4. ARTIKJEL FA DAUT STUDIUM
Wuarom wie no daut Owentmol wanken
“Doot dit om aun mie to denkjen” (LUK. 22:19)
LEET 20 Du hast dienen leewen Sän jejäft
WAUT WIE SEENEN WOAREN *
1-2. (a) Wanea denkj wie besonda aun onse Frind ooda Frintschoft, waut aul jestorwen sent? (b) Waut deed Jesus dän Zeowes, ea hee storf?
WIE vejäten nich von ons Frintschoft ooda onse Frind, waut aul jestorwen sent, endoont woo lang trigj daut aul es. Un aun dän Dach, aus dee mol storwen, denkj wie jeweenlich besonda väl aun dee.
2 Jieda Joa sent wie mank de millionende Menschen oppe gaunze Welt, waut aun dän Doot von wäm denkjen, waut wie sea leewen. Daut es Jesus Christus (1. Pet. 1:8). Wie komen toop, om aun dänjanjen to denkjen, waut sien Läwen aus Leesjelt jeef, om ons von de Sind un dän Doot frietomoaken (Mat. 20:28). Jesus wull je, daut siene Nofolja aun sienen Doot denkjen sullen. Dän Zeowes, ea hee storf, fieed hee met siene Nofolja toop daut Owentmol un säd: “Doot dit om aun mie to denkjen” (Luk. 22:19). *
3. Waut woa wie en disen Artikjel seenen?
3 Eene kjliene Grupp von dee, waut bie daut Owentmol sent, hopen fa emma em Himmel to läwen. Oba millionende, waut doa sent, haben de Hopninj oppe Ieed to läwen. En disen Artikjel woa wie seenen, wuarom dee aula jieda Joa bie daut Owentmol sennen wellen. Wie woaren uk seenen, woo ons daut togood kjemt, wan wie doa sent. Oba daut ieeschte woa wie doavon räden, wuarom de Jesaulwde doa hanwanken.
WUAROM DE JESAULWDE DOA SENT
4. Wuarom nämen de Jesaulwde bie daut Owentmol von daut Broot un dän Wien?
4 De Jesaulwde freien sikj jieda Joa, daut see no daut Owentmol wanken kjennen un doa von daut Broot un dän Wien nämen. Wuarom es daut paussent, daut dee von daut Broot un dän Wien nämen? Daut see wie, wan wie ons daut unjastonen, waut aun Jesus sienen latsten Owent hia oppe Ieed wort. No daut Passamol fieed Jesus daut en, waut wie vondoag dän Dach “dän Harn sien Owentmol” nanen. Hee jeef siene 11 true Apostel Broot un Wien un säd, see sullen von daut äten un drinkjen. Hee räd met an uk äwa dän nieen Bunt un äwa dän Bunt fa daut Kjennichrikj (Luk. 22:19-20, 28-30). * Derch dän nieen Bunt un dän Bunt fa daut Kjennichrikj es daut mäajlich, daut dise Apostel un eene kjliene Grupp aundre kjennen Kjennichs un Priestasch em Himmel sennen (Opb. 5:10, NW; 14:1). Bloos de Jesaulwde, waut noch oppe Ieed läwen un waut en dän nieen Bunt un en dän Bunt fa daut Kjennichrikj met en sent, kjennen bie daut Owentmol von daut Broot un dän Wien nämen.
5. Waut weeten de Jesaulwde äwa äare Hopninj?
5 Daut jeft noch eene Uasoak, wuarom de Jesaulwde wellich bie daut Owentmol sent. Doa kjennen dee äwa äare Hopninj nodenkjen. Jehova haft dee eene besondre Hopninj jejäft. Dee kjennen em Himmel läwen un doa onstoaflich un onvewäslich sennen. Doa kjennen dee met Jesus Christus toopschaufen, waut vom Doot oppjestonen es, un met de äwaje von de 144 000. Un daut baste es, daut dee doa bie Jehova Gott sennen kjennen (1. Kor. 15:51-53; 1. Joh. 3:2). De Jesaulwde weeten, daut see aul dit scheene noch mol em Himmel beläwen kjennen. Oba daut see nom Himmel komen kjennen, motten see batem Doot tru bliewen (2. Tim. 4:7-8). Daut jeft dee väl Freid, äwa äare scheene Hopninj notodenkjen (Tit. 2:13, NW). Woo steit daut met de “aundre Schop”? (Joh. 10:16). Wuarom wanken dee no daut Owentmol?
WUAROM DE AUNDRE SCHOP DOA SENT
6. Wuarom wanken de aundre Schop jieda Joa no daut Owentmol?
6 De aundre Schop wanken no daut Owentmol un nämen doa nich von daut Broot un dän Wien. Un doch sent dee schaftich, daut dee doa sennen kjennen. Aune 1938 worden dee, waut de irdische Hopninj hauden, toom ieeschte Mol no daut Owentmol jekroacht. En dän enjlischen Woaktorm vom 1. Moaz 1938 säd daut: “Daut es sea paussent un uk rajcht, daut . . . [de aundre Schop] bie dit Toopkomen bie sent un beoobachten, waut doa jedonen woat. . . . Daut saul fa dee uk eene scheene Tiet sennen un daut es uk.” Krakjt soo aus de Jast schaftich sent, waut no eene Kjast jekroacht sent, soo sent uk de aundre Schop schaftich, daut see bie daut Owentmol met bie sennen kjennen.
7. Wuarom freien de aundre Schop sikj to de Owentmolsräd?
7 De aundre Schop denkjen uk äwa äare Hopninj no. Dee freien sikj to de Owentmolsräd, wiels dee doa väl doavon hieren kjennen, waut Christus un siene 144 000 Metharscha en de dusent Joa fa de true Menschen doonen woaren. De 144 000 woaren dän Kjennich Jesus Christus halpen, de Ieed to een Paradies to moaken un de jehuarsome Menschen volkomen to moaken. Fa de millionende, waut bie daut Owentmol sent, es daut wundascheen, doaräwa notodenkjen, woo de biblische Profezeiungen sikj erfellen woaren, soo aus Jesaja 35:5-6; 65:21-23 un Openboarunk 21:3-4. Wan dee sikj väastalen, woo see met äare Frind un Frintschoft toop en de niee Welt läwen woaren, dan woat dee äare Hopninj noch stoakja un dee sent sikj noch eenja Jehova fa emma to deenen (Mat. 24:13; Gal. 6:9).
8. Waut es noch eene Uasoak, wuarom de aundre Schop no daut Owentmol wanken?
8 Daut jeft noch eene Uasoak, wuarom de aundre Schop no daut Owentmol wanken. Doaderch wellen dee de Jesaulwde wiesen, daut see an leewen un an unjastetten. En Gott sien Wuat wia daut aul verutjesajcht, daut de Jesaulwde un dee met de irdische Hopninj fein toopschaufen wudden. See wie mol een poa Biespels doafäa.
9. Woo denkjen de aundre Schop äwa de Jesaulwde, soo aus de Profezeiunk en Sacharja 8:23 wiest?
9 Läs Sacharja 8:23. Dise Profezeiunk wiest daut sea fein, woo de aundre Schop äwa äare jesaulwde Breeda un Sestren denkjen. Met de Wieed “jieda Jud” un “junt” sent de Jesaulwde jemeent, waut noch oppe Ieed läwen (Reem. 2:28-29). Un de “tieen Menschen von veschiedne Velkja” sent de aundre Schop. Dee henjen sikj soo to sajen aun de Jesaulwde aun, ooda stonen dee tru bie, un doonen Jehova met dee toop rajcht aunbäden. Doawäajen wellen dee uk bie daut Owentmol met bie sennen un doaderch wiesen, woo sea see sikj met äare jesaulwde Breeda vebungen feelen.
10. Waut haft Jehova jedonen, daut de Profezeiunk en Hesekiel 37:15-19, 24-25 sikj erfeld?
10 Läs Hesekiel 37:15-19, 24-25. Dise Profezeiunk erfeld sikj doaderch, daut Jehova de Jesaulwde un de aundre Schop doatoo jebrocht haft fein tooptoschaufen. De Profezeiunk rät von twee Stekja Holt. Dee, waut de himlische Hopninj haben, sent soo aus daut Stekj Holt “fa Juda” (daut wia de Staum von dän de israelitische Kjennichs kjeemen). Un dee, waut de irdische Hopninj haben, sent soo aus daut Stekj Holt “fa . . . Efraim”. * Jehova wudd dise beid Gruppen veeenjen, daut dee “een Stock” woaren wudden. Daut bediet, daut dee am veeent deenen wudden un mau eenen Kjennich haben wudden, Christus Jesus. De Jesaulwde un de aundre Schop sent jieda Joa bie daut Owentmol. Dee hoolen daut nich oppoat aus twee Gruppen, oba soo aus “eene Häad” met eenen Hoad (Joh. 10:16).
11. Woo wiesen “de Schop”, wua Matäus 25:31-36, 40 von rät, daut see Christus siene Breeda unjastetten?
11 Läs Matäus 25:31-36, 40. “De Schop” en dit Jlikjnis stalen de Jerajchte en de Enjtiet väa, waut de irdische Hopninj haben, aulsoo de aundre Schop. Dee unjastetten tru Christus siene jesaulwde Breeda, waut noch oppe Ieed läwen. Woo doonen dee daut? Daut mieeschte doaderch, daut dee an halpen, äare groote Veauntwuatunk notokomen un oppe gaunze Welt to prädjen un Jinja to moaken (Mat. 24:14; 28:19-20).
12-13. Woo kjennen de aundre Schop noch bewiesen, daut see Christus siene Breeda unjastetten?
12 Woo wiesen de aundre Schop noch, daut see Christus siene Breeda unjastetten? Doaderch daut see jieda Joa en de Wäakjen ver daut Owentmol flietich methalpen, de Menschen oppe gaunze Welt entoloden (see dän Kausten “ Waut hast du die fa de Tiet von daut Owentmol väajenomen?”). Dee halpen uk wellich, aules fa daut Owentmol reedtomoaken, wan en äare Vesaumlunk veleicht uk kjeen Jesaulwda es. De aundre Schop jeit daut scheen, Christus siene Breeda opp soone Wajch bietostonen. Dee weeten, daut Jesus daut doafäa aunsitt, daut see am biestonen (Mat. 25:37-40).
13 Waut fa Jrind jeft daut noch, wuarom wie aula bie daut Owentmol sent, endoont aus wie jesaulft sent ooda nich?
WUAROM WIE AULA DOA SENT
14. Woo haben Jehova un Jesus ons groote Leew jewäsen?
14 Wie sent dankboa fa de Leew, waut Jehova un Jesus ons jewäsen haben. Jehova haft väl jedonen, om ons siene Leew to wiesen, oba eent es besonda oppfaulent. De jratsta Bewies fa Gott siene groote Leew wia, daut hee sienen leewen Sän schekjt, om fa ons to lieden un to stoawen (Joh. 3:16). Un wie weeten, daut Jesus ons uk groote Leew wees, wiels hee wellich reed wia fa ons to stoawen (Joh. 15:13). Wie kjennen Jehova un Jesus daut kjeenmol trigjtolen, oba derch daut, waut wie jieda Dach doonen, kjenn wie dee wiesen, woo dankboa wie an sent (Kol. 3:15). Un wan wie no daut Owentmol wanken, dan kjenn wie äwa dee äare groote Leew fa ons nodenkjen un an wiesen, daut wie an uk leewen.
15. Wuarom sent de Jesaulwde un uk de aundre Schop sea dankboa fa daut Leesjelt?
15 Wie räakjnen daut Leesjelt sea väl (Mat. 20:28). De Jesaulwde es daut Leesjelt väl wieet, wiels doaderch kjennen dee eene wundascheene Hopninj haben. Wiels dee aun Christus sien Opfa jleewen, talt Jehova dee fa jerajcht un haft dee aus siene Kjinja aunjenomen (Reem. 5:1; 8:15-17, 23). De aundre Schop sent uk dankboa fa daut Leesjelt. Wiels dee aun Christus sien Opfa jleewen, kaun Gott dee fa rein talen un dee kjennen am deenen un haben de Hopninj, daut see “de groote Vefoljunk”, ooda Triebsaul, äwaläwen kjennen (Opb. 7:13-15). Eent, wua de Jesaulwde un uk de aundre Schop wiesen kjennen, woo dankboa see fa daut Leesjelt sent, es, wan dee jieda Joa bie daut Owentmol sent.
16. Wuarom well wie noch bie daut Owentmol sennen?
16 Daut jeft noch eene Uasoak, wuarom wie bie daut Owentmol sent. Wie wellen Jesus jehorchen. Endoont aus wie hopen em Himmel ooda oppe Ieed to läwen, jieda eena von ons well daut Jeboot nokomen, waut Jesus dän Zeowes jeef, aus hee met daut Owentmol dän Aunfank muak: “Doot dit fa mie tom Aunjedenkj” (1. Kor. 11:23; 11:24, NTR).
WAUT WIE DOA AULA BIE HABEN
17. Woo halpt daut Owentmol ons, Jehova noda to komen?
17 Wie komen Jehova noda (Jak. 4:8). Soo aus wie jeseenen haben, kjenn wie bie daut Owentmol äwa de Hopninj nodenkjen, waut Jehova ons jejäft haft, un äwa de groote Leew, dee hee ons jewäsen haft (Jer. 29:11; 1. Joh. 4:8-10). Wan wie daut doonen, dan woat onse ieejne Leew fa Jehova noch jrata un wie woaren noch jratre Frind met am (Reem. 8:38-39).
18. Waut woa wie doonen wellen, wan wie äwa Jesus sien Biespel nodenkjen?
18 Daut halpt ons, daut wie Jesus nodoonen wellen (1. Pet. 2:21). En de Tiet ver daut Owentmol läs wie en de Schreft von Jesus siene latste Wäakj oppe Ieed un von sienen Doot un von sien oppstonen. Un de Owentmolsräd halpt ons doaraun denkjen, woo väl Leew Jesus fa ons haft (Efs. 5:2; 1. Joh. 3:16). Wan wie läsen, woo väl Jesus fa ons oppjejäft haft, un doaräwa nodenkjen, dan well wie secha “uk soo läwen aus Christus jeläft haft” (1. Joh. 2:6).
19. Woo kjenn wie en Gott siene Leew bliewen?
19 Wie sent ons noch eenja, en Gott siene Leew to bliewen (Jud. 20-21). Wie bliewen en Gott siene Leew, wan wie aules doonen, waut wie kjennen, om am to jehorchen, sienen Nomen to heiljen un am Freid to moaken (Spr. 27:11; Mat. 6:9; 1. Joh. 5:3). Daut Owentmol halpt ons, daut wie ons noch eenja sent, Jehova jieda Dach to bewiesen, daut wie fa emma en siene Leew bliewen wellen!
20. Waut fa goode Uasoak hab wie, om bie daut Owentmol to sennen?
20 Wie haben goode Uasoak, daut wie bie daut Owentmol sent, endoont aus wie hopen fa emma em Himmel ooda oppe Ieed to läwen. Jieda Joa, wan wie aun dän Dach toopkomen, dan denkj wie aun dän Doot von Jesus Christus, dän wie sea leewen. Un daut wichtichste es, daut wie aun de Leew denkjen, dee Jehova ons doaderch wees, daut hee sienen Sän aus een Leesjelt jeef. Daut es de jratsta Bewies fa Leew, waut et jeft. Dit Joa woat daut Owentmol Friedach, dän 15. Aprell 2022, zeowes sennen. Wiels wie Jehova un sienen Sän leewen, woat ons nuscht wichtja sennen, aus dän Dach bie daut Aundenkjen aun Jesus sienen Doot to sennen.
LEET 16 Dankt Gott fa sienen Sän, onsen Kjennich
^ Wie freien ons jieda Joa to daut Owentmol, endoont aus wie hopen em Himmel to läwen ooda en een Paradies oppe Ieed. En disen Artikjel woa wie seenen, wuarom wie no de Schreft no goode Uasoak haben, bie daut Owentmol to sennen, un woo ons daut togood kjemt.
^ En aundre Biblen sajcht daut: “Dit doot to mienem Jedajchnis” (JHF) un “Doot dit mie tom jedenknes” (NTR).
^ En dän Artikjel “Ihr werdet ‘ein Königreich von Priestern’” em Wachtturm vom 15. Oktooba 2014, S. 15-17 jeit noch mea notoläsen äwa dän nieen Bunt un äwa dän Bunt fa daut Kjennichrikj.
^ En daut Buak Die reine Anbetung Jehovas – endlich wiederhergestellt!, S. 130-135, V. 3-17 jeit noch mea notoläsen äwa de Profezeiunk von de twee Stekja Holt ut Hesekiel, Kapitel 37.
