1. Waut deed daut aun eenen jungen Brooda, daut dee aune 1935 bie eenen Kongress eene Räd hieed?

EEN 18-joascha Jung leet sikj aune 1926 deepen. Dän siene Elren wieren Bibelforscha, soo aus Jehova siene Zeijen to jane Tiet jenant worden. Dee hauden dree Junges un twee Mejalen, waut see lieeden, Jehova Gott to deenen un Jesus Christus notodoonen. Soo aus aule Bibelforscha to jane Tiet neem uk dis junga Maun jieda Joa bie daut Owentmol von daut Broot un von dän Wien. Oba aus hee de besondre Räd met daut Teema “De groote Häad” hieed, endad siene Hopninj sikj gaunz. Dise Räd hilt Brooda J. F. Rutherford aune 1935 bie eenen Kongress en Washington, D.C., en de Stäts. Waut lieeden de Bibelforscha bie disen Kongress?

2. Waut fa eene biblische Lia läd Brooda Rutherford en siene Räd ut?

² Brooda Rutherford läd daut en siene Räd ut, wäa to de groote Häad jehieet, wua Openboarunk 7:9 von rät. Ea hauden de Bibelforscha jedocht, daut de groote Häad uk nom Himmel komen wudden, oba daut dee nich soo tru jewast wieren aus de Jesaulwde. Oba nu läd Brooda Rutherford daut met de Schreft ut, daut de groote Häad nich em Himmel komen wudden, oba daut daut Christus siene aundre Schop * wieren, waut de “groote Triebsaul” äwaläwen wudden un fa emma oppe Ieed läwen  (Opb. 7:14, NTR). Jesus vespruak je: “Ekj hab noch aundre Schop, dee nich von dise Häad sent. Dee mott ekj uk nenn brinjen, un dee woaren miene Stemm hieren. Dan woat doa eene Häad un een Hoad sennen” (Joh. 10:16). Dise aundre Schop deenen Jehova tru un haben de Hopninj, noch mol fa emma em Paradies oppe Ieed to läwen (Mat. 25:31-33, 46). Waut deed daut aun disen 18-joaschen Brooda un uk aun väl aundre von Jehova siene Deena, daut dise biblische Lia fresch utjelajcht wort? (Psa. 97:11; Spr. 4:18).

3-4. Waut worden dusende bie dän Kongress aune 1935 en, un wuarom?

³ Daut wia gaunz besonda, aus de Rädna bie dän Kongress säd: “Kjennen aul dee, waut de Hopninj haben, fa emma oppe Ieed to läwen, toom Jefaulen oppstonen?” Een Brooda, waut doa wia, säd, daut äwa de Halft von de ojjefäa 20 000, waut doa wieren, oppstunden. Dan säd Brooda Rutherford: “Kjikjt! De groote Häad!” De Toohiera schrieejen aula fa Freid. Deejanje, waut oppstunden, wisten, daut see nich utjewält wieren toom em Himmel läwen un daut see nich met Gott sienen Jeist jesaulft wieren. Dän näakjsten Dach leeten sikj bie dän Kongress 840 Menschen deepen. Un de mieeschte von dee wieren von de aundre Schop.

⁴ No dise Räd hieeden de junga Brooda, wua wie ea von räden, un dusende aundre opp, bie daut Owentmol von daut Broot un von dän Wien to nämen. Väle jinkj daut krakjt soo aus eenen deemootjen Brooda, waut doa säd: “Aune 1935 neem ekj toom latste Mol biem Owentmol von daut Broot un von dän Wien. Ekj wort en, daut Jehova mie nich derch sienen heiljen Jeist de himlische Hopninj jejäft haud. Enne Städ daut haud ekj de Hopninj, noch mol oppe Ieed to läwen un mettohalpen, dee to een Paradies to moaken” (Reem. 8:16-17; 2. Kor. 1:21-22). Von dan aun neem de groote Häad emma dolla too un dee schauften veeent met de Jesaulwde toop.

5. Woo denkjt Jehova äwa deejanje, waut nich mea von daut Broot un von dän Wien nämen?

⁵ Woo docht Jehova äwa deejanje, waut no 1935 nich mea von daut Broot un von dän Wien neemen? Un waut denkjt hee, wan eent von Jehova siene Zeijen vondoag dän Dach bie daut Owentmol von daut Broot un von dän Wien nemt un lota enwoat, daut dee doch nich jesaulft es? (1. Kor. 11:28). Eenje haben von daut Broot un von dän Wien jenomen, wiels see daut nich rajcht vestunden, waut fa eene Hopninj see hauden. Oba wan dee äaren Fäla toostonen un nich mea von daut Broot un von dän Wien nämen un Jehova wieda tru deenen, dan woat hee dee secha mank de aundre Schop talen. Dee nämen nich von daut Broot un von dän Wien, oba dee komen doawäajen no daut Owentmol, wiels dee fa daut sea dankboa sent, waut Jehova un Jesus fa an jedonen haben.

6. Waut säd Jesus, waut de Enjel doonen sullen?

⁶ De groote Triebsaul es aul sea dicht bie un daut kaun ons väl Moot jäwen, wan wie seenen, waut Openboarunk, Kapitel 7 noch äwa de Jesaulwde un äwa  de groote Häad von de aundre Schop sajcht. Jesus sajcht to de Enjel, daut see dän Wint von de vea Rechtungen fa de Venichtunk trigjhoolen sellen. Dee sellen dän mau dan loosloten, wan aule jesaulwde Christen jetieekjent sent. Daut bediet, daut Jehova dee fa tru talt (Opb. 7:1-4). Christus siene jesaulwde Breeda woaren met am toop Kjennichs un Priestasch em Himmel sennen, wäajen see tru wieren (Opb. 20:6). Jehova, Jesus un de Enjel woaren sikj sea freien, wan dee seenen, woo de 144 000 äaren Loon em Himmel kjrieen woaren.

7. Wäm sitt Johanes en eene Vision, soo aus Openboarunk 7:9-10 sajcht, un waut doonen dee? (See daut Bilt oppe väaschte Sied.)

⁷ Nodäm daut Johanes von de 144 000 Kjennichs un Priestasch rät, sitt dee noch waut besondret. Daut es eene groote Häad, waut Harmagedon äwaläwen. To dise groote Häad jehieren väl mea aus 144 000 Persoonen un wie weeten nich, woo väl daut tolatst sennen woaren (läs Openboarunk 7:9-10). Dee äare “witte Kjleeda” sent een Tieekjen doafäa, daut dee “sikj von de Welt rein[jehoolen]” haben un Gott un Christus tru jebläwen sent (Jak. 1:27). Dee schrieen, daut see derch Jehova un derch Gott sien Laum Jesus jerat worden sent. Un dee haben Paulmasta en de Henj. Daut jeft auntovestonen, daut dee sikj freien, wiels Jehova Jesus toom Kjennich jemoakt haft (see uk Johanes 12:12-13).

8. Waut sajcht Openboarunk 7:11-12 ons von Jehova siene Famielje em Himmel?

⁸ Läs Openboarunk 7:11-12. Waut doonen deejanje, waut em Himmel sent, wan see de groote Häad seenen? Johanes sitt, daut dee sikj aula sea freien un Gott preisen. Jehova siene Famielje em Himmel woat sea schaftich sennen, wan dise Vision sikj erfelt un de groote Häad de groote Triebsaul äwaläwen.

9. Waut deit de groote Häad vondoag dän Dach, soo aus Openboarunk 7:13-15 sajcht?

⁹ Läs Openboarunk 7:13-15. Johanes rät doavon, daut de groote Häad “äare Kjleeda em Bloot vom Laum kloa witt jewoschen” haben. Daut bediet, daut dee een reinet Jewessen haben un daut Jehova dee fa jerajcht talt (Jes. 1:18). Dee haben sikj am hanjejäft un deepen loten un jleewen aun Jesus sien Opfa un sent Frind met Jehova (Joh. 3:36; 1. Pet. 3:21). Doawäajen kjennen dee ver Gott sienen Troon stonen un am “Dach un Nacht” oppe Ieed deenen. Dee sent flietich un doonen daut jratste Poat biem prädjen un lieren, wiels dee daut ieeschte om Gott sien Kjennichrikj todoonen sent (Mat. 6:33; 24:14; 28:19-20).

10. Äwa waut es de groote Häad sikj secha, un waut woaren dee beläwen kjennen?

¹⁰ De groote Häad, waut de groote Triebsaul äwaläwen woaren, sent sikj secha, daut Gott sikj uk wieda om an kjemren woat, wiels “dee, dee opp däm Troon sett woat mank an wonen”. Dan woaren de aundre Schop waut beläwen kjennen, wua see aul lang no jeluat haben: “Gott woat an aule Tronen von de Uagen weschen. Doa woat kjeen Doot ooda Trua ooda Hielen ooda Weedoag mea sennen” (Opb. 21:3-4).

11-12. (a) Waut fa goodet woat de groote Häad no Openboarunk 7:16-17 no beläwen? (b) Waut kjennen de aundre Schop bie daut Owentmol doonen, un wuarom?

¹¹ Läs Openboarunk 7:16-17. Nu motten  eenje von Jehova siene Deena hungren, wiels dee nich jenuach Jelt haben toom Äten kjeepen ooda wäajen dee wua läwen, wua daut Orru ooda Kjrich jeft. Aundre sent wäajen äaren Gloowen enjestopt. Un doch es de groote Häad sea schaftich, wiels dee weeten, daut see lota noch mol jenuach jeisteljet un aundret Äten haben woaren, wan dise schlajchte Welt ieescht venicht es. Wan Jehova dän Soton siene Welt venichten woat, dan woat hee de groote Häad fa de “Hett” von sienen Oaja beschitzen. Un wan de groote Triebsaul ieescht äwa es, dan woat Jesus deejanje, waut äwaläft haben, “no läwendje Wotakjwalen leiden”, daut dee eewjet Läwen kjrieen. Stal die mol väa, waut vonne besondre Hopninj de groote Häad haft! Daut sent de eensje mank aul de Menschen, waut jeemols jeläft haben, waut kjeenmol stoawen woaren (Joh. 11:26).

¹² De aundre Schop sent Jehova un Jesus sea dankboa fa äare wundascheene Hopninj. Jehova haft dee nich utjewält toom em Himmel läwen, oba hee räakjent dee krakjt soo väl aus de Jesaulwde. De Jesaulwde un de aundre Schop kjennen Gott un Christus preisen. Un daut kjennen dee biejlikj doonen, wan dee no daut Owentmol komen.

13-14. Wuarom saul jieda eena no daut Aundenkjen von Christus sienen Doot komen?

¹³ En de latste Joaren neem bie daut Owentmol ojjefäa eena von dusent von daut Broot un von dän Wien. Daut bediet, daut en de mieeschte Vesaumlungen oppe Welt verheipts kjeena von daut Broot un dän Wien nemt, wiels de mieeschte hopen fa emma oppe Ieed to läwen. Wuarom komen dee dan no daut Owentmol? See wie mol een Biespel: Wuarom foat eena no eenen Frint siene Kjast? Jeweenlich deit eena daut, wiels eena de Brutlied wiesen well, daut eena dee väl räakjent un unjastetten well. De aundre Schop, waut no daut Owentmol komen, doonen daut uk, wiels dee Christus un de Jesaulwde wiesen wellen, daut see an väl räakjnen un unjastetten wellen. Un dee foaren doa uk han, wiels  dee fa Jesus sien Opfa dankboa sent. Dit Opfa moakt daut mäajlich, daut see noch mol fa emma oppe Ieed läwen kjennen.

¹⁴ Wuarom komen de aundre Schop noch no daut Owentmol? Dee wellen Jesus sien Jeboot jehorchen. Aus Jesus met siene true Apostel toop toom ieeschte Mol daut Owentmol fieed, säd hee to dee: “Doot daut, om aun mie to denkjen” (1. Kor. 11:23-26). Doawäajen wanken de aundre Schop soo lang no daut Owentmol, aus daut noch Jesaulwde hia oppe Ieed jeft. Un dee loden aulem en, doa uk hantokomen.

15. Woo kjenn wie bie daut Owentmol Gott un Christus preisen?

¹⁵ Bie daut Owentmol kjenn wie Gott un Christus preisen, wan wie doa toop sinjen un bäden. Doa woa wie dit Joa uk de Räd hieren met daut Teema “Räakjen daut väl, waut Gott un Christus fa die jedonen haben!” Dee woat ons halpen Jehova un Christus noch dankboara to sennen. Un wan daut Broot un de Wien romjerieekjt woaren, dan kjenn wie doaräwa nodenkjen, daut dee Jesus sienen Kjarpa un sien Bloot väastalen. Wie woaren uk doaraun denkjen, daut Jehova sienen Sän fa ons stoawen leet, daut wie läwen kjennen (Mat. 20:28). Secha wellen aule, waut onsen himlischen Voda un sienen Sän leewen, bie daut Owentmol sennen.

16. Waut es bie de Jesaulwde un de aundre Schop äwareen?

¹⁶ Bie de Jesaulwde un bie de aundre Schop es jewesset äwareen un Gott räakjent dee jlikjen väl. Hee jeef je sienen leewen Sän, om de Jesaulwde un de aundre Schop frietokjeepen. Dee haben eene veschiedne Hopninj, oba aulebeid motten Gott un Christus tru bliewen (Psa. 31:24). Un Gott kaun jiedrem eenen sienen heiljen Jeist jäwen, wan daut fält, endoont aus dee von de Jesaulwde ooda von de aundre Schop sent.

17. To waut freien de Jesaulwde sikj, waut noch oppe Ieed läwen?

¹⁷ De jesaulwde Christen haben nich von kjlien aun de Hopninj em Himmel to läwen. Gott jeft an dee. Dee denkjen äwa äare Hopninj no un bäden un freien sikj aul to äaren Loon em Himmel. Dee kjennen sikj daut nu noch nich krakjt väastalen, waut fa eenen Kjarpa see em Himmel haben woaren (Filip. 3:20-21; 1. Joh. 3:2). Oba dee freien sikj aul doatoo, daut see Jehova, Jesus, de Enjel un de aundre Jesaulwde doa trafen woaren un wellen  met dee toop en daut himlische Kjennichrikj sennen.

18. To waut freien de aundre Schop sikj?

¹⁸ De aundre Schop freien sikj doatoo, daut see noch mol fa emma oppe Ieed läwen kjennen. Daut es waut, waut aule Menschen sikj wenschen (Liera 3:11, NW). Dee jankat daut aul mettohalpen, daut de gaunze Ieed een Paradies woat. Dee freien sikj, daut see sikj dan äare Hiesa buen kjennen un äare Goades moaken un daut see un äare Kjinja gaunz jesunt sennen woaren (Jes. 65:21-23). Dee freien sikj uk aul doatoo, no veschiedne Städen to reisen un biejlikj de Boaj, dän Woolt un daut Mäa to seenen un aul daut to unjasieekjen, waut Jehova jemoakt haft. Un besonda freien dee sikj, daut see woaren Jehova emma noda komen.

19. Waut kaun jieda eena bie daut Owentmol doonen, un wanea woa wie daut dit Joa haben?

¹⁹ Jehova jeft jiedrem eenen, waut sikj am hanjeft, eene wundascheene Hopninj (Jer. 29:11). Waut kjenn wie aula bie daut Owentmol doonen? Wie kjennen Gott un Christus fa aul daut preisen, waut dee jedonen haben, daut wie kjennen eewjet Läwen haben. Daut Aundenkjen aun Christus sienen Doot es daut wichtichste Toopkomen, waut woare Christen jieda Joa haben. Dit Joa woa wie daut aum Sinowent, dän 27. Moaz 2021 no Sonnenunjagank haben. Väle woaren gaunz frie doa hankomen kjennen. Aundre woaren doa hankomen, wan dee uk Jäajenstaunt haben. Un noch aundre woaren daut em Jefenkjnis fieren. Jehova, Jesus, de Enjel un de Jesaulwde, waut vom Doot oppjestonen sent, woaren daut seenen. Wie wenschen jiedrem eenen un jieda Vesaumlunk un Grupp een wundascheenet Owentmol.