1. Waut denkjen eenje veleicht, soo aus de Kjennich David?

WIE aula wenschen ons een rujet un een frädeljet Läwen. Kjeenem jeit daut scheen met Sorjen. Un doch hab wie eenjemol groote Sorjen. Eenje von Jehova siene Deena denkjen veleicht krakjt soo aus de Kjennich David, waut Jehova fruach: “Woo lang saul ekj en miene Seel sorjen un mie däachlich em Hoaten enjsten?” (Psa. 13:3).

2. Waut woa wie en disen Artikjel seenen?

² Wie aula woaren mol Sorjen haben, oba wie kjennen veschiednet doonen, daut et nich too oajch woat. Aum Aunfank von disen Artikjel woa wie een poa Sachen seenen, waut ons kjennen Sorjen moaken. Un dan woa wie von sas Sachen räden, waut ons halpen kjennen ruich to bliewen, wan wie Schwierichkjeiten haben.

3. Waut kaun ons Sorjen moaken, un kjenn wie doa waut aun doonen?

³ Daut jeft väl, waut ons Sorjen moaken kaun, wua wie meist nuscht ooda nuscht aun endren kjennen. Wie kjennen doa biejlikj nuscht aun doonen, daut daut Äten, Kjleeda un daut wonen jieda Joa diera woat. Un wie kjennen onse Oabeitspoatna ooda Schoolpoatna uk nich bat doa brinjen, daut dee ons nich soo foaken veleiden wellen, onopprechtich to sennen ooda een orreinet Läwen to fieren. Un wie kjennen de Menschen rom ons uk nich doavon aufhoolen, daut dee schlajchtet doonen. Wie haben dise Schwierichkjeiten, wiels wie en eene Welt läwen, wua de  mieeschte Menschen sikj nich no de biblische Gruntsauzen rechten. De Soton es de Gott äwa dise Welt un hee weet krakjt, daut “de Sorjen en dise Welt” eenje doavon aufhoolen, Jehova to deenen (Mat. 13:22; 1. Joh. 5:19). Doawäajen wundat ons daut nich, daut et opp dise Welt soo väl schwoaret jeft!

4. Waut kaun daut aun ons doonen, wan wie ons groote Sorjen moaken?

⁴ Veleicht moak wie ons äwa onse Trubbels soo väl Sorjen, daut wie sest nuscht mea denkjen kjennen. Woomäajlich moak wie ons Sorjen, daut wie nich jenuach Jelt vedeenen ooda krank woaren un dan nich schaufen kjennen ooda de Oabeit velieren. Veleicht moak wie ons daut uk doamet schwoa, daut wie nich woaren tru bliewen, wan wie aufjeprooft woaren. Un de Soton woat je deejanje, waut opp siene Sied sent, boolt bat doa brinjen, jäajen Gott siene Deena to gonen. Un dan denkjt eena doaräwa no, waut eena dan doonen woat. Es daut orrajcht, wan eena sikj wäajen soont Sorjen moakt?

5. Waut meend Jesus doamet, aus hee säd: “Moakt junt nich sorjen”?

⁵ Wie weeten, daut Jesus to siene Nofolja säd: “Moakt junt nich sorjen” (Mat. 6:25). Meend Jesus doamet, daut wie ons äwa nuscht sorjen sullen? Secha nich! Eenje von Jehova siene true Deena ieeschtemma muaken sikj uk Sorjen, oba Jehova jleicht dee doawäajen (1. Kjen. 19:4; Psa. 6:4). * Jesus wull ons treesten, daut wie ons nich soo väl Sorjen äwa dit Läwen moaken sullen, daut ons Deenst fa Gott doarunja to lieden kjeem. Waut kjenn wie doonen, wan wie ons oba Sorjen moaken? (See dän Kausten “ Woo kjenn wie daut doonen?”)

6. Waut kaun ons no Filippa 4:6-7 no berujen?

⁶ (1) Bäd foaken. Wan wie ons wäajen eenen Trubbel Sorjen moaken, dan kjenn wie Jehova no Help froagen (1. Pet. 5:7). Dan kaun hee ons sienen Fräd jäwen, “dee wiet äwa aules jeit waut Menschen vestonen kjennen” (läs Filippa 4:6-7). Jehova woat ons derch sienen stoakjen heiljen Jeist berujen (Gal. 5:22).

7. Waut sell wie em Denkj hoolen, wan wie bäden?

⁷ Wan du to Jehova bätst, dan saj dän krakjt, woo du die feelst. Saj dän, waut fa eenen Trubbel du hast un woo die daut jeit. Wan du jleefst, daut du doamet waut doonen kaust, dan froag am no Weisheit un Krauft, daut rajchte to doonen. Oba wan du doa nuscht met doonen kaust, dan froag Jehova no Help, daut du die doa nich too väl Sorjen äwa moakst. Wan du Jehova daut krakjt sajchst, wua du daut met schwoa hast, dan woascht du bäta enwoaren, woo Jehova no diene Jebäda horcht. Oba waut es, wan Jehova doa nich fuaz no horcht? Dan jeff nich opp, wiels hee well, daut wie aunhoolent bäden (Luk. 11:8-10).

8. Aun waut sell wie denkjen, wan wie bäden?

⁸ Wan wie met Jehova äwa onse Sorjen räden, dan sell wie uk doaraun denkjen, daut wie am dankscheen sajen. Daut es goot fa ons, wan wie aun daut goode denkjen, waut wie haben, wan wie uk en eene schwoare Loag sent. Eenjemol jeit ons daut veleicht soo schlajcht, daut  wie nich krakjt weeten, waut wie sajen sellen. Oba Jehova horcht uk no onse Jebäda, wan wie sest nuscht sajen kjennen aus: “Halp mie, toom Jefaulen!” (2. Chr. 18:31; Reem. 8:26).

9. Wua kjenn wie woare Sechaheit finjen?

⁹ (2) Velot die opp Jehova siene Weisheit un nich opp die selfst. En dän Profeet Jesaja siene Tiet hauden de Menschen en Juda Angst, daut de Assiera jäajen an komen wudden. Doawäajen fruagen see de Ägipta no Help (Jes. 30:1-2). Jehova säd to dee, daut et schlajcht utkomen wudd, wan see sikj opp de Ägipta veleeten (Jes. 30:7, 12-13). Hee leet dee derch dän Profeet Jesaja sajen, daut see bie am kunnen woare Sechaheit finjen. Hee säd: “Wan jie . . . ruich bliewen . . . un vetruen hoolen, woa jie stoakj sennen” (Jes. 30:15b).

10. Aun waut es daut to seenen, daut wie opp Jehova vetruen? Jeff Biespels.

¹⁰ Aun waut es daut to seenen, daut wie opp Jehova vetruen? Saj wie mol, die woat eene Oabeit aunjeboden, wua du dia betolt kjrichst, oba wua die nich mea väl Tiet fa jeisteljet blift. Ooda een Oabeitspoatna, waut nich aus eent von Jehova siene Zeijen jedeept es, schmeichelt no die. Ooda wäa von diene Famielje sajcht to die: “Du motst die entscheiden! West du ons ooda dienen Gloowen?” Soone Entscheidungen sent nich leicht, oba Jehova jeft ons emma dän Rot, waut ons fält (Mat. 6:33; 10:37; 1. Kor. 7:39). De Froag es: Woa wie opp Jehova vetruen un sienen Rot uk nokomen?

11. Waut fa biblische Jeschichten kjennen ons halpen ruich to bliewen, wan wie Jäajenstaunt haben?

¹¹ (3) Lia von goode un schlajchte Biespels. Daut jeft väl biblische Jeschichten, waut ons wiesen, woo goot daut es, ruich to bliewen un opp Jehova to vetruen. Wan wie dise Jeschichten studieren, kjenn wie doano kjikjen, woo Gott siene Deena ruich bliewen kunnen, wan dee uk väl Jäajenstaunt hauden. Aus biejlikj daut hechste judische Jerecht to de Apostel säd, daut see nich mea prädjen sullen, leeten dee sikj nich engrulen. Dee wieren äwanäment un säden: “Wie motten Gott mea jehorchen aus Menschen” (Apj. 5:29). Dee leeten sikj nich mol engrulen, aus see an vekjielen deeden. Wuarom nich? Wiels dee wisten, daut Jehova opp äare Sied wia. Hee wia met an tofräd, un doawäajen deeden see wieda de goode Norecht prädjen (Apj. 5:40-42). Un aus see dän Jinja Stefanus wullen dootmoaken, bleef hee soo ruich, daut sien Jesecht soo “aus een Enjeljesecht” sach (Apj. 6:12-15). Wuarom? Wiels hee sikj gaunz secha wia, daut Jehova eenen Jefaulen aun am haud.

12. Woo jeft 1. Petrus 3:14 un 4:14 auntovestonen, daut wie schaftich sennen kjennen, wan wie vefolcht woaren?

¹² De Apostel kunnen daut gaunz kloa seenen, daut Jehova an biestunt, wiels hee an de Krauft jeef, Wunda to doonen (Apj. 5:12-16; 6:8). Wie kjennen daut vondoag dän Dach nich. Oba Jehova sajcht ons derch sien Wuat, daut hee met ons tofräd es un ons met sienen Jeist halpen woat, wan wie om Jerajchtichkjeits haulwen vefolcht woaren (läs 1. Petrus 3:14; 4:14). Wie derwen ons nu nich Sorjen moaken, waut wie doonen woaren, wan wie lota noch mol sea vefolcht woaren. Daut es väl bäta, wan wie nu doaropp schaufen, noch dolla doaropp to vetruen, daut Jehova ons halpen un raden kaun. Wie sellen ons krakjt soo opp Jesus siene  Wieed veloten, aus de Jinja daut ieeschtemma deeden. Hee vespruak: “Ekj woa junt met Wieed un Weisheit vesorjen, wuajäajen june Jäajna nich woaren räden ooda stonen kjennen.” Un hee säd uk: “Wan jie staunthauft bliewen, woa jie june Seelen jewennen” (Luk. 21:12-19). Un denkj wie uk emma doaraun, daut Jehova sikj mau rajcht aule Kjlienichkjeiten von siene true Deena moakjt, wiels hee dee vom Doot oppwakjen woat, wan dee stoawen.

13. Waut kjenn wie von deejanje lieren, waut nich ruich bleewen un nich opp Jehova vetruden?

¹³ Wie kjennen uk von deejanje lieren, waut nich ruich bleewen un nich opp Jehova vetruden. Dee äare Biespels kjennen ons halpen, daut wie nich deeselwje Fäla moaken waut dee. Aus biejlikj Asa de Kjennich von Juda wia, kjeemen een deel Soldoten jäajen am. Oba hee veleet sikj opp Jehova, un Jehova holp am, dee to jewennen (2. Chr. 14:8-11). Lota kjeem dan de Kjennich Bascha von Israel jäajen am, waut lang nich soo väl Soldoten haud. Oba ditmol betold Asa de Siera (Aramäa), daut see am holpen, enne Städ sikj opp Jehova to veloten (2. Chr. 16:1-3). Un aus Asa sien Läwen meist to Enj wia, veleet hee sikj uk nich opp Jehova, aus hee eene schwoare Krankheit haud (2. Chr. 16:12).

14. Waut kjenn wie ut Asa siene Fäla lieren?

¹⁴ Aum Aunfank vetrud de Kjennich Asa opp Jehova, wan doa Trubbels oppkjeemen. Oba lota wull hee leewa aules selfst doonen. Ieeschtlich sach daut soo, daut daut eene goode Iedee wia, daut Asa aundre Menschen no Help fruach. Oba enne Lenjd kjeem daut nich goot ut. Jehova leet am derch eenen Profeet sajen: “Wiels du die opp dän Kjennich von Aram veloten hast un nich opp däm HARN, dienen Gott, doawäajen es däm Kjennich von Aram sien Häa ut diene Macht jekomen” (2. Chr. 16:7). Wie motten uk oppaussen, daut wie ons nich opp ons selfst veloten. Enne Städ daut sell wie en Jehova sien Wuat no Rot sieekjen. Mau rajcht wan doa onverhofs waut oppkjemt, dan woat Jehova ons halpen, wan wie ruich bliewen un ons opp am veloten.

15. Waut kjenn wie doonen, wan wie en de Schreft läsen?

¹⁵ (4) Lia die Bibelvarzhen utwendich. Wan du Bibelvarzhen finjst, waut die halpen ruich to bliewen un opp Jehova to vetruen, dan wurscht du die dee kjennen utwendich lieren. Du wurscht dee biejlikj kjennen opp ludes läsen ooda die dee oppschriewen un dee emma wada wadaholen. Josua sull Gott sien Jesazbuak räajelmässich opp ludes läsen, daut hee goode Entscheidungen moaken kunn. Daut wudd am uk halpen, daut hee sikj aus Leida von Gott sien Volkj nich Sorjen muak (Jos. 1:8-9). Daut jeft een deel Bibelvarzhen, waut ons halpen kjennen en soone Loagen ennalich Fräd to haben, wua eena jeweenlich wudd sea Angst haben ooda sikj väl Sorjen moaken (Psa. 27:1-3; Spr. 3:25-26).

16. Woo halpt Jehova ons derch de Vesaumlunk, daut wie kjennen ruich bliewen un opp am vetruen?

¹⁶ (5) Sie met Gott siene Deena toop. Jehova halpt ons derch onse Breeda un Sestren, daut wie kjennen ruich bliewen un opp am vetruen. Bie onse Toopkomes hab wie feine Räden un wie kjennen de aundre äare Auntwuaten hieren un ons unjarenaunda Moot toospräakjen (Heb. 10:24-25). Daut kaun ons uk eene  groote Help sennen, wan wie met goode Frind von de Vesaumlunk äwa onse Sorjen räden. Wan wäa von eenen gooden Frint “jetreest woat”, woat dee foaken väl leichta met siene Sorjen foadich (Spr. 12:25).

17. Woo kaun onse Hopninj ons en schwoare Tieden halpen ruich to bliewen, soo aus Hebräa 6:19 sajcht?

¹⁷ (6) Hool diene Hopninj em Uag. Onse Hopninj fa daut Kjennichrikj es soo aus een “Anka fa onse Seel”, waut ons en schwoare Tieden halpt ruich to bliewen (läs Hebräa 6:19). Denkj aun de niee Welt, waut Jehova vesproaken haft, wua wie kjeene Sorjen mea haben woaren (Jes. 65:17). Stal die väa, woo frädlich daut doa sennen woat, wan ons nuscht mea toosaten woat (Micha 4:4). Onse Hopninj woat uk stoakja, wan wie met aundre doaräwa räden. Wan wie biem prädjen un Jinja moaken ons bastet doonen, dan kjenn wie “de Hopninj fausthoolen un iewrich bat aum Enj doabie bliewen” (Heb. 6:11).

18. Opp waut mott wie räakjnen, un woo kjenn wie doamet foadich woaren?

¹⁸ Je noda daut Enj von dise Welt kjemt, je mea Sorjen un Trubbels woa wie woomäajlich haben. Ons Varsch fa daut Joa 2021 kaun ons halpen, doamet foadich to woaren un ruich to bliewen, wan wie ons nich opp ons selfst veloten, oba opp Jehova. Well wie en dit Joa derch onse Woakjen bewiesen, daut wie opp Jehova vetruen un daut nokomen wellen, waut ons Varsch fa daut Joa sajcht: Wan jie ruich bliewen un Vetruen hoolen, woa jie stoakj sennen (Jes. 30:15).