1. Woo kjenn wie Jehowa schaftich moaken?

 STAL die väa, du jefst wäm, dän du väl räakjenst, een besondret Jeschenkj. Daut Jeschenkj lat schmock un es hendich. Wurscht du nich truarich sennen, wan deejanja daut Jeschenkj eefach wudd wajchlajen un doavon vejäten? Oba du wurscht die secha freien, wan deejanja säd, daut dee doafäa dankboa wia un daut Jeschenkj goot brukt. Waut es de Lia? Jehowa haft sienen Sän fa ons jejäft. Jehowa freit sikj sea, wan wie onse Dankboakjeit wiesen fa dit besondre Jeschenkj un fa siene Leew, waut am bat doa brocht, daut Leesjelt to jäwen (Joh. 3:16; Reem. 5:​7-8).

2. Waut woa wie en disen Artikjel seenen?

² Met de Tiet kunn wie veleicht nich mea soo dankboa sennen fa daut Leesjelt. Daut wudd soo sennen, aus wan wie Gott sien Jeschenkj wajchlajen wudden un doa nich mea aun denkjen. Daut et nich bat doa kjemt, mott wie emma wada doaraun denkjen, waut Gott un Christus fa ons jedonen haben. Dis Artikjel kaun ons doabie halpen. Wie woaren seenen, woo ons daut Leesjelt nu aul togood kjemt un uk lota. Wie woaren uk seenen, woo wie wiesen kjennen, daut wie fa Jehowa siene Leew dankboa sent – besonda en de Tiet von daut Owentmol.

WOO ONS DAUT NU AUL TOGOOD KJEMT

3. Waut es eene Wajch, woo ons daut Leesjelt togood kjemt?

³ Christus sien Leesjelt kjemt ons nu aul togood. Biejlikj wäajen daut Leesjelt vejeft Jehowa onse Sinden. Hee mott ons nich vejäwen, oba hee well daut. Een Psalmenschriewa wia dankboa doafäa un sunk: “Wiels du, Har, best goot un reed to vejäwen” (Psa. 86:5; 103:​3, 10-13).

4. Fa wäm jeef Jehowa daut Leesjelt? (Lukas 5:32; 1. Timotäus 1:15).

⁴ Eenje denkjen veleicht, daut dee daut nich wieet sent,  Jehowa siene Vejäwunk to kjrieen. En Werkjlichkjeit sent wie daut aula nich wieet. Biejlikj de Apostel Paulus stunt too, hee wia “daut nich mol wieet, een Apostel jenant to woaren”. Un doch säd hee: “Wäajen Gott sien grootet Metleet sie ekj, waut ekj sie” (1. Kor. 15:​9-10). Wan wie een Leetsennen haben, vejeft Jehowa onse Sinden. Wuarom? Nich wäajen wie daut vedeenen, oba wäajen hee ons leeft. Wan die daut schlajcht jeit, wäajen du denkjst, daut du daut nich wieet best, Jehowa siene Vejäwunk to kjrieen, dan denkj doaraun, daut Jehowa daut Leesjelt nich fa volkomne Menschen jeef, oba fa Sinda, waut een Leetsennen haben (läs Lukas 5:32; 1. Timotäus 1:15).

5. Mott Jehowa ons vejäwen? Laj daut ut.

⁵ Kjeena saul denkjen, daut dee sikj Jehowa siene Vejäwunk vedeent, nich mol wan dee dän aul väl Joaren jedeent haft. Jehowa räakjent daut secha sea väl, daut wie am tru jedeent haben (Heb. 6:10). Oba daut Leesjelt es een frieweljet Jeschenkj. Dauts nich een Loon fa onsen Deenst. Waut, wan doa wäa denkjt, daut dee sikj Jehowa siene Vejäwunk vedeent haft? Deejanja wudd doamet auntovestonen jäwen, daut Christus fa Dommheit jestorwen es (see uk Galata 2:21).

6. Wuarom schauft Paulus soo schwoa en Jehowa sienen Deenst?

⁶ Paulus wist, daut hee sikj nich kunn Gott siene Vejäwunk vedeenen. Wuarom schauft hee dan soo schwoa en Jehowa sienen Deenst? Hee wull doamet nich wiesen, daut hee Jehowa sien grootet Metleet vedeend, oba hee wull siene Dankboakjeit wiesen (Efs. 3:7). Soo aus Paulus strenj wie ons wieda aun en Jehowa sienen Deenst, wiels wie wiesen wellen, daut wie fa sien Metleet dankboa sent un nich, wiels wie ons daut vedeenen wellen.

7. Woo kjemt ons daut Leesjelt noch togood? (Reema 5:1; Jakobus 2:23).

⁷ Woo kjemt ons daut Leesjelt noch togood? Wie kjennen goode Frind met Jehowa sennen. a Soo aus wie en dän väajen Artikjel sagen, sent wie nich von Jeburt aun Gott siene Frind. Oba wäajen daut Leesjelt kjenn wie “Fräd met Gott” haben un am doaderch noda komen (läs Reema 5:1; Jakobus 2:23).

8. Wuarom sell wie Jehowa fa de Iea dankboa sennen, daut wie to am bäden kjennen?

⁸ Waut fa Besondret hab wie, wäajen wie Frind sent met Jehowa? Wie kjennen biejlikj to am bäden. Jehowa hieet nich bloos de Jebäda, waut siene Deena sajen, wan dee vesaumelt sent. Hee hieet uk de Jebäda von jiedrem eenen, wan wie auleen sent. Daut Jebäd kaun ons halpen, ruich to sennen un ennalichen Fräd to haben. Oba daut Jebäd es nich bloos doatoo, daut wie ons sellen bäta feelen. Daut kaun ons halpen, jratre Frind met Gott to woaren (Psa. 65:3; Jak. 4:8; 1. Joh. 5:14). Aus Jesus oppe Ieed wia, bäd hee foaken, wäajen hee wist, daut Jehowa no am horcht un daut hee derch daut Jebäd sien Veheltnis met sienen Voda stoakj hoolen kunn (Luk. 5:16). Wäajen Jesus sien Opfa kjenn wie Jehowa siene Frind sennen un mau rajcht derchem Jebäd to am räden! Sent wie nich sea dankboa doafäa?

WOO WOAT ONS DAUT LOTA TOGOOD KOMEN?

9. Woo woat daut Leesjelt true Deena lota togood komen?

⁹ Woo woat daut Leesjelt Jehowa siene true Deena lota togood komen? Dee woaren eewjet Läwen kjrieen. Väle denkjen, daut dit  nich mäajlich es, wiels Menschen aul fa dusende Joaren jestorwen sent. Oba Jehowa haud sikj daut von Aunfank aun väajenomen, daut de Menschen fa emma läwen sullen. Wan Adam nich jesindicht haud, wudd kjeena denkjen, daut et ommäajlich wia. Wan wie ons daut uk meist nich väastalen kjennen, fa emma to läwen, sent wie ons oba secha, wiels wie weeten, daut Jehowa dän dieeschten Pries betolt haft, daut et mäajlich es – daut Läwen von sienen leewen Sän (Reem. 8:32).

10. To waut freien de Jesaulwde un de aundre Schop sikj?

¹⁰ Uk wan wie ieescht mol lota daut eewje Läwen haben woaren, well Jehowa oba, daut wie ons daut nu aul väastalen. De Jesaulwde freien sikj to daut scheene Läwen em Himmel, wua see woaren met Christus toop äwa de Ieed rejieren (Opb. 20:6). De aundre Schop freien sikj to daut Läwen em Paradies hia oppe Ieed, wua kjeena mea lieden ooda truaren woat (Opb. 21:​3-4). Best du eent von de aundre Schop, waut de Hopninj haben, fa emma oppe Ieed to läwen? Dise Beloonunk es nich weinja wieet aus daut Läwen em Himmel! Dauts krakjt, wua de Menschen fäa jemoakt worden. Soo, ons woat daut gaunz schaftich moaken, oppe Ieed to läwen.

11-12. To woone Säajnungen em Paradies kjenn wie ons freien? (See uk de Bilda.)

¹¹ Denkj mol han, woo dien Läwen em Paradies oppe Ieed sennen woat. Du woascht die nich doaräwa Sorjen moaken, aus du woascht krank woaren ooda stoawen motten (Jes. 25:8; 33:24). Jehowa woat die aul de goode Sachen jäwen, waut du die wenscht. Wurscht du jleichen, mea äwa de Tieren to lieren? Ooda lieren to molen ooda een Instrument to spälen? Secha woat daut doa aun soone fälen, waut vestonen, Buplons to moaken, to buen un daut Launt to beoabeiden. Daut woat doa uk aun soone fälen, waut vestonen, eenen Goaden un Äten to moaken, ooda waut vestonen Jereetschoft to moaken un sikj om daut Launt to kjemren, soo daut et schmock blift (Jes.  35:1; 65:21). Wan du ieescht fa emma läfst, woascht du fa aul dit un fa noch väl mea Tiet haben.

¹² Daut woat eene Freid sennen, dee opptonämen, waut vom Doot oppstonen woaren! (Apj. 24:15). Denkj mol äwa no, woo scheen daut nich woat sennen, mea äwa Jehowa to lieren derch de veschiedne Sachen, waut hee jemoakt haft (Psa. 104:24; Jes. 11:9). Noch bäta es, daut wie woaren Jehowa deenen kjennen, onen ons een beskje schuldich to feelen. Wurscht du die dise Säajnungen loten derchgonen, bloos om die “een Stootje loten de Sind scheen gonen”? (Heb. 11:25). Secha nich! Dise Säajnungen sent irjenteen Opfa wieet, waut wie nu moaken motten. Hool em Denkj, daut daut Paradies oppe Ieed nich bloos waut sennen woat, wua wie opp hopen motten. Met de Tiet woat daut de Städ sennen, wua wie jieda Dach läwen woaren. Nuscht von dit wudd mäajlich jewast sennen, wan Jehowa ons nich sea jeleeft un sienen Sän fa ons jejäft haud.

WIES DIENE DANKBOAKJEIT FA JEHOWA SIENE LEEW

13. Woo kjenn wie onse Dankboakjeit wiesen fa Jehowa siene Leew? (2. Korinta 6:1).

¹³ Woo kjenn wie Jehowa onse Dankboakjeit wiesen fa daut Leesjelt? Wan sien Deenst daut ieeschte en ons Läwen kjemt (Mat. 6:33). Jesus es je jestorwen, “soo daut dee, waut doa läwen, nich mea fa sikj selfst läwen, oba fa dän, waut fa äant storf un vom Doot oppjewakjt wort” (2. Kor. 5:15). Wie wellen secha nich Jehowa sien grootet Metleet vejäfs aunjenomen haben, oba ut Dankboakjeit soo väl aus mäajlich en sienen Deenst doonen (läs 2. Korinta 6:1).

14. Woo kjenn wie wiesen, daut wie opp Jehowa siene Aunwiesungen vetruen?

¹⁴ Woo kjenn wie noch wiesen, daut wie dankboa sent fa Jehowa siene Leew? Doaderch, daut wie opp siene Aunwiesungen vetruen. Woo doo wie daut? Wan wie waut entscheiden motten – biejlikj aus wie ons sellen huach utlieren loten ooda waut vonne Oabeit wie aunnämen –, dan mott wie doano kjikjen, waut Jehowa sikj von ons wenscht (1. Kor. 10:31; 2. Kor. 5:7). Wan wie soone Entscheidungen moaken, waut wiesen, daut wie Gloowen haben, dan passieet doa waut Besondret: Ons Gloowen aun Jehowa un ons Veheltnis met am woaren stoakja un wie sent ons noch sechra äwa onse Hopninj (Reem. 5:​3-5; Jak. 2:​21-22).

15. Woo kjenn wie onse Dankboakjeit wiesen en de Tiet von daut Owentmol?

¹⁵ Doa es noch eene aundre Wajch, woo wie onse Dankboakjeit fa Jehowa siene Leew wiesen kjennen. Daut es, wan wie de Tiet von daut Owentmol utnutzen, om Jehowa to wiesen, daut wie fa daut Leesjelt dankboa sent. Wie wellen doano hanplonen, bie daut Owentmol to sennen, un uk aundre enloden (1. Tim. 2:4). Vetal dee, waut du enloden deist, waut bie daut Owentmol krakjt  jedonen woat. De Videos Wuarom must Jesus stoawen? un Denkjt aun Jesus sienen Doot opp jw.org kjennen die doabie halpen. De Eltestasch sellen onbedinjt soone enloden, waut nich mea prädjen gonen. Stal die väa, woo väl Freid daut em Himmel un oppe Ieed jäwen woat, wan eenje von Jehowa siene veloarne Schop jeholpen woat, trigj no Hus to komen! (Luk. 15:​4-7). Bie daut Owentmol well wie ons nich bloos unjarenaunda bejreessen, oba besonda soone, waut doa toom ieeschte Mol hankomen ooda waut doa aul lang nich jewast sent. Wie wellen, daut dee sikj werkjlich oppjenomen feelen (Reem. 12:13).

16. Wuarom sell wie doaräwa nodenkjen, mea em Deenst to doonen en de Tiet von daut Owentmol?

¹⁶ Wurscht du mea em Deenst doonen kjennen en de Tiet von daut Owentmol? Dauts eene feine Wajch, woo wie onse Dankboakjeit fa aules wiesen kjennen, waut Gott un Christus fa ons jedonen haben. Je mea wie em Deenst fa Jehowa doonen, je kloara kjenn wie daut seenen, daut hee ons biestonen deit, un doaderch woat ons Vetruen opp am stoakja woaren (1. Kor. 3:9). Vejät daut nich, de Bibelvarzhen fa daut Owentmol to läsen, waut en daut Heft Jieda Dach en de Schreft forschen ooda em Schoolheft aunjejäft sent. Veleicht woascht du die soogoa eenich, dise Bibelvarzhen en dien perseeneljet Studium neiwa to unjasieekjen.

17. Waut moakt Jehowa schaftich? (See uk daut Hock “ Woo kjenn wie onse Dankboakjeit wiesen fa Jehowa siene Leew?”)

¹⁷ Veleicht kaust du wäajen diene Omstend nich aules nokomen, wua dis Artikjel von rät. Oba hool em Denkj, daut Jehowa daut nich vejlikjt, waut du doonen kaust met daut, waut aundre doonen kjennen. Hee sitt, waut du em Hoat hast. Hee es schaftich, wan hee sitt, daut du von Hoaten dankboa best fa sien wundascheenet Jeschenkj, aulsoo daut Leesjelt (1. Sam. 16:7; Mar. 12:​41-44).

18. Wuarom sent wie Jehowa Gott un Jesus Christus soo dankboa?

¹⁸ Dauts bloos wäajen daut Leesjelt, daut onse Sinden kjennen vejäft woaren, daut wie kjennen Frind sennen met Jehowa un daut wie de Hopninj haben, noch mol fa emma to läwen. Well wie emma onse Dankboakjeit wiesen fa Jehowa siene Leew, waut am bat doa brocht, ons aul dise scheene Sachen to jäwen (1. Joh. 4:19). Well wie uk onse Dankboakjeit fa Jesus wiesen, dee ons soo sea leewd un fa ons storf! (Joh. 15:13).