1-2. Waut fa schwoaret beläwen Jehowa siene Deena?

 WAN doa waut schlemmet passieet, kaun ons Läwen haustich gaunz endren. Een Brooda, waut Luis a heet, wort biejlikj en, daut hee Kjräft haud. Un de Dokta säd, daut hee bloos noch een poa Moonat läwen wudd. Monika un äa Maun wieren em jeisteljen sea drock. Oba dan wort see eenen Dach en, daut äa Maun, waut een Eltesta wia, aul fa Joaren em plietschen sindjen deed. Olivia, eene onbefriede Sesta, must äa Hus veloten wäajen eenen grooten Uarkaun. Un aus see trigjkjeem, wort see en, daut de Storm äa Hus gaunz tonicht jebrocht haud. Dise dree äa Läwen endad sikj haustich. Kaust du die daut väastalen, woo dee daut mott jegonen haben? Hast du aul mol waut beläft, wua sikj die daut soo späad, daut de Welt gaunz toopjebroaken wia?

² Wan wie uk Jehowa siene true Deena sent, hab wie doawäajen Schwierichkjeiten un woaren uk krank krakjt soo aus aule aundre Menschen. Wie haben veleicht uk Jäajenstaunt ooda Vefoljunk von soone, waut Gott siene Deena nich lieden kjennen. Wan Jehowa ons uk nich fa soone Schwierichkjeiten beschizt, vesprakjt hee ons oba to halpen (Jes. 41:10). Met siene Help kjenn wie onse Freid hoolen un goode Entscheidungen moaken un am uk tru bliewen mau rajcht en de schwanste Loagen. En disen Artikjel woa wie veatlei seenen, woo Jehowa ons en schwoare Tieden halpt. Wie woaren uk seenen, waut wie motten doonen, daut ons siene Help togood kjemt.

 JEHOWA WOAT DIE BEWOAREN

3. Waut es ons veleicht schwoa, wan wie waut schlemmet beläwen?

³ De Trubbel. Wan wie waut schwoaret beläwen, es ons daut veleicht schwoa, kloa to denkjen un Entscheidungen to moaken. Wuarom? Wiels wie dan sea truarich un äwafoddat sent. Ons späat sikj daut veleicht soo, daut wie en eenen Näwel romgonen un nich krakjt weeten, wua wie han sellen. De beid Sestren, wua wie en Varsch eent von räden, sajen, woo dee sikj feelden. Olivia sajcht: “Nodäm de Uarkaun daut Hus gaunz tonicht jebrocht haud, feeld ekj mie veloten un gaunz derchenaunda.” Monika sajcht, woo ar daut jinkj, aus see daut enwort, daut äa Maun ar ontru wia. See sajcht: “Ekj wia nich bloos derchenaunda. Ekj must sea lieden, wäajen mien Hoat gaunz tweijebroaken wia. Ekj haud nich Lost, irjentwaut to doonen. Ekj wudd kjeenmol jedocht haben, daut ekj soont beläwen wudd.” Woo woat Jehowa ons halpen, wan wie ons äwafoddat feelen?

4. Waut vesprakjt Jehowa ons no Filippa 4:6-7 no?

⁴ Waut Jehowa deit. Hee vesprakjt, daut hee ons woat “Gott sien Fräd” jäwen, wua de Bibel von rät (läs Filippa 4:6-7). Dis Fräd es de Ru, waut wie ennalich feelen, un dän hab wie bloos, wiels wie goode Frind met Jehowa sent. De Fräd, “dee wiet äwa aules jeit waut Menschen vestonen kjennen”, es väl scheena, aus waut wie ons väastalen kjennen. Hast du biejlikj mol von gaunzen Hoaten to Jehowa jebät un jewundat, woo ruich du die dan feelsd? Dit Jefeel es “Gott sien Fräd”.

5. Woo bewoat Jehowa sien Fräd ons Hoat un onse Jedanken?

⁵ Dis Bibelvarsch sajcht uk, daut Gott sien Fräd onse Hoaten un Jedanken “bewoaren” deit. Daut Wuat “bewoaren” brukten se ieeschtemma, wan se von Soldoten räden, waut eene Staut beschitzen deeden, daut kjeena dee aunjriepen wudd. De Menschen, waut en soone Staut wonden, feelden sikj secha un wieren ruich, wiels dee wisten, daut doa Soldoten wieren, waut äant beschitzen deeden. Krakjt soo es daut uk bie ons: Wan Gott sien Fräd onse Hoaten un Jedanken bewoaren deit, dan feel wie ons ruich, wiels wie weeten, daut Jehowa ons beschitzen deit (Psa. 4:9). Krakjt soo aus daut bie Hana wia, kjenn wie doawäajen Fräd haben, wan onse Loag uk nich fuaz bäta woat (1. Sam. 1:16-18). Un wan wie ons ruich feelen, es ons daut foaken leichta, kloa to denkjen un goode Entscheidungen to moaken.

6. Waut mott wie doonen, daut Gott sien Fräd ons togood kjemt? (See uk daut Bilt.)

⁶ Waut wie doonen motten. Waut saust du doonen, wan du vetwiewelt best? Bäd soolang,  bat du Gott sienen Fräd späaren kaust (Luk. 11:9; 1. Tes. 5:17). Luis, von dän wie aul ea räden, sajcht, waut am un siene Fru jeholpen haft wiedatomoaken, aus see daut enworden, daut hee bloos noch een poa Moonat läwen wudd. Hee säd: “En soone Loag es daut sea schwoa, Entscheidungen to moaken äwa de Jesuntheit un uk äwa aundre Sachen. Oba wiels wie emma bäden deeden, kunn wie en dise schwoare Loag doawäajen Fräd haben.” Luis siene Fru säd, daut äant daut holp, daut see sea un uk foaken bäden deeden. Dee fruagen Jehowa doano, daut hee äant Fräd jeef un äant holp, ruich to bliewen un daut hee äant Weisheit jeef toom goode Entscheidungen moaken. Un see kunnen siene Help späaren. Wan du nu jroz derch waut schwoaret jeist, dan hool aun met bäden. Dan woascht du daut beläwen, woo Jehowa sien Fräd dien Hoat un diene Jedanken bewoaren woat (Reem. 12:12).

JEHOWA WOAT ONS NICH FAULEN LOTEN

7. Woo feel wie ons veleicht, wan wie derch waut schwoaret gonen?

⁷ De Trubbel. Wan wie en eene sea schwoare Loag sent, dan es daut, waut wie doonen, un onse Jefeelen un Jedanken aules nich mea soo aus jeweenlich. Wie feelen ons met onse Jefeelen dan soo, aus een Schepp oppem Mäa, waut von de Walen han un trigj jeschmäten woat. Ana, von dee wie ea aul räden, säd, daut see een deel veschiedne Jefeelen haud, aus Luis jestorwen wia. See säd: “Eenjemol feeld ekj mie gaunz dol, un dan funk daut aun, daut ekj mie selfst bejaumren deed. Un ekj wort uk doll, daut Luis jestorwen wia.” Eenjemol feeld Ana sikj auleen un mootloos, wan see Entscheidungen moaken sull, wua Luis sikj ea om jekjemmat haud. Un eenjemol feeld see sikj soo, aus wan see en eenen Storm oppem Mäa wia. Woo halpt Jehowa ons, wan soone Jefeelen ons unjakjrieen wellen?

8. Waut vesechat Jehowa ons, soo aus Psalm 62:3 wiest?

⁸ Waut Jehowa deit. Hee vesechat ons, daut hee ons nich woat faulen loten (läs Psalm 62:3). Wan een Schepp en eenen Storm nennkjemt, dan dukt daut veleicht sea von eene Sied no de aundre. Om daut väatobieejen, daut daut nich oppe Sied dreit, haben väl Schäp aune Sied een bät soo waut aus Flichten. De Flichten halpen met, daut daut Schepp nich soo sea opp un dol ducken kaun un de Menschen feelen sikj sechra un de Reis es een bät makelja. Oba bie väl Schäp schaufen dise Flichten daut baste, wan dee foaren. Krakjt soo es daut bie Jehowa: Hee woat ons nich faulen loten, wan wie am wieda tru deenen un nich stellhoolen.

9. Woo kjennen de Sachen toom nosieekjen ons halpen, daut wie nich faulen? (See uk daut Bilt.)

 ⁹ Waut wie doonen motten. Wan du die wäajen diene Jefeelen äwafoddat feelst, dan proow dien bastet, om diene jeistelje Jewanheiten to hoolen. Secha kaust du nu nich mea soo väl doonen aus ea, oba denkjt doaraun, daut Jehowa nich mea velangt, aus waut du jäwen kaust (see uk Lukas 21:1-4). Perseenlich studieren un doaräwa nodenkjen saul Poat sennen von diene jeistelje Jewanheiten. Wuarom? Wiels Jehowa derch siene Organisazion een deel jeisteljet Äten reedmoakt, waut ons halpt, utjejlikjt to bliewen. En de JW Library^®-App un de Help toom nosieekjen fa Jehova siene Zeijen kaun eena een deel finjen, waut eena dan jroz brukt. Monika, von dee wie ea räden, sajcht, daut see soone Sachen aus dit brukt, om sikj waut notosieekjen, wan äare schlajchte Jefeelen aunfangen opptokomen. Biejlikj socht see sikj eemol soon Wuat aus “Wutt” un daut näakjste mol soone Wieed aus “Ontru” ooda “tru sennen”. Un dan läsd see soo lang, bat see sikj bäta feeld. See sajcht: “Wan ekj aunfunk, mie waut notosieekjen, wia ekj noch gaunz mootloos, oba wan ekj wieda läsen deed, dan kjrieech ekj daut Jefeel, daut Jehowa mie ompaken deed. Doaderch daut ekj läsen deed, wort ekj en, daut Jehowa aul miene veschiedne Jefeelen vestonen kunn un mie halpen deed”. Wäajen Jehowa ons opp dise Wajch halpen deit, kjenn wie bowen bliewen, bat de Storm wada nojeloten haft (Psa. 119:143-144).

JEHOWA WOAT DIE UNJASTETTEN

10. Woo feel wie ons veleicht, wan wie waut sea schwoaret beläft haben?

¹⁰ De Trubbel. Wan ons waut schlemmet passieet es, feel wie ons veleicht eenje Doag onen Krauft un met de Jefeelen gaunz rauf. Veleicht feel wie ons soo aus een Sportspäla, waut ea bosich ranen kunn un nu lom jeit. Veleicht es ons daut schwoa, wesse Sachen to doonen, waut ons ea leicht wieren. Ooda wie haben nich mea Lost, waut to doonen, waut ons ea scheen jinkj. Soo aus Elia es ons daut veleicht schwoa opptostonen un wellen bloos wieda schlopen (1. Kjen. 19:5-7). Waut vesprakjt Jehowa fa ons to doonen, wan wie ons dol feelen?

11. Woo halpt Jehowa ons noch? (Psalm 94:18).

¹¹ Waut Jehowa deit. Hee vesprakjt, daut hee ons unjastetten woat (läs Psalm 94:18). Krakjt soo aus eenen lomen Sportspäla Help fält, daut dee opp un dol kjemt, krakjt soo fält ons daut aun Jehowa siene Help, daut wie am wieda deenen kjennen. Wan wie en soone Loag  sent, vesechat Jehowa ons: “Ekj de HAR, sie dien Gott, un ekj hool die bie diene rajchte Haunt. Velot die doaropp wan ekj saj: Enjst die nich, ekj woa die halpen” (Jes. 41:13). De Kjennich David kjrieech dise Help. Aus hee met siene Fiend un met aundre Schwierichkjeiten foadich woaren must, säd hee to Jehowa: “Diene rajchte Haunt unjastett mie” (Psa. 18:35, NW). Oba woo deit Jehowa ons unjastetten?

12. Wäm brukt Jehowa veleicht toom ons halpen, wan wie gaunz dol sent?

¹² Foaken unjastett Jehowa ons doaderch, daut hee aundre bat doa brinjt, ons to halpen. Biejlikj, aus David sikj dol feeld, kjeem sien Frint Jonatan toom am Moot toospräakjen un am biestonen (1. Sam. 23:16-17). Un Jehowa brukt uk Elisa, om Elia to halpen (1. Kjen. 19:16, 21; 2. Kjen. 2:2). Vondoag dän Dach unjastett Jehowa ons veleicht derch onse Famielje, Frind ooda de Eltestasch. Oba wan wie ons gaunz dol feelen, dan doo wie ons veleicht trigjtrakjen un wellen bloos auleen sennen; un daut es gaunz jeweenlich. Waut mott wie doonen, daut Jehowa ons unjastetten kaun?

13. Waut mott wie doonen, daut Jehowa ons unjastetten kaun? (See uk daut Bilt.)

¹³ Waut wie doonen motten. Proow, die nich oppoat to hoolen von aundre. Wan wie ons oppoat hoolen, dan denkj wie jeweenlich bloos aun ons selfst un aun de Trubbels, waut wie haben. Doaderch woa wie veleicht nich de baste Entscheidungen moaken (Spr. 18:1). Secha brukt wie daut aula mol, auleen to sennen, besonda wan wie waut sea schlemmet beläft haben. Oba wan wie ons fa eene lange Tiet oppoat hoolen, dan näm wie veleicht nich de Help aun von aundre, waut Jehowa brukt toom ons unjastetten. Krakjt endoont waut fa schwoaret wie derchmoaken, wie wellen emma de Help aunnämen von onse Famielje, Frind un de Eltestasch. Denkj doaraun, daut Jehowa dee brukt toom die unjastetten (Spr. 17:17; Jes. 32:1-2).

JEHOWA WOAT DIE TREESTEN

14. Woone Sachen wudden ons kjennen Angst moaken?

¹⁴ De Trubbel. Veleicht go wie derch Tieden, wua wie Angst haben. Eenje true Deena von Gott räden enne Bibel von Loagen, wua dee sea lieden musten un sea Angst hauden, wäajen äare Fiend ooda wäajen aundre Schwierichkjeiten (Psa. 18:5; 55:2, 6). Bie ons kunn daut uk soo sennen. Veleicht hab wie Jäajenstaunt enne School, bie de Oabeit, von onse Famielje ooda von de Rejierunk. Veleicht hab wie uk Angst, daut wie wäajen eene Krankheit  woaren stoawen motten. En soone Tieden feel wie ons veleicht soo helploos aus een kjlienet Kjint. Woo deit Jehowa ons en soone Loag halpen?

15. Waut woat Jehowa fa ons doonen no Psalm 94:19 no?

¹⁵ Waut Jehowa deit. Hee treest un beruicht ons (läs Psalm 94:19, NW). Dis Varsch halpt ons aun een kjlienet Mejalkje denkjen, waut Angst haft un nich schlopen kaun wäajen eenen grooten Räajenstorm. Wie kjennen ons daut väastalen, daut äa Voda no ar kjemt, ar ompakt un ar soo lang en siene Oarms helt, bat see enschlapt. Wan doa uk noch Storm es un daut sea räajent, feelt daut Mejalkje sikj oba secha en dän Voda siene Oarms. Wan wie derch waut schwoaret gonen un Angst haben, dan fält ons daut, daut ons himlischa Voda ons soo to sajen en siene Oarms helt, bat wie ons ruja feelen. Waut mott wie doonen, daut Jehowa ons treesten kaun?

16. Waut kjenn wie doonen, daut Jehowa sien Troost ons togood kjemt? (See uk daut Bilt.)

¹⁶ Waut wie doonen motten. Wie sellen ons foaken Tiet nämen fa Jehowa doaderch, daut wie to am bäden un sien Wuat läsen (Psa. 77:2, 13-15). Wan wie dise Jewanheit haben, dan woa wie meist secha daut ieeschte bie onsen himlischen Voda no Help sieekjen, wan wie vetwiewelt sent. Saj Jehowa, waut die Angst un Sorjen moakt. Dan horch no am, doaderch daut du sien Waut läst, un du woascht beläwen, woo hee die treesten deit (Psa. 119:28). Eenje Bibelbieekja kjennen die besonda treesten, wan du Angst hast. Du kaust biejlikj Moot kjrieen derch daut Bibelbuak Hiob, Psalm, Spricha ooda Jesus siene Wieed en Matäus, Kapitel 6. Wan du to Jehowa bätst un sien Wuat läst, dan woascht du Troost kjrieen.

17. Äwa waut kjenn wie ons secha sennen?

¹⁷ Wie kjennen ons secha sennen, daut Jehowa ons emma halpen woat, wan wie schlemmet beläwen. Wie woaren kjeenmol auleen sennen (Psa. 23:4; 94:14). Jehowa vesprakjt, daut hee ons bewoaren woat un daut hee ons nich faulen loten woat un daut hee ons unjastetten un treesten woat. En Jesaja 26:3 sajcht daut von Jehowa: “Wäa dän Gloowen aun die helt, un sikj gaunz opp die velat, däm jefst du Fräd, ennare Fräd.” Vetru aulsoo opp Jehowa un nutz aul daut ut, waut hee brukt toom die halpen. Wan du daut deist, dan woascht du mau rajcht en schwoare Tieden wada Krauft kjrieen.