1. Waut es eene Uasoak, wuarom Jehowa dän Ehestaunt enjerecht haft?

 JEHOWA es de “freidja Gott” un hee well, daut wie uk Freid haben (1. Tim. 1:11). Hee haft ons veschiedne Jeschenkja jejäft, daut wie kjennen Freid aum Läwen haben (Jak. 1:17). Eent von dise Jeschenkja es de Ehestaunt. Wan een Maun un eene Fru sikj befrieen, vespräakjen dee, sikj omzajcht to leewen un to respakjten. Wan dee äare Leew stoakj hoolen, dan kjennen dee werkjlich schaftich sennen (Spr. 5:18).

2. Waut von Ehestaunt haben väle vondoag dän Dach?

² Väl Befriede vondoag dän Dach hoolen sikj nich aun daut, waut see aun äaren Kjastdach vesproaken haben. Doawäajen sent dee nich schaftich. Eene Organisazion, waut fa de Jesuntheit veauntwuatlich es, haft korz rutjefungen, daut väl Ehemana äare Frues schlajcht behaundlen, hunjsch to dee räden ooda dee opp aundre Wäaj toosaten. Eenje von dise Mana behaundlen äare Frues fein ver aundre, oba tus sent see hunjsch to dee. Väle haben uk eenen schwoaren Ehestaunt, wäajen de Mana Pornografie kjikjen.

3. Wuarom behaundlen eenje Ehemana äare Frues schlajcht?

³ Wuarom behaundlen eenje Ehemana äare Frues schlajcht? Veleicht haben dee daut tus von äaren Voda jelieet un doawäajen jleewen dee, daut soon Benämen jeweenlich es. Aundre doonen soont, wiels de Mieeschte en äare Kultua daut doonen. Dee denkjen veleicht, daut wan dee äare Frues schlajcht behaundlen, dan wiesen dee doamet, wäa de Wieet es. Aundre Mana haben daut nich jelieet, sikj to beoabeiden, biejlikj wan dee doll sent. Eenje kjikjen foaken Pornografie un denkjen, daut eene Fru bloos een Dinkj es, wua see sikj met tofräd stalen kjennen. De Forscha haben uk rutjefungen, daut dise Trubbels en de Tiet von de COVID-19-Krankheit bloos noch oaja jeworden sent. Oba nuscht von dit es eene Uträd, soon Benämen to haben.

4. Wuafäa motten christelje Ehemana oppaussen, un wuarom?

⁴ Christelje Ehemana motten oppaussen, daut dee nich soo  äwa de Frues denkjen, aus de Welt deit. a Wuarom nich? Eene Uasoak es, daut eena foaken daut deit, wua eena sikj enne Jedanken met aufjeft. De Apostel Paulus rood de Jesaulwde Christen en Room too: “Lot junt nich mea von dise Welt formen” (Reem. 12:​1-2). Aus Paulus sienen Breef aun de Reema schreef, jeef daut dise Vesaumlunk aul een natet Stoot. Oba Paulus siene Wieed jeewen auntovestonen, daut eenje enne Vesaumlunk sikj doawäajen noch von de Welt äare Jewanheiten un Denkjen metrieten leeten. Doawäajen muntad hee dee opp, äa Denkjen un Benämen to endren. Dis Rot es vondoag dän Dach noch jeltich fa christelje Ehemana. Dauts schod, daut eenje sikj haben von de Welt äa Denkjen metrieten loten un haben soogoa äare Frues schlajcht behaundelt. b Waut velangt Jehowa von de Ehemana, woo dee met äare Ehefrues omgonen sellen? De Auntwuat finj wie en dän Teemavarsch von disen Artikjel.

5. Woo sellen Ehemana no 1. Petrus 3:7 no äare Frues behaundlen?

⁵ Läs 1. Petrus 3:​7, NW. Jehowa velangt von de Ehemana, daut see äare Frues ieren. Waut es met ieren jemeent? Doa es de Oat un Wies met jemeent, woo wie soonen behaundlen, dän wie respakjten. Een Ehemaun, waut siene Fru ieren well, behaundelt dee natjes un leeftolich. En disen Artikjel woa wie doavon räden, woo krakjt een Ehemaun siene Fru ieren kaun. Oba ieescht woa wie von soon Benämen räden, wuaderch eene Ehefru kaun veacht woaren.

DOO NUSCHT, WUAMET DU DIENE FRU VEACHTEN KAUST

6. Woo denkjt Jehowa äwa soonen Maun, waut siene Fru kjarpalich waut aundeit? (Kolossa 3:19).

⁶ Nich dee kjarpalich waut aundoonen. Jehowa haust jiedrem eenen, waut grausom es (Psa. 11:​5, NW). Un besonda schlajcht jleicht hee daut, wan een Ehemaun siene Fru hunjsch behaundelt (Mal. 2:16; läs Kolossa 3:​19, Footnoot). Soo aus ons Teemavarsch von 1. Petrus 3:7 wiest, woat een Ehemaun sien Veheltnis met Gott schoden, wan dee siene Fru nich fein behaundelt. Jehowa woat dan veleicht nich mea no dän siene Jebäda horchen.

7. Waut vonne Räd sull een Ehemaun no Efeesa 4:​31-32 no nich haben? (See uk “Wieed utjelajcht”.)

⁷ Nich dee met Wieed waut aundoonen. Eenje Mana räden kort to äare Frues un sajen waut, waut sea weedeit. Oba Jehowa haust “Oaja, Wutt, utbrellen un hunjsche Räd” (läs Efeesa 4:​31-32). c Jehowa hieet aules, un am es daut nich endoont, woo een Ehemaun to siene Fru rät, uk wan dee tus sent. Een Ehemaun, waut hunjsch rät to siene Fru, schot nich bloos sienen Ehestaunt, oba uk sien Veheltnis met Gott (Jak. 1:26).

8. Woo denkjt Jehowa äwa Pornografie, un wuarom?

⁸ Nich Pornografie kjikjen. Woo denkjt Jehowa äwa Pornografie? Hee haust daut. Een Ehemaun, waut schwiensche Bilda kjikjt, schot sien Veheltnis met Jehowa un veacht siene Fru. d Jehowa velangt von eenen  Maun, daut dee siene Fru nich bloos tru es en daut, waut hee deit, oba uk en siene Jedanken. Jesus säd, daut een Maun, waut no eene aundre Fru kjikjt, soo daut hee een Velangen no dee kjricht, haft “en siene Jedanken” aul de Ehe jebroaken (Mat. 5:​28-29). e

9. Wuarom haust Jehowa daut, wan een Ehemaun siene Fru derchem Sex moakt wieetloos feelen?

⁹ Nich ar derchem Sex moaken wieetloos feelen. Eenje Ehemana saten äare Frues unja Druck un velangen von dee, daut see biem Sex haben soont doonen motten, wuaderch see sikj wieetloos, orrein un respakjtloos behaundelt feelen. Een Maun, waut soont deit, denkjt bloos aun sikj selfst un jeft om siene Fru nuscht rom, un Jehowa haust daut. Hee velangt von eenen Ehemaun, daut dee siene Fru leeft un opp äare Jefeelen acht (Efs. 5:​28-29). Oba waut, wan een christelja Ehemaun siene Fru aul opp dise Wajch mesbrukt ooda ar opp irjenteene aundre Wajch schlajcht behaundelt ooda Pornografie kjikjt? Woo kaun dee daut dan endren, woo dee denkjt un waut dee deit?

WOO KAUN EEN EHEMAUN OPPHIEREN MET SOON SCHLAJCHTET BENÄMEN?

10. Waut kjennen Ehemana von Jesus sien Biespel lieren?

¹⁰ Wan een Ehemaun siene Fru mesbrukt ooda dee opp irjenteene Wajch schlajcht behaundelt, waut kaun dän halpen, doavon loostokomen? Hee saul sikj aunstrenjen, Jesus notodoonen. Wan Jesus uk kjeenmol befriet wia, es hee oba een goodet Biespel fa de Ehemana, woo dee äare Frues behaundlen sellen (Efs. 5:25). See wie biejlikj mol, waut Ehemana doavon lieren kjennen, woo Jesus siene Jinja behaundeld un woo hee to dee räd.

11. Woo jinkj Jesus met siene Jinja om?

¹¹ Jesus behaundeld siene Jinja leeftolich un met Respakjt. Hee wia kjeenmol hunjsch to dee un säd dee uk nich aules väa. Wan hee uk dee äa Har un Liera wia, brukt Jesus siene Macht nich doatoo, daut dee sikj sullen kjlien feelen ooda Angst haben. Enne Städ daut wia hee deemootich un deend äant (Joh. 13:​12-17). Hee säd to siene Jinja: “Lieet von mie, wiels ekj sie leeftolich un von Hoaten deemootich, un ekj woa junt daut leichta moaken” (Mat. 11:​28-30). Daut sajcht, daut Jesus leeftolich wia, ooda eene ruje Enstalunk haud. Een Mensch, waut ruich enjestalt es, es nich schwak, oba stoakj, wiels hee sikj selfst kontrollen kaun. Wan am wäa prooft doll to moaken, blift hee ruich un kaun sikj gaunz beoabeiden.

12. Woo brukt Jesus siene Wieed?

¹² Jesus brukt siene Wieed, om aundre to treesten un Moot tootospräakjen. Hee räd nich hunjsch to siene Nofolja (Luk. 8:​47-48). Mau rajcht wan siene Jäajna am domm säden un am proowden, doll to moaken, säd hee dee nich domm trigj (1. Pet. 2:​21-23). Eenjemol bleef Jesus bloos stell, enne Städ waut hunjsch trigjtosajen (Mat. 27:​12-14). Es daut nich een goodet Väabilt fa christelje Ehemana?

13. Woo kaun een Maun met siene Fru veeent bliewen? (Matäus 19:​4-6). (See uk daut Bilt.)

¹³ Jesus säd, daut een Ehemaun saul siene Fru tru sennen. Hee säd dautselwje aus sien Voda: Daut een Ehemaun un siene Fru sullen “veeent sennen” (läs Matäus 19:​4-6). Daut griechische Wuat, waut hia met “veeent sennen” äwasat woat, meent en Werkjlichkjeit toopjebakt. Een Ehemaun un siene Fru sellen unjarenaunda soone stoakje Leew haben, aus wudden dee toopjebakt  sennen. Wan eena waut deit, waut de Ehe schot, dan woat nich bloos eena doarunja lieden, oba beid. Een Ehemaun, waut opp dise Wajch met siene Fru veeent es, woat aule Sorten Pornografie aufwiesen. Hee woat fuaz wajchkjikjen “von nuzloose Dinja” (Psa. 119:37). Hee woat sikj daut met siene Uagen beräden, no kjeene aundre Fru to kjikjen, soo daut hee een Velangen no dee kjricht, buta no siene Fru (Hiob 31:1).

14. Waut fa Sachen saul een Ehemaun doonen, waut siene Fru schlajcht behaundelt, daut hee wada met ar un Jehowa Frind woaren kaun?

¹⁴ Een Ehemaun, waut siene Fru kjarpalich un met daut, waut hee sajcht, Schoden aundeit, mott eenje Sachen doonen, om wada een goodet Veheltnis met Jehowa un siene Fru to haben. Waut mott hee doonen? Ieeschtens: Hee mott enseenen, daut hee eenen Trubbel haft un daut hee nuscht fa Jehowa vestäakjen kaun (Psa. 44:22; Liera 12:14; Heb. 4:13). Tweedens: Hee mott opphieren, siene Fru schlajcht to behaundlen, un sien Vehoolen endren (Spr. 28:13). Dreddens: Hee mott ver siene Fru un Jehowa toostonen, daut hee äant toojesat haft, un äant opprechtich om Vejäwunk froagen (Apj. 3:19). Hee mott uk Jehowa doarom prachren, daut hee dän Wunsch kjricht, sikj to endren, un daut dee am halpt, daut to kontrollen, woo hee denkjt, rät un haundelt (Psa. 51:​12-14; 2. Kor. 10:5; Filip. 2:13). Vieedens: Hee mott nich bloos om Help bäden, oba sikj uk aunstrenjen, aules to haussen, waut aundre toosat, un uk hunjsche Räd (Psa. 97:​10, NW). Feftens:  Hee mott fuaz de Eltestasch enne Vesaumlunk no Help froagen (Jak. 5:​14-16). Sastens: Hee mott sikj eenen Plon moaken, waut am halpt, soone schlajchte Sachen nich wada to doonen. Een Ehemaun, waut sikj Pornografie aunkjikjt, saul uk dise sas Sachen doonen. Jehowa woat daut säajnen, daut hee sikj aunstrenjt, sien Vehoolen to endren (Psa. 37:5). Oba een Ehemaun saul nich bloos opphieren met soon schlajchtet Benämen; hee mott uk lieren, woo hee siene Fru ieren kaun. Woo kaun hee daut doonen?

 WOO DU DIENE FRU IEREN KAUST

15. Woo kaun een Ehemaun siene Fru wiesen, daut hee ar väl räakjent?

¹⁵ Wies ar diene Leew. Eenje Breeda, waut eenen gooden Ehestaunt haben, haben de Jewanheit, jieda Dach waut to doonen toom äare Frues äare Leew wiesen (1. Joh. 3:18). Een Ehemaun kaun siene Fru opp eefache Wäaj wiesen, daut hee ar väl räakjent. Biejlikj kaun hee ar aune Haunt foten ooda ar omfoten. Hee kaun ar uk äwa Fon froagen: “Woo es dien Dach?” ooda ar sajen: “Mie fält daut aun die.” Hee kaun ar uk doaderch siene Leew wiesen, daut hee ar emma wada mol Bloomen ooda een Jeschenkj jeft. Wan een Ehemaun soont deit, dan ieet hee siene Fru un dee haben eenen bätren Ehestaunt.

16. Wuarom saul een Ehemaun siene Fru lowen?

¹⁶ Saj ar, daut see fa die wieetvoll es. Een Ehemaun, waut siene Fru ieet, loft ar un moakt ar Moot. Hee deit daut biejlikj doaderch, daut hee ar siene Dankboakjeit wiest, wäajen see am opp veschiedne Wäaj unjastett (Kol. 3:15). De Fru jeit daut sea to Hoaten, wan äa Maun ar opprechtich loft. Dee feelt sikj secha, jeleeft un jeieet (Spr. 31:28).

17. Woo kaun een Ehemaun siene Fru Respakjt wiesen?

¹⁷ Sie leeftolich un respakjtvoll. Een Ehemaun, waut siene Fru leeft, wiest ar, daut hee ar schazt. Hee sitt ar aus een feinet Jeschenkj von Jehowa (Spr. 18:22; 31:10). Doawäajen jeit hee leeftolich un respakjtvoll met ar om, biejlikj wan dee Sex haben. Wan dee Sex haben, dan woat de Maun ar daut nich bemotten, irjentwaut to doonen, wuaderch see sikj ommaklich ooda wieetloos feelt ooda een schlajchtet Jewessen kjricht. f Un hee sitt doano, daut hee selfst een reinet Jewessen ver Jehowa haben kaun (Apj. 24:16).

18. Waut sellen de Ehemana sikj eenich sennen to doonen? (See uk daut Hock “ Veatlei, wuaderch een Ehemaun siene Fru Respakjt wiesen kaun”.)

¹⁸ Ehemana, siet junt secha, daut Jehowa aules sitt un väl räakjent, waut jie doonen, om june Frues derch daut to ieren, waut jie sajen un doonen. Sie die eenich, diene Fru doaderch to ieren, daut du nuscht deist, waut ar toosaten kaun, oba leeftolich un respakjtvoll met ar omjeist. Wan du daut deist, dan wiest du, daut du ar leefst un schazt. Wan du diene Fru ieren deist, dan woascht du nich bloos met ar Frind sennen, oba daut Wichtichste es, du woascht met Jehowa Frind bliewen (Psa. 25:​14, NW).