1. Waut wurscht du sajen, woo wia Jakobus siene Famielje?

 JAKOBUS, de Brooda von Jesus, wort en eene Famielje oppjetrocken, waut Jehova tru deend. * Siene Elren, Josef un Maria, leewden Jehova sea un deeden äa bastet fa Jehova. Jakobus beläwd noch waut goodet. Sien elra Brooda wudd met de Tiet de vesproakna Messias woaren. Daut wia waut sea besondret, daut Jakobus kunn to dise Famielje jehieren!

2. Waut fa Jrind haud Jakobus, om sienen elren Brooda to bewundren?

² Jakobus haud väl Uasoak, sienen elren Brooda to bewundren (Mat. 13:55). Aus Jesus biejlikj 12 Joa wia, kjand hee de Schreften aul soo goot, daut de Liera en Jerusalem gaunz vewundat wieren doaräwa (Luk. 2:46-47). Jakobus schauft woomäajlich uk met Jesus toop en de Descharie. Wan daut soo wia, dan haft hee am secha sea fein kjanen jelieet. Nathan H. Knorr säd foaken: “Wan eena met wäm toopschauft, lieet eena dänjanjen sea fein kjanen.” * De Schreft sajcht: “Jesus woss opp un neem too aun Weisheit. Un Gott un Menschen hauden Jefaulen aun am” (Luk. 2:52). Secha es Jakobus dit uk oppjefollen. Nu denkj wie veleicht, daut Jakobus wudd haben sult eena von de ieeschte sennen von Jesus siene Jinja. Oba daut wia nich soo.

3. Waut deed Jakobus nich, aus Jesus met sienen Deenst aunfunk?

³ En de Tiet, aus Jesus sienen Deenst hia oppe Ieed derchfieed, wort Jakobus nich een Jinja von am (Joh. 7:3-5). Veleicht wia hee mau rajcht eena von daut Frintschoft,  waut doa dochten, daut Jesus “nich mea gaunz kloa em Kopp” wia (Mar. 3:21). Un daut jeft uk noanich auntovestonen, daut Jakobus bie siene Mutta Maria wia, aus Jesus aum Pol dootjemoakt wort (Joh. 19:25-27).

4. Waut woa wie en disen Artikjel lieren?

⁴ Lota jleewd Jakobus dan aun Jesus un hee wort een gooda Eltesta en de Christenvesaumlunk. En disen Artikjel woa wie äwa tweeatlei räden, waut wie von Jakobus lieren kjennen: 1. Wuarom wie motten deemootich bliewen, un 2. woo wie kjennen goode Liera woaren.

5. Waut deed Jakobus, aus Jesus sikj no sien oppstonen von am seenen leet?

⁵ Wanea funk Jakobus aun, Jesus notofoljen? Nodäm daut Jesus vom Doot oppjestonen wia, “wees hee sikj däm Jakobus, un dan aul de Apostel” (1. Kor. 15:7). No daut wort Jakobus dan een Jinja von Jesus. Hee wia uk bie de Apostel, aus dee en Jerusalem en eene Bowastow no dän heiljen Jeist luaden (Apj. 1:13-14). Lota wia hee mau rajcht eena von dee, waut to jane Tiet em Väastaunt wieren (Apj. 15:6, 13-22; Gal. 2:9). Un een Stootje ver daut Joa 62 leet Jehova am eenen Breef aun de jesaulwde Christen schriewen. Dis Breef es ons vondoag dän Dach noch toom gooden, endoont aus wie de Hopninj haben em Himmel to läwen ooda hia oppe Ieed (Jak. 1:1). No daut no, waut de ieeschtemmascha Jeschichtsschriewa Josefus säd, sach de judischa Huaga Priesta Hananias de Jinjra doano, daut Jakobus dootjemoakt wort. Oba Jakobus bleef Jehova tru, bat sien Läwen hia oppe Ieed to Enj wia.

6. En waut fa Stekjen wia Jakobus aundasch aus de Gloowesleidasch?

⁶ Jakobus wia deemootich. Woo weet wie daut? Wäajen hee gaunz aundasch wia aus väle Gloowesleidasch to siene Tiet. Aus Jakobus dän kloaren Bewies sach, daut Jesus Gott sien Sän wia, wia hee deemootich un neem daut aun. Oba de väaschte Priestasch von Jerusalem deeden daut nich. Dee kunnen biejlikj nich vestrieden, daut Jesus Lazarus vom Doot oppjewakjt haud. Oba enne Städ daut see aunerkjanden, daut Jehova Jesus jeschekjt haud, plonden see Jesus un uk Lazarus doottomoaken (Joh. 11:53; 12:9-11). Lota, aus Jesus dan vom Doot oppjestonen wia, proowden see daut fa de Menschen plietsch to hoolen  (Mat. 28:11-15). De Gloowesleidasch wieren soo stolt, daut see dän Messias nich aunneemen.

7. Wuarom mott wie oppaussen, daut wie nich stolt sent?

⁷ De Lia fa ons: Sie nich stolt, oba lot die von Jehova belieren. Krakjt soo, aus eene Krankheit de Odren von een Hoat hoat moaken kaun, soo daut et nich mea fein pompen kaun, krakjt soo kaun Stolt ons hoat moaken, daut wie ons nich mea no Jehova sienen Rot rechten. De Farisäa wieren soo stolt, daut dee nich aun dän kloaren Bewies jleewden, waut see hauden, daut Jesus Gott sienen Jeist haud un daut hee dän sien Sän wia (Joh. 12:37-40). Daut kjeem dee sea dia tostonen, wiels doaderch veluaren dee äa eewjet Läwen (Mat. 23:13; 23:33, NW). Woo wichtich daut nich es, daut wie ons wieda von Gott sien Wuat un sienen Jeist belieren loten! Wan wie daut doonen, dan woat daut aun onse Perseenlichkjeit, ons denkjen un aun onse Entscheidungen to seenen sennen (Jak. 3:17). Wäajen Jakobus deemootich wia, leet hee sikj von Jehova belieren. Un soo aus wie seenen woaren, holp am daut uk, een gooda Liera to woaren.

8. Waut woat ons halpen een gooda Liera to woaren?

⁸ Jakobus wia nich eene wundre School derchjegonen. De Gloowesleidasch en siene Tiet dochten äwa am secha krakjt soo aus äwa dän Apostel Petrus un Johanes, waut see fa “ojjeschoolde, jeweenelje Menschen” talden (Apj. 4:13). Oba wan wie daut Buak Jakobus läsen, woat ons kloa, daut Jakobus doawäajen een gooda Liera wort. Wie sent veleicht uk nich eene goode School derchjegonen. Oba met de Help von Jehova sienen Jeist un de Belierunk von siene Organisazion kjenn wie uk goode Liera woaren. Well wie nu mol seenen, woo Jakobus aundre lieed un waut wie ons doavon rutnämen kjennen.

9. Waut wurscht du sajen, woo deed Jakobus aundre lieren?

⁹ Jakobus brukt nich schwoare Wieed, oba läd Sachen opp eene eefache Wajch ut. Doawäajen wisten siene Toohiera krakjt,  waut see doonen musten un woo see daut kunnen. See wie biejlikj mol, woo eefach Jakobus daut utläd, daut Christen reed sennen musten met Ojjerajchtichkjeit foadich to woaren, onen sikj vebetren to loten. Hee schreef: “Wie spräakjen dee seelich, dee jeduldich doabie jebläwen sent. Von Hiob siene Jedult hab jie jehieet, un jie haben jeseenen, woo de Har daut nohäa met am muak. De Har es metliedent un erboarmt sikj” (Jak. 5:11). Soo aus wie jeseenen haben, stett Jakobus sikj oppe Schreft. Hee brukt Gott sien Wuat, om siene Toohiera to wiesen, daut Jehova emma deejanje beloont, waut am soo tru sent aus Hiob. Soo läd hee daut met leichte Wieed un opp eene eefach Wajch ut. Hee wull nich, daut de Oppmoakjsomkjeit opp am jinkj, oba opp Jehova.

10. Waut es eene Wajch, woo wie Jakobus nodoonen kjennen, wan wie aundre lieren?

¹⁰ De Lia fa ons: Lia opp eene eefache Wajch un bruck doatoo Gott sien Wuat. Wie wellen nich, daut de Menschen denkjen sellen, woo väl wie weeten, oba woo väl Jehova weet un woo sea hee om an bekjemmat es (Reem. 11:33). Daut kjenn wie, wan wie emma de Schreft brucken, wan wie aundre lieren. Biejlikj well wie nich to onse Bibelstudiums sajen, waut wie en äare Städ doonen wudden, oba wie wellen dee halpen, äwa biblische Biespels notodenkjen, daut dee enwoaren, woo Jehova denkjt un feelt. Daut woat dee bat doa brinjen, daut dee Jehova jefaulen wellen un nich ons.

11. Waut hauden eenje Christen fa Schwakheiten, un waut von Rot jeef Jakobus dee? (Jakobus 5:13-15).

¹¹ Jakobus velangd nich too väl von aundre. Wan wie sienen Breef läsen, kjenn wie seenen, daut hee sikj em kloaren wia, waut fa Schwakheiten siene Gloowesbreeda hauden. Un hee jeef an kloare Aunwiesungen, woo see doamet foadich woaren kunnen. Biejlikj siemden eenje Christen, dän Rot notokomen, waut see kjrieejen (Jak. 1:22). Aundre trocken de Rikje väa (Jak. 2:1-3). Noch aundre pausten nich opp, waut see säden (Jak. 3:8-10). Dise Christen hauden iernste Trubbels, oba Jakobus jeef nich de Hopninj opp bie dee. Hee jeef dee kloaren Rot, oba opp eene leeftolje Wajch. Un deejanje, waut em Gloowen schwak jeworden wieren, rod hee too, de Eltestasch no Help to froagen (läs Jakobus 5:13-15).

12. Woo kjenn wie eene goode Enstalunk haben, wan wie onse Bibelstudiums halpen?

¹² De Lia fa ons: Velang nich too väl von aundre un denkj goot äwa dee. Väle von dee, met dee wie de Bibel studieren, felt daut schwoa, daut notokomen, waut see lieren (Jak. 4:1-4). Veleicht dieet dee daut lang, met schlajchte Jewanheiten opptohieren un goode Ieejenschoften to kjrieen. Wie wellen krakjt soo aus Jakobus dän Moot haben onse Bibelstudiums to sajen, en waut dee sikj vebätren motten. Daut es uk needich, daut wie eene goode Enstalunk haben un doaropp vetruen, daut Jehova deemootje Menschen no sikj trakjt un an de Krauft jäwen woat, äa Läwen to endren (Jak. 4:10).

13. Waut kunn Jakobus vestonen, soo aus Jakobus 3:2 wiest?

¹³ Jakobus docht rajcht äwa sikj selfst. Hee tald sikj selfst nich fa wichtja aus siene Gloowesbreeda, wan hee uk de Brooda aun Jesus wia un besondre Oppgowen haud. Hee nand de aundre Christen “leewe Breeda” (Jak. 1:16, 19; 2:5). Jakobus jeef nich auntovestonen, daut hee volkomen wia. Enne Städ daut tald hee sikj doa selfst met en, aus hee säd: “Wie loten ons aula  veschiednet to schulden komen” (läs Jakobus 3:2).

14. Wuarom mott wie reed sennen, onse Fäla tootostonen?

¹⁴ De Lia fa ons: Denkj doaraun, daut wie aula Fäla moaken. Wie sellen nich denkjen, daut wie opp irjenteene Wajch bäta sent aus deejanje, met wäm wie studieren. Wuarom nich? Wan wie onsen Bibelschiela auntovestonen jäwen, daut wie kjeene Fäla moaken, dan woat dee sikj soo feelen, daut hee Jehova nienich en aules jefaulen kaun. Woo kjenn wie dänjanjen dan halpen to vestonen, daut hee Jehova uk tru deenen kaun? Daut kjenn wie, wan wie selfst toostonen, daut et fa ons uk nich emma leicht wia, ons no biblische Gruntsauzen to rechten, un woo Jehova ons jeholpen haft, dise Schwierichkjeiten to äwakomen.

15. Woo sent de Jlikjnisen, waut Jakobus brukt? (Jakobus 3:2-6, 10-12).

¹⁵ Jakobus brukt Jlikjnisen, waut de Menschen to Hoaten jinjen. Secha holp am de heilja Jeist doabie, oba woomäajlich lieed hee uk een deel von de Jlikjnisen, waut sien elra Brooda Jesus brukt. De Jlikjnisen, waut Jakobus en sienen Breef oppschreef, sent eefach un leicht to vestonen (läs Jakobus 3:2-6, 10-12).

16. Wuarom sell wie goode Jlikjnisen brucken?

¹⁶ De Lia fa ons: Bruck goode Jlikjnisen. Wan du goode Jlikjnisen brukst, dan kjennen diene Toohiera sikj doa een Bilt von moaken, waut du sajchst. Daut halpt dee, daut dee wichtje biblische Lieren em Denkj hoolen kjennen. Jesus vestunt daut sea fein, goode Jlikjnisen to brucken, un sien Brooda Jakobus deed daut uk soo. Well wie nu mol een Jlikjnis unjasieekjen, waut Jakobus brukt, un wuarom daut soo paussent wia.

17. Wuarom es daut Jlikjnis, waut en Jakobus 1:22-25 oppjeschräwen es, soo paussent?

¹⁷ Läs Jakobus 1:22-25. Wuarom es Jakobus sien Jlikjnis met dän Spieejel soo paussent? Hee wull siene Toohiera waut lieren, un daut wia, daut eenem Gott sien Wuat togood kjemt, wan eena daut nich bloos läst, oba daut uk nokjemt, waut eena läst. Jakobus brukt een Jlikjnis, waut fa de Menschen leicht to vestonen wia. Doa rät daut von eenen Mensch, waut em Spieejel kjikjt. Waut wull hee doamet sajen? Daut et wudd onkluak sennen, wan doa wäa em  Spieejel kjikjt un sach, daut hee waut endren must, un oba nuscht deed. Biejlikj soo wudd daut uk onkluak sennen, Gott sien Wuat to läsen un to seenen, wua eena sikj em Läwen endren must, un daut oba nich nokjeem.

18. Waut fa dree Sachen mott wie em Denkj hoolen, wan wie Jlikjnisen brucken?

¹⁸ Wan du een Jlikjnis brukst, dan kaust du Jakobus nodoonen, wan du dreeatlei em Denkj helst: 1. Moak die secha, daut daut Jlikjnis, waut du brukst, bie daut biepaust, waut du sajen west. 2. Bruck een Jlikjnis, waut de Menschen fein vestonen kjennen. 3. Moak kloa, waut de Lia von daut Jlikjnis es. Wan die daut schwoa es, goode Jlikjnisen to finjen, dan kaust du en dän Index der Wachtturm-Publikationen kjikjen bie de Äwaschreft “Veranschaulichungen”. Doa woascht du een deel Jlikjnisen finjen. Denkj doaraun, daut Jlikjnisen soo sent aus een Mikrofoon. Dee moaken daut luda – ooda dietelja – waut du sajen west. Doawäajen acht doaropp, daut du nich too väl Jlikjnisen brukst, oba bloos bie de wichtje Sachen, waut du kloa moaken west. Waut es daut wichtichste, wuarom wie ons em lieren vebätren wellen? Daut es nich, daut de Menschen sellen oppmoakjsom woaren opp ons, oba daut wie soo väl Menschen aus mäajlich halpen kjennen, Poat von Jehova siene schaftje Famielje to woaren.

19. Woo wies wie, daut wie onse Breeda un Sestren leewen?

¹⁹ Wie haben nich kunt met eenen volkomnen elren Brooda toop oppwaussen, soo aus Jakobus. Oba wie kjennen Jehova toop met eene groote Famielje von Breeda un Sestren deenen. Wie wiesen dee onse Leew, wan wie met dee toop sent, von dee lieren un wan wie toop met dee daut Prädicht- un Liawoakj tru unjastetten. Woo woat daut utkomen, wan wie ons Jakobus toom Väabilt nämen, woo hee läwd un jesonnen wia un uk, woo hee lieed? Dan woa wie Jehova ieren un wie woaren opprechtje Menschen halpen, onsen leeftoljen himlischen Voda noda to komen.