1. Aun waut es to seenen, daut väl Famieljes vondoag dän Dach sikj nich goot sent?

EN DE Schreft sajcht daut äwa de Menschen en de latste Tiet, daut dee “sikj nich goot sennen” woaren (2. Tim. 3:1, 3). Dise Profezeiunk erfelt sikj vondoag dän Dach. Väl Menschen haben sikj biejlikj scheeden loten. De Elren sent sikj dan unjarenaunda doll un de Kjinja feelen sikj soo, aus wan kjeena an waut räakjent. Soogoa Famieljes, waut aula toopwonen, feelen sikj foaken nich vebungen. Eena, waut Famieljes Rot jeft, sajcht: “De Mame, de Pape un de Kjinja, dee kjikjen mea en de Fons, Tablets un Komputasch nenn un spälen Videogäms, aus daut dee unjarenaunda räden. Wan dee uk aula unja dautselwje Dak wonen, kjanen dee sikj oba nich werkjlich.”

2-3. (a) Wäm sell wie no Reema 12:10 no goot sennen? (b) Waut woa wie en disen Artikjel lieren?

² Wie wellen nich soo woaren, aus dise Welt es, waut kjeene Leew haft (Reem. 12:2). Oba wie sellen doaropp schaufen, daut wie onse ieejne Famielje goot sent un uk onse Breeda un Sestren (läs Reema 12:10). Waut bediet daut? Daut bediet, daut wie ons met onse Gloowesbreeda krakjt soo sellen vebungen feelen aus en eene leeftolje Famielje. Dan halp wie met, daut wie aula Jehova schaftich un veeent deenen kjennen (Micha 2:12).

³ Nu woa wie ut eenje Biespels ut de Schreft lieren, woo wie ons doarenn noch vebätren kjennen, Leew to wiesen.

4. Waut sajcht Jakobus 5:11 äwa Jehova siene Leew fa ons?

⁴ En de Schreft see wie, waut fa wundascheene Ieejenschoften Jehova haft. Doa sajcht daut biejlikj: “Gott es ons goot” (1. Joh. 4:8). Wan wie doaräwa nodenkjen, dan well wie met am Frind sennen. Un en de Schreft sajcht daut uk, daut Jehova sea metliedent es (läs Jakobus 5:11). Daut wiest ons, woo leeftolich Jehova to ons es.

5. Woo wiest Jehova Metjefeel, un woo kjenn wie am nodoonen?

⁵ En Jakobus 5:11 sajcht daut, daut Jehova metliedent es un uk, daut hee erboarment es (2. Mo. 34:6). Daut kjenn wie doaraun seenen, daut Jehova ons onse Fäla togood helt (Psa. 51:3). Oba de Schreft wiest, daut sikj erboarmen väl mea bediet, aus bloos Fäla togood to hoolen. Sikj erboarmen ooda Metjefeel haben bediet, daut eena aundre halpen well, wan eena sitt, daut dee waut schwoa es. Jehova haft Metjefeel fa ons un jeft mea om ons rom aus eene Mutta om äa Bäbe (Jes. 49:15). Wan ons daut schwoa es, well Jehova ons ut Metjefeel halpen (Psa. 37:39; 1. Kor. 10:13). Wie kjennen onse Gloowesbreeda Metjefeel wiesen, wan wie dee togood hoolen un nich doll bliewen, wan wie ons aun dee aunjeschmäat haben (Efs. 4:32). Un wie kjennen uk Metjefeel wiesen, wan wie onse Breeda un Sestren halpen, wan dee waut schwoaret derchmoaken. Ut Leew woa wie Metjefeel wiesen un doaderch doo wie Jehova no, waut daut baste Biespel fa Leew es (Efs. 5:1).

6. Aun waut wia daut to seenen, daut Jonatan un David goode Frind wieren?

⁶ En de Schreft läs wie von onvolkomne Menschen, waut goode Frind wieren un sikj von Hoaten goot wieren. Äwa Jonatan un David sajcht de Schreft biejlikj:  “Jonatan siene Seel [wia] eent jeworden met David siene. Jonatan jleicht am soo sea aus hee sikj selfst deed” (1. Sam. 18:1). Jehova haud David utjewält fa dän näakjsten Kjennich. Lota wort Saul soo aufjenstich, daut hee David wull ombrinjen. Oba Saul sien Sän Jonatan stunt sienen Voda en dise Sach nich bie. Jonatan un David vespruaken sikj unjarenaunda, emma Frind to sennen un sikj unjarenaunda to halpen (1. Sam. 20:42).

7. Wuarom es daut oppfaulent, daut Jonatan un David goode Frind wieren?

⁷ Wuarom es daut oppfaulent, daut Jonatan un David goode Frind wieren? Eent es, daut Jonatan ojjefäa dartich Joa ella wia aus David. Jonatan wudd haben kunt denkjen, daut hee nich väl met David äwareen haud, wäajen dee väl jinja wia aus hee un uk nich soo väl Erfoarunk haud. Oba Jonatan docht nich soo un räakjend David väl.

8. Waut denkjst du, wuarom wieren Jonatan un David soone goode Frind?

⁸ Jonatan wudd David uk haben kunt aufjenstich woaren. Hee wia dän Kjennich Saul sien Sän un Jonatan wudd haben kunt denkjen, daut hee daut Rajcht haud de näakjsta Kjennich to sennen (1. Sam. 20:31). Oba Jonatan wia deemootich un bleef Jehova tru. Hee wia gaunz doamet envestonen, daut David de näakjsta Kjennich sennen sull. Hee unjastett dän tru, wan Saul sikj doaräwa uk sea oajren must (1. Sam. 20:32-34).

9. Wia Jonatan David aufjenstich? Laj daut ut.

⁹ Jonatan wia David von Hoaten goot un doawäajen wia hee am nich aufjenstich. Jonatan vestunt sea fein metem Flitzboagen to scheeten un wia uk äwanäment em Kjrich. Hee un sien Voda Saul wieren doafäa bekaunt, daut dee bosja wieren “aus Odlasch un stoakja aus Leiws” (2. Sam. 1:22-23). Jonatan wudd haben kunt doamet puchen, waut hee em Kjrich aules volbrocht haud. Oba hee proowd nich, bäta to sennen aus David, un wia uk nich aufjenstich. Enne Städ daut jleicht Jonatan David, wäajen dee soo äwanäment wia un sikj opp Jehova veleet. Von dan, aus David mol Goliat dootjemoakt haud, räakjend Jonatan am krakjt soo väl, aus hee sikj selfst deed. Woo kjenn wie wiesen, daut wie onse Breeda krakjt soo goot sent?

10. Woo kjenn wie ons “unjarenaunda werkjlich von Hoaten goot” sennen?

¹⁰ De Schreft sajcht: “Siet junt unjarenaunda werkjlich von Hoaten goot” (1. Pet. 1:22). Jehova es daut baste Biespel fa Leew. Soo lang aus wie am tru sent, woat hee nich opphieren ons to leewen (Reem. 8:38-39). Daut griechische Wuat, waut met “werkjlich” äwasat woat, jeft auntovestonen, daut eena sikj aunstrenjt Leew to wiesen. Eenjemol es daut nich leicht, onse Gloowesbreeda un Sestren von Hoaten goot to sennen. Waut kjenn wie doonen, wan wie ons äwa aundre oajren? De Schreft sajcht: “Habt soo väl Leew, daut jie junt unjarenaunda vedroagen. Siet emma doano ut, de Eenichkjeit em Jeist to bewoaren, wuaderch jie met eenaunda vebungen bliewen” (Efs. 4:1-3). Wan wie ons aunstrenjen, “met eenaunda vebungen [to] bliewen”, dan woa wie nich no onse Breeda äare Fäla kjikjen. Dan woa wie soo äwa dee denkjen, aus Jehova deit (1. Sam. 16:7; Psa. 130:3).

11. Wuarom es daut eenjemol schwoa, Leew to wiesen?

 ¹¹ Daut es nich emma leicht, onse Breeda un Sestren Leew to wiesen, besonda wan wie no dee äare Fäla kjikjen. Soo jinkj daut veleicht uk eenje en de Aposteltiet. Efodia un Sintieche biejlikj wia daut woomäajlich nich schwoa, Paulus “em Deenst aum Evangelium” tru bietostonen. Oba wäajen irjentwaut worden dee beid unja sikj nich fein foadich. Paulus rod dee too “sikj eenich to sennen em Harn” (Filip. 4:2-3).

12. Waut kjenn wie doonen, daut wie onse Breeda un Sestren leewen?

¹² Waut kjenn wie doonen, daut wie onse Breeda un Sestren leewen? Na, wan wie dee bäta kjanen lieren, dan woat daut leichta sennen, dee to vestonen un eene Leew fa dee to kjrieen. Wie kjennen met dee Frind woaren, soogoa dan, wan wie nich jlikjen oolt sent ooda von veschiedne Velkja sent. Denkj wie noch eemol aun Jonatan. Hee wia ojjefäa dartich Joa ella aus David un doch kunn hee een gooda Frint aun dän woaren. Wurscht du kjennen met wäm von de Vesaumlunk Frint woaren, waut ella es aus du ooda veleicht jinja? Wan du daut deist, dan kaust du wiesen, daut du aule Breeda goot best (1. Pet. 2:17).

13. Wuarom woa wie woomäajlich nich aule en de Vesaumlunk jlikjen väl räakjnen?

¹³ Wie leewen onse Breeda un Sestren. Oba bediet daut dan, daut wie dee aula jlikjen väl räakjnen? Nä, wiels daut wudd goanich mäajlich sennen. Daut es nich orrajcht, wan wie eenje mea räakjnen aus aundre, wiels ons dautselwje intressieet. Jesus nand aul siene Apostel siene “Frind”, oba hee jleicht Johanes besonda (Joh. 13:23; 15:15; 20:2). Daut bediet oba nich, daut Jesus Johanes aundasch behaundeld aus de aundre Apostel. Aus Johanes un sien Brooda Jakobus biejlikj doano fruagen, aus see wudden kjennen de baste Städen en Gott sien Kjennichrikj kjrieen, säd Jesus to an: “To bestemmen  wäa aun miene rajchte ooda linkje Sied setten saul, es nich miene Sach” (Mar. 10:35-40). Wie wellen soo aus Jesus onse goode Frind nich väl bäta behaundlen aus aundre (Jak. 2:3-4). Wan wie daut deeden, dan wudd daut en de Vesaumlunk Spoolungen jäwen (Jud. 17-19).

14. Woo halpt Filippa 2:3 ons, daut wie nich wellen bäta sennen aus aundre?

¹⁴ Wan wie onse Breeda un Sestren von Hoaten goot sent, dan woa wie nich proowen bäta to sennen aus dee. Denkj wie doaraun, daut Jonatan David nich aufjenstich wort un daut hee nich proowd selfst Kjennich to woaren. Un doa kjenn wie aula väl von lieren. Wie wellen aundre von de Vesaumlunk nich aufjenstich sennen wäajen daut, waut dee kjennen. Wie wellen deemootich sennen un dän Näakjsten hecha achten aus ons selfst (läs Filippa 2:3). Denkj wie doaraun, daut jieda eena waut fa de Vesaumlunk doonen kaun. Wan wie deemootich sent, dan woa wie no onse Breeda un Sestren äare goode Sieden kjikjen, un wie kjennen väl von dee lieren (1. Kor. 12:21-25).

15. Waut lia wie von daut, waut Tanya un äare Kjinja beläwden?

¹⁵ Wan wie mol onverhofs waut schwoaret beläwen, dan kaun Jehova ons doaderch treesten, daut onse Breeda un Sestren ons Leew wiesen un ons halpen. Well wie mol seenen, waut eene Sesta enne Stäts aune 2019 beläwd, aus see met äare dree Kjinja toop bie eenen internazionalen Kongress wia, waut daut Teema haud “Leew haft kjeen Enj!” See heet Tanya un vetalt, waut doa Sinowent no dän Kongress passieed: “Aus wie wada trigj nom Hotel fuaren, prald een aundret  Foatich en ons nenn. Kjeenem wort waut, oba aus wie utem Foatich rutkroopen, stund wie gaunz vebleft oppem Heiwä. Biesied ons hilt wäa stell un roopt, daut wie sullen no siene Koa komen, wäajen wie doa sechra wieren. Daut wia eent von onse Breeda, waut doa uk vom Kongress kjeem. Un daut wia nich de eensja. Fief von onse Breeda von Schweeden hilden doa uk stell. De Sestren pakten mie un miene Dochta leeftolich om, un daut wia krakjt daut, waut ons dan jroz fäld. Ekj säd to dee, daut see wellich wudden kjennen foaren, wäajen ons wia je aulmols nuscht jeworden. Oba dee bleewen de gaunze Tiet bie ons, soogoa dan, aus de Ambulans aul jekomen wia. De Breeda wullen ons met aules halpen, waut ons dan fäld. En dise schwieeje Loag kunn wie Jehova siene Leew späaren. Von doa aun leew wie onse Breeda un Sestren un uk Jehova noch dolla un sent am uk noch dankboara.” Kaust du die besennen, woo de Breeda die mol Leew jewäsen haben, aus die Help fäld?

16. Wuarom sell wie ons unjarenaunda von Hoaten goot sennen?

¹⁶ Waut fa goodet brinjt daut, wan wie ons unjarenaunda goot sent? Wie kjennen onse Breeda un Sestren treesten, wan dee waut schwoaret beläwen. Un wie halpen uk met, daut Gott siene Deena veeent bliewen. Wie wiesen uk, daut wie werkjlich Jesus siene Nofolja sent, un daut woat opprechtje Menschen halpen, daut dee Jehova deenen wellen. Un daut wichtichste es, daut wie Jehova ieren. “Hee es een Voda, dee sikj erboarmt, un een Gott, dee onen Enj treesten deit” (2. Kor. 1:3). Well wie wieda doaropp schaufen, ons unjarenaunda Leew to wiesen!