Ekj wort aune 1954 en de Staut St. Paul, Minnesota, en de Stäts jebuaren. Miene Elren wieren nich rikj uk nich oam un hauden fief Kjinja. Ekj wia daut tweede von daut elste. Wie aula wieren katoolsch un ekj jinkj no eene katoolsche School un holp uk emma dän Priesta enne Kjoakj. Oba von de Schreft wist ekj nich väl. Ekj jleewd doaraun, daut Gott aules jemoakt haud, oba ekj vetrud nich mea oppe Kjoakj.

En daut ieeschte Joa, aus ekj mie fa Jesazessachen utlieren leet, kjeemen Jehova siene Zeijen no mien Hus. Ekj deed jroz wauschen un wia drock un doawäajen säden dee leeftolich, see wudden opp aundatsmol komen. Aus dit Ehepoa wadakjeem, stald ekj dee twee Froagen: “Wuarom haben de schlajchte Menschen daut en dise Welt bäta aus de goode? Un woo kaun eena opp iernst schaftich sennen?” Dee jeewen mie daut Buak Die Wahrheit, die zu ewigem Leben führt un de schmocke jreene Neue-Welt-Übersetzung der Heiligen Schrift. Ekj funk uk een Bibelstudium aun un daut muak mie de Uagen op. Ekj freid mie sea, aus ekj enwort, daut Gott sien Kjennichrikj eene Rejierunk wia, waut met aule Trubbels oppe Ieed een Enj moaken wudd. Mie wia daut kloa, daut de menschelje Rejierungen daut nich kunnen un daut dee sea  väl Ojjerajchtichkjeit, Lieden un Weedoag veuasoakt hauden.

Aunfangs 1982 jeef ekj mie Jehova han un ekj leet mie bie dän Kongress “De Woarheit von daut Kjennichrikj” deepen. Dee wia en een grootet Jebied en St. Paul. Eene Wäakj lota wia ekj dan wada en dit Jebied toom doa mienen Test moaken toom Ofkot woaren. Aunfangs Oktooba leeten se mie dan weeten, daut mien Test fein utjefollen wia un daut ekj nu aus Ofkot schaufen kunn.

Bie dän Kongress “De Woarheit von daut Kjennichrikj” bejäajend ekj Mike Richardson, waut en daut Betel en Brooklyn wia. Dee säd mie, daut see en de Hauptoffiz nu eene Aufdeelunk fa Jesazessachen hauden. Mie foll daut bie, waut de ätiopischa Beaumta no Aposteljeschicht 8:36 no mol jesajcht haud, un ekj docht soo: “Wuarom sull ekj nich en de Aufdeelunk fa Jesazessachen methalpen?” Doawäajen jeef ekj mie aun toom em Betel schaufen.

Miene Elren wieren nich schaftich, daut ekj eent von Jehova siene Zeijen jeworden wia. Mien Voda fruach, woo mie daut aus Ofkot wudd togood komen, wan ekj em Betel schauft. Ekj säd dan to dän, daut ekj doa aus Friewelja schaufen wudd un daut ekj jieda Moonat wudd 75 Dola kjrieen, krakjt soo aus de aundre Betelmetoabeida.

Wiels ekj aul ea berät haud, bie een Jerecht to schaufen, kunn ekj nich fuaz nom Betel komen. Oba vonne 1984 aun wia ekj dan em Betel en Brooklyn, New York. Ekj sull en de Aufdeelunk fa Jesazessachen methalpen. Un daut, waut ekj ea bie daut Jerecht jelieet haud, kjeem mie doa boolt togood.

En Nowamba 1983 koften de Breeda daut Stanley-Theater en Jersey City, New Jersey. Dee fruagen, aus see doa kunnen de Fiadräd un de Wotaruaren oppfreschen, un säden to de Beaumte, daut see daut Stanley-Theater aus een Kongresshus brucken wullen. Doaderch kjeem een Trubbel opp, wiels dit Jebied en eene Jäajent wia, wua bloos Jeschafta wieren, un daut Jesaz säd, daut eena Gotteshiesa bloos doa haben kunn, wua de Menschen wonden. Doawäajen jeewen de Beaumte nich Frieheit, dit Jebied opptofreschen. De Breeda fruagen dan noch eemol, oba dee kjrieejen wada nich Frieheit.

Aus ekj de ieeschte Wäakj em Betel schauft, brocht de Organisazion dise Sach verem Jerecht, om to seenen, aus see nich doch noch kunnen de Frieheit kjrieen. Wiels ekj de latste twee Joa bie een Jerecht en St. Paul, Minnesota, jeschauft  haud, vestunt ekj mie met soone Sachen. Eena von onse Ofkoten säd doa ver daut Jerecht, daut dit Stanley-Theater ea uk aul to veschiednet jebrukt worden wia, biejlikj toom Mowies wiesen ooda fa Sinja. Wuarom wudd eena doa dan nich kjennen Toopkomes haben toom Gott aunbäden? Daut Jerecht unjastunt sikj daut un säden dan, daut de Beaumte von Jersey City ons daut nich aufsajen kunnen, en dit Jebied Gott auntobäden. Dee säden, daut see ons sullen de Frieheit jäwen, daut opptofreschen. Doa kunn ekj toom ieeschte Mol beläwen, woo Jehova daut säajend, wan siene Organisazion daut Jesaz to Help neem toom sien Woakj wiedabrinjen. Ekj wia soo schaftich, daut ekj doabie methalpen kunn!

De Breeda deeden daut Jebied sea oppfreschen un nich mol een Joa lota, aum 8. Septamba 1985, hauden see doa aul daut Schlusstoopkomen fa de 79. Klauss von de Gilead-School. Fa mie wia daut eene Iea, daut ekj bie soone Jesazessachen kunn methalpen un opp dee Wajch Gott sien Kjennichrikj unjastetten. Daut muak mie väl schaftja aus de Oabeit, waut ekj ea aus Ofkot deed. Ekj wudd daut don kjeenmol jedocht haben, fa woo väl Jerechtssachen Jehova mie noch mol brucken wudd.

En de 1980ja Joaren deeden de Doktasch un de Hospitols daut foaken nich respakjten, wan Jehova siene Zeijen kjeen Bloot brucken wullen toom doktren. Daut wia besonda schwoa fa de schwangre Frues, wiels de Rechtasch foaken dochten, daut dee nich daut Rajcht hauden, onen Bloot enlakjen to doktren. Dee säden, daut de Fru stoawen kunn, wan dee nich wudd Bloot enjelakjt woaren, un daut daut Kjint dan wudd motten onen eene Mame oppwaussen.

Dän 29. Dezamba 1988 funk de Sesta Denise Nicoleau sea aun to bleeden, aus see een kjlienet Junkje haud. De Dokta wull ar Bloot enlakjen, wiels daut soo sach, daut see stoawen kunn. Oba Sesta Nicoleau wull daut nich. Dän näakjsten Dach zemorjes fruach daut Hospitol eenen Rechta no Frieheit, daut see ar doch kunnen Bloot enlakjen. De Rechta jeef Frieheit, onen met de Sesta Nicoleau ooda met dee äaren Maun to räden ooda an daut weeten to loten.

Friedach, dän 30. Dezamba, deeden se de Sesta Nicoleau Bloot enlakjen, wan doa uk dee äa Maun un äa Frintschoft bie wieren un doa aula nich met envestonen wieren. Dänselwjen Owent worden dan waut von daut Frintschoft un eent ooda twee Eltestasch faustjenomen. Dee worden beschulcht, daut see sikj hauden rom daut Bad jestalt, daut see de Sesta Nicoleau nich sullen Bloot enlakjen. Sinowent zemorjes, dän 31. Dezamba, wort daut dan en New York City un en Long Island äwa Tellewizhen un äwa Rädio un en de Post bekauntjemoakt, daut dee wieren faustjenomen worden.

 Mondach zemorjes räd ekj dan met eenen Rechta von een hechret Jerecht, waut Milton Mollen heet. Ekj vetald dän aules, waut doa aunjegonen wia, un säd dän, daut de aundra Rechta Frieheit jejäft haud, Bloot entolakjen, onen daut dee met de Sesta jerät haud. Rechta Mollen säd dan, daut ekj no Meddach sull no siene Offiz komen toom wieda äwa de Sach räden. Mien Oppsechta Philip Brumley jinkj dan lota met mie toop doa han. De Rechta haud doa uk dän Ofkot von daut Hospitol hanjekroacht. Daut jinkj doa lud too. Dan opp eemol wees Brooda Brumley mie eenen Zadel, wua bowen stunt, daut ekj mie een bät berujen sull. Daut wia een gooda Rot, wiels ekj sea doaropp schauft to bewiesen, daut de Ofkot von daut Hospitol em orrajchten wia.

Ojjefäa eene Stund lota säd de Rechta Mollen, daut see sikj dän näakjsten Dach zemorjes daut ieeschte om dise Sach kjemren wudden. Aus wie ut de Offiz rutjinjen, säd de Rechta Mollen, daut de Ofkot von daut Hospitol “morjen eenen schwoaren Dach haben” wudd. Daut wudd nich leicht fa dän sennen, wan dee wudd bewiesen wellen, daut daut Hospitol em rajchten jewast wia. Mie späad sikj soo, daut Jehova mie opp dee Wajch wees, daut daut Jerecht opp onse Sied sennen wudd. Daut wia meist nich to jleewen, daut Jehova ons brukt toom sienen Wellen derchfieren.

Wie muaken ons bat lot zeowes reed fa dän näakjsten Dach. Daut Jerechtshus wia nich wiet auf von daut Betel en Brooklyn un de mieeschte, waut en onse kjliene Aufdeelunk fa Jesazessachen schauften, jinjen doa tofoot han. De vea Rechtasch doa horchten sikj de Sach aun un säden dan, daut daut nich rajcht wia, dee Bloot entolakjen. Dee stalden sikj opp de Sesta Nicoleau äare Sied un säden, daut daut Jerecht emma ieescht met dän Kranken räden must, ea dee entscheiden, aus doa waut aun dän jedonen kunn.

Nich lang no daut säd dan mau rajcht daut hechste Jerecht von New York, daut de Sesta Nicoleau rein gaunz wudd daut Rajcht jehaut haben, onen Bloot to doktren. Daut wia daut ieeschte von vea Mol, daut ekj methalpen kunn, wan een huaget Jerecht en de Stäts Froagen unjasocht, waut met Bloot enlakjen to doonen hauden. (See dän Kausten “ Entscheidungen von de hechste Prowinsjerechten en de Stäts”.) Ekj schauft uk met de aundre Ofkoten vom Betel toop, wan daut biejlikj Trubbel jeef met Launt ooda Jebieda ooda  met Ehescheedunk ooda bie wäm de Kjinja wonen sullen.

Ekj bejäajend eene Sesta, waut Dawn heet. See wia jeschieden un trock äare dree Kjinja auleen opp. See deed schaufen, daut see to läwen hauden, un wia uk noch Pionia. Dee haud aul väl schwoaret beläft un mie wia daut sea oppfaulent, woo faust dee aun Jehova wia. Aune 1992, aus wie bie dän Kongress “Daut Licht wiedadroagen” en New York City wieren, fruach ekj ar, aus wie ons wullen bäta kjanen lieren. Un een Joa lota befried wie ons. Daut es een Jeschenkj von Jehova, daut ekj soone jeistelje un oppjebrochte Fru hab. Dawn haft mie de gaunze Tiet, waut wie befriet sent, sea väl goodet jedonen (Spr. 31:12).

Aus wie ons befrieden, wieren de Kjinja 11, 13 un 16 Joa. Wäajen ekj fa dee een gooda Voda sennen wull, läsd ekj mie en onse Bieekja aules no, waut et doa von Steefelren säd, un strenjd mie aun, daut notokomen. Daut wia nich emma leicht, oba mie freit daut sea, daut de Kjinja mie nu aus eenen gooden Frint un leeftoljen Voda aunnämen. De Kjinja kunnen wellich äare Frind no Hus kroagen un wie jleichten daut sea, wan doa soone Häad schaftje junge Menschen rom ons wieren.

Aune 2013 trocken ekj un Dawn no Wisconsin toom onse Elren halpen, wiels dee aul ella jeworden wieren. Ekj docht, ekj wudd nich mea kjennen fa daut Betel schaufen. Oba dee fruagen mie, aus ekj nich wieda met veschiedne Jesazessachen wudd halpen kjennen.

En Septamba 2018 wort ekj en, daut ekj foaken hoosten must, ea ekj waut sajen kunn. De Dokta unjasocht mie, oba dee kunn nich rutfinjen, von wua daut häakjeem. Lota wia ekj bie eenen aundren Dokta un dee säd, daut ekj mol no eenen Narfendokta foaren sull. En Jaunewoa 2019 säd de Narfendokta dan to mie, daut ekj eene schlemme Krankheit haud, waut et nich foaken jeef un waut met de Tiet mienen gaunzen Kjarpa aunjriepen wudd.

Dree Doag lota deed ekj oppem Ies joagen un vebruak mie dan mien rajchtet Hauntjelenkj. Ekj deed aul mien Läwen lank oppem Ies joagen un vestunt mie doa sea goot met. Doaraun wort ekj en, daut miene Musklen aul nich soo oabeiden deeden, aus dee sullen. Ekj wia vewundat, woo bosich daut met miene Krankheit oaja wort. Mie foll daut emma schwanda, mie to bewäajen un to räden un to schlucken.

Mie freid daut sea, daut ekj Jehova siene Organisazion derch miene Oabeit aus Ofkot halpen kunn. Un ekj frei mie uk sea, daut ekj een deel Artikjels fa Doktasch, Rechtasch un Ofkoten schriewen kunn un opp väl Städen oppe Welt Räden hoolen kunn toom wiesen, daut Jehova siene Zeijen daut Rajcht haben, onen Bloot to doktren. Oba doawäajen denkj ekj aun Lukas 17:10. Ekj feel mie uk mau aus een jeweenelja Oabeida un hab bloos jedonen, waut ekj schuldich wia.