1. Wuarom woa wie no Filippa 2:3 no leichta met aundre Frind sennen, wan wie deemootich sent?

WIE sent deemootich un jehorchen Jehova, wiels hee emma weet, waut daut baste fa ons es (Efs. 4:22-24). Deemootich sennen halpt ons, daut wie dolla om Jehova sienen Wellen todoonen sent aus om daut, waut wie selfst wellen. Un daut halpt ons uk, daut wie aundre fa hecha talen aus ons selfst. Soo kjenn wie Frind sennen met Jehova un uk met onse Gloowesbreeda (läs Filippa 2:3).

2. Waut wist de Apostel Paulus, un von waut woa wie en disen Artikjel räden?

² Wan wie nich oppaussen, dan kjenn wie krakjt soo stolt un ekjich woaren aus väle en dän Soton siene Welt. * Eenje en de Aposteltiet hauden soonen Trubbel un doawäajen schreef de Apostel Paulus aun de Reema: “Ekj [saj] junt, een jieda eenem, denkjt von junt nich mea aus jie werkjlich sent, oba schazt junt doano auf, aus Gott junt Gloowen jeschonken haft” (Reem. 12:3). Paulus wist, daut wie ons selfst waut räakjnen sullen. Oba de Deemoot woat ons halpen, daut wie nich too väl von ons hoolen. En disen Artikjel woa wie von dreeatlei räden, wua de Deemoot ons halpt, de rajchte Enstalunk to haben. Daut es (1) en de Ehe un (2) wan wie en Gott sien Volkj besondre Oppgowen kjrieen un (3) wan wie Bilda em Internet nendoonen.

3. Wuarom kjennen doa Schwierichkjeiten em Ehestaunt oppkomen, un waut denkjen eenje dan?

³ Jehova wull, daut de Befriede daut sull scheen gonen. Oba wäajen wie aula onvolkomen sent, kjennen doa Schwierichkjeiten oppkomen. Paulus schreef je, daut de befriede Menschen eenjemol Trubbel haben wudden (1. Kor. 7:28). Eenje sent sikj emma oneenich un denkjen dan woomäajlich, see haben sikj nich met dän rajchten befriet. Väle en de Welt wudden dee dan tooroden, bloos aun sikj selfst to denkjen un sikj fuaz scheeden to loten, daut see wada kunnen schaftich sennen.

4. Fa waut mott wie oppaussen?

⁴ Wie motten oppaussen, daut wie nich ontofräd woaren met onsen Ehestaunt. Wie weeten, daut eena sikj no de Schreft no bloos kaun scheeden loten wäajen Ehebruch, ooda Huararie (Mat. 5:32). Wan wie aulsoo soone Trubbels haben, wua Paulus von räd, dan sell wie nich stolt sennen un nich denkjen: “Kjrie ekj en mienen Ehestaunt aules, waut mie fält? Kjrie ekj de Leew, waut ekj vedeent hab? Wudd ekj met eenen aundren Poatna schaftja sennen?” Bie aul dise Froagen wudd eena bloos aun sikj denkjen un nich aun sienen Poatna. De Welt well die tooroden, daut du bloos aun daut denkjen saust, waut die schaftich moakt, endoont waut dan met dienen Ehestaunt passieet. Oba Gott sajcht: “Jie sellen nich bloos no daut kjikjen, waut junt selfst intressieet, oba uk no daut, waut dän näakjsten intressieet” (Filip. 2:4). Jehova well, daut du met dienen Ehepoatna toopblifst un nich, daut du die scheeden latst (Mat. 19:6). Jehova well uk, daut du daut ieeschte aun am denkjst un nich aun die selfst.

5. Woo sellen de Ehepoatna sikj no Efeesa 5:33 no behaundlen?

⁵ Ehelied sellen sikj unjarenaunda leewen un achten (läs Efeesa 5:33). De Schreft  lieet, daut wie dolla sellen doarom todoonen sennen, aundre waut to jäwen aus to nämen (Apj. 20:35). Waut woat Ehelied halpen, sikj unjarenaunda to leewen un to respakjten? De Deemoot. Eene Ehefru ooda een Ehemaun, waut deemootich es, woat nich sienen ieejnen Nutzen sieekjen, oba “daut, waut sienem näakjsten goot deit” (1. Kor. 10:24).

6. Waut kjenn wie von daut lieren, waut Steven un Stephanie sajen?

⁶ De Deemoot haft aul väl Christen jeholpen, een scheenret befriedet Läwen to haben. Een Ehemaun, waut Steven heet, sajcht biejlikj: “Du un dien Ehepoatna motten toopschaufen, besonda wan doa Trubbels oppkomen. Dan woascht du nich denkjen: ‘Waut es fa mie daut baste?’ Oba du woascht denkjen: ‘Waut es fa ons daut baste?’” Siene Fru Stephanie stemt met en. See sajcht: “Kjeena well met wäm toopläwen, waut emma bloos jäajenaun es. Wan wie ons mol nich eenich sent, dan unjasieekj wie, wua de Trubbel häakjemt. Dan doo wie bäden un sieekjen ons waut no un räden äwa dän Trubbel. Wie proowen dän Trubbel to fiksen enne Städ ons to strieden.” Soone Ehelied, waut nich hecha von sikj selfst denkjen, aus daut needich es, woaren väl schaftja sennen.

7. Woo saul een Brooda enjestalt sennen, wan dee eene besondre Oppgow kjricht?

⁷ Aules, waut wie fa Jehova doonen kjennen, es eene Iea fa ons (Psa. 27:4; 84:11). Daut es to lowen, wan een Brooda reed es, mea en Jehova sien Volkj to doonen. De Schreft sajcht je: “Wäa doa sträft Jemeentenleida to woaren sträft no een goodet Aumt” (1. Tim. 3:1). Oba wan een Brooda eene besondre Oppgow kjricht, dan saul dee von sikj nich hecha denkjen, aus daut needich es (Luk. 17:7-10). Dee saul doano sträwen, aundre deemootich to deenen (2. Kor. 12:15).

8. Waut lia wie ut daut, waut Diotrefes, Usija un Absalom deeden?

⁸ De Schreft rät von eenje Menschen, waut too huach von sikj selfst dochten. Diotrefes wia nich bescheiden un wull en de Vesaumlunk “jieren bowenaun stonen” (3. Joh. 9). Usija wort stolt un wull waut fa Jehova doonen, waut nich siene Oppgow wia (2. Chr. 26:16-21). Absalom proowd de Menschen hinjalestich opp siene Sied to kjrieen, wäajen hee wull Kjennich woaren (2. Sam. 15:2-6). Dise Biespels wiesen, daut Jehova soone Menschen nich jleicht, waut no äare ieejne Iea sieekjen (Spr. 25:27). Un met de Tiet kjemt daut emma schlajcht ut, wan eena stolt es un sikj äwa aundre erhäwen well (Spr. 16:18).

9. Waut kjenn wie von Jesus lieren?

⁹ Jesus wia verheipts nich stolt. “Wan hee Gott uk änlich wia, docht hee nich doaräwa no, daut hee wull waut en siene Macht kjrieen, waut am nich toostunt, un daut wia, Gott jlikj to sennen” (Filip. 2:6, NW). Jesus es fuaz hinja Jehova un doch denkjt hee nich hecha von sikj selfst, aus daut needich es. Hee säd mol to siene Jinja: “De jerinjsta mank junt, woat de jratsta sennen” (Luk. 9:48). Es daut nich wundascheen, daut wie kjennen met Pionieren, Deenstaumthelpa, Eltestasch un Kjreisoppsechtasch toopschaufen, waut uk deemootich sent, soo aus Jesus? Wan wie Jehova deemootich deenen, dan halp wie met, daut en sien Volkj krakjt dee Leew es, wua dee fäa bekaunt sent (Joh. 13:35).

10. Waut sell wie doonen, wan wie jleewen, daut en de Vesaumlunk Trubbels sent, wua nich rajcht met omjegonen woat?

¹⁰ Waut sell wie doonen, wan wie jleewen, daut enne Vesaumlunk Trubbels sent, wua nich rajcht met omjegonen woat? Dan  sell wie ons nich bekloagen, oba deemootich deejanje unjastetten, waut äwa Gott sien Volkj aunjestalt sent (Heb. 13:17). Daut woat ons leichta faulen, wan wie äwalajen: “Sent de Trubbels opp iernst soo groot, daut doa waut met jedonen mott? Es daut nu de rajchte Tiet? Es daut miene Oppgow, doa waut met to doonen? Well ekj opp iernst methalpen, daut de Vesaumlunk dolla veeent es, ooda well ekj mie selfst eenen grooten Nomen moaken?”

11. Woo kjemt daut ut, wan wie Jehova deemootich deenen, soo aus Efeesa 4:2-3 sajcht?

¹¹ Jehova es daut wichtja, daut siene Deena deemootich un veeent sent, aus daut dee sikj met väl weeten ooda besonda väl jedonen kjrieen. Strenj die aun, Jehova deemootich to deenen, daut de Vesaumlunk noch dolla veeent es (läs Efeesa 4:2-3). Sie drock em Deenst. Proow emma, aundre to halpen un dee goots to doonen. Sie to aulem gaustfrie, endoont aus dee eene besondre Oppgow en Gott sien Volkj haben ooda nich (Mat. 6:1-4; Luk. 14:12-14). Wan du fein met diene Gloowesbreeda toopschaufst, dan woaren dee nich bloos daut seenen, waut du deist, oba uk diene Deemoot.

12. Rot de Schreft ons too, Frind to haben? Laj daut ut.

¹² Jehova well, daut ons daut met onse Frind un Frintschoft scheen jeit (Psa. 133:1). Jesus haud je uk goode Frind (Joh. 15:15). De Schreft wiest, woo ons daut togood kjemt, wan wie woare Frind haben (Spr. 17:17; 18:24). Un dee lieet ons uk, daut daut nich goot es, wan wie ons von aundre oppoat hoolen (Spr. 18:1). Väle jleewen, daut eena äwa Internet een deel Frind finjen kaun, daut eena sikj nich soo auleen feelt.  Oba wuarom mott eena doa uk väasechtich sennen?

13. Wuarom feelen eenje sikj auleen ooda truarich, wan dee sikj aundre äare Bilda em Internet beseenen?

¹³ De Forscha haben rutjefungen, daut deejanje sikj leichta auleen un truarich feelen, waut sikj oppem Fon ooda sestwua tiedenlank aundre äare Bilda beseenen un daut, waut dee doa bieschriewen. Wuarom? Eene Uasoak kaun sennen, daut de Menschen foaken soone Bilda em Internet nendoonen, wua dee waut gaunz besondret beläwen. Woomäajlich sent daut schmocke Bilda von sikj selfst un von äare Frind un von de feine Städen, wua see jewast sent. Wan eena sikj soont besitt, dan kaun eena leicht denkjen, daut eenem sien Läwen nich väl enhelt ooda mau rajcht enoolent es. Eene 19-joasche Sesta säd: “Ekj wort aufjenstich, wan ekj sach, waut de aundre aula fa een scheenet Utgangswäakj jehaut hauden, un ekj wia bloos tus jewast.”

14. Woo kaun 1. Petrus 3:8 ons halpen, wan wie Bilda em Internet nendoonen ooda doa waut bieschriewen?

¹⁴ Daut kaun goot sennen, Bilda em Internet nentodoonen ooda ons dee to beseenen, wiels wie dan biejlikj weeten, waut onse Frind un Frintschoft beläwen. Oba es die oppjefollen, daut väle doa bloos soont nendoonen, wua see met puchen kjennen? Daut späat sikj soo, daut dee bloos wellen, daut aundre no an kjikjen sellen. Eenje schriewen mau rajcht bie äare ieejne Bilda ooda bie aundre äare waut groffet ooda orreinet bie. Wudd wie aus Christen nich leewa sellen deemootich un metfeelent sennen? (Läs 1. Petrus 3:8.)

15. Woo kaun de Schreft ons halpen, daut wie nich stolt sent un nich met ons puchen?

¹⁵ Wie wudden kjennen äwalajen: “Wan ekj Bilda ooda Videos em Internet nendoo ooda doa waut bieschriew, kunnen aundre dan denkjen, daut ekj doamet puchen well? Wudden aundre kjennen aufjenstich woaren?” De Schreft sajcht: “Aules waut en dise Welt es, jeltjierich sennen, hinjaraun sennen no waut de Uagen jankat un sikj groot doonen, daut staumt nich vom Voda. Daut es von dise Welt” (1. Joh. 2:16). En eene aundre Bibel sajcht daut en disen Varsch nich, daut de Menschen “sikj groot doonen”,  oba daut dee “wellen, daut aundre an fa wichtich talen”. Christen wellen nich met sikj puchen. Dee komen daut no, waut de Schreft sajcht, un sieekjen nich “no Iea un aunseenen . . ., wuaderch Aufgonst un Oaja kjemt” (Gal. 5:26). Wan wie deemootich sent, dan woa wie nich stolt sennen un nich met ons puchen, soo aus väle en de Welt daut doonen.

16. Wuarom sell wie nich stolt sennen?

¹⁶ Wie motten lieren, deemootich to sennen, wäajen dee, waut stolt sent, nich rajcht äwa sikj selfst denkjen (Reem. 12:3). Stolte Menschen sent ekjich un opp strieden. Dee äare Enstalunk brinjt an foaken bat doa, daut dee waut sajen ooda doonen, waut an selfst un uk aundre schot. Wan dee sikj nich endren, dan kaun de Soton dee em denkjen veleiden un blint moaken (2. Kor. 4:4; 11:3). Oba een deemootja Mensch haft de rajchte Enstalunk. Soona es utjejlikjt un denkjt rajcht äwa sikj selfst, wiels dee weet, daut aundre am en väl Stekjen äwaläajen sent (Filip. 2:3). Un dee helt uk em Denkj, daut Gott “jäajen de stolte [es], oba de deemootje schenkjt hee to rajchte Tiet Jnod” (1. Pet. 5:5). Dee, waut de rajchte Enstalunk haben, wudden kjeenmol wellen, daut Jehova jäajen an wia.

17. Waut sell wie doonen, daut wie kjennen deemootich bliewen?

¹⁷ De Schreft wiest, daut wie ons “oolet ekj met siene beese Natua un Woakjen” auflajen motten un “eene niee Natua” aunnämen, daut wie kjennen deemootich bliewen. Daut es goanich leicht. Oba wie kjennen daut, wan wie ons unjastonen, woo Jesus krakjt wia, un ons dan aunstrenjen, soo goot aus mäajlich en siene Footspoaren to gonen (Kol. 3:9-10; 1. Pet. 2:21). Wuarom loont sikj daut? Wiels wan wie deemootich sent, woa wie een bätret Famieljenläwen haben un methalpen, daut Eenichkjeit en de Vesaumlunk es, un uk oppaussen, daut wie met onse Bilda em Internet nich puchen. Oba daut wichtichste es, daut Jehova dan aun ons eenen Jefaulen haft un ons säajnen woat.