EN DAUT Bible Lands Museum en Jerusalem es eene Steentofel von rom de Tiet 700-600 v. Chr. Dise Steentofel haben se en eene Grauf-Heel jefungen dicht bie Hebron en Israel. Doabowen steit: “Jahwe Zeebaot sien Fluch saul äwa Hagav sienen Sän Hagaf komen.” Woo paust dit met daut toop, waut de Schreft sajcht? Daut wiest, daut Gott sien Nomen Jehova, waut met hebräische Latren JHWH (ooda YHWH) jeschräwen wia, en de Bibeltiet sea bekaunt wia un jebrukt wort. Mau rajcht en aundre Grauf-Heelen, wua Menschen sikj troffen un vestuaken, fungen se aune Wenj foaken Gott sienen Nomen un uk Menschen äare Nomes, waut met Gott sienen Nomen to doonen hauden.

De Jelieede Dr. Rachel Nabulsi von de Uniwersität von Georgia säd doatoo: “Wie kjennen doa väl von lieren, daut de Nomen JHWH foaken jebrukt wort. . . . Daut jeschräwne un de Varzhen [von de Bibel] wiesen, woo wichtich JHWH en daut Läwen von Israel un Juda wia.” Dit paust doamet toop, daut Gott sien Nomen met de hebräische Latren JHWH dusende Mol en de Schreft bennen steit. Foaken wia Gott sien Nomen uk en Menschen äare Nomes met en.

De Wieed “Jahwe Zeebaot”, waut opp de Steentofel wieren, meenen “Jehova von de Armeeen”, ooda “Jehova, de Hechsta von de himlische Armeeen”. Daut diet doano han, daut dee en de Bibeltiet foaken Gott sienen Nomen jebrukt haben un uk de Wieed “Jehova von de Armeeen”. Dit paust doamet toop, daut de Bibel dise Wieed 283 Mol en de Hebräische Schreften brucken deed, meist emma en Jesaja, Jeremia un Sacharja.