1-3. Waut kaun ons toom roaren brinjen?

 WANEA hast du daut latste Mol jeroat? Eenjemol roa wie fa Freid. Oba jeweenlich roa wie, wiels wie daut met waut sea schwoa haben, biejlikj wan doa wäa stoaft. Lorilei, eene Sesta von de Stäts, schreef: “Aus onse Dochta storf, haud ekj daut eenjemol soo schwoa, daut mie nuscht treesten kunn. Ekj wia soo truarich, daut ekj schia docht, daut mien Hoat wudd stonen bliewen.” *

² Veleicht roa wie uk wäajen waut aundret. Eene Pioniasesta en Jaupaun, waut Hiromi heet, sajcht: “Eenjemol sie ekj sea mootloos, wäajen de Menschen em Deenst nich toohorchen wellen. Dan bäd ekj met Tronen enne Uagen, daut Jehova mie halpt wäm to finjen, waut de Woarheit kjanen lieren well.”

³ Veleicht jeit ons daut eenjemol uk soo aus dise Sestren (1. Pet. 5:9). Wie wellen Jehova “met Freiden” deenen, oba veleicht vejeet wie Tronen, wäajen wie mootloos sent ooda wäajen wie aufjeprooft woaren (Psa. 6:7; 100:2). Waut kjenn wie dan doonen?

4. Waut woa wie en disen Artikjel seenen?

⁴ Wie kjennen väl von Jesus lieren. Hee haud daut eenjemol uk soo schwoa, daut hee road (Luk. 19:41; 22:44; Joh. 11:35; Heb. 5:7). Well wie mol seenen, wanea Jesus road un waut wie doavon lieren kjennen. Wie woaren uk seenen, waut wie doonen kjennen, wan wie Trubbels haben, waut ons toom roaren brinjen.

5. Waut lia wie von Johanes 11:32-36 äwa Jesus?

⁵ Em Winta aune 32 wort Jesus sien gooda Frint Lazarus krank un storf (Joh. 11:3, 14). Dee haud twee Sestren, Maria un Marta, un Jesus jleicht dee aula sea. Maria un Marta wieren sea truarich, wiels äa Brooda jestorwen wia. No Lazarus sienen Doot kjeem Jesus no Betanien, wua Maria un Marta wonden. Aus Marta enwort, daut Jesus dicht bie wia, kjeem see am bosich entjäajen. See wia gaunz truarich un säd: “Har, wan du wieescht hia jewast, wia mien Brooda nich jestorwen” (Joh. 11:21). Un aus Jesus dan sach, daut Maria un de aundre roaden, road hee uk (läs Johanes 11:32-36).

6. Wuarom road Jesus?

⁶ Wuarom road Jesus? Daut Buak Einsichten über die Heilige Schrift sajcht: “Jesus wia daut schwoa un hee road, wiels sien leewa Frint Lazarus jestorwen wia un hee sach, woo truarich dän siene Sestren doaräwa wieren.” * Veleicht docht Jesus doaraun, woo väl Weedoag sien Frint haud, aus dee krank wia, un woo schwoa dee daut haud, aus dee enwort, daut dee boolt stoawen wudd. Secha kjrieech Jesus uk Tronen en de Uagen, aus hee sach, woo sea Maria un Marta daut toosad, daut äa Brooda jestorwen wia. Wan wäa von onse Famielje ooda een gooda Frint jestorwen es, dan feel wie ons secha uk sea truarich. See wie mol dreeatlei, waut wie von dit lieren kjennen.

7. Waut lieren Jesus siene Tronen ons äwa Jehova?

⁷ Jehova weet, woo wie ons feelen. Jesus likjent “en siene Oat un Wies . . . jeneiw” sienen Voda (Heb. 1:3). Jesus siene Tronen wiesen, woo sien Voda sikj feelt, wan doa wäa stoaft (Joh. 14:9). Du kaust die secha sennen, daut Jehova daut enwoat, wan du äwa wäm truascht,  un daut am daut sea äwa die jaumat. Hee well dien jebroaknet Hoat heelen (Psa. 34:19; 147:3).

8. Wuarom kjenn wie ons secha sennen, daut Jesus onse leewe Vestorwne oppwakjen woat?

⁸ Jesus well onse leewe Vestorwne oppwakjen. Ea hee road, säd hee to Marta: “Dien Brooda saul vom Doot oppstonen.” Marta jleewd daut (Joh. 11:23-27). Wiels see Jehova tru deend, wist see secha, daut de Profeeten Elia un Elisa ea aul Menschen vom Doot oppjewakjt hauden (1. Kjen. 17:17-24; 2. Kjen. 4:32-37). Un secha haud see uk jehieet, daut Jesus aul Menschen oppjewakjt haud (Luk. 7:11-15; 8:41-42, 49-56). Wie brucken nich doaraun twiewlen, daut wie onse leewe Vestorwne wada seenen woaren. Daut Jesus road, aus hee siene truaje Frind treest, bewiest, daut hee sikj doano sänt, de Vestorwne opptowakjen!

9. Woo kjenn wie deejanje biestonen, waut truaren, soo aus Jesus daut deed? Jeff een Biespel.

⁹ Wie kjennen deejanje biestonen, waut truaren. Jesus road met Marta un Maria toop un hee horcht dee too un spruak dee uk Moot too. Wie kjennen dautselwje doonen, wan doa wäa truat. Een Eltesta en Australien, waut Dan heet, sajcht: “Nodäm aus miene Fru jestorwen wia, fäld mie Help. Miere Ehepoaren wieren emma reed mie tootohorchen. Ekj kunn dee vetalen, woo truarich ekj wia, un dee wia daut uk nich ommaklich, wan ekj road. Dee wieren uk reed, Sachen fa mie to doonen, biejlikj daut Foatich reintomoaken, entokjeepen un Äten to moaken, wan ekj daut selfst nich kunn. Un dee bäden foaken met mie toop. Daut wieren woare Frind un Breeda, waut ‘jebuaren [wieren] toom em Trubbel biestonen’” (Spr. 17:17).

10. Von waut rät daut en Lukas 19:36-40?

¹⁰ Jesus reisd dän 9. Nissan aune 33 no Jerusalem. Aus hee dicht bie de Staut wia, kjeem doa eene groote Häad Menschen toop, un dee läden äare Kjleeda ver am oppem Wajch toom am aus äaren Kjennich oppnämen. Dee wieren aula sea schaftich (läs Lukas 19:36-40). Doawäajen haben de Jinja sikj secha jewundat, aus dee sagen, waut Jesus nu deed. “Aus hee dicht bie kjeem un de Staut sach, hield hee äwa de Enwona”. Met Tronen en de Uagen räd Jesus von daut schlemme, waut boolt äwa de Menschen von Jerusalem komen wudd (Luk. 19:41-44).

11. Wuarom road Jesus äwa de Menschen von Jerusalem?

¹¹ De Menschen hauden Jesus fein oppjenomen, oba hee wia truarich, wiels hee wist, daut de mieeschte Juden nich no de goode Norecht von daut Kjennichrikj horchen wudden. Doawäajen wudd Jerusalem venicht woaren un aule, waut daut äwaläwden, wudden enne Jefangenschoft gonen (Luk. 21:20-24). Krakjt soo aus Jesus daut säd, kjeem daut uk rom. Waut doonen de mieeschte Menschen von june Jäajent, wan dee de goode Norecht vom Kjennichrikj hieren? Waut kjenn wie von Jesus siene Tronen lieren, wan de mieeschte nich horchen wellen? See wie mol dreeatlei.

12. Waut wiest ons daut von Jehova, daut Jesus wäajen de Menschen road?

¹² Jehova es om de Menschen bekjemmat. Jesus siene Tronen wiesen ons, woo  sea Jehova om de Menschen todoonen es. “Hee well, daut aulemaun sikj oppmoaken saul, un daut kjeena veloaren jeit” (2. Pet. 3:9). Wie kjennen vondoag dän Dach bewiesen, daut wie onse Nobasch leewen, wan wie nich oppjäwen, dee de goode Norecht von daut Kjennichrikj to brinjen (Mat. 22:39). *

13-14. Aun waut wia to seenen, daut Jesus daut äwa de Menschen jaumad, un woo kjenn wie am nodoonen?

¹³ Jesus strenjd sikj em Deenst sea aun. Hee wees de Menschen doaderch Leew, daut hee dee bie jieda Jeläajenheit lieed (Luk. 19:47-48). Wuarom deed hee daut? Wiels am daut äwa dee jaumad. Eenjemol wullen soo väl Menschen Jesus toohorchen, daut hee un de Jinja “nich Jeläajenheit hauden toom äten” (Mar. 3:20). Un aus een Maun de Nacht met am räden wull, wia hee uk wellich reed, daut to doonen (Joh. 3:1-2). De mieeschte, waut Jesus toohorchten, worden lota nich siene Jinja. Oba dee kjrieejen aula een jrinteljet Zeichnis. Vondoag dän Dach well wie uk aulem de Jeläajenheit jäwen, de goode Norecht to hieren (Apj. 10:42, NW). Doawäajen kaun daut eenjemol needich sennen, ons de Menschen auntopaussen, wan wie dee prädjen wellen.

¹⁴ Reed sennen ons auntopaussen. Wan wie emma wudden to deeselwje Tiet prädjen, dan wudd wie woomäajlich nich deejanje finjen, waut no de goode Norecht horchen wellen. Eene Pioniasesta, waut Matilda heet, sajcht: “Ekj un mien Maun proowen to veschiedne Tieden to prädjen. Tiedich zemorjes doo wie bie de Jeschafta prädjen. Medden em Dach bruck wie dän Bieekjakrota, wiels doa mea Menschen oppe Gauss sent. Un lota traft eena de Menschen dan ea tus.” Wie wellen nich bloos to soone Tiet prädjen, wan ons daut fein paust, oba leewa dan, wan wie met de mieeschte Menschen räden kjennen. Wan wie daut doonen, dan  kjenn wie ons secha sennen, daut Jehova met ons tofräd es.

15. Waut wort en de latste Nacht, ea se Jesus dootmuaken, soo aus Lukas 22:39-44 sajcht?

¹⁵ Dän 14. Nissan aune 33 wia Jesus lot zeowes em Goaden Getsemane. Doa schedd hee sikj to Jehova ut (läs Lukas 22:39-44). En dise schwoare Stunden haft Jesus “jebät un . . . jeschräajen met Tronen” (Heb. 5:7). No waut fruach hee sienen Voda en de latste Nacht, ea se am dootmuaken? Hee bäd om Krauft, daut hee Jehova tru bliewen kunn un dän sienen Wellen doonen. Un Jehova horcht no daut opprechtje Jebäd von sienen Sän un schekjt eenen Enjel, om dän to stoakjen.

16. Waut sad Jesus too, aus hee doa em Goaden Getsemane bäd?

¹⁶ Wuarom road Jesus, aus hee doa em Goaden Getsemane bäd? Secha sad am daut too, daut se am beschuljen wudden, daut hee Gott jelastat haud. Hee wist uk, daut hee de groote Veauntwuatunk haud, tru to bliewen un sienen Voda eenen gooden Nomen to moaken. Waut kjenn wie von Jesus siene Tronen lieren, wan wie sea aufjeprooft woaren, aus wie Jehova tru bliewen? See wie mol dreeatlei.

17. Waut kjenn wie doavon lieren, daut Jehova no Jesus siene opprechtje Jebäda horcht?

¹⁷ Jehova horcht no ons, wan wie am iernstlich no waut froagen. Wuarom horcht hee no Jesus siene opprechtje Jebäda? Wiels daut fa Jesus daut ieeschte wia, sienen Voda tru to bliewen un dän eenen gooden Nomen to moaken. Wan daut fa ons uk daut ieeschte es, Jehova tru to bliewen un am eenen gooden Nomen to moaken, dan woat hee ons wellich halpen, wan wie am doano froagen (Psa. 145:18-19).

18. En waut fa Stekjen es Jesus soo aus een metfeelenda Frint?

¹⁸ Jesus weet, woo wie ons feelen. Wan wie daut met waut sea schwoa haben, dan kaun ons daut sea treesten, wan een Frint ons Moot toosprakjt, un besonda,  wan dee aul biejlikj soowaut beläft haft aus wie. Jesus es soo aus soon Frint. Hee weet, woo daut es, wan eena sikj schwak feelt un Help brukt. Hee kjant onse Schwakheiten un sitt doano, daut wie “to de rajchte Tiet” dee Help kjrieen, waut ons fält (Heb. 4:15-16). Jesus leet sikj em Goaden Getsemane von eenen Enjel halpen. Wie sellen uk wellich reed sennen, dee Help auntonämen, waut Jehova ons jeft, endoont aus daut derch onse Bieekja es, een Video, eene Räd ooda doaderch, daut een Eltesta ooda een erfoarna Frint ons Moot toosprakjt.

19. Waut kaun ons halpen, Jehova tru to bliewen, wan wie waut schwoaret derchgonen? Jeff een Biespel.

¹⁹ Jehova woat ons sienen Fräd jäwen. Woo woat Jehova ons stoakjen? Wan wie bäden, woa wie sienen Fräd kjrieen, “dee wiet äwa aules jeit waut Menschen vestonen kjennen” (Filip. 4:6-7). Daut haft eene Sesta utjefungen, waut Luz heet. See sajcht: “Ekj feel mie foaken sea auleen. Un dan denkj ekj eenjemol, daut Jehova mie goanich leeft. Wan ekj mie soo aus dit feel, dan saj ekj Jehova daut fuaz. Bäden halpt mie, daut mie daut wada bäta jeit.” Dit wiest, daut bäden ons halpen kaun, wada ennalich Fräd to haben.

20. Waut hab wie von Jesus siene Tronen jelieet?

²⁰ Waut wie nich aules von Jesus siene Tronen lieren kjennen! Dee halpen ons doaraun to denkjen, daut wie onse Frind biestonen sellen, waut truaren, un daut wie ons doaropp veloten, daut Jehova un Jesus ons halpen woaren, wan doa wäa stoaft, dän wie väl räakjnen. Wie wellen uk Metjefeel haben, wan wie prädjen un lieren, wiels Jehova Gott un Jesus Christus uk metfeelent sent. Daut es uk een groota Troost fa ons, daut Jehova un sien leewa Sän vestonen kjennen, woo ons daut jeit un daut wie Schwakheiten haben, un daut dee ons halpen wellen tru to bliewen. Well wie uk wieda daut nokomen, waut wie jelieet haben, bat Jehova daut wundascheene Vespräakjen erfellen woat, daut hee ons “aule Tronen von de Uagen weschen” woat! (Opb. 21:4).