3. ARTIKJEL FA DAUT STUDIUM
LEET 35 Hool daut wichtichste em Uag
Soone Entscheidungen moaken, waut Jehowa jleicht
“De Weisheit fangt aun wan eena däm HARN fercht; dän Heiljen kjanen lieren, brinjt Vestentnis” (SPR. 9:10)
OM WAUT DAUT JEIT
Woo Erkjantnis, Vestentnis un derchjedocht sennen ons halpen, kluake Entscheidungen to moaken.
1. Waut mott wie jieda Dach doonen?
JIEDA DACH mott wie Entscheidungen moaken. Eenje sent leicht, soo aus waut wie to Freestikj äten ooda wanea wie schlopen gonen. Aundre Entscheidungen sent nich soo leicht, wiels dee veleicht waut aun onse Jesuntheit, onse Freid, onse Famielje ooda onsen Deenst doonen kjennen. Wie wellen, daut onse Entscheidungen ons togood komen, oba uk onse Famielje. Äwa aules well wie, daut onse Entscheidungen Jehowa jefaulen (Reem. 12:1-2).
2. Waut kaun die halpen, kluake Entscheidungen to moaken?
2 Du woascht väl leichta kluake Entscheidungen moaken, wan du (1) die de Eenselheiten unjasteist, (2) doano kjikjst, woo Jehowa äwa de Sach denkjt, un (3) äwa de veschiedne Mäajlichkjeiten nodenkjst. Dis Artikjel woat ons wiesen, woo wie dit doonen kjennen, un woat ons halpen, onse Fäichkjeit to denkjen noch bäta to brucken (Spr. 2:11, NW).
UNJASTO DIE DE EENSELHEITEN
3. Wuarom mott wie ieescht de Eenselheiten weeten, ea wie eene Entscheidunk trafen? Met waut jeit daut to vejlikjen?
3 Wauts daut Ieeschte, waut du doonen motst, om eene goode Entscheidunk to moaken? Die de Eenselheiten unjastonen. Wuarom es daut soo wichtich? Stal die väa, doa es wäa sea krank un dee jeit nom Dokta. Woat de Dokta dän irjenteene Medizien jäwen, onen dän to unjasieekjen ooda dän Froagen to stalen? Secha nich. Krakjt soo woascht du uk bätre Entscheidungen moaken kjennen, wan du die ieescht de Eenselheiten unjasteist, waut met diene Loag to doonen haben. Waut kaun die doabie halpen?
4. Waut kaust du no Spricha 18:13 no doonen, om de Eenselheiten to weeten? (See uk daut Bilt.)
4 Foaken kaust du de Eenselheiten weeten, wan du doano froagen deist. Saj wie mol, du woascht to een Fast enjelot. Sust du doa hanwanken? Wan du dänjanjen nich kjanst, waut daut aunjestalt haft, un nich krakjt weetst, waut doa jeplont es, dan saust du dän soone aus dise Froagen stalen: “Wua un wanea woat daut Fast sennen? Woo väl Menschen woaren doa sennen un wäa aula woat doa hankomen? Wäa woat fa daut Fast veauntwuatlich sennen? Waut woaren dee doa aules doonen? Woat daut doa Schnaups jäwen?” Dise Froagen kjennen die halpen, eene kluake Entscheidunk to moaken (läs Spricha 18:13).
Stal Froagen, om de Eenselheiten to weeten (See Varsch 4) a
5. Waut saust du doonen, wan du de Eenselheiten ieescht weetst?
5 Wan du de Eenselheiten ieescht weetst, dan saust du noch äwa de gaunze Loag nodenkjen. Biejlikj: Waut es, wan du enwoascht, daut opp dit Fast eenje sennen woaren, waut nuscht om Jehowa siene Jesazen romjäwen, ooda daut doa woat Schnaups sennen, oba daut doa kjeena aunjestalt es toom oppaussen, daut doa nich too väl jedrunken woat? Denkjst du nich uk, daut dit kaun een utjehoaktet Fast woaren? (1. Pet. 4:3). Ooda waut es, wan du krakjt to dee Tiet Vesaumlunk hast ooda jeweenlich prädjen jeist? Wan du äwa de gaunze Loag nodenkjst, dan woat die daut leichta sennen, eene goode Entscheidunk to moaken. Oba doa es noch waut, waut du doonen saust. Du weetst aul, woo du äwa de Loag denkjst, oba woo denkjt Jehowa doaräwa? (Spr. 2:6).
KJIKJ DOANO, WOO JEHOWA DOARÄWA DENKJT
6. Wuarom sell wie no Jakobus 1:5 no Jehowa om Help bäden?
6 Froag Jehowa om Help, daut du vestonen kaust, woo hee denkjt. Jehowa vesprakjt, ons Weisheit to jäwen, daut wie vestonen kjennen, aus am eene Entscheidunk jefelt. Hee jeft ons dise Weisheit “friejäwrich, onen ons waut väatohoolen” (läs Jakobus 1:5).
7. Woo kaust du rutfinjen, woo Jehowa denkjt? Met waut jeit daut to vejlikjen?
7 Wan du Jehowa om Aunleidunk bätst, dan horch uk oppmoakjsom no siene Auntwuat. Wie kjennen daut soo vejlikjen: Wan du die wurscht en eene Staut vebeiselt haben, dan wurscht du gaunz secha wäm om Help froagen, waut doa wont. Oba wurscht du dan fuaz von dän wajchgonen, ea dee die haud eene Auntwuat jejäft? Secha nich. Du wurscht oppmoakjsom toohorchen, waut dee die säd. Krakjt soo es daut bie Jehowa. Wan wie am no Weisheit froagen, dan mott wie proowen ruttofinjen, waut siene Auntwuat es, doaderch daut wie no biblische Jesazen un Gruntsauzen kjikjen, waut to onse Loag paussen. Waut kjenn wie biejlikj doonen, ea wie entscheiden, aus wie no soon Fast gonen, wua wie ea aul von jerät haben? Doano kjikjen, waut de Bibel äwa utjehoakte Fasten un schlajchte Frind sajcht un doaräwa, woo wie daut Kjennichrikj aune ieeschte Städ stalen kjennen enne Städ daut, waut ons bloos jankat (Mat. 6:33; Reem. 13:13; 1. Kor. 15:33).
8. Waut kaust du doonen, wan die daut aun Help fält, Gruntsauzen to finjen, waut fa diene Loag paussent sent? (See uk daut Bilt.)
8 Veleicht woat die daut uk eenjemol aun Help fälen, Gruntsauzen to finjen, waut fa diene Loag paussent sent. Dan kjennen erfoarne Breeda un Sestren die veleicht met eenje Iedeeen halpen. Oba du wurscht die uk selfst sellen waut nosieekjen. Doatoo jeft daut een deel, biejlikj en de Help toom nosieekjen fa Jehowa siene Zeijen un en daut Buak Bibelvarzhen fa ons christeljet Läwen. Denkj aun daut, waut daut Wichtichste es: Jehowa sellen diene Entscheidungen jefaulen.
Kjikj doano, woo Jehowa äwa de Sach denkjt (See Varsch 8) b
9. Woo kaust du die secha sennen, daut Jehowa diene Entscheidunk jefelt? (Efeesa 5:17).
9 Woo kaust du die secha sennen, daut Jehowa diene Entscheidungen jefaulen woat? Ieeschtens motst du am goot kjanen lieren. De Bibel sajcht: “Dän Heiljen kjanen lieren, brinjt Vestentnis” (Spr. 9:10). Daut woare Vestentnis kjemt doavon, daut du weetst, waut Jehowa sikj väajenomen haft, waut vonne Ieejenschoften hee haft un waut hee jleicht ooda haust. Du kaust mol äwalajen: “Waut vonne Entscheidunk woat Jehowa jefaulen doano, woo ekj am aul kjan?” (läs Efeesa 5:17).
10. Wuarom sent de biblische Gruntsauzen wichtja, aus de Famielje un de Menschen to jefaulen?
10 Om Jehowa to jefaulen, mott wie eenjemol onse Famielje un Frind enteischen. Saj wie mol een Biespel: Eenje Elren, waut daut Baste fa äare Kjinja wellen, proowen äare Dochta veleicht bat doa to brinjen, sikj met wäm to befrieen, waut een deel Jelt haft, uk wan dee nich stoakj em Jeisteljen es. Secha wellen dee, daut äare Dochta em Tieteljen goot vesorcht es, oba woat soon Maun ar halpen, em Jeisteljen verauntokomen? Woo denkjt Jehowa äwa dee Sach? Wie finjen de Auntwuat en Matäus 6:33. Doa woat de Christen toojerot, “wieda daut ieeschte no Gott sien Kjennichrikj” to sieekjen. Wie wellen onse Elren ieren un de Menschen doa rom respakjten, oba daut Wichtichste es, daut wie Jehowa schaftich moaken.
DENKJ ÄWA DE MÄAJLICHKJEITEN NO
11. Waut vonne Ieejenschoft woat die halpen, goode Entscheidungen to moaken?
11 Wan du die de biblische Gruntsauzen, waut to diene Loag paussen, ieescht unjastonen hast, dan motst du noch äwa de veschiedne Mäajlichkjeiten nodenkjen, waut du hast (läs Spricha 2:11, NW). Waut bediet daut, daut derchjedocht sennen die beschitzen woat? Daut bediet, daut die daut halpen woat to weeten, woo waut utkomen woat, doano waut vonne Entscheidunk du moakst. Eenje Entscheidungen sent leicht, oba nich aule. Derchjedocht sennen woat die halpen, kluake Entscheidungen to moaken, mau rajcht wan de Loag schwoa es.
12-13. Woo kaun derchjedocht sennen die halpen, eene kluake Entscheidunk to trafen, wan daut om de Oabeit jeit?
12 Stal die dise Loag väa. Du sieekjst no eene Oabeit, om fa diene Famielje to sorjen. Dee haben die opp twee Städen Oabeit aunjeboden. Du denkjst äwa de Eenselheiten no, waut doa met en sent, biejlikj waut vonne Oabeiten daut sent, waut vonne Tiet daut es, woo wiet du foaren motst un soo wieda. No de Schreft no kaust du irjenteene von dee aunnämen. Veleicht jankat die dolla eene von dee, wäajen daut eene Oabeit es, waut du jleichst ooda wäajen du mea vedeenen woascht. Oba doa sent noch aundre Sachen, wua du äwa nodenkjen saust, ea du eene Entscheidunk moakst.
13 Woascht du biejlikj eenje Toopkomes motten utloten, wan du eene von dise Oabeiten aunnemst? Ooda woat eent von dee die de Tiet wajchnämen, waut die fält, om fa de Famielje em Jeisteljen un uk aundasch to sorjen? Äwa soont notodenkjen, woat die halpen, “daut gaunz Wichtichste” – aulsoo dienen Deenst fa Jehowa un daut, waut diene Famielje fält – ver daut Tietelje to saten. Dan woascht du eene Entscheidunk moaken, waut Jehowa säajnen woat.
14. Woo woat Leew un derchjedocht sennen ons halpen, kjeenem tofaul to brinjen?
14 Derchjedocht sennen woat ons halpen, doaräwa notodenkjen, waut onse Entscheidunk aun aundre deit, un soo woa wie “kjeenem tofaulbrinjen” (Filip. 1:10). Dits wichtich, wan wie perseenelje Entscheidungen moaken, biejlikj woo wie ons auntrakjen un oppfiksen. Veleicht jleich wie ons opp eene jewesse Wajch opptofiksen ooda eene jewesse Sort Kjleedie. Oba waut es, wan onse Gloowesbreeda ooda aundre, waut Jehowa nich deenen, sikj doaraun stieren? Derchjedocht sennen woat ons halpen, opp äare Jefeelen to achten. Un Leew woat ons bat doa brinjen, soont to doonen, “waut fa aundre toom Gooden es,” un ons bescheiden auntotrakjen (1. Kor. 10:23-24, 32; 1. Tim. 2:9-10). Dan woa wie soone Entscheidungen moaken, waut wiesen, daut wie aundre leewen un respakjten.
15. Waut motst du doonen, ea du eene wichtje Entscheidunk moakst?
15 Wan du eene Entscheidunk trafst, dan denkj doaräwa no, waut du doonen motst, om dee derchtofieren. Jesus lieed ons, daut wie “de Kosten uträakjnen” sellen (Luk. 14:28). Denkj doaräwa no, woo väl Tiet, Krauft un Jelt daut kosten woat, daut et fein utkjemt, waut du entschieden hast. Eenjemol kaust du veleicht uk met diene Famielje doaräwa räden, waut jieda eena doonen mott, om diene Entscheidunk to unjastetten. Wuarom es daut goot, dit aul ea to doonen, ea du eene wichtje Entscheidunk trafst? Dan woascht du veleicht enwoaren, daut du waut aun diene Entscheidunk endren motst ooda daut eene aundre Entscheidunk bäta sennen wudd. Wan du met diene Famielje doaräwa rätst un no dee äare Iedeeen horchst, dan woaren dee ea reed sennen, die to unjastetten, daut diene Entscheidunk goot utkjemt (Spr. 15:22).
MOAK SOONE ENTSCHEIDUNK, WAUT GOOT UTKOMEN WOAT
16. Waut kaun die halpen, soone Entscheidunk to moaken, waut goot utkomen woat? (See uk daut Hock “ Woo kaust du kluake Entscheidungen moaken?”)
16 Wan du de Sachen nojekomen best, wua wie von jerät haben, dan best du reed, eene kluake Entscheidunk to moaken. Wuarom kaust du dan Jehowa doano froagen, daut hee diene Entscheidunk säajent? Wiels du hast aun aule Eenselheiten jedocht un die de biblische Gruntsauzen unjastonen, waut die halpen, soone Entscheidunk to moaken, waut am jefelt.
17. Waut kaun die daut dolste halpen, goode Entscheidungen to moaken?
17 Wan du ea uk aul väl goode Entscheidungen jemoakt hast, vejät nich, waut die daut dolste halpt, goode Entscheidungen to moaken: die opp Jehowa siene Weisheit to veloten, un nich opp dien ieejnet Vestaunt. Bloos hee kaun die woare Erkjantnis un Vestentnis jäwen un die halpen, derchjedocht to sennen – dise dree Sachen sent onbedinjt needich, om weis to haundlen (Spr. 2:1-5). Jehowa kaun die halpen, soone Entscheidungen to moaken, waut am jefaulen (Psa. 23:2-3).
LEET 28 Wäa es Jehowa sien Frint?
