1-2. (a) Woo jeit ons daut, wan wie äwa Jesus sien Läwen un Deenst nodenkjen? (b) Waut woa wie en disen Artikjel seenen?

 WAN wie wäm em Doot veloaren haben, dan bang wie ons bloos sea no disen Mensch. Aum Aunfank feel wie ons veleicht gaunz benomen, wan wie aun dee Doag denkjen, ea dee storf, un besonda, wan dee noch sea haft must lieden. Oba met de Tiet fang wie ons veleicht wada aun bäta to feelen ooda mau rajcht een bät Freid to haben, wan wie aun soone Sachen denkjen, waut dee ons jelieet haft ooda woo dee ons Moot muak ooda woo dee ons veleicht toom lachen jebrocht haft.

² Wan wie doavon läsen, woo Jesus haft must lieden un jestorwen es, dan moakt ons daut uk truarich. Besonda en de Tiet von daut Owentmol näm wie ons de Tiet, doaräwa notodenkjen, woo väl wieet Jesus sien Opfa fa ons es (1. Kor. 11:24-25). Oba ons jeft daut uk eene groote Freid, wan wie aun aul de scheene Sachen denkjen, waut Jesus säd un deed, aus hee oppe Ieed wia. Ons jeft daut uk Moot doaräwa notodenkjen, waut hee nu jroz deit un waut hee noch fa ons doonen woat. Aun dit to denkjen un uk aun de Leew, waut hee fa ons haft, kaun ons bat doa brinjen, onse Dankboakjeit to wiesen, soo aus wie en disen Artikjel seenen woaren.

3. Wuarom kjenn wie dankboa sennen fa daut Leesjelt?

³ Wan wie äwa Jesus sienen Doot nodenkjen, dan sent wie sea dankboa. Aus Jesus oppe Ieed wia, lieed hee de Menschen aul daut goode, waut Gott sien Kjennichrikj doonen wudd. Wie räakjnen daut sea väl, waut de Schreft äwa daut Leesjelt lieet, un aul daut goode, waut doaderch mäajlich es.  Wie sent soo dankboa fa daut Leesjelt, wäajen wie doaderch Frind met Jehova un Jesus woaren kjennen. Dee, waut aun Jesus jleewen, haben uk de Hopninj, noch mol fa emma to läwen un dee äare leewe Vestorwne wada to seenen (Joh. 5:28-29; Reem. 6:23). Aul daut hab wie ons nich met irjentwaut vedeent un wie woaren daut uk kjeenmol trigjtolen kjennen, waut Gott un Christus fa ons jedonen haben (Reem. 5:8, 20-21). Oba wie kjennen daut wiesen, daut wie sea dankboa sent. Woo kjenn wie daut doonen?

4. Woo wees Maria Magdalena, daut see dankboa wia fa daut, waut Jesus fa ar deed? (See daut Bilt.)

⁴ See wie mol daut Biespel von Maria Magdalena, eene judische Fru. Dee wia en eene kjemmaliche Loag; en ar wieren säwen beese Jeista. Secha haft sikj ar daut soo jespäat, daut ar kjeena halpen kunn. Stal die väa, woo dankboa see wia, aus Jesus ar friemuak von dise beese Jeista! Äare Dankboakjeit brocht ar bat doa, Jesus notofoljen un äare Tiet, Krauft un aules, waut see haud, doafäa to brucken, am en sienen Deenst to unjastetten (Luk. 8:1-3). Wan Maria daut uk sea väl räakjend, waut Jesus fa ar deed, haft see daut oba veleicht nich gaunz kunt bejriepen, daut Jesus fa ar lota noch väl jratret doonen wudd. Hee wudd sien Läwen fa de Menschheit jäwen, “daut aul dee, dee aun am jleewen”, kunnen eewjet Läwen kjrieen (Joh. 3:16). Maria wees aul ea, woo dankboa see fa Jesus wia, wäajen see tru wia. Maria stunt doa dicht bie, aus Jesus aum Pol lieden must. See wull fa am doa sennen un wull uk de aundre treesten, waut doa wieren (Joh. 19:25). No Jesus sienen Doot brochten Maria un twee aundre Frues scheenrikjende Eelj no daut Grauf fa sien Bejrafnis (Mar. 16:1-2). Daut Maria soo tru wia, wort sea beloont. See kunn waut beläwen, waut de mieeschte aundre Jinja nich kunnen – see haud de groote Freid, daut see kunn Jesus seenen, aus hee wada oppjestonen wia, un met am räden (Joh. 20:11-18).

5. Woo kjenn wie wiesen, daut wie dankboa sent fa daut, waut Jesus un Jehova fa ons jedonen haben?

 ⁵ Wie kjennen krakjt soo aus Maria onse Dankboakjeit wiesen fa aul daut, waut Jehova un Jesus fa ons jedonen haben. Wie kjennen daut, wan wie onse Tiet, Krauft un Jelt brucken, om daut Kjennichrikj to unjastetten. Wie wudden biejlikj kjennen methalpen biem Jebieda buen ooda unjahoolen, waut fa de woare Aunbädunk jebrukt woaren.

6. Wuarom kjenn wie sajen, daut daut Leesjelt fa ons een Jeschenkj es?

⁶ Wie leewen Jehova un Jesus, wäajen wie weeten, woo sea dee ons leewen (1. Joh. 4:10, 19). Onse Leew woat uk noch jrata, wan wie doaraun denkjen, daut Jesus fa ons perseenlich jestorwen es. De Apostel Paulus wist daut uk un schreef aun de Galata, woo dankboa hee wia, aus hee säd: “Gott sienen Sän, dee mie goot wia un sikj selfst fa mie hanjeef” (Gal. 2:20). Wäajen Jesus fa die storf, kunn Jehova die no sikj trakjen, soo daut du sien Frint sennen kaust (Joh. 6:44). Jeit die daut nich to Hoaten, daut Jehova en die waut goodet sach un soonen dieren Pries jetolt haft, soo daut hee die aus sienen Frint talen kaun? Woat diene Leew fa Jehova un Jesus doaderch nich noch väl jrata? To waut brinjt die dise Leew?

7. Woo kjenn wie aula wiesen, daut wie Jehova un Jesus leewen, soo aus opp daut Bilt to seenen es? (2. Korinta 5:14-15; 6:1-2).

⁷ Onse Leew fa Gott un Jesus brinjt ons bat doa, aundre Leew to wiesen (läs 2. Korinta 5:14-15; 6:1-2). Wie kjennen onse Leew biejlikj wiesen, wan wie flietich methalpen biem prädjen. Wie räden met aule un wiesen kjeenem auf, wäajen dee von eene aundre Rauss ooda von eenen aundren Staum es. Un wie räden uk met jiedrem  eenen, aus dee nu rikj ooda oam sent ooda aus dee utjelieet sent ooda nich eene goode School hauden. Doaderch kjenn wie methalpen, Jehova sien Väanämen to erfellen, “daut aule Menschen sellen jerat woaren un de Woarheit kjanen lieren” (1. Tim. 2:4).

8. Woo kjenn wie onse Leew fa onse Breeda un Sestren wiesen?

⁸ Wie bewiesen uk onse Leew fa Gott un Christus, wan wie onse Breeda un Sestren onse Leew wiesen (1. Joh. 4:21). Wie wellen weeten, woo dee daut jeit, un wan dee schwoaret derchmoaken, sent wie reed, dee to halpen. Wan dee wäm em Doot veloaren haben, dan treest wie dee. Wan dee krank sent, dan besieekj wie dee. Un wan dee mootloos sent, dan doo wie ons bastet, dee wada Moot to moaken (2. Kor. 1:3-7; 1. Tess. 5:11, 14). Wie bäden wieda fa dee, wäajen wie weeten, daut “daut Jebäd von eenem jerajchten … väl utrechten [kaun], wan daut opp iernst es” (Jak. 5:16).

9. Woo kaust du diene Leew fa de Breeda un Sestren noch wiesen?

⁹ Wie wiesen onse Leew to onse Breeda un Sestren uk, wan wie doaropp schaufen, met dee Fräd to hoolen. Wie proowen daut notodoonen, woo Jehova vejeft. Wan Jehova reed wia, sienen Sän fa onse Sinden to jäwen, wudd wie dan nich sellen reed sennen, onse Breeda un Sestren to vejäwen, wan dee jäajen ons sindjen? Secha well wie nich soo sennen aus de beesa Kjnajcht en Jesus sien Jlikjnis. Sien Har vejeef am eene groote Schult, oba hee vejeef sienen Metoabeida nich mol eene kjliene Schult (Mat. 18:23-35). Wan du die met wäm enne Vesaumlunk nich gaunz eenich best, wurscht du daut dan kjennen oppem kloaren brinjen, ea du nom Owentmol wankst? (Mat. 5:23-24). Wan du daut deist, dan wiest du, daut du Jehova un Jesus sea leefst.

10-11. Woo kjennen Eltestasch wiesen, daut dee Jehova un Jesus leewen? (1. Petrus 5:1-2).

¹⁰ Woo kjennen de Eltestasch wiesen, daut see Jehova un Jesus leewen? Eene wichtje Sach es, wan dee sikj om Jesus siene Schop kjemren (läs 1. Petrus 5:1-2). Daut es, waut Jesus dän Apostel Petrus dietlich muak. Nodäm daut Petrus Jesus dree Mol veloagen haud, wull hee Jesus jieren wiesen, daut hee am leewd. No Jesus sien Oppstonen fruach Jesus Petrus: “Best du mie goot?” Petrus wudd secha aules jedonen haben, om siene Leew fa Jesus to bewiesen. Jesus säd to Petrus: “Weid miene Schop” (Joh. 21:15-17). Un Petrus deed daut. Fa sien gaunzet Läwen kjemmad Petrus sikj om sienen Harn siene Schop un bewees doamet, daut hee Jesus sea leewd.

¹¹ Jie Eltestasch, woo kjenn jie en de Wäakjen ver un no daut Owentmol wiesen, daut daut, waut Jesus to Petrus säd, uk fa junt wichtich es? Jie kjennen wiesen, daut jie Jehova un Jesus leewen, wan jie pinkjlich Hoadbesuchs moaken un uk, wan jie soone, waut von Jehova aufjekomen sent, halpen trigjtokomen (Hes. 34:11-12). Daut es uk goot, wan jie junt fa de Bibelschiela intressieren un fa soone, waut toom ieeschte Mol bie daut Owentmol wieren. Wie wellen, daut dee sikj wool feelen en de Vesaumlunk, wäajen wie hopen, daut dee eenen Dach uk woaren Jesus siene Nofolja woaren.

12. Wuarom jeft ons daut Moot, wan wie äwa de Wieed nodenkjen, waut Jesus säd, ea hee storf? (Johanes 16:32-33).

¹² Dän Zeowes ea Jesus storf, säd hee to siene Jinja: “En dise Welt hab jie Angst, oba siet jetroost, ekj hab jäajen dise Welt jewonnen” (läs Johanes 16:32-33). Waut holp Jesus, äwanäment to seenen un siene Fiend  to wadastonen un bat aum Doot tru to bliewen? Hee vetrud opp Jehova. Wäajen hee daut wist, daut siene Nofolja wudden biejlikj soone Proowen derchmoaken aus hee, fruach hee Jehova, dee secha to hoolen (Joh. 17:11). Wuarom jeft ons daut Moot? Wäajen Jehova stoakja es aus irjent Fiend (1. Joh. 4:4). Jehova sitt aules – am jlept nuscht derch. Wie sent gaunz äwazeicht, daut wie onse Angst äwakomen un äwanäment sennen kjennen, wan wie opp Jehova vetruen.

13. Woo wees Josef von Arimatäa, daut hee äwanäment wia?

¹³ See wie mol daut Biespel von Josef von Arimatäa. Hee wia huach aunjeseenen mank de Juden. Hee wia eena von dän Sanhedrin, dän judischen Huagen Rot. Oba aus Jesus prädjen deed, wia Josef nich sea äwanäment. Johanes säd von am: “Josef wia eena von Jesus siene Jinja, oba hee hilt daut stell ut Angst fa de Juden” (Joh. 19:38). Wan Josef daut uk intressieed, von daut Kjennichrikj to hieren, hilt hee daut oba plietsch fa de aundre, daut hee aun Jesus jleewd. Veleicht haud hee Angst, daut hee mank de Juden nich mea wudd soo aunjeseenen sennen. Oba de Schreft sajcht, daut nodäm Jesus storf, “neem Josef von Arimatäa dän Moot, bie Pilatus nenn to gonen un no Jesus sienen Kjarpa to froagen” (Mar. 15:42-43). Nu proowd Josef daut nich mea plietsch to hoolen, daut hee eent von Jesus siene Jinja wia.

14. Waut kaust du doonen, wan du Menschenforcht hast?

¹⁴ Hast du uk eenjemol Menschenforcht, soo aus Josef haud? Veleicht schämt sikj die daut, wan du daut enne School ooda oppe Oabeit sajchst, daut du eent von Jehova siene Zeijen best. Latst du die doavon trigjhoolen, een Vekjindja to woaren ooda die deepen to loten, wiels du Angst hast, waut aundre dan von die denkjen woaren? Wan du weetst, daut du daut rajchte deist, dan lot die von soont nich trigjhoolen. Bäd iernstlich to Jehova un froag am, daut hee die saul dän Moot jäwen, sienen Wellen to doonen. Wan du enwoascht, woo Jehova diene Jebäda beauntwuat, dan woascht du stoakja woaren un kjennen äwanäment sennen (Jes. 41:10, 13).

15. Waut deed de Freid aun de Jinja, aus Jesus sikj von an seenen leet? (Lukas 24:52-53).

¹⁵ Jesus siene Jinja wieren sea truarich, aus hee storf. Wan du doa wurscht jewast sennen, woo wurscht du die dan jefeelt haben? Dee hauden nu nich bloos äaren gooden  Frint veloaren, oba see hauden uk daut Jefeel, daut see äare Hopninj veloaren hauden (Luk. 24:17-21). Oba aus Jesus sikj dan wada von an seenen leet, neem hee sikj de Tiet, an to wiesen, woo hee de biblische Profezeiungen erfellen deed. Hee jeef an uk eene wichtje Oabeit opp (Luk. 24:26-27, 45-48). Aus Jesus dan no 40 Doag nom Himmel fua, wieren de Jinja nich mea truarich, oba dee hauden eene groote Freid. Dee wisten, daut äa Har aum Läwen wia un uk, daut hee reed wia, an met de Oppgow to halpen, waut see jekjräajen hauden. Äare Freid brocht an bat doa, Jehova to preisen un nich doamet opptohieren (läs Lukas 24:52-53; Apj. 5:42).

16. Woo kjenn wie Jesus siene Jinja nodoonen?

¹⁶ Woo kjenn wie Jesus siene Jinja nodoonen? Wie kjennen uk Freid haben, wan wie Jehova aunbäden – nich bloos en de Tiet von daut Owentmol, oba daut gaunze Joa äwa. Oba daut wie daut kjennen, mott daut Kjennichrikj fa ons daut ieeschte komen. Väle haben sikj daut met de Oabeit soo enjerecht, daut dee kjennen prädjen gonen, no de Toopkomes komen un pinkjlich daut Famieljenstudium haben. Eenje haben sikj nich soo väl Sachen aunjegonen; nich mol soont, waut eenje wudden fa needich talen. Daut deeden dee, daut see wudden mea enne Vesaumlunk halpen kjennen ooda doa deenen, wua daut aun mea Help fält. Wan wie nich opphieren wellen, Jehova to deenen, mott wie staunthauft bliewen. Hee vesprakjt ons, daut hee ons dan sea beloonen woat, wan daut Kjennichrikj en ons Läwen daut ieeschte kjemt (Spr. 10:22; Mat. 6:32-33).

17. Waut west du en de Tiet von daut Owentmol dit Joa doonen? (See daut Bilt.)

¹⁷ Wie freien ons aul sea to Dinjsdach, dän 4. Aprell, wan wie daut Owentmol fieren. Oba wacht nich bat dan, äwa Jesus sien Läwen un sienen Doot notodenkjen un uk äwa de Leew, waut hee un Jehova ons jewäsen haben. Proow, jieda Jeläajenheit uttonutzen en de Tiet von daut Owentmol, om doaräwa notodenkjen. Du wurscht die biejlikj kjennen Tiet nämen, om die waut en de List “Jesus siene latste Wäakj oppe Ieed” en daut Heft Help fa daut Bibelstudium Poat 16 notoläsen un uk doaräwa nodenkjen. Wan du daut deist, dan sieekj die soone Varzhen, waut die halpen, noch dankboara to sennen, mea Leew to haben, äwanämenda to woaren un mea Freid to haben. Dan proow doaräwa notodenkjen, woo du de Dankboakjeit noch bäta wiesen kaust. Du kaust die secha sennen, daut Jesus aul daut sea väl räakjent, waut du en de Tiet von daut Owentmol deist, om aun am to denkjen (Opb. 2:19).