1. Woo kjenn wie ons Tiet nämen fa Jehova?

 WIE jleichen daut, met Menschen toop to sennen, dee wie väl räakjnen. Feine Ehepoaren jleichen daut, eenen scheenen Owent toop to haben. Junge Menschen räakjnen daut väl, wan see kjennen met äare goode Frind toop sennen. Un wie aula haben eene scheene Tiet, wan wie met onse Gloowesbreeda toop sent. Un daut scheenste es, wan wie ons kjennen met Gott aufjäwen. Daut kjenn wie, wan wie to am bäden, sien Wuat läsen un äwa sien Väanämen un siene besondre Ieejenschoften nodenkjen. De Tiet, waut wie ons fa Jehova nämen, es waut sea besondret! (Psa. 139:17).

2. Wuarom es daut nich emma leicht, Tiet fa Jehova to haben?

² Wan wie daut uk sea jleichen, ons Tiet fa Jehova to nämen, es daut oba nich emma leicht. Wie haben een drocket Läwen, waut ons daut schwoa moaken kaun, ons Tiet fa daut jeistelje to nämen. Onse Oabeit, onse Famielje un aundre Sachen kjennen ons soo väl Tiet wajchnämen, daut wie ons too drock feelen toom bäden, studieren ooda nodenkjen.

3. Waut kunn ons noch de Tiet wajchnämen?

³ Daut jeft noch waut, waut ons de Tiet wajchnämen kunn. Wan wie nich oppaussen, kjennen ons Sachen, waut nich schlajcht sent, de Tiet nämen, waut wie brucken kunnen, om Jehova noda to komen. Denkj wie biejlikj mol aun dän Tietvedrief. Wie aula jleichen daut, mol waut aundret to doonen. Oba mau rajcht gooda Tietvedrief kunn ons väl  Tiet nämen, soo daut wie goanich mea jenuach Tiet haben fa daut jeistelje. Wie wellen em Denkj hoolen, daut de Tietvedrief nich daut wichtichste es (Spr. 25:27; 1. Tim. 4:8).

4. Waut woa wie en disen Artikjel seenen?

⁴ En disen Artikjel woa wie seenen, wuarom wie doano kjikjen motten, waut daut wichtichste es. Wie woaren uk doaräwa räden, woo wie de Tiet daut baste nutzen kjennen fa Jehova un woo ons daut kaun togood komen.

5. Woo kaun Efeesa 5:15-17 de junge Menschen halpen, sikj daut baste Läwen to wälen?

⁵ Wäl die daut baste Läwen. Junge Menschen sent foaken doarom bekjemmat, waut fa an daut baste Läwen sennen wudd. De Lierasch en de School un aundre von de Famielje, waut Jehova nich deenen, roden dee veleicht too, daut see sikj sellen huach utlieren loten, sikj eene goode Oabeit sieekjen un väl Jelt vedeenen. Daut wudd dee oba sea väl Tiet wajchnämen. Oba de Elren un aundre Frind von de Vesaumlunk roden de junge Menschen veleicht too, äa Läwen fa Jehova sienen Deenst to brucken. Waut kaun eenen jungen Mensch, waut Jehova leeft, halpen sikj fa daut rajchte to entscheiden? Daut wudd sea goot sennen, wan dee Efeesa 5:15-17 läsd un doaräwa nodocht (läs). Wan dee daut dan jeläst haud, wudd dee kjennen doaräwa nodenkjen: “Waut es Jehova sien Wellen? Waut vonne Entscheidunk wudd am schaftich moaken? Woo wudd ekj de Tiet aum basten utnutzen kjennen?” Denkj doaraun, daut wie en “eene schlajchte Tiet” läwen un daut dän Soton siene Welt aulmols boolt vegonen woat. Daut wudd sea weis sennen, wan wie ons fa daut entscheiden wudden, waut Jehova schaftich moakt.

6. Waut wäld Maria sikj, un wuarom wia daut de baste Entscheidunk?

⁶ Sträw no daut rajchte. Wan wie de Tiet daut baste utnutzen wellen, mott wie eenjemol tweschen twee Sachen entscheiden, waut beid nich schlajcht sent. Daut kjenn wie beoobachten, wan wie doaraun denkjen, waut passieed, aus Jesus Maria un Marta besocht. Marta wia sea schaftich, daut Jesus no an kjeem, un see muak eene groote Moltiet reed. Oba Maria sad sikj biesied Jesus dol un horcht dän too, woo hee lieed. Daut wia nich schlajcht, waut Marta deed, oba Jesus säd, daut Maria “sikj daut bätre jewält” haud (Luk. 10:38-42). Secha haft Maria met de Tiet vejäten, waut see don eeten, oba see vegaut secha nienich, waut see von Jesus jelieet haud. Krakjt soo aus Maria daut sea väl räakjend, daut see kunn met Jesus toop sennen, soo jleich wie daut uk sea, daut wie ons Tiet fa Jehova nämen. Woo kjenn wie de Tiet daut baste utnutzen?

7. Wuarom es daut sea wichtich, daut wie bäden, studieren un nodenkjen?

⁷ Wie motten vestonen, daut bäden, studieren un nodenkjen Poat von onsen Deenst fa Jehova es. Wan wie bäden, dan vetal wie met onsen himlischen Voda, waut ons soo sea leeft (Psa. 5:8). Wan wie de Bibel studieren, dan kjrie wie “Gotteserkjantnis”, wiels von am kjemt aule Weisheit (Spr. 2:1-5). Wan wie nodenkjen, dan jäw wie ons met Jehova siene besondre Ieejenschoften auf un met daut besondre, waut hee sikj fa ons un fa de Menschheit väajenomen haft. Dit es de baste Wajch,  woo wie de Tiet utnutzen kjennen. Oba waut kaun ons halpen, daut to doonen?

8. Waut kjenn wie doavon lieren, woo Jesus de Tiet utnuzt, aus hee en de Wiltnis wia?

⁸ Sieekj die eene ruje Städ, wan daut mäajlich es. Räd wie mol äwa daut Biespel von Jesus. Ea hee sienen Deenst hia oppe Ieed aunfunk, wia hee 40 Doag en de Wiltnis (Luk. 4:1-2). Bie dee ruje Städ kunn Jesus to Jehova bäden un doaräwa nodenkjen, waut sien Voda von am haben wull. Soo kunn hee sikj opp de Proowen reedmoaken, waut hee boolt haben wudd. Woo kaun ons sien Biespel togood komen? Wan du Poat von eene groote Famielje best, dan es daut secha nich emma leicht, bennen eenen rujen Plauz to finjen. Dan wurscht du die veleicht kjennen buten eenen Plauz sieekjen. Daut es, waut Julie deit, wan see sikj Tiet nemt, om to Jehova to bäden. See un äa Maun wonen en eene kjliene Woninj en Frankreich, un doa es daut werkjlich schwoa, auleen to sennen, onen daut eena jestieet woat. Julie sajcht: “Ekj go jieda Dach nom Park. Doa kaun ekj auleen sennen, mienen Kopp bie de Sach haben un ruich to Jehova bäden.”

9. Waut deed Jesus, wan hee uk sea drock wia?

⁹ Jesus haud daut sea drock. En sienen Deenst hia oppe Ieed jinjen am een deel Menschen hinjaraun von eene Städ no de aundre un wullen met am toop sennen. Opp eene Sauz saumeld “de gaunze Staut . . . sikj ver de Däa”, om am to seenen. Oba hee neem sikj doawäajen Tiet, om to Jehova to bäden. Ea de Sonn oppjinkj, funk hee “eene eensome Städ”, wua hee sikj Tiet neem, om met sienen Voda to räden (Mar. 1:32-35).

10-11. Waut von gooden Rot jeef Jesus siene Jinja no Matäus 26:40-41 no, oba waut deeden dee?

¹⁰ De latste Nacht ver Jesus sienen Doot, aus sien Deenst hia oppe Ieed meist to Enj wia, socht hee sikj wada eene ruje Städ ut, wua hee nodenkjen un bäden kunn. Daut wia bie dän Goaden Getsemane (Mat. 26:36). Doa jeef Jesus siene Jinja sea paussenden Rot äwa daut Jebäd.

¹¹ See wie mol, woo sikj daut romneem. Aus dee no dän Goaden Getsemane kjeemen, wia daut aul sea lot, veleicht aul medden enne Nacht. Jesus säd to siene Apostel, daut dee sullen waka bliewen, un hee jinkj dan bäden (Mat. 26:37-39). Oba aus hee bäd, schleepen dee en. Aus Jesus sach, daut dee schleepen, säd hee noch eemol iernstlich, daut dee sullen waka bliewen un aunhoolent bäden (läs Matäus 26:40-41). Hee wist, daut dee äwafoddat un sea meed wieren. Doawäajen haud hee Metleet met dee un säd: “Daut Fleesch es schwak.” Dan jinkj hee noch tweemol,  om to bäden, un wan hee dan trigjkjeem, schleepen dee wada, enne Städ daut dee bäden deeden (Mat. 26:42-45).

12. Waut kjenn wie doonen, wan wie too äwafoddat ooda too meed sent toom bäden?

¹² Wäl die de rajchte Tiet. Eenjemol feelst du die veleicht too äwafoddat un too meed toom bäden. Oba weetst waut? Dan best du nich de eensja. Waut kaust du dan doonen? Eenje, waut de Jewanheit hauden, aum Enj vom Dach to Jehova to bäden, haben utjefungen, daut daut fa an bäta es, wan see tiedja em Owent bäden, wan see noch nich soo meed sent. Fa aundre es daut bäta, wan see setten ooda opp Kjneees sent, wan see bäden. Waut es, wan du too besorcht ooda too mootloos best toom bäden? Saj Jehova, woo du die feelst. Du kaust die secha sennen, daut ons leeftolja Voda daut vestonen kaun (Psa. 139:4).

13. Woo wudd ons daut Fon ooda Tablet kjennen auflenkjen, wan wie bäden, studieren ooda bie de Toopkomes sent?

¹³ Lot die nich auflenkjen, wan du studieescht. Bäden es nich de eensje Wajch, woo wie Jehova noda komen kjennen. Wan wie Gott sien Wuat studieren un bie de Toopkomes sent, dan kjenn wie Gott uk noda komen. Kaust du irjentwaut doonen, daut du de Tiet daut baste utnutzen kaust, wan du studieescht ooda bie de Toopkomes best? Du wurscht kjennen doaräwa nodenkjen: “Waut es doa, waut mie auflenkjt, wan ekj bie de Toopkomes sie ooda wan ekj proow to studieren?” Kjemt doa veleicht en dien Fon ooda Tablet eene E-Mail ooda eene korte Norecht nenn ooda font die wäa? Vondoag dän Dach haben millionende Menschen een Fon ooda Tablet. Eenje Forscha sajen, daut wan eena vesieekjt, sienen Kopp bie de Sach to haben un daut Fon oba dicht bie es, kaun eena sikj leicht auflenkjen loten. Un een Jelieeda sajcht: “Eena kaun dan siene Jedanken nich bie de Sach haben. Eena haft sien Vestaunt dan gaunz sestwua.” Ea een Kongress aunfangt, woat ons jeweenlich toojerot, daut wie ons Fon ooda Tablet soo enstalen sellen, daut aundre daut nich stieet. Wudd wie uk dautselwje doonen kjennen, wan wie auleen sent, soo daut wie nich aufjelenkjt woaren, wan wie ons met jeisteljet aufjäwen?

14. Woo woat Jehova die no Filippa 4:6-7 no halpen, daut du kaust bie de Sach bliewen?

 ¹⁴ Bäd Jehova om Help, daut du kaust dienen Kopp bie de Sach haben. Wan du moakjst, daut diene Jedanken aundatwäajen hangonen, wan du studieescht ooda bie een Toopkomen best, dan froag Jehova no Help. Wan du sea besorcht best, dan es daut nich leicht, doavon to vejäten un äwa jeisteljet notodenkjen. Oba daut es sea wichtich, daut du daut deist. Bäd Jehova doarom, daut hee met sienen Fräd dien Hoat un diene Jedanken bewoaren saul (läs Filippa 4:6-7).

15. Woo kjemt ons daut togood, wan wie ons met Jehova aufjäwen?

¹⁵ Wan wie ons Tiet nämen toom met Jehova räden, am toohorchen un äwa am nodenkjen, dan woat ons daut sea togood komen. Wuarom? Ieeschtens woa wie dan bätre Entscheidungen moaken. De Schreft sajcht: “Wäa daut met weise Menschen helt, woat weis” (Spr. 13:20). Soo, wan wie ons met Jehova aufjäwen, von dän aule Weisheit kjemt, dan woa wie uk weisa woaren. Wie woaren dan bäta vestonen kjennen, woo wie am jefaulen kjennen un woo wie soont utem Stich gonen kjennen, waut am weedeit.

16. Woo kjenn wie bätre Liera woaren, wan wie ons met Jehova aufjäwen?

¹⁶ Tweedens woa wie dan bätre Liera woaren. Eent von daut wichtichste es, wan wie met wäm de Bibel studieren, daut wie dän halpen Jehova noda to komen. Je mea wie met onsen himlischen Voda vetalen, je dolla woa wie dän leewen un je bäta woa wie onsen Bibelschiela halpen kjennen, am uk to leewen. Soo wia daut bie Jesus. Hee räd soo goot un soo leeftolich von sienen Voda, daut siene Nofolja goanich aundasch kunnen, aus dän uk to leewen (Joh. 17:25-26).

17. Woo kaun bäden un studieren ons halpen, daut ons Gloowen stoakja woat?

¹⁷ Dreddens woat ons Gloowen dan stoakja. Woo kjemt daut ut, wan wie Gott no Rot, Troost un Help froagen? Jiedatsmol, wan Jehova ons dan halpt, woat ons Gloowen stoakja (1. Joh. 5:15). Waut kaun ons noch halpen, onsen Gloowen to stoakjen? Wan wie fa ons perseenlich studieren, wiels “dee Gloowe kjemt derch heare” (Reem. 10:17, NTR). Oba toom onsen Gloowen stoakjen es doa noch mea needich, aus bloos Sachen to lieren. Waut es daut dan?

18. Jeff een Biespel, wuarom wie nodenkjen sellen.

¹⁸ Wie motten doaräwa nodenkjen, waut wie lieren. Denkj wie mol doaraun, waut de Schriewa von Psalm 77 beläwd. Hee wia  sea besorcht, wiels hee docht, daut Jehova aun am un aun de aundre Israeliten nich mea eenen Jefaulen haud. Hee kunn de Nacht nich mol schlopen, wiels hee soo besorcht doaräwa wia (Varsch 3-9). Waut deed hee dan? Hee säd to Jehova: “Ekj denkj äwa aul diene Woakjen no, un waut du nu deist” (Varsch 13). Secha wist de Psalmenschriewa, waut Jehova en de Vegonenheit fa sien Volkj jedonen haud, oba hee wundad doawäajen noch: “Haft Gott vejäten Jnod to bewiesen, un em Oaja sien Metleet trigjehoolen?” (Varsch 10). De Psalmenschriewa docht doaräwa no, woo Jehova en de Vegonenheit sien Volkj Jnod un Metleet jewäsen haud (Varsch 12). Woo kjeem daut ut? De Psalmenschriewa wia sikj dan gaunz secha, daut Jehova sien Volkj nienich veloten wudd (Varsch 16). Krakjt soo woat ons Gloowen dan stoakja woaren, wan wie doaräwa nodenkjen, waut Jehova aul fa siene Deena jedonen haft un uk fa ons perseenlich.

19. Woo woat ons daut noch togood komen, wan wie ons met Jehova aufjäwen?

¹⁹ Daut vieede un daut wichtichste es: Onse Leew fa Jehova woat emma jrata woaren. Leew es dee Ieejenschoft, waut ons daut dolste halpen woat, Jehova to jehorchen, Sachen opptojäwen, om am to jefaulen, un met aule Schwierichkjeiten foadich to woaren (Mat. 22:37-39; 1. Kor. 13:4, 7; 1. Joh. 5:3). Daut jeft nuscht waut bätret, aus een gooda Frint met Jehova to sennen! (Psa. 63:2-9).

20. Woo woascht du plonen, daut du Tiet hast, die met Jehova auftojäwen?

²⁰ Denkj doaraun, daut bäden, studieren un nodenkjen Poat von onsen Gottesdeenst es. Sieekj die soo aus Jesus eenen rujen Plauz, wua du die met Jehova aufjäwen kaust. Lot die nich von aundre Sachen auflenkjen. Froag Jehova no Help, daut du dienen Kopp kaust bie de Sach haben, wan du bätst, studieescht ooda bie de Toopkomes best. Wan du nu de Tiet daut baste utnuzt, woat Jehova die met daut eewje Läwen en de niee Welt beloonen (Mar. 4:24).