1. En waut vonne schwieeje Loag wia David?

 DAVID must sikj fuatbrinjen, wiels de majchtja Kjennich Saul von Israel am dootmuaken wull. Aus David daut aun Äten fäld, jinkj hee no de Staut Nob. Doa fruach hee bloos no fief Brood (1. Sam. 21:2, 4). Lota vestuaken hee un siene Mana sikj en eene Heel (1. Sam. 22:1). Woo kjeem David en dise Loag?

2. Wuarom brocht Saul sikj en groote Jefoa? (1. Samuel 23:16-17).

² Saul wia sea aufjenstich, wiels David sea bekaunt wia un sea goot em Kjrich wia. Hee wist uk, daut Jehova am aus Kjennich raufsaten wudd, wiels hee ojjehuarsom jewast wia, un daut Jehova en siene Städ David aus Kjennich jewält haud (läs 1. Samuel 23:16-17). Oba wiels Saul noch de Kjennich von Israel wia, haud dee een deel Soldoten un väl Helpa. Doawäajen must David sikj fuatbrinjen toom sien Läwen raden. Docht Saul opp iernst, daut hee doa waut aun doonen kunn, daut Gott David nich toom Kjennich moaken wudd? (Jes. 55:11). Daut sajcht de Schreft nich, oba eent es gaunz kloa: Saul brocht sikj selfst en groote Jefoa, wiels dee, waut jäajen Gott kjamfen, woaren tolatst emma vespälen.

3. Woo wia David jesonnen, wan hee uk Schwierichkjeiten haud?

³ David wia deemootich. Hee haud nich selfst jesajcht, daut hee Kjennich woaren wull; Jehova haud am utjewält (1. Sam. 16:1, 12-13). Met de Tiet wia Saul sea spietich äwa David. Oba David jeef nich Jehova de Schult doafäa un hee  grunzt uk nich doaräwa, daut hee mau weinich Äten haud un sikj en eene Heel vestäakjen must. Daut kaun mau rajcht sennen, daut daut en dise Heel wia, wua David daut wundascheene Leet schreef toom Jehova preisen, wua uk de Wieed von onsen Teemavarsch met en sent. Doa sajcht daut: “Dee, dee Jehova sieekjen, woat daut aun nuscht goodet fälen” (Psa. 34:11).

4. Von waut vonne Froagen woa wie räden, un wuarom es daut wichtich?

⁴ Väl von Jehova siene Deena en de vondoagsche Tiet jeit daut knaup ooda haben nich jenuach to äten. * Soo wia daut biejlikj en de Tiet von de COVID-19-Krankheit. Un daut kaun noch schwanda woaren, je noda de groote Triebsaul kjemt (Mat. 24:21). Doawäajen well wie nu mol von vea Froagen räden: Wuarom säd David, daut am daut “aun nuscht goodet fälen” wudd? Wuarom sell wie lieren tofräd to sennen? Wuarom kjenn wie ons doaropp veloten, daut Jehova fa ons sorjen woat? Un woo kjenn wie ons nu aul fa lota reedmoaken?

5-6. Woo wiest Psalm 23:1-6 ons, waut David meend, aus hee säd, daut Gott siene Deena daut “aun nuscht goodet fälen” wudd?

⁵ Waut meend David doamet, aus hee säd, daut Jehova siene Deena daut “aun nuscht goodet fälen” wudd? Daut see wie, wan wie ons dän 23. Psalm unjastonen, wua David meist deeselwje Wieed brukt (läs Psalm 23:1-6). Aum Aunfank säd David: “De HAR es mien Hoad; mie woat daut aun nuscht fälen.” En de äwaje Varzhen von disen Psalm räd David von Sachen, waut opp iernst wichtich wieren, soo aus aul daut goode, waut Jehova am jäwen wudd, wiels hee sien Hoad wia. Jehova wudd David “opp jerajchte Wäaj” leiden un am en goode un en schlajchte Tieden tru biestonen. David wist, daut sien Läwen opp Jehova siene “jreene Weid” nich onen Trubbels sennen wudd. Eenjemol wudd hee mootloos woaren un soo to sajen “derch  een diestret Tol” gonen un hee wudd uk Jäajna haben. Oba wiels Jehova sien Hoad wia, wudd David “kjeen Ojjlekj” ferchten.

⁶ Nu weet wie, wuarom David daut “aun nuscht goodet fälen” deed. Hee haud aules, waut am fäld, om em Gloowen stoakj to bliewen. Hee brukt nich een deel tietelje Sachen toom schaftich sennen, oba wia tofräd met daut, waut Jehova am jeef. Fa am wia daut daut wichtichste, daut Jehova am säajend un beschizt.

7. Waut vonne Schwierichkjeiten hauden de Christen en Judäa no Lukas 21:20-24 no?

⁷ Von David siene Wieed lia wie, woo wichtich daut es, daut wie rajcht äwa daut tietelje denkjen. Wie kjennen Freid haben aun onse tietelje Sachen, oba dee sellen nich daut ieeschte fa ons sennen. Dise wichtje Lia kunnen de Christen met de Tiet vestonen, waut en de Aposteltiet en Judäa wonden (läs Lukas 21:20-24). Jesus haud je to dee jesajcht, daut de Staut Jerusalem “von Armeeen beloagat” woaren wudd. Un dan sullen see “en de Boaj nenn flichten”. Wan dee daut deeden, wudden dee läwen bliewen, oba dee wudden väl motten trigjloten. Eenje Joaren trigj säd daut em Wachtturm mol: “Dee musten äare Stapen un Hiesa trigjloten un sullen nich mol äare Sachen von en de Hiesa metnämen. Dee veleeten sikj doaropp, daut Jehova an beschitzen un halpen wudd. Am deenen wia an wichtja aus aulet aundre.”

8. Wuarom es daut eene Woarnunk fa ons, waut de Christen beläwden, waut en Judäa wonden?

⁸ Wuarom es daut eene Woarnunk fa ons, waut de Christen beläwden, waut en Judäa wonden? En dänselwjen Wachtturm, wua wie jroz von räden, sajcht daut noch: “Veleicht woaren doa lota Proowen komen, wua wie bewiesen motten, woo faust wie aun de tietelje Sachen sent. Sent ons dee wichtja aus Gott tru to bliewen un jerat to woaren? Wan daut Enj kjemt, woa wie motten met Schwierichkjeiten foadich woaren un Sachen trigjloten. Wie motten doafäa reed sennen, aules to doonen, waut doa needich es, krakjt soo aus de Christen, waut sikj ieeschtemma von Judäa fuatbrinjen musten.” *

9. Wuarom jeft ons daut Moot, waut Paulus de Hebräa toorod?

⁹ Kaust du die väastalen, woo schwoa daut fa dise Christen wia, meist aul äare Sachen trigjtoloten un wada fresch auntofangen? Dee brukten Gloowen un musten sikj doaropp veloten, daut Jehova fa daut sorjen wudd, waut an fäld. Waut holp dee, met daut foadich to woaren? Fief Joa ea de reemische Soldoten Jerusalem beloagaden, jeef de Apostel Paulus de Hebräa eenen gooden Rot: “Siet nich hungrich no Jelt. Siet tofräd met waut jie haben. Gott haft jesajcht: ‘Ekj woa die nich veloten, die nich em Stich loten.’ Soo kjenn wie em vetruen sajen: ‘De Har es dee, dee mie halpt, ekj woa mie nich ferchten. Waut kaun een Mensch mie aundoonen?’” (Heb. 13:5-6). Fa dee, waut Paulus sienen Rot nokjeemen, ea de Reema kjeemen, wia daut secha leichta, met een eefachret Läwen tofräd to sennen, aus see sikj fuatbrinjen musten. Dee kunnen sikj secha sennen, daut Jehova fa daut sorjen wudd, waut an fäld. Paulus siene Wieed wiesen ons, daut wie ons uk opp Jehova veloten kjennen.

10. Waut fa een “Jeheemnis” verod Paulus ons?

¹⁰ Paulus jeef Timotäus sea soonen Rot, un wie kjennen doa uk waut von lieren. Hee schreef: “Wan wie Kjleeda un Äten haben, doamet sell wie tofräd sennen”  (1. Tim. 6:8). Bediet daut dan, daut wie nich Freid haben sellen aun eene scheene Moltiet ooda en een schmocket Hus wonen ooda ons bieaun fresche Kjleeda kjeepen? Nä, daut es nich, waut Paulus meend. Paulus rod ons too, daut wie met dee Sachen tofräd sennen sullen, waut wie haben (Filip. 4:12). Daut wia Paulus sien “Jeheemnis”. Daut wieetvolste, waut wie haben, sent nich onse tietelje Sachen, oba daut wie kjennen Frind met Jehova sennen (Hab. 3:17-18).

11. Waut lia wie von daut, waut Moses to de Israeliten säd, äwa tofräd sennen?

¹¹ Daut, waut wie denkjen, waut ons fält, es veleicht aundasch aus daut, waut Jehova denkjt. See wie mol, waut Moses to de Israeliten säd, nodäm aus dee 40 Joa en de Wiltnis wieren: “Jun Gott [haft] junt jesäajent . . . en jieda Dinkj waut jie en dise Tiet jedonen haben. Hee haft no junt oppjepaust wiel jie derch dise groote Wiltnis jinjen, un es nu dise 40 Joa met junt jewast, un jie haben aules jehaut waut junt fäld” (5. Mo. 2:7). En dise 40 Joa jeef Jehova de Israeliten Mauna to äten. Un hee kjeem doafäa opp, daut äare Kjleeda nich oolt worden, soo daut see noch deeselwje Kjleeda brucken kunnen, waut see hauden, aus see von Ägipten veleeten (5. Mo. 8:3-4). Fa eenje wia daut veleicht nich wunda waut. Oba Moses holp de Israeliten denkjen, daut see aules hauden, waut an fäld. Jehova freit sikj, wan wie daut lieren, tofräd to sennen. Hee well, daut wie soogoa fa de kjliene Sachen dankboa sent,  waut hee ons jeft, un daut wie vestonen, daut daut een Säajen von am es.

12. Waut wiest, daut David sikj opp Jehova veleet un nich opp sikj selfst?

¹² David wist, daut Jehova tru wia un daut dee sea om dee bekjemmat wia, waut am leewden. Aus hee dän 34. Psalm schreef, wia sien Läwen en Jefoa. Oba wiels David Gloowen haud, wist hee, daut “däm HARN sien Enjel” sikj rom am loagad (Psa. 34:8). Veleicht vejlikjt David Jehova sienen Enjel hia met eenen Soldot, waut sikj wua loagat un waut emma oppaust, aus doa nich Jäajna komen. David wia een stoakja Kjrichsmaun un Jehova haud am vesproaken, daut hee Kjennich woaren wudd. Hee vestunt sikj uk fein metem Schleida un metem Schwieet. Oba David veleet sikj nich doaropp, daut hee selfst de Jäajna jewennen kunn (1. Sam. 16:13; 24:13). Hee veleet sikj opp Jehova un doaropp, daut dän sien Enjel dee raden wudd, “dee am ferchten”. Wie velangen nich, daut Jehova ons vondoag dän Dach derch een Wunda beschitzen saul. Oba wie weeten, daut kjeena, waut sikj opp Jehova velat, fa eewich Schoden lieden woat.

13. (a) Wuarom woat Gog von Magog denkjen, daut dee ons leicht jewennen kaun? (b) Wuarom woa wie nich derwen Angst haben? (See daut Bilt oppe väaschte Sied.)

¹³ Boolt woat sikj daut utwiesen, aus wie ons doaropp veloten, daut Jehova ons beschitzen kaun. Wan Gog von Magog, aulsoo Velkja, waut sikj toopstonen, jäajen Gott siene Deena komen woaren, dan woat daut soo loten, daut ons Läwen en Jefoa es. Wie woaren ons motten gaunz secha sennen, daut Jehova ons raden kaun un uk woat. Fa de Velkja woat daut soo loten, daut wie Schop sent, waut sikj nich wäaren kjennen un waut kjeena beschizt (Hes. 38:10-12). Wie woaren nich Kjrichsjereetschoft haben un uk nich utjelieet sennen toom Kjrich fieren. Doawäajen woaren de Velkja jleewen, daut see ons leicht jewennen kjennen. Oba wiels wie Gloowen haben, woa wie weeten, daut doa een deel Enjel reed sennen woaren, om ons to beschitzen. De Velkja weeten daut nich, wiels dee nich Gloowen haben. Dee woaren sikj sea vefieren, wan dee enwoaren, daut de majchtje Enjel ons halpen woaren (Opb. 19:11, 14-15).

14. Woo kjenn wie ons nu aul fa lota reedmoaken?

¹⁴ Woo kjenn wie ons nu aul reedmoaken fa lota? Wie motten daut lieren, rajcht äwa de tietelje Sachen to denkjen, wiels eenen Dach woa wie dee motten trigjloten. Wie motten uk lieren tofräd to sennen un onse jratste Freid doaraun to haben, daut wie kjennen Frind met Jehova sennen. Je bäta wie onsen Gott kjanen lieren, je sechra woa wie ons sennen, daut dee ons beschitzen kaun, wan Gog von Magog jäajen ons kjemt.

15. Wuahäa wist David, daut Jehova am kjeenmol aunschmäaren wudd?

¹⁵ Woo kjenn wie ons noch fa Trubbels reedmoaken? See wie mol, waut David holp. Hee säd: “Finjt eemol selfst ut, woo goot de HAR es. Woo goot es daut fa däm, dee sikj opp am velat!” (Psa. 34:9). Daut wiest, wuarom David wist, daut Jehova am biestonen wudd. Hee haud sikj aul foaken opp Jehova veloten un dee haud am noch kjeenmol aunjeschmäat. Bie junk must David jäajen dän grooten Filista Goliat kjamfen un hee säd to disen stoakjen Kjrichsmaun: “Vondoag noch, woat de HAR mie  die en miene Macht jäwen” (1. Sam. 17:46). Lota schauft David fa dän Kjennich Saul un dee proowd am mieremol doottomoaken. Oba Jehova “wia met David” (1. Sam. 18:12). Wiels David aul foaken erfoaren haud, woo Jehova am holp, wist hee uk, daut hee am met de Trubbels halpen wudd, waut hee nu haud.

16. Woo kjenn wie utfinjen, daut Jehova goot es?

¹⁶ Wan wie ons nu aul doaropp veloten, daut Jehova ons leiden deit, dan woa wie ons lota noch sechra sennen, daut dee ons friemoaken kaun. Wie brucken Gloowen un motten ons opp Jehova veloten, wan wie onsen Wieet froagen, aus wie kjennen von de Oabeit auf haben toom no eenen Kongress wanken ooda aus wie kjennen weinja schaufen toom bie aule Toopkomes sennen un mea Tiet fa dän Deenst haben. Saj wie mol, ons Wieet jeft ons nich de Frieheit un wie velieren de Oabeit. Velot wie ons dan doaropp, daut Jehova ons kjeenmol em Stäakj loten woat un daut hee ons emma daut jäwen woat, waut ons fält? (Heb. 13:5). Väle, waut em Voltietdeenst sent, kjennen doavon vetalen, woo Jehova an jeholpen haft, aus an daut needich fäld. Jehova es emma tru.

17. Waut es de Varsch fa daut Joa 2022, un wuarom es dee paussent?

¹⁷ Wan Jehova met ons es, dan bruck wie ons nich fa daut ferchten, waut noch kjemt. Hee woat ons kjeenmol veloten, wan sien Wellen bie ons daut ieeschte es. Waut kaun ons halpen, ons nu aul fa de Schwierichkjeiten reedtomoaken, waut noch komen, un doaropp to vetruen, daut Jehova ons kjeenmol veloten woat? De Varsch fa daut Joa 2022, waut de Väastaunt utjeläst haft. Dee stett sikj opp Psalm 34:11 un sajcht: “Dee, dee Jehova sieekjen, woat daut aun nuscht goodet fälen”.