1. Waut kaun Gott siene Leew aun die doonen?

DE Apostel Johanes schreef: “Gott es ons goot” (1. Joh. 4:8). Wie weeten, daut Gott aules jemoakt haft, waut läft. Oba dis Varsch halpt ons denkjen, daut de Leew uk von Gott kjemt. Jehova leeft ons! Wäajen siene Leew kjenn wie ons secha feelen un schaftich un tofräd sennen.

2. Woont sent no Matäus 22:37-40 no de beid jratste Jebooten, un wuarom es daut veleicht schwanda, daut tweede to jehorchen?

² Aus wie aus Christen Leew wiesen ooda nich es nich mol eene Froag, daut es een Jeboot (läs Matäus 22:37-40). Wan wie Jehova kjanen lieren, es daut veleicht noch leicht, daut ieeschte Jeboot notokomen. Wuarom? Wiels Jehova om ons bekjemmat es un leeftolich un volkomen es. Oba veleicht es daut fa ons nich soo leicht, daut tweede Jeboot notokomen. Wuarom nich? Wiels aundre Menschen nich volkomen sent, un doa sent uk onse Breeda un Sestren met en. Veleicht sajen ooda doonen dee noch mol waut, wua wie jleewen, daut daut nich leeftolich wia, ooda wie denkjen, dee jäwen nuscht om ons rom. Jehova wist, daut daut fa ons nich wudd leicht sennen, dän Näakjsten to leewen. Doawäajen sajcht hee ons en sien Wuat, wuarom wie ons unjarenaunda Leew wiesen sellen un woo wie daut krakjt doonen kjennen. Hee leet daut von veschiedne Bibelschriewa oppschriewen, un Johanes wia eena von dee (1. Joh. 3:11-12).

3. Äwa waut schreef Johanes foaken?

 ³ Johanes schreef ieremol, daut een Christ Leew wiesen sull. En daut Bibelbuak Johanes sent soone Wieed aus “goot sennen” un “Leew” foakna bennen aus en de Bibelbieekja Matäus, Markus un Lukas aula toop. Johanes wia ojjefäa hundat Joa oolt, aus hee daut Bibelbuak Johanes schreef un siene dree Breew. Dise Bibelbieekja wiesen ons, daut wie aules ut Leew doonen sellen (1. Joh. 4:10-11). Woo must Johanes daut lieren, Leew to haben?

4. Wia Johanes emma leeftolich to aundre? Laj daut ut.

⁴ Aus Johanes noch een junga Maun wia, wia hee nich emma leeftolich to aundre. Hee deed biejlikj mol met Jesus toop prädjen un see wieren oppem Wajch no Jerusalem. De Menschen von een Stautje en Samaria wullen Jesus un dee, waut met am toop reisden, nich oppnämen. Waut fa eene Natua haud Johanes dan? Hee wull Fia vom Himmel raufkomen loten un dise Menschen venichten (Luk. 9:52-56). Opp eene aundre Sauz wia daut fa de aundre Apostel nich leeftolich, waut Johanes deed. Hee un sien Brooda Jakobus hauden äare Mutta woomäajlich berät, daut see Jesus doano froagen sull, daut see wudden de baste Städen en Jesus sien Kjennichrikj kjrieen. Aus de aundre Apostel daut enworden, oajad dee daut sea (Mat. 20:20-21, 24). Johanes muak veschiedne Fäla, un doch leewd Jesus am (Joh. 21:7).

5. Waut woa wie en disen Artikjel seenen?

⁵ En disen Artikjel woa wie noch mea von Johanes lieren un waut hee äwa Leew schreef. Wie woaren seenen, woo wie onse Breeda un Sestren Leew wiesen kjennen. Un wie woaren uk seenen, opp waut vonne Wajch daut Haupt äwa eene Famielje siene Famielje Leew wiesen kaun.

6. Waut haft Jehova jedonen, om ons Leew to wiesen?

⁶ Veleicht denkj wie, Leew haben bediet leeftolich to räden. Oba woare Leew es uk aun de Woakjen to seenen (see uk Jakobus 2:17, 26). Jehova biejlikj leeft ons (1. Joh. 4:19). Daut wiest hee ons derch de wundascheene Wieed, waut hee haft loten en de Schreft oppschriewen (Psa. 25:10; Reem. 8:38-39). Wie kjennen ons secha sennen, daut Gott ons leeft – nich bloos wäajen daut, waut hee sajcht, oba uk wäajen daut, waut hee deit. Johanes schreef: “Gott wees ons woo goot hee ons wia aus hee sienen eensjen Sän en de Welt schekjen deed, daut wie derch am läwen sellen” (1. Joh. 4:9). Jehova schekjt sienen leewen Sän, daut hee fa ons lieden un  stoawen deed (Joh. 3:16). Wie kjennen ons gaunz secha sennen, daut Jehova ons leeft.

7. Woo wees Jesus ons siene Leew?

⁷ Jesus säd siene Jinja daut, daut hee an leewd (Joh. 13:1; 15:15). Woo sea Jesus ons un uk siene Jinja leewd, wees hee nich bloos derch daut, waut hee säd, oba uk derch daut, waut hee deed. Hee säd: “Kjeena jeft mea rom om dän näakjsten aus dit, daut hee sien Läwen fa siene Frind jeft” (Joh. 15:13). Wan wie doaraun denkjen, waut Jehova un Jesus fa ons jedonen haben, waut sull wie dan doonen?

8. Waut sell wie doonen, soo aus 1. Johanes 3:18 sajcht?

⁸ Wan wie no Jehova un Jesus horchen, dan wies wie, daut wie an leewen (Joh. 14:15; 1. Joh. 5:3). Un Jesus jeef ons daut Jeboot, daut wie ons unjarenaunda leewen sullen (Joh. 13:34-35). Wie sellen onse Breeda un Sestren daut nich bloos sajen, daut wie an leewen, oba an daut derch Woakjen wiesen (läs 1. Johanes 3:18). Oba woo kjenn wie an daut krakjt wiesen?

9. Waut deed Johanes ut Leew?

⁹ Johanes wudd haben kunt tus bliewen un met siene Famielje toop aus Fescha schaufen un Jelt vedeenen. Oba hee wäld sikj daut, daut äwaje von sien langet Läwen doatoo to brucken, aundre de Woarheit äwa Jehova un Jesus to lieren. Daut wia kjeen leichtet Läwen, wäajen hee vefolcht wort. Daut latste Mol wort hee faustjenomen, aus hee aul sea oolt wia (Apj. 3:1; 4:1-3; 5:18; Opb. 1:9). Mau rajcht dan docht Johanes emma aun aundre. Aus hee biejlikj opp de Insel Patmos faust wia, schreef hee de Openboarunk un schekjt daut no de Vesaumlungen, soo daut dee weeten kunnen, “waut em korten passieren must” (Opb. 1:1). Un daut Bibelbuak Johanes, waut sikj von Jesus sien Läwen un Deenst haundelt, schreef hee woomäajlich, aus hee wada friekjeem. Un hee schreef uk dree Breew, om de Breeda Moot to moaken un dee to stoakjen. Woo kjenn wie, krakjt soo aus Johanes, om aundre bedocht sennen?

10. Woo kaun eena wiesen, daut eena Leew fa aundre haft?

¹⁰ Waut wie en ons Läwen doonen, wiest, aus wie Leew fa aundre haben. Dän Soton siene Welt well ons enbillen, daut wie aul onse Krauft un Tiet fa ons brucken sellen, biejlikj daut wie sellen rikj woaren ooda aunjeseenen sennen. Oba Jehova siene Deena oppe gaunze Welt brucken soo väl Tiet, aus dee kjennen, om de goode Norecht to prädjen un aundre to halpen Jehova noda to komen. Eenje von dee kjennen soogoa aul äare Tiet brucken toom prädjen un lieren.

11. Woo wiesen väle, daut see Jehova un uk äare Breeda un Sestren leewen?

¹¹ Väl von onse Breeda un Sestren motten de Wäakj äwa schaufen, daut dee fa sikj un äare Famielje sorjen kjennen. Un doch unjastetten dee Gott siene Organisazion soo goot, aus dee kjennen. Eenje von dee halpen biejlikj doa, wua daut een Owwada jejäft haft. Aundre halpen bie daut Buwoakj met, un aule kjennen Gowen jäwen fa daut Woakj oppe gaunze Welt. Daut doonen dee, wiels dee Leew fa Gott un fa dän Näakjsten haben. Wan wie no de Toopkomes foaren un doa metmoaken, wies wie jieda Wäakj, daut wie onse Breeda un Sestren leewen. Veleicht sent wie meed, oba wie komen doa doawäajen han. Veleicht sent wie uk een bät jerettelt, oba wie jäwen doawäajen Auntwuaten. Un wie  aula haben onse ieejne Sorjen, un doch moak wie aundre ver un no de Toopkomes Moot (Heb. 10:24-25). Sent wie nich sea dankboa fa aul daut, waut onse Breeda un Sestren doonen?

12. Woo wees Johanes noch, daut hee siene Breeda un Sestren leewd?

¹² Johanes wees, daut hee siene Breeda un Sestren leewd, aus hee dee lowd un an uk Rot jeef. En siene Breew biejlikj lowd Johanes de Breeda fa äaren Gloowen un fa daut goode, waut dee deeden. Oba hee jeef dee uk gaunz kloaren Rot, woo dee äwa de Sind denkjen sullen (1. Joh. 1:8–2:1, 13-14). Krakjt soo sell wie onse Breeda un Sestren fa daut goode lowen, waut dee doonen. Oba wan wie enwoaren, daut doa wäa nich mea eene goode Enstalunk haft ooda waut orrajchtet deit, dan sell wie dän leeftolich Rot jäwen un dän doaderch Leew wiesen. Daut brukt Moot, om wäm Rot to jäwen, oba de Schreft sajcht, daut woare Frind sikj unjarenaunda halpen (Spr. 27:17).

13. Waut sell wie nich doonen?

¹³ Eenjemol es onse Leew fa de Breeda un Sestren doaraun to seenen, daut wie waut nich doonen. Biejlikj woa wie nich fuaz doll, wan dee waut sajen. Denkj wie mol aun daut, waut doa een Stoot ver Jesus sienen Doot passieed. Hee säd to siene Jinja, daut see bloos dan daut eewje Läwen kjrieen wudden, wan see sien Fleesch eeten un sien Bloot drinkjen wudden (Joh. 6:53-57). Väl von siene Jinja jleichten daut nich un veleeten am, oba siene woare Frind, soo aus Johanes, bleewen bie Jesus. Dee wundaden sikj secha uk, waut daut bedied, oba dee worden nich fuaz doll un dochten nich, daut Jesus waut orrajchtet säd. Dee veleeten sikj opp am un wisten, daut hee de Woarheit säd (Joh. 6:60, 66-69). Doawäajen es daut uk sea needich, daut wie nich fuaz doll woaren, wan onse Breeda waut sajen. Wie woaren dee väl leewa froagen, woo see daut jemeent haben (Spr. 18:13; Liera 7:9).

14. Wuarom sell wie nich äwa onse Breeda vehaust sennen?

¹⁴ Johanes säd ons uk, daut wie nich sullen äwa onse Breeda ooda Sestren vehaust sennen. Sest wudd de Soton ons kjennen en siene Macht kjrieen (1. Joh. 2:11; 3:15). En de Aposteltiet jlekjt dän daut bie eenje. Don proowd de Soton aules, waut dee kunn, daut Gott siene Deena  sikj nich sullen lieden kjennen un daut et doa Spoolungen jäwen sull. Aus Johanes siene Breew schreef, jeef et en de Vesaumlunk aul Menschen, waut krakjt soo jesonnen wieren aus de Soton. Biejlikj jeef et en eene Vesaumlunk derch Diotrefes väl Oneenichkjeit (3. Joh. 9-10). Hee haud kjeenen Respakjt fa soone, waut de Väastaunt no an jeschekjt haud. Hee wull soogoa deejanje von de Vesaumlunk looswoaren, waut soone oppnämen deeden, waut hee nich lieden kunn. Hee wia een sea stolta Mensch. De Soton schauft noch emma doaropp, daut et mank Gott siene Deena Oneenichkjeit jäwen saul. Well wie daut kjeenmol bat doa komen loten!

15. Waut mott een Haupt von de Famielje em Denkj hoolen?

¹⁵ Daut Haupt von eene Famielje wiest, daut hee siene Famielje leeft, wan hee em tieteljen fa dee sorcht (1. Tim. 5:8). Oba hee mott uk doaraun denkjen, daut et väl wichtja es, daut siene Famielje jenuach em jeisteljen haft (Mat. 5:3, NW). Jesus wia een goodet Biespel doafäa. Daut Bibelbuak Johanes wiest, daut Jesus noch aun siene Famielje docht, aus hee meist batem stoawen wia. Doa rom am stunden siene Mutta Maria un Johanes. Jesus haud groote Weedoag, oba hee sach doano, daut Johanes sikj om Maria kjemmad (Joh. 19:26-27). Jesus haud Breeda un Sestren, un dee wudden secha haben kunt fa daut sorjen, waut Maria em tieteljen fäld. Oba daut späat sikj soo, daut noch kjeena von dee eent von Jesus siene Nofolja wia. Doawäajen wull Jesus sikj secha sennen, daut Maria aules haud, waut dee em tieteljen un uk em jeisteljen fäld.

16. Om waut fa Sachen must Johanes sikj kjemren?

¹⁶ Johanes must sikj om väl Sachen kjemren. Hee wia eent von de Apostel un deed flietich prädjen. Un veleicht wia hee uk befriet un must doano seenen, daut siene Famielje aules haud, waut dee em tieteljen un uk em jeisteljen fäld (1. Kor. 9:5). Waut kaun daut Haupt von de Famielje doavon lieren?

17. Wuarom saul daut Haupt von de Famielje em jeisteljen fa de Famielje sorjen?

¹⁷ Een Brooda, waut Haupt von de Famielje es, mott sikj om väl wichtje Sachen kjemren. Hee mott sikj biejlikj bie  de Oabeit aunstrenjen, daut et een goodet Zeichnis jeft (Efs. 6:5-6; Tit. 2:9-10). Un hee deit veleicht uk veschiednet fa de Vesaumlunk, soo aus sikj om de Breeda kjemren un dee Moot moaken un flietich prädjen. Oba daut es doawäajen wichtich, daut hee pinkjlich met siene Fru un siene Kjinja toop de Schreft studieet. Secha woaren dee am dankboa sennen, daut hee soo väl deit, daut dee kjennen tofräd sennen un daut dee daut haben, waut an em tieteljen uk em jeisteljen fält (Efs. 5:28-29; 6:4).

18. Äwa waut wia Johanes sikj secha?

¹⁸ Johanes wort sea oolt un haud väl beläft. Hee haud veschiedne Schwierichkjeiten, waut am wudden haben kunt em Gloowen schwak moaken. Oba hee deed emma sien bastet Jesus siene Jebooten notokomen, biejlikj siene Breeda un Sestren to leewen. Doawäajen wia Johanes sikj secha, daut Jehova un Jesus am leewden un daut dee am de Krauft jäwen wudden toom met aules foadich woaren (Joh. 14:15-17; 15:10; 1. Joh. 4:16). Nich de Soton un nich dän siene Welt kunnen Johanes doavon aufhoolen, siene Breeda to leewen un dee daut uk to wiesen.

19. Waut sell wie no 1. Johanes 4:7 no doonen, un wuarom?

¹⁹ Soo aus Johanes läw wie en eene Welt, wua de Soton harscht, un dee haft kjeene Leew (1. Joh. 3:1, 10). Dee well haben, daut wie onse Breeda un Sestren nich mea leewen sellen, oba hee kaun ons daut nich bemotten. Well wie ons eenich sennen, onse Breeda un Sestren to leewen un an daut to wiesen derch daut, waut wie sajen un waut wie doonen. Dan kjenn wie Poat sennen von Jehova siene Famielje un opp iernst schaftich sennen (läs 1. Johanes 4:7).