1. Wuarom es daut goot, daut wie jieda Joa bie daut Owentmol sent?

 DU WURSCHT doa secha met envestonen sennen, daut daut Leesjelt een butajeweenlich grootet Jeschenkj es (2. Kor. 9:15). Wäajen Jesus sien menscheljet Läwen aus Opfa hanjeef, kaust du goode Frind sennen met Jehowa Gott. Du hast doaderch uk de Hopninj, noch mol fa emma to läwen. Wie haben jenuach Uasoak, Jehowa onse Dankboakjeit fa daut Leesjelt to wiesen, waut hee ut Leew jeef (Reem. 5:8). Daut wie daut Leesjelt nich vejäten un emma dankboa bliewen, haft Jesus daut Owentmol enjerecht toom aun sienen Doot denkjen (Luk. 22:​19-20).

2. Waut woa wie en disen Artikjel seenen?

² Dit Joa woat daut Owentmol aum Sinowent, dän 12. Aprell 2025 sennen. Gaunz secha well wie aula doa sennen. Wie wudden ons sellen ver un no daut Owentmol de Tiet nämen toom doaräwa nodenkjen a, waut Jehowa un sien Sän fa ons jedonen haben. En disen Artikjel woa wie seenen, waut daut Leesjelt ons äwa Jehowa un sienen Sän lieet. Un de näakjsta Artikjel woat ons halpen to vestonen, woo sea ons daut Leesjelt togood kjemt un woo wie onse Dankboakjeit fa daut wiesen kjennen.

WAUT LIEET DAUT LEESJELT ONS ÄWA JEHOWA?

3. Woo kunn eenen Maun sien Doot millionende Menschen von Sind un Doot friemoaken? (See uk daut Bilt.)

³ Daut Leesjelt lieet ons een deel äwa Jehowa siene Jerajchtichkjeit (5. Mo. 32:​4, NW). Aus Adam sikj jäajen Gott stald, wort hee een Sinda un must stoawen. Wäajen wie siene Nokomen sent, sent wie uk Sinda un motten stoawen (Reem. 5:12). Om ons von de Sind un dän Doot frietomoaken, recht Jehowa daut soo en, daut Jesus  daut Leesjelt jäwen sull. Oba woo kunn daut Opfa von eenen volkomnen Mensch millionende Menschen friemoaken? De Apostel Paulus läd daut soo ut: “Krakjt soo aus derch daut Ojjehuarsom-Sennen von eenen Maun [Adam] väle to Sinda worden, soo woaren derch daut Jehuarsom-Sennen von eenen Maun [Jesus] väle jerajcht jemoakt” (Reem. 5:19; 1. Tim. 2:6). Paulus wees, daut wie aula Sinda sent un stoawen motten, wäajen een volkomna Maun Gott ojjehuarsom wort. Doawäajen fäld daut bloos aun eenen volkomnen Maun, waut Gott jehuarsom wia, daut wie von dise Sachen wada kunnen friekomen.

4. Wuarom muak Jehowa daut nich soo, daut Adam siene Nokomen, waut jehuarsom wieren, fa emma läwen kunnen?

⁴ Must Jesus opp iernst stoawen, om ons to raden? Kunn Jehowa daut nich eefach soo moaken, daut Adam siene Nokomen, waut jehuarsom wieren, fa emma läwen kunnen? Wie onvolkomne Menschen denkjen veleicht, daut et wudd sennen leeftolich jewast un uk de rajchte Leesunk. Oba wäa soont jleeft, denkjt nich aun Jehowa siene volkomne Jerajchtichkjeit. Wäajen Jehowa jerajcht es, wudd hee daut kjeenmol toojeloten haben, daut Adam met sien Ojjehuarsomet jrodsoo derchkjeem.

5. Wuarom kjenn wie ons secha sennen, daut Jehowa emma daut Rajchte doonen woat?

⁵ Woo wudd daut jewast sennen, wan Jehowa nich haud daut Leesjelt jejäft, oba siene Jerajchtichkjeit bloos haud tosied jeschowen un toojeloten, daut Adam siene Nokomen fa emma läwen kunnen? Dan wudden de Menschen wundren, aus Gott sikj dan uk en aundre Stekjen nich wudd aun siene Jerajchtichkjeit hoolen. Woat hee biejlikj aules doonen, waut hee vesproaken haft? Doa bruck wie nich äwa duaren. Daut Jehowa sikj aun siene Jerajchtichkjeit hilt, wan am daut uk väl kost – hee must je sienen Sän oppjäwen – jeft ons de Sechaheit, daut hee emma daut Rajchte doonen woat.

6. Wuarom es daut Leesjelt een Bewies doafäa, daut Jehowa ons sea leeft? (1. Johanes 4:​9-10).

⁶ Daut Leesjelt wiest dietlich, daut Jehowa jerajcht es, oba daut halpt ons besonda to vestonen, waut vonne groote Leew hee haft (Joh. 3:16; läs 1. Johanes 4:​9-10). De Lia von daut Leesjelt wiest, daut Jehowa nich bloos well, daut wie fa emma läwen, oba daut hee sikj uk wenscht, daut wie to siene Famielje jehieren sellen. Äwalaj mol: Aus Adam sindijd, kunn hee nich mea to Jehowa siene Famielje jehieren. Doawäajen sent wie uk nich en Gott siene Famielje nennjebuaren. Oba wäajen daut  Leesjelt vejeft Jehowa de Sinden von aul dee, waut Gloowen wiesen un jehuarsom sent, un woat dee lota en siene Famielje oppnämen. Un wie kjennen nu aul goode Frind met Jehowa un met onse Gloowesbreeda sennen. Es daut nich dietlich, daut Jehowa ons sea leeft? (Reem. 5:​10-11).

7. Wuarom es Jesus sien Lieden een Bewies doafäa, daut Jehowa ons sea leeft?

⁷ Wie kjennen daut noch bäta vestonen, woo sea Jehowa ons leeft, wan wie doaräwa nodenkjen, waut daut Leesjelt am jekost haft. De Soton behaupt, daut kjeen Mensch Jehowa tru bliewen wudd, wan daut schwoa wia. Om to wiesen, daut daut nich soo es, leet Jehowa daut too, daut Jesus lieden must, ea hee storf (Hiob 2:​1-5; 1. Pet. 2:21). Jehowa kjikjt too, aus Jesus von de Menschen vespott, von de Soldoten vekjielt un aum Pol jenoagelt wort. Jehowa sach krakjt, waut von grausomen Doot sien leewa Sän haud (Mat. 27:​28-31, 39). Jehowa haud de Macht, doa irjentwanea een Enj met to moaken. Biejlikj aus de Menschen säden: “Nu saul [Gott] am raden, wan dee am halpen well,” kunn Jehowa krakjt daut doonen (Mat. 27:​42-43). Oba wan Gott doa mankjefot haud, wudd daut Leesjelt nich sennen betolt worden un wie wudden wada onen Hopninj sennen. Doawäajen leet Jehowa too, daut sien Sän lieden must, bat hee sienen latsten Odem utjepust haud.

8. Wuarom sent wie ons secha, daut Jehowa daut schwoa wia, aus sien Sän lieden must? Laj daut ut. (See uk daut Bilt.)

⁸ Wie sellen nich denkjen, daut Gott kjeene Jefeelen haft, wäajen hee de Aulmajchtja es. Wie sent no sien Bilt jemoakt un wie haben Jefeelen. Daut wiest, daut Jehowa uk Jefeelen haft. De Bibel sajcht, daut hee mol “enteischt” ooda “truarich” wia (Psa. 78:​40-41, NW). Denkj uk aun de Jeschicht von Abraham un Isaak. Soo aus wie weeten, säd Jehowa Abraham, daut hee sienen eensjen Sän opfren sull (1. Mo. 22:​9-12; Heb. 11:​17-19). Wie kjennen ons daut bloos een bät väastalen, waut vonne veschiedne Jefeelen Abraham mott jehaut haben, aus hee reedmuak toom Isaak met een Mol spekjen dootmoaken. Nu stal die mol väa, woo väl schwanda daut fa Jehowa mott jewast sennen to seenen, daut sien Sän grausom jekjwält un tolatst dootjemoakt wort! (Kjikj daut Video opp jw.org Dee nodoonen, waut Gloowen hauden – Abraham (Poat 2).)

9. Waut wiest Reema 8:​32, 38-39 ons doaräwa, woo sea Jehowa de Menschen leeft?

⁹ Daut Leesjelt lieet ons, daut kjeena ons dolla leeft aus Jehowa – nich mol ons basta Frint ooda wäa von onse Famielje  (läs Reema 8:​32, 38-39). Wie kjennen ons gaunz secha sennen, daut Jehowa ons dolla leeft, aus wie ons selfst leewen. Wurscht du jleichen, fa emma to läwen? Jehowa wenscht sikj daut noch väl dolla. Wurscht du jleichen, daut diene Sinden vejäft worden? Jehowa wenscht sikj daut noch väl dolla. Hee well bloos haben, daut du sien butajeweeneljet Jeschenkj saust aunnämen, doaderch daut du Gloowen wiest un jehuarsom best. Daut Leesjelt es een groota Bewies fa Gott siene Leew. Un en de niee Welt woa wie noch mea von Jehowa siene Leew lieren kjennen (Liera 3:​11, NW).

WAUT LIEET DAUT LEESJELT ONS ÄWA JESUS?

10. (a) Waut wia Jesus besonda schwoa? (b) Waut deed Jesus, om Jehowa sienen Nomen von de Läajes frie to moaken? (See uk daut Hock “ Jesus sien Tru-Sennen muak Jehowa sienen Nomen rein”.)

¹⁰ Jesus es besonda doarom to doonen, waut de Menschen äwa sienen Voda denkjen (Joh. 14:31). Fa Jesus wia daut sea schwoa, daut de Menschen am beschuljden wudden, daut hee jäajen sienen Voda jelastat haud un een Vebräakja wia. Wuarom? Wiels daut wudd Schaund opp sienen Voda sienen Nomen brinjen. Doawäajen bäd hee: “Mien Voda, wan daut mäajlich es, dan nemm dit Kuffel von mie” (Mat. 26:39). Doaderch daut Jesus Jehowa batem Doot tru bleef, holp hee met, sienen Voda sienen Nomen von de Läajes frie to moaken.

11. Woo wees Jesus de Menschen siene groote Leew? (Johanes 13:1).

¹¹ Daut Leesjelt lieet ons uk, daut Jesus sea om de Menschen todoonen es, besonda om siene Nofolja (Spr. 8:31; läs Johanes 13:1). Biejlikj wist Jesus, daut eenjet  en sienen Deenst oppe Ieed wudd sea schwoa sennen, besonda daut hee wudd eenen grausomen Doot haben. Oba hee deed aul dise schwoare Sachen nich bloos, wiels Jehowa am doatoo aunjestalt haud, oba uk wiels hee de Menschen leewd. Hee deed von gaunzen Hoaten prädjen, lieren un de Menschen halpen. Mau rajcht aun dän Owent ver sienen Doot neem hee sikj noch de Tiet, om siene Apostel de Feet to wauschen, opptomuntren un Aunwiesungen to jäwen (Joh. 13:​12-15). Un wan hee uk aum Pol honk, jeef hee eenen Vebräakja Hopninj, waut toom Doot veuadeelt wia, un sach doano, daut siene Mutta wudd vesorcht woaren (Luk. 23:​42-43; Joh. 19:​26-27). Jesus wees de Menschen siene groote Leew de gaunze Tiet, aus hee oppe Ieed wia, nich bloos aus hee storf.

12. En waut fa Stekjen deit Jesus noch emma waut fa ons?

¹² Jesus “storf bloos een Mol”, oba hee deit doawäajen noch emma waut fa ons (Reem. 6:10). Opp waut vonne Wajch? Hee sitt noch emma doano, daut wie aul daut Goode kjrieen kjennen, waut derch daut Leesjelt mäajlich es. Kjikj wie mol, waut hee deit. Hee es ons Kjennich un Huaga Priesta un daut Haupt von de Vesaumlunk (1. Kor. 15:25; Efs. 5:23; Heb. 2:17). Hee haft de Oppgow, de Jesaulwde un de groote Häad tooptosaumlen – dise Oppgow woat hee foadich haben, ea de groote Liedenstiet to Enj es (Mat. 25:32; Mar. 13:27). Hee sitt uk doano, daut siene true Deena aules em Jeisteljen haben, waut dee en dise latste Doag fält (Mat. 24:45). Un en de dusent Joa woat hee wieda Goodet fa ons doonen. Jesus jeef sikj gaunz fa ons han un es een butajeweeneljet Jeschenkj von Jehowa!

HIA NICH OPP MET LIEREN

13. Woo kaust du noch mea äwa de Leew lieren, waut Gott un Christus fa ons haben?

¹³ Du kaust noch mea äwa de Leew lieren, waut Jehowa Gott un Jesus Christus fa ons haben, wan du doa deep äwa nodenkjst. En de Tiet von daut Owentmol wurscht du kjennen eent ooda een poa Evangelien oppmoakjsom läsen. Proow nich, too väl Kapitels opp eemol to läsen. Enne Städ daut läs sachta un sieekj noch no mea Jrind, wuarom wie wudden Jehowa un Jesus leewen sellen. Un vetal uk aundre doavon, waut du jelieet hast.

14. Waut mott wie doonen, om mea äwa daut Leesjelt un uk aundre Teemasch to lieren? (Psalm 119:97). (See uk daut Bilt.)

¹⁴ Wan du aul fa väl Joaren enne Woarheit best, wundascht du veleicht, aus du noch irjentwaut Nieet lieren kaust äwa  soone bekaunde Teemasch aus Gott siene Jerajchtichkjeit, siene Leew un daut Leesjelt. Rajcht jesajcht woascht du kjeenmol utjelieet kjrieen äwa soone un uk aundre Teemasch. Soo, woo kaust du waut Nieet lieren? Nutz daut ut, waut du en onse Bieekja finjen kaust. Wan du waut läst un daut nich gaunz vestonen kaust, dan sieekj die mea doaräwa no. Du kaust dan derch dän Dach doaräwa nodenkjen, waut du rutjefungen hast un waut die daut äwa Jehowa, sienen Sän un de Leew lieet, waut dee fa ons haben (läs Psalm 119:​97, JHF).

15. Wuarom es daut wichtich, daut wie wieda jieda Dach de Schreft läsen?

¹⁵ Woa nich mootloos, wan du nich jiedatsmol waut Nieet ooda Intressauntet lieescht, wan du de Schreft läst ooda die waut nosieekjst. Stal die väa, du best een Mensch, waut no Golt sieekjt. Foaken mott soon Mensch stunden- ooda doagenlank no Golt sieekjen, bat dee een kjlienet Bietskje Golt finjt. Oba dee jeft nich opp, wiels jieda Bietskje Golt es sea wieetvoll fa am. Woo väl wieetvolla es nich jieda Sach, waut wie ut de Bibel lieren? (Psa. 119:127; Spr. 8:10). Soo, sie jeduldich un läs wieda jieda Dach de Schreft (Psa. 1:2).

16. Woo kjenn wie Jesus un Jehowa nodoonen?

¹⁶ Wan du studieescht, dan kjikj doano, woo du daut nokomen kaust, waut du lieescht. Biejlikj proow, soo aus Jehowa jerajcht to sennen, doaderch daut du aulem äwareen behaundelst. Doo de Leew no, waut Jesus fa sienen Voda haft, doaderch daut du reed best, daut to doonen, waut Jehowa haben well, un aundre halpst, wan die daut daut Läwen uk schwanda moakt. Du kaust Jesus uk doaderch nodoonen, daut du aundre äwa de goode Norecht vetalst, soo daut dee uk de Jeläajenheit haben, aun daut Leesjelt Gloowen to kjrieen.

17. Waut woa wie en dän näakjsten Artikjel seenen?

¹⁷ Je mea wie äwa daut Leesjelt lieren un daut räakjnen, je dolla woa wie Jehowa un sienen Sän leewen. Un dan woaren dee ons uk emma dolla leewen (Joh. 14:21; Jak. 4:8). Well wie wieda de Bibel un onse Bieekja brucken, om mea äwa daut Leesjelt to lieren. En dän näakjsten Artikjel woa wie von eenje Säajnungen räden, waut derch daut Leesjelt mäajlich sent, un woo wie onse Dankboakjeit wiesen kjennen fa Jehowa siene Leew.