1. Waut säd de Apostel Paulus?

DE Apostel Paulus stunt daut too, daut hee sikj eenjemol schwak feeld. Hee säd, daut sien “Kjarpa . . . langsom [vefoll]” un daut am daut schwoa wia, daut rajchte to doonen, un daut Jehova nich emma soo no siene Jebäda horcht, aus hee wudd jedocht haben (2. Kor. 4:16; 12:7-9; Reem. 7:21-23). Paulus säd uk, daut siene Jäajna am fa läach talden, oba hee leet nich too, daut hee sikj wäajen aul daut wieetloos feeld (2. Kor. 10:10-12, 17-18). *

2. Waut fa feinet lieed Paulus no 2. Korinta 12:9-10 no?

² Paulus lieed waut sea feinet: Eena kaun stoakj sennen, wan eena sikj uk schwak feelt (läs 2. Korinta 12:9-10). Jehova säd to Paulus, daut siene “Krauft . . . en schwake Menschen stoakj” wia. Daut bedied, daut Jehova Paulus de Krauft jäwen wudd, waut am fäld. Well wie nu mol seenen, wuarom wie ons daut doa nich sellen met schwoa moaken, wan onse Jäajna ons beleidjen.

3. Wuarom kjenn wie mootich sennen, wan se ons beleidjen?

³ Daut jeit ons nich scheen, wan wie meshaundelt, ooda beleidicht, woaren. Oba wan wie ons too väl Sorjen moaken  wäajen daut, waut de Jäajna äwa ons sajen, dan kjenn wie mootloos woaren (Spr. 24:10, NW). Woo sell wie dan doaräwa denkjen, wan se ons beleidjen? Krakjt soo aus Paulus. Hee säd: “Ekj [sie] mootich wan ekj . . . meshaundelt woa” (2. Kor. 12:10). Wuarom kjenn wie mootich sennen? Wiels wan de Menschen ons beleidjen un vefoljen, dan bewiest daut, daut wie werkjlich Jesus siene Nofolja sent (1. Pet. 4:14). Jesus säd je, daut se siene Nofolja vefoljen wudden (Joh. 15:18-20). Krakjt daut beläwden de Christen ieeschtemma. To jane Tiet jleichten väle daut, woo de Griechen daut hauden, un sagen de Christen fa läach un onkluak aun. Un de Juden talden dän Apostel Petrus un Johanes un uk de aundre Christen fa “ojjeschoolde, jeweenelje Menschen” (Apj. 4:13). Un wiels de Christen sikj nich manke Politikj menjden un nich Soldoten wieren, talden väle dee fa schwak un kjikjten rauf opp dee.

4. Leeten de Christen ieeschtemma sikj von äare Jäajna mootloos moaken? Laj daut ut.

⁴ Leeten de Christen ieeschtemma sikj von äare Jäajna mootloos moaken? Nä. De Apostel Petrus un Johanes biejlikj talden daut fa eene Iea, daut see vefolcht worden, wiels see Jesus nofoljden un aundre von am lieeden (Apj. 4:18-21; 5:27-29, 40-42). De Jinja hauden kjeenen Grunt, sikj to schämen. Dise deemootje Christen deeden väl mea fa de Menschen aus irjenteena von dee äare Jäajna. Eenje von dee schreewen biejlikj Bibelbieekja opp, waut noch emma millionende Menschen halpen un Hopninj jäwen. Un daut Kjennichrikj, wua dee von prädijden, rejieet nu aul em Himmel un woat boolt äwa aule Menschen harschen (Mat. 24:14). Oba met de majchtje reemische Rejierunk, waut jane Christen vefoljd, es daut aul lang vebie. Un dise true Christen sent nu Kjennichs em Himmel. Dee äare Jäajna sent aul lang doot, un wan dee noch mol oppstonen woaren, dan woat krakjt daut Kjennichrikj äwa an rejieren, wua de Christen don von räden, waut see nich lieden kunnen (Opb. 5:10).

5. Wuarom kjikjen de Menschen opp Jehova siene Deena rauf, soo aus Johanes 15:19 sajcht?

⁵ Vondoag dän Dach vespotten eenje ons uk un kjikjen rauf opp ons, wiels dee ons fa onkluak un läach aunseenen. Wuarom? Wäajen wie aundasch sent aus de aundre Menschen. Wie wellen deemootich, leeftolich un jehuarsom sennen. Oba de Welt jleicht soone, waut stolt un jäajenaun sent un fa sikj strieden. Wie menjen ons nich manke Politikj un woaren uk nich Soldot, endoont en waut fa een Launt wie sent. Wäajen wie nich soo sent aus dise Welt, jleewen dee, daut et met ons nuscht enhelt (läs Johanes 15:19; Reem. 12:2).

6. Waut kaun Jehova derch siene Deena doonen?

⁶ De Welt kjikjt opp ons rauf, oba Jehova brukt ons, om butajeweenelje Sachen derchtofieren. Hee lat ons bie daut jratste Prädichtwoakj methalpen, waut et jeemols jejäft haft. Sest kjeena deit soo väl Tietschreften opp soo väl Sproaken äwasaten un utdeelen aus Jehova siene Deena. Un dee halpen millionende Menschen met de Bibel, daut dee äa Läwen vebätren kjennen. Aul dit es bloos met Jehova siene Help mäajlich. Hee brukt siene Deena, waut läach aunjeseenen sent, toom dit butajeweenelje Woakj doonen. Oba stoakjt Jehova uk jiedrem eenen oppoat? Wan jo, waut mott wie dan doonen, daut hee ons halpt? Well wie ons mol dreeatlei  unjastonen, waut wie von dän Apostel Paulus lieren kjennen.

7. Waut kjenn wie von Paulus lieren?

⁷ Waut es daut ieeschte, waut wie von Paulus lieren kjennen? Wie sellen ons em Deenst fa Jehova nich opp onse ieejne Krauft veloten ooda opp daut, waut wie jelieet haben. Paulus wudd sikj goot haben kunt brow doonen un sikj opp sikj selfst veloten. Hee woss en Tarsus opp, waut de Hauptstaut von eene reemische Prowins wia. Tarsus wia eene rikje Staut, wua daut eene bekaunde Uniwersität jeef. Un Paulus wia sea fein utjelieet. Sien Liera wia de judischa Leida Gamaliel, waut huach aunjeseenen wia (Apj. 5:34; 22:3). Un ea Paulus een Christ wort, haud hee uk väl to sajen manke Juden. Hee säd: “Ekj jinkj em Judentum wieda aus väle aundre en miene Tiet” (Gal. 1:13-14; Apj. 26:4). Un doch veleet Paulus sikj nich opp sikj selfst.

8. (a) Woo docht Paulus no Filippa 3:8 no äwa daut, waut hee oppjeef? (b) Wuarom wia Paulus mootich, wan hee schwak wia?

⁸ Paulus jeef wellich Sachen opp, waut de Menschen en de Welt sea wichtich wieren. Hee sach aules, waut hee ea haud, “aus Drakj” aun (läs Filippa 3:8). Paulus kjrieech sea väl Trubbels, wäajen hee Jesus sien Nofolja wort. Sien ieejnet Volkj jleicht am nich mea (Apj. 23:12-14). Un de Reema deeden am schlonen un enstoppen, wan hee selfst uk een Reema wia (Apj. 16:19-24, 37). Paulus wort uk en, daut hee onvolkomen wia un daut am daut sea schwoa foll, daut rajchte to doonen (Reem. 7:21-25). Oba hee jeef nich opp un säd: “Ekj [sie] mootich wan ekj . . . schwak sie”. Wuarom? Wiels hee dan enwort, woo Gott am holp (2. Kor. 4:7; 12:10).

9. Kjenn wie Jehova deenen, wan wie uk nich daut haben, waut de Welt fa wichtich talt? Laj daut ut.

⁹ Halpt Jehova bloos deejanje, waut väl Krauft ooda Jelt haben ooda huach utjelieet sent ooda von eene jewesse Sort Menschen sent? Nä, hee kjikjt nich no  soone Sachen. Mank siene Deena sent “nich väl weise no menschliche Mot, nich väl sea stoakje, nich väle, dee en de Jesalschoft huach [stonen]”. Jehova haft sikj “daut schwake en dise Welt jewält” (1. Kor. 1:26-27). Doawäajen sell wie kjeenmol jleewen, daut wie Jehova nich deenen kjennen. Wie kjennen daut beläwen, daut hee ons de needje Krauft jeft, wan wie uk nich daut haben, waut de Welt fa wichtich talt. Wan wie biejlikj Angst haben fa Jäajna, dan kjenn wie Jehova bäden, daut wie brow sent un fa onsen Gloowen enstonen kjennen (Efs. 6:19-20). Un wan wie eene schwoare Krankheit haben, dan kjenn wie Jehova no Krauft froagen, daut wie kjennen em Deenst drock bliewen. Un jiedatsmol, wan wie enwoaren, daut Jehova ons halpt, dan woat ons Gloowen jrata woaren un wie woaren stoakja woaren.

10. Wuarom sell wie äwa Gott siene true Deena ut de Bibeltiet studieren, biejlikj äwa dee, wua Hebräa 11:32-34 von rät?

¹⁰ Paulus studieed flietich de Schreft. Hee lieed väl von daut, waut hee doa von Gott siene true Deena läsd. Un aus Paulus aun de Hebräa schreef, rod hee dee too, daut see äwa dise goode Biespels nodenkjen sullen (läs Hebräa 11:32-34). Eent von dee wia de Kjennich David. Hee wort von siene Fiend vefolcht un uk von soone, waut ea siene Frind wieren. Wan wie ons David siene Jeschicht unjastonen, dan woa wie seenen, wuarom Paulus daut soo väl Krauft jeef, äwa David notodenkjen. Un wie woaren uk seenen, woo wie Paulus nodoonen kjennen.

11. Wuarom leet daut soo, aus wan daut met David nuscht enhilt? (See daut Bilt oppe väaschte Sied.)

¹¹ De stoakja Kjrichsmaun Goliat docht, daut et met David nuscht enhilt. Aus hee dän sach, “veacht hee am”, wiels hee väl jrata wia aus David un bätret Kjrichsjereetschoft haud un sikj bäta met kjamfen vestunt. Un David wia noch junk un daut sach doa nich no, daut hee reed wia toom kjamfen. Oba en Werkjlichkjeit wia David stoakj, wiels hee sikj opp Jehova veleet. Un Jehova jeef am de Krauft, daut hee Goliat jewennen kunn (1. Sam. 17:41-45, 50).

12. Waut haud David noch fa eenen Trubbel?

¹² Oba doa wia noch een aundra Trubbel, waut David haud kunt schwak un mootloos moaken. Jehova haud Saul toom Kjennich äwa Israel jemoakt un David deend dän tru. Ieeschtlich räakjend de Kjennich Saul am väl. Oba dan wort hee stolt un wia David aufjenstich. Saul behaundeld David schlajcht un wull dän mau rajcht ombrinjen (1. Sam. 18:6-9, 29; 19:9-11).

13. Waut deed David, aus de Kjennich Saul am ojjerajcht behaundeld?

¹³ De Kjennich Saul behaundeld David ojjerajcht, oba David wees dän doawäajen Respakjt, wiels Jehova dän aunjestalt haud (1. Sam. 24:7). Hee jeef Jehova kjeenmol de Schult fa daut schlajchte, waut Saul deed. David veleet sikj doaropp, daut Jehova am Krauft jäwen wudd, om met disen grooten Trubbel foadich to woaren (Psa. 18:1-2).

14. En waut fa Stekjen jinkj dän Apostel Paulus daut biejlikj soo aus David?

¹⁴ Dän Apostel Paulus jinkj daut biejlikj soo aus David. Paulus siene Jäajna wieren väl stoakja aus hee. Een deel  aunjeseene Leidasch kunnen am schlajcht lieden. Dee leeten am foaken vekjielen un enstoppen. Soo aus David wort Paulus von soone schlajcht behaundelt, waut rajcht jesajcht siene Frind sennen sullen. Soogoa en de Christenvesaumlunk stalden eenje sikj jäajen am (2. Kor. 12:11; Filip. 3:18). Oba Paulus leet sikj von aul daut nich opphoolen. Aun waut wia daut to seenen? Hee hieed nich opp to prädjen, wan et uk Jäajenstaunt jeef. Hee stunt de Breeda un Sestren wieda bie, wan dee am uk aunschmäaden. Un daut wichtichste wia, daut hee Gott sien Läwen lank tru bleef (2. Tim. 4:8). Wäajen Paulus sikj opp Jehova veleet un nich opp siene ieejne Krauft, kunn hee met groote Trubbels foadich woaren.

15. Waut well wie doonen, un woo kjenn wie daut?

¹⁵ Doonen diene Schoolpoatna ooda Oabeitspoatna ooda dien Frintschoft, waut nich Jehova siene Zeijen sent, die beleidjen ooda vefoljen? Ooda haft die wäa von de Vesaumlunk mol schlajcht behaundelt? Dan wurscht du kjennen aun David un Paulus denkjen. Du kaust wieda “goodet [doonen], om daut beese unjatokjrieen” (Reem. 12:21). Wie wellen onse Jäajna nich dootmoaken, soo aus David daut met Goliat deed. Oba wie wellen dee halpen, daut dee Jehova un de Schreft kjanen lieren. Daut doo wie, wan wie dee äare Froagen met de Schreft beauntwuaten un met soone leeftolich un respakjtvoll omgonen, waut ons schlajcht behaundlen, un wan wie mau rajcht onse Fiend goots doonen (Mat. 5:44; 1. Pet. 3:15-17).

16-17. Waut deed Paulus kjeenmol vejäten?

¹⁶ Ea de Apostel Paulus een Christ wort, wia hee een schlajchta junga Maun, waut Christus siene Nofolja vefoljen deed (Apj. 7:58; 1. Tim. 1:13). Jesus selfst kjeem doafäa opp, daut Paulus, waut don Saul heet, de Christen nich lenja vefoljen kunn. Hee räd von utem Himmel to Paulus un muak dän blint. Daut Paulus wada seenen kunn, must hee krakjt dee Menschen no Help  froagen, waut hee ea vefolcht haud. Hee wia deemootich un leet sikj von eenen Jinja halpen, waut Hananias heet (Apj. 9:3-9, 17-18).

¹⁷ Paulus wort lota sea bekaunt manke Christen, oba hee vegaut daut kjeenmol, waut Jesus am oppem Wajch no Damaskus jelieet haud. Paulus bleef deemootich un leet sikj wellich von de Breeda un Sestren halpen. Hee säd mau rajcht, daut dee fa am “een Troost jewast” wieren (Kol. 4:10-11).

18. Wuarom well wie ons eenjemol nich von aundre halpen loten?

¹⁸ Waut kjenn wie von Paulus lieren? Aus wie Jehova siene Deena kjanen lieeden, leet wie ons secha wellich von aundre halpen, wiels wie wisten, daut wie noch soo aus Kjinja wieren, waut väl lieren musten (1. Kor. 3:1-2). Oba woo es daut nu? Sent wie noch emma reed, ons von aundre halpen to loten, wan wie Jehova uk aul lang deenen un väl Erfoarunk haben? Lot wie ons uk von soone halpen, waut noch nich soo lang en de Woarheit sent? Jehova brukt foaken de Breeda un Sestren toom ons stoakjen (Reem. 1:11-12). Wan wie daut em Denkj hoolen, dan kaun Jehova ons derch an Krauft jäwen.

19. Wuarom kunn Paulus soo väl doonen?

¹⁹ Wuarom kunn Paulus soo väl doonen, aus hee ieescht een Christ wia? Wiels hee jelieet haud, daut et nich doaropp aunkjeem, woo stoakj, rikj ooda huach utjelieet eena wia ooda von wua eena häakjeem. Daut wia väl wichtja, daut eena deemootich wia un opp Jehova vetrud. Well wie aula Paulus nodoonen un ons (1) opp Jehova veloten un (2) von de Menschen ut de Bibeltiet lieren un ons (3) von onse Gloowesbreeda halpen loten. Dan woat Jehova ons Krauft jäwen, wan wie ons uk schwak feelen!