1. Om waut sent väle bie dise Tiet todoonen?

 HAST du daut aul jeseenen, daut väle bie dise Tiet bloos om sikj selfst todoonen sent? Biejlikj jleichen eenje em Internet met sikj selfst to puchen ooda met daut, waut dee doonen. Oba mau weinich vondoag dän Dach jäwen Jehowa Gott de Harlichkjeit, ooda de Iea. En disen Artikjel woa wie doavon räden, waut daut meent, Jehowa de Harlichkjeit to jäwen un waut ons bat doa brinjen saul, daut to doonen. Wie woaren uk lieren, woo wie Gott de Iea jäwen kjennen, waut hee vedeent, un woo hee sienen Nomen boolt selfst heiljen woat.

WAUT MEENT DAUT, JEHOWA HARLICHKJEIT TO JÄWEN?

2. Woo wees Jehowa siene Harlichkjeit biem Sinai-Boajch? (See uk daut Bilt oppe.)

² Waut es Harlichkjeit? Dit Wuat woat en de Bibel fa irjentwaut jebrukt, waut ons bat doa brinjt, wäm to bewundren. Een Stoot nodäm daut de Israeliten von de Sklowarie en Ägipten wieren friejekomen, wees Jehowa äant opp eene majchtje Wajch siene Harlichkjeit. Stalt junt dit mol väa: Doa sent millionende Israeliten unjen biem Sinai-Boajch toopjekomen toom hieren, waut Gott äant to sajen haft. Dan bedakjt eene dunkle Wolkj dän Boajch un aulawäajen rieekjat daut sea. Met eemol haustich jeft daut doa een grootet Ieedbäben. Daut rummelt un blizt un doa woat jewaultich lud met eene Posaun jeblost (2. Mo. 19:​16-18; 24:17; Psa. 68:9). De Israeliten motten secha sea vewundat jewast sennen, aus Jehowa äant opp dise majchtje Wajch siene Harlichkjeit wees.

3. Woo kjenn wie Jehowa Harlichkjeit jäwen?

 ³ Oba woo es daut met ons Menschen? Kjenn wie Jehowa werkjlich Harlichkjeit jäwen? Jo. Wie kjennen daut biejlikj doaderch doonen, daut wie aundre von siene groote Krauft un feine Ieejenschoften vetalen. Ooda uk doaderch, daut wie am de Iea jäwen fa aules, waut wie met siene Help volbrinjen (Jes. 26:12). De Kjennich David es een goodet Biespel doarenn, Jehowa Harlichkjeit to jäwen. Eemol, aus hee ver daut gaunze Volkj Israel bäd, säd hee to Gott: “Die HAR, jehieet de Kjennichsiea un Jewault, de Harlichkjeit, de Siech un de hechste Pracht. Wiels aules, waut em Himmel un oppe Ieed es, daut es dient.” Waut deeden de Israeliten, nodäm daut David jebät haud? “De gaunze Vesaumlunk lowd dän HARN” (1. Chr. 29:​11, 20).

4. Woo veharlicht Jesus Jehowa?

⁴ Woo veharlicht Jesus sienen Voda, aus hee oppe Ieed wia? Hee säd emma, daut hee Wunda moaken kunn, wäajen Jehowa am de Krauft doatoo jejäft haud (Mar. 5:​18-20). Daut, waut Jesus von sienen Voda säd un woo hee aundre behaundeld, brocht uk Iea opp Jehowa. Opp eene Sauz deed Jesus en een Vesaumlungshus von de Juden lieren. Mank de Toohorcha wia eene Fru, waut aul 18 Joa eenen beesen Jeist jehaut haud. De beesa Jeist muak ar sea kromm, soo daut see sikj nich jlikj bieejen kunn. Daut mott sennen werkjlich schwoa jewast! Ut Metleet jinkj Jesus no dise Fru un säd gaunz leeftolich to ar: “Fru, du best von diene Krankheit loos.” Dan läd hee siene Henj opp ar, un plazlich buach see sikj jlikj un “veharlicht Gott”; see wia sea dankboa, daut see jeheelt wort! (Luk. 13:​10-13). Dise Fru haud jenuach Uasoak, Jehowa to veharlichen, un wie uk.

WAUT BRINJT ONS BAT DOA, JEHOWA HARLICHKJEIT TO JÄWEN?

5. Waut fa Uasoaken hab wie, Jehowa Respakjt to wiesen?

⁵ Wie veharlichen Jehowa, wiels hee een butajeweenelja Gott es. Jehowa es aulmajchtich; hee haft Krauft onen Enj (Psa. 96:​4-7). Siene groote Weisheit es kloa doaraun to seenen, waut hee jemoakt haft. Hee haft ons daut Läwen jejäft un uk aules, waut ons toom läwen fält (Opb. 4:11). Hee es tru (Opb. 15:​4, NW). Aules, waut hee sikj väanemt, fieet hee derch, un hee helt sikj emma doaraun, waut hee vesprakjt (Jos. 23:14). Doawäajen säd de Profeet Jeremia äwa Jehowa: “Noanich mank de jelieede von de Velkja, ooda mank äare Kjennichs, es wua eena soo aus du best” (Jer. 10:​6-7). Ons himlischa Voda es werkjlich butajeweenlich, un wie haben goode Uasoak, am Respakjt to wiesen. Oba Jehowa vedeent nich bloos onsen Respakjt, hee vedeent uk onse Leew.

6. Wuarom leew wie Jehowa?

⁶ Wie veharlichen Jehowa, wiels wie am sea leewen. See wie mol eenje Ieejenschoften von Jehowa, waut ons bat doa brinjen, am to leewen. Hee wiest Metleet un jeft väl om ons rom (Psa. 103:13; Jes. 49:15). Hee es metfeelent; wan wie lieden motten, deit am daut uk wee (Sach. 2:12). Hee moakt ons daut leicht, met am Frind to sennen (Psa. 25:​14, NW; Apj. 17:27). Un hee es deemootich, wiels “dee rauf sticht om to seenen waut em Himmel un opp de Ieed es”, un “hee häft de oame utem Stoff” (Psa. 113:​6-7). Woo wudd wie dan nich wellen onsen grooten Gott veharlichen? (Psa. 86:12).

7. Waut vonne Iea hab wie?

⁷ Wie veharlichen Jehowa, wiels wie wellen, daut aundre am kjanen lieren. Wuarom  weeten väl Menschen nich de Woarheit äwa Jehowa? Wiels de Soton dee äa Vestaunt blint jemoakt haft met schlemme Läajes äwa Jehowa (2. Kor. 4:4). De Soton haft de Menschen enjebilt, daut Jehowa een dolla Gott es, daut dee nuscht om ons romjeft un daut dee veauntwuatlich es fa daut Lieden enne Welt. Oba wie weeten de Woarheit äwa Gott! Wie haben de Iea, de Menschen to vetalen, woo Gott werkjlich es, un kjennen dee halpen, am to veharlichen (Jes. 43:​10, NW). Psalm 96 jeit doarom, Jehowa Harlichkjeit to jäwen. Wan wie disen Psalm derchgonen, denkj doaräwa no, woo du Jehowa de Harlichkjeit jäwen kaust, waut hee vedeent.

WOO KJENN WIE JEHOWA DE HARLICHKJEIT JÄWEN, WAUT HEE VEDEENT?

8. Woo kjenn wie Jehowa veharlichen? (Psalm 96:​1-3).

⁸ Läs Psalm 96:​1-3. Wie kjennen Jehowa veharlichen, doaderch woo wie von am räden. En dise Varzhen woat Jehowa siene Deena toojerot: “Sinjt fa dän HARN”, “loft sienen Nomen”, “rät aule Dach von woo hee raden deit” un “vetalt aule Velkja von siene Harlichkjeit”. Aul dit sent veschiedne Wäaj, woo wie onsen himlischen Voda veharlichen kjennen. De true Juden un de ieeschtemmasche Christen hilden sikj nich trigj, aundre von aul daut Goode to vetalen, waut Jehowa fa äant jedonen haud, un stunden fa sienen Nomen en (Dan. 3:​16-18; Apj. 4:29). Woo kjenn wie dautselwje doonen?

9-10. Waut kaust du von Angelena äare Erfoarunk lieren? (See uk daut Bilt.)

⁹ See wie mol de Erfoarunk von Angelena a, eene Sesta, waut enne Stäts wont. See stunt äwanäment fa Jehowa sienen Nomen en bie de Kompanie, wua see schauft. Aus see korz met de Oabeit aunjefongen haud, wort see no een Toopkomen jekroacht fa dee, waut jroz aunjefongen hauden, doa to schaufen. Doa kunn see äare Oabeitspoatna vetalen, wäa see wia. Angelena muak sikj waut Bilda reed toom wiesen, woo väl Freid see aus eent von Jehowa siene Zeijen haud. Oba ea daut bat ar wia, räd een Oabeitspoatna doavon, daut hee en eene Famielje von Jehowa siene Zeijen oppjewossen wia. Hee haud sikj sea domm äwa disen Gloowen. Angelena sajcht: “Mien Hoat bumst sea.  Oba ekj docht bie mie soo: ‘Woa ekj daut tooloten, daut äwa Jehowa soone Läajes vetalt woaren? Ooda woa ekj nu fa am enstonen?’”

¹⁰ Aus de Oabeitspoatna dan utjerät haud, bäd Angelena gaunz kort opp stelles. See säd dan leeftolich to dän: “Ekj sie krakjt soo aus du mank Jehowa siene Zeijen oppjewossen, un ekj sie bat vondoag eena von dee.” Daut wia nich eene aunjenäme Loag, oba Angelena bleef ruich un wees waut schmocke Bilda von ar un äare Frind, wua see biejlikj opp eenen Kongress sent, un stunt respakjtvoll fa daut en, waut see jleewd (1. Pet. 3:15). Woo kjeem daut ut? Aus Angelena utjerät haud, wia de Maun aul väl ruja. Hee stunt too, daut am noch von scheene Tieden docht, aus hee noch wia mank Jehowa siene Zeijen jewast. Angelena sajcht: “Jehowa vedeent daut, daut wie fa am enstonen. Dauts eene Iea, sienen Nomen to veteidjen.” Wie haben uk de Iea, Jehowa to lowen un am to veharlichen, wan aundre uk Läajes von am vetalen.

11. Woo sent Jehowa siene Deena de Lia ut Psalm 96:8 noch emma nojekomen?

¹¹ Läs Psalm 96:​8, NW. Wie kjennen Jehowa derch onse tietelje Sachen veharlichen. Jehowa siene true Deena haben am noch emma opp dise Wajch Iea jejäft (Spr. 3:9). De Israeliten biejlikj jeewen Gowen toom dän Tempel buen un unjahoolen (2. Kjen. 12:​5-6; 1. Chr. 29:​3-9). Eenje von Jesus siene Nofolja deeden am un siene Apostel “met äa Hab un Goot” unjastetten (Luk. 8:​1-3). Un de ieeschtemmasche Christen deeden äare Breeda un Sestren uthalpen, aus doa eene Hungaschnoot wia (Apj. 11:​27-29). Vondoag dän Dach kjenn wie Jehowa uk derch onse friewelje Gowen veharlichen.

12. Woo woat Jehowa derch onse Gowen veharlicht? (See uk daut Bilt.)

¹² See wie bloos mol eene Erfoarunk, waut doa wiest, daut Jehowa derch onse Gowen veharlicht woat. Aune 2020 wia en Simbabwe een sea drieejet Joa. Millionende Menschen wieren batem vehungren, wua uk eene Sesta met en wia, waut Prisca heet. Oba en dise schwoare Tiet jinkj Prisca doawäajen emma aum Medwäakj un Friedach prädjen. Äare Nobasch hauden sikj domm äwa ar, wäajen see em Deenst jinkj un nich äa Launt reedmoaken deed. Dee säden to ar: “Du woascht vehungren.”  Prisca auntwuad gaunz äwazeicht: “Jehowa haft siene Deena noch kjeenmol em Stäakj jeloten.” Nich lang nodäm kjrieech see de needje Sachen von de Organisazion jeschekjt. Daut see dise needje Sachen haben kunn, wia bloos derch friewelje Gowen mäajlich. Prisca äare Nobasch wieren gaunz vewundat un säden to ar: “Gott haft die nienich em Stäakj jeloten, doawäajen well wie nu uk mea von am lieren.” Doa fungen säwen Stekj von äare Nobasch aun, bie de Toopkomes to sennen.

13. Woo kjenn wie Jehowa veharlichen derch ons Benämen? (Psalm 96:9).

¹³ Läs Psalm 96:9. Wie kjennen Jehowa veharlichen derch een heiljet, ooda reinet, Benämen. De Priestasch, waut en Jehowa sien Hus deenden, musten sikj kjarpalich rein hoolen (2. Mo. 40:​30-32). Wie motten ons uk rein hoolen, nich bloos doaderch, daut wie kjarpalich rein sent, oba uk doaderch, daut wie nuscht doonen, waut Jehowa haust (Mal. 3:5; 1. Pet. 1:​15-16). Wie motten ons aunstrenjen, ons “de oole Natua” uttotrakjen un “de niee Natua” auntotrakjen. Daut bediet, daut wie aules doonen, waut wie kjennen, om nich schwiensche Jedanken to haben un aule schlajchte Jewanheiten tochtoloten, waut Jehowa haust. Enne Städ daut lia wie, soo to denkjen un soont to doonen, waut doa wiest, daut wie Jehowa siene goode Ieejenschoften nodoonen (Kol. 3:​9-10). Met Jehowa siene Help kjenn wie ons endren un de niee Natua auntrakjen – mau rajcht soone, waut een sea grausomet un schwienschet Läwen fieren.

14. Waut lieescht du von Jack siene Erfoarunk? (See uk daut Bilt.)

¹⁴ See wie mol de Erfoarunk von Jack. Hee wia een grausoma un jefäadelja Maun; hee wort mau rajcht de Beesa Fient jenant. Wäajen Jack soo väl Schlajchtet jedonen haud, wort hee toom Doot veuadeelt. Oba en dee Tiet, ea hee hanjerecht wort, kjeem een Brooda no daut Jefenkjnis un funk aun, met am toop de Bibel to studieren. Wan Jack uk soo väl Schlajchtet jedonen haud, trock hee sikj de oole Natua ut un kunn sikj lota deepen loten. Jack haud sikj soo sea veendat, daut eenje Jefenkjnis-Woaka mau rajcht Tronen kjrieejen, aus dee Aufscheet neemen aun dän Dach, aus Jack wudd dootjemoakt woaren. Een Soldot, waut doa em Jefenkjnis schauft, säd: “Jack wia de Schlemsta hia, oba nu es  hee eent von de Baste.” De Wäakj nodäm daut Jack dootjemoakt wort, kjeemen de Breeda doa wada han un hauden wada een Toopkomen. Doa kjeem een Vebräakja han, waut noch nich bie een Toopkomen jewast wia. Waut brocht am bat doa? Hee wia vewundat, woo sea Jack sikj jeendat haud, un wull weeten, waut hee doonen must, om Jehowa to deenen. Ons Benämen kaun werkjlich Harlichkjeit opp onsen himlischen Voda brinjen! (1. Pet. 2:12).

WOO WOAT JEHOWA SIENEN NOMEN BOOLT VEHARLICHEN?

15. Woo woat Jehowa sienen Nomen boolt gaunz veharlichen? (Psalm 96:​10-13).

¹⁵ Läs Psalm 96:​10-13. De latste Varzhen von Psalm 96 wiesen, daut Jehowa een jerajchta Rechta un Kjennich es. Woo woat Jehowa sienen Nomen boolt veharlichen? Doaderch daut hee fa Jerajchtichkjeit sorcht. Hee woat boolt daut Groote Babel venichten, wäajen daut Schaund opp sienen heiljen Nomen jebrocht haft (Opb. 17:​5, 16; 19:​1-2). Eenje, waut daut seenen, daut daut Groote Babel venicht woat, woaren veleicht dan aunfangen met ons toop, Jehowa to deenen. Dan – en Harmagedon – woat Jehowa dän Soton siene Welt gaunz venichten un woat dee äwatsied schaufen, waut sikj jäajen am stalen un Läajes von am vetalen. Oba hee woat dee raden, waut am leewen un jehorchen un sienen Nomen jieren veharlichen (Mar. 8:38; 2. Tes. 1:​6-10). No Christus sien Dusentjoaschet Rikj woat daut eene latste Proow jäwen. Wan dee Proow ieescht derch es, woat Jehowa sienen Nomen gaunz jeheilicht haben (Opb. 20:​7-10). Woo woat daut dan sennen? “De gaunze Ieed woat enseenen, woo harlich Gott es, soo aus daut gaunze Mäa gaunz voll Wota es” (Hab. 2:14).

16. Waut best du die eenich to doonen? (See uk daut Bilt.)

¹⁶ Woo scheen woat daut nich sennen, wan jieda eena Jehowa sienen Nomen de Harlichkjeit jeft, waut dän traft! Oba wie kjennen nu aul jieda Jeläajenheit utnutzen, om onsen Gott to veharlichen. Om dise wichtje Sach dietlich to moaken, haft de Väastaunt Psalm 96:​8, (NW) utjewält aus de Varsch fa daut Joa 2025: “Jäft Jehowa de Harlichkjeit, dee sienen Nomen traft”.