wan wie de Jesaulwde too sea ieren un erhäwen wudden, dan kunn dee daut ommaklich sennen. * Un noch väl schlemma es, daut wie dee dan veuasoaken kunnen stolt to woaren (Reem. 12:3). Secha wudd kjeena von ons Christus siene jesaulwde Breeda bat doa brinjen wellen, daut dee soonen grooten Fäla muaken! (Mar. 9:42).
9. Woo kjenn wie wiesen, daut wie de Jesaulwde respakjten?
9 Woo kjenn wie wiesen, daut wie deejanje respakjten, waut Jehova jesaulft haft? Wie woaren dee biejlikj nich froagen, woo dee jesaulft worden. Daut es dee äare Sach un wie haben nich daut Rajcht, daut to weeten (1. Tess. 4:11; 2. Tess. 3:11, NW). Un wie sellen uk nich denkjen, daut dee äa Ehepoatna, äare Elren ooda sestwäa von dee äare Famielje uk jesaulft es. De Hopninj, noch mol em Himmel to komen, es nich waut, waut eena metoaft. Dee kjricht eena von Gott (1. Tess. 2:12). Wie sellen uk nich soont froagen, waut dee velazen kaun. Wie wudden biejlikj de Fru von eenen jesaulwden Brooda nich froagen, woo ar daut jeit, wan see doaraun denkjt, daut see noch mol onen äaren Maun fa emma oppe Ieed läwen woat. Wie weeten je, daut Jehova doano seenen woat, daut en de niee Welt aule schaftich un “tofräd sent” (Psa. 145:16).
10. Wuarom es daut een Schutz fa ons, wan wie nich Menschen veieren?
10 Daut es uk een Schutz fa ons, wan wie de Jesaulwde nich fa wichtja talen aus aundre. Wuarom? Wiels de Schreft sajcht, daut eenje Jesaulwde woomäajlich nich tru bliewen woaren (Mat. 25:10-12; 2. Pet. 2:20-21). Oba wan wie doafäa oppaussen, daut wie nich Menschen veieren, dan woa wie kjeenmol Menschen nofoljen, nich mol wan dee jesaulft ooda sea bekaunt sent ooda Jehova aul lang deenen (Jud. 16, NW, Fn.). Un wan soone dan ontru woaren ooda de Vesaumlunk veloten, dan woa wie nich onsen Gloowen velieren ooda opphieren Jehova to deenen.
ES DAUT SCHLEMM, WAN DOA EMMA MEA VOM BROOT UN WIEN NÄMEN?
11. Woo wia daut ea bie daut Owentmol, un woo es daut nu?
11 Joarenlank neemen bie daut Owentmol emma weinja vom Broot un vom Wien. Oba en de lotre Joaren worden daut jieda Joa emma mea. Wudd wie ons sellen doaräwa Sorjen moaken? Nä. Well wie mol seenen, wuarom nich.
12. Wuarom sell wie ons nich Sorjen moaken, woo väl doa bie daut Owentmol vom Broot un Wien nämen?
12 Jehova “kjant de sienje” (2. Tim. 2:19). Oba de Breeda, waut daut bie daut Owentmol talen, woo väl doa von daut Broot un von dän Wien nämen, weeten daut nich, wäa doa opp iernst jesaulft es. Doawäajen woaren uk soone jetalt, waut doa bloos jleewen, daut see jesaulft sent. Biejlikj nämen eenje von daut Broot un von dän Wien un hieren doa lota wada met opp. Un aundre wada deit daut veleicht aun de Narfen ooda dee moaken sikj daut met irjentwaut schwoa un jleewen dan, daut see met Christus toop em Himmel rejieren woaren. Wie weeten aulsoo nich krakjt, woo väl Jesaulwde daut noch oppe Ieed jeft.
13. Sajcht de Schreft, woo väl Jesaulwde oppe Ieed sennen woaren, wan de groote Triebsaul aunfangt? Laj daut ut.
13 Wan Jesus komen woat, om de Jesaulwde met nom Himmel to nämen, dan woat daut noch opp väl Städen oppe Ieed Jesaulwde jäwen (Mat. 24:31). De Schreft wiest, daut doa en de latste Tiet noch woaren waut Jesaulwde oppe Ieed sennen (Opb. 12:17). Oba dee sajcht nich, woo väl doa noch sennen woaren, wan de groote Triebsaul aunfangt.
Waut sell wie doonen, wan doa wäa bie daut Owentmol von daut Broot un dän Wien nemt? (See Varsch 14)
14. Waut wiest Reema 9:11, 16 ons doaräwa, woo de Jesaulwde utjewält woaren?
14 Daut es Jehova siene Sach, wanea hee de Jesaulwde utwält (Reem. 8:28-30). Nodäm aus Jesus vom Doot oppstunt, wäld Jehova de ieeschte Jesaulwde ut. Daut lat soo, daut en de Aposteltiet aule woare Christen jesaulft wieren. En aul de Joaren no daut foljden de mieeschte, waut sikj Christen nanden, nich werkjlich Christus no. Doa jeef et nich väl woare Christen, oba dee, waut et jeef, deed Jehova saulwen. Dee wieren soo aus de Weit en Jesus sien Jlikjnis, waut mankem Onkrut waussen wudd (Mat. 13:24-30). En de latste Tiet haft Jehova noch wieda soone utjeläst, waut to de 144 000 jehieren woaren. * Un wan hee sikj eenich woat, eenje von dee jroz ver daut Enj uttoläsen, dan sell wie nich aun siene Weisheit twiewlen (läs Reema 9:11, 16). * Wie motten oppaussen, daut wie nich soo sent aus de Oabeida, wua Jesus en een Jlikjnis von räd. Dee grunzten doaräwa, woo de Wieet deejanje beloond, waut en de latste Stund aunjefongen hauden to schaufen (Mat. 20:8-15).
15. Jehieren de Jesaulwde aula to dän truen, weisen Kjnajcht, wua Matäus 24:45-47 von rät? Laj daut ut.
15 Nich aule, waut de Hopninj haben, em Himmel to läwen, jehieren to dän truen, weisen Kjnajcht (läs Matäus 24:45-47). Krakjt soo aus en Jesus siene Tiet brucken Jehova un Jesus vondoag dän Dach bloos een poa Breeda, om väle Äten to jäwen, ooda to lieren. Ieeschtemma worden mau een poa jesaulwde Christen aunjestalt toom de Christelje Griechische Schreften oppschriewen. Un vondoag dän Dach haben mau een poa jesaulwde Christen de Oppgow, Gott siene Deena “to rajchte Tiet äten to jäwen”.
16. Waut hab wie en disen Artikjel jelieet?
16 Waut hab wie en disen Artikjel jelieet? Jehova es sikj eenich jeworden, de mieeschte von siene Deena met eewjet Läwen oppe Ieed to beloonen. Un hee haft mau weinich utjewält toom em Himmel läwen un doa met Jesus toop rejieren. Jehova beloont aul siene Deena un dee motten sikj uk aula aun deeselwje Jesazen hoolen un am tru bliewen, endoont aus dee Poat von dän “Jud” sent ooda von de “tieen Menschen”. Dee motten aula deemootich bliewen un am veeent deenen. Un dee motten aula doaropp schaufen, daut doa Fräd en de Vesaumlunk blift. Well wie nu ver daut Enj wieda aus “eene Häad” Jehova deenen un Christus nofoljen! (Joh. 10:16).
^ Varsch 5 Dit Joa woa wie aum Dinjsdach, dän 7. Aprell, daut Aundenkjen aun Christus sienen Doot haben. Woo sell wie äwa dee denkjen, waut doa bie daut Owentmol vom Broot äten un von dän Wien drinkjen? Sell wie ons Sorjen moaken, wan doa emma mea vom Broot un von dän Wien nämen? Daut woa wie en disen Artikjel derchnämen. Dee stett sikj opp eenen Artikjel, waut em Wachtturm von Jaunewoa 2016 es.
^ Varsch 2 Psalm 87:5-6 jeft auntovestonen, daut Gott woomäajlich lota noch mol de Nomes von aul deejanje bekauntmoakt, waut met Jesus toop em Himmel rejieren (Reem. 8:19).
^ Varsch 8 See dän Kausten “Om dee bedocht sennen, waut ons veroppgonen” em Woaktorm von Septamba 2018, S. 31.
^ Varsch 14 Jehova läst jiedrem eenen von dee ut, wan daut en Aposteljeschicht 2:33 uk sajcht, daut de heilja Jeist derch Jesus utjegoten woat.
^ Varsch 14 Bie “Fragen von Lesern” em Wachtturm vom 1. Mei 2007 jeit noch mea doaräwa notoläsen.
LEET 25 Gott sien ieejnet Volkj
^ Varsch 56 BILTBESCHRIEWUNK: Wudd daut nich onveschämt sennen, wan se bie eenen Kongress eenen Veträda von de Hauptoffiz un siene Fru meist unjaflieejen wudden toom von dee Bilda moaken?
