1. Waut moakt ons no 3. Johanes 3-4 no schaftich?

KAUST du die väastalen, woo schaftich de Apostel Johanes wia, aus hee hieed, daut deejanje Jehova tru deenden, waut hee haud jeholpen de Woarheit kjanen to lieren? Fa am wieren dee soo aus siene Kjinja un hee schauft sea doaropp, daut dise true Christen em jeisteljen stoakja worden. Un wie sent uk schaftich, wan onse Kjinja ooda onse Bibelstudiums sikj Jehova hanjäwen un am tru deenen (läs 3. Johanes 3-4).

2. Wuarom schreef Johanes siene dree Breew?

² Aune 98 n. Chr. wond Johanes veleicht en Efesus ooda doa dicht bie. Woomäajlich trock hee doa han, nodäm aus hee von de Insel Patmos trigjkjeem, wua hee faust jewast wia. Ojjefäa en dee Tiet brocht Jehova sien heilja Jeist am bat doa, dree Breew to schriewen. Dise Breew sullen de true Christen halpen, wieda aun Jesus to jleewen un no de Woarheit to läwen.

3. Waut fa Froagen woa wie derchnämen?

³ De aundre Apostel wieren aul aula jestorwen un Johanes muak sikj Sorjen, wiels doa faulsche Liera de Vesaumlungen veleiden wullen (1. Joh. 2:18-19, 26). * Dise Aufjefolne säden, daut see Jehova kjanden, oba dee jehorchten nich siene Jebooten. Well wie mol seenen, waut Gott Johanes oppschriewen leet. Un wie woaren dree Froagen derchnämen: Waut bediet daut, no de Woarheit to läwen? Waut kaun ons daut schwoa moaken? Un woo kjenn wie ons unjarenaunda halpen, en de Woarheit to bliewen?

4. Waut mott eena no 1. Johanes 2:3-6 un 2. Johanes 4, 6 no doonen, wan eena no de Woarheit läwen well?

⁴ Daut eena no de Woarheit läwen kaun, mott eena de Woarheit ut Gott sien Wuat kjanen lieren. Un dan mott eena Gott jehorchen un “siene Jebooten hoolen” (läs 1. Johanes 2:3-6; 2. Johanes 4, 6). Jesus jehorcht Jehova en aules. Doawäajen mott wie soo goot aus mäajlich en Jesus siene Footspoaren gonen, wan wie Jehova jehorchen wellen (Joh. 8:29; 1. Pet. 2:21).

5. Äwa waut mott wie ons secha sennen?

⁵ Daut wie nich von de Woarheit äwa Jehova un Jesus aufkomen, mott wie ons secha sennen, daut Jehova emma de Woarheit sajcht un daut uk aules, waut de Schreft sajcht, woa es. Un wie motten ons uk secha sennen, daut Jesus de vesproakna Messias es. Vondoag dän Dach jleewen väle daut nich, daut Jesus de Kjennich von Gott sien Kjennichrikj es. Johanes säd, daut daut “väle Veleida” jäwen wudd, waut deejanje teischen wudden, waut sikj en de Woarheit nich secha wieren (2. Joh. 7-11). Johanes schreef: “Wäa doa sajcht, daut Jesus nich de Christus es, es daut nich een Lieeja?” (1. Joh. 2:22). Wie motten Gott sien Wuat studieren, daut ons kjeena teischen kaun. Bloos doaderch kjenn wie Jehova un Jesus werkjlich kjanen lieren (Joh. 17:3). Un dan woa wie ons secha sennen, daut wie de Woarheit haben.

6. Fa waut motten junge Menschen oppaussen?

⁶ Jieda Christ mott oppaussen, daut dee nich derch menschelje Iedeeen veleit woat (1. Joh. 2:26). De junge Menschen motten besonda oppaussen. Eene fraunzeesische Sesta, waut Alexia * heet un 25 Joa es, sajcht: “Aus ekj noch no de School jinkj, lieed ekj doa väl von de Ewoluzion un von aundre menschelje Iedeeen. Daut brocht mie oppem Twiewel, wäajen ekj daut eenjemol jleicht, waut ekj doa lieed. Oba ekj wull nich eefach de Liera jleewen, onen mie daut to unjastonen, waut Jehova to sajen haud.” Alexia studieed dan daut Buak Das Leben — Wie ist es entstanden? Durch  Evolution oder durch Schöpfung?. No een poa Wäakj haud see kjeenen Twiewel mea. Alexia sajcht: “Ekj funk daut selfst ut, daut de Bibel de Woarheit säd un daut mie daut wudd Freid un Fräd brinjen, wan ekj no dee läwd.”

7. Fa waut mott wie oppaussen, un wuarom?

⁷ De jinjre uk de elre Christen motten oppaussen, daut dee nich bloos sajen, daut dee Jehova deenen, oba plietsch waut orrajchtet doonen. Johanes muak daut dietlich, daut wie nich een orreinet Läwen fieren kjennen un no de Woarheit läwen (1. Joh. 1:6). Wan wie Gott jefaulen wellen, dan mott wie em Denkj hoolen, daut hee aules enwoat, waut wie doonen. Wie kjennen kjeene Sind plietsch hoolen, wiels hee aulmols aules sitt (Heb. 4:13).

8. Woo sell wie nich denkjen?

⁸ Wie sellen nich soo äwa de Sind denkjen, aus de Welt deit. De Apostel Johanes schreef: “Wan wie sajen, wie haben kjeene Sind, dan lieej wie ons selfst waut väa” (1. Joh. 1:8). En Johanes siene Tiet säden de Aufjefolne, daut eena waut orrajchtet doonen kunn un doawäajen noch Frint met Gott sennen. Un väl Menschen vondoag dän Dach haben daut krakjt soo tohoolen. Dee sajen, daut see aun Gott jleewen, oba dee denkjen nich soo äwa de Sind, aus Jehova deit, besonda wan daut om daut Jeschlajchtsläwen jeit. Dee denkjen, daut daut nich orrajcht es, wan eena daut deit, waut eenem jankat.

9. Woo kjemt junge Menschen daut togood, wan see daut doonen, waut no de Schreft no rajcht es?

⁹ Besonda fa junge Menschen es daut schwoa, rajcht äwa daut Jeschlajchtsläwen to denkjen, wan de Schoolpoatna ooda Oabeitspoatna daut nich doonen. Daut es, waut Aleksandar beläwd. Hee sajcht: “Eenje Mejalen en de School wullen mie bat doa brinjen, daut ekj mie met an veläwd.  Dee säden mau rajcht, daut ekj Mana jleichen wudd, wäajen ekj nich eene Mejal haud.” Veleicht beläfst du uk mol soont. Oba wan du fa dienen Gloowen ensteist un daut deist, waut no de Schreft no rajcht es, dan es die daut toom gooden. Du woascht ennalich Fräd haben un du kaust Frint met Jehova bliewen un kaust die väl Sorjen un Krankheiten spoaren. Un jiedatsmol, wan du en eene Vesieekjunk tru blifst, woat die daut leichta sennen, daut rajchte to doonen. Denkj doaraun, daut daut, waut de Welt äwa daut Jeschlajchtsläwen denkjt, en Werkjlichkjeit von dän Soton kjemt. Un wan du aundasch denkjst aus de Welt, dan kaust du “dän beesen” jewennen (1. Joh. 2:14).

10. Woo halpt 1. Johanes 1:9 ons, daut wie Jehova met een rujet Jewessen deenen kjennen?

¹⁰ Wie weeten, daut Jehova daut Rajcht haft ons to sajen, waut orrajcht es. Un wie strenjen ons aun, soont nich to doonen. Un wan wie mol eene Sind begonen, dan bäd wie to Jehova un bekjanen daut (läs 1. Johanes 1:9). Un wan daut eene schwoare Sind es, dan froag wie de Eltestasch no Help, waut Jehova aunjestalt haft, sikj om ons to kjemren (Jak. 5:14-16). Oba wie sellen ons daut nich too schwoa moaken äwa Fäla, waut wie ea jedonen haben. Wuarom nich? Wiels ons leeftolja Voda Jehova doafäa jesorcht haft, daut sien Sän fa ons storf. Doaderch kjennen ons de Sinden vejäft woaren. Un wan Jehova vesprakjt, daut hee deejanje vejeft, waut een Leetsennen haben, dan deit hee daut uk. Doawäajen kjenn wie Jehova met een rujet Jewessen deenen (1. Joh. 2:1-2, 12; 3:19-20).

11. Woo kjenn wie ons fa soone Lieren beschitzen, waut ons schoden kjennen?

¹¹ Wie sellen ons nich met Aufjefolne äare Lieren aufjäwen. De beesa Fient haft noch emma doaropp jeschauft, de true  Christen derch oppjemoakte Jeschichten oppem Twiewel to brinjen. Doawäajen mott wie weeten, aun waut daut to kjanen es, aus eene Jeschicht woa es ooda nich. * Onse Jäajna vetalen woomäajlich Läajes äwa Internet toom ons von Jehova un von onse Breeda aufbrinjen. Denkj doaraun, daut soone Läajes en Werkjlichkjeit vom Fient komen, un horch doa nich no! (1. Joh. 4:1, 6; Opb. 12:9).

12. Wuarom sell wie ons aunstrenjen, onsen Gloowen to stoakjen?

¹² Woo kjenn wie dän Soton wadastonen? Wie motten daut lieren, noch mea opp Jesus to vetruen un doaropp, woo hee Jehova sienen Wellen derchfieren woat. Un wie motten ons uk opp deejanje veloten, waut Jehova vondoag dän Dach äwa siene Organisazion aunjestalt haft (Mat. 24:45-47). Wan wie pinkjlich Gott sien Wuat studieren, dan woat ons Gloowen stoakja woaren. Dee woat dan soo sennen aus een Boom, waut deepe Wartlen haft. Paulus räd von biejlikj soowaut, aus hee no de Vesaumlunk en Kolossä schreef. Hee säd: “Soo aus jie dän Harn Christus Jesus aunjenomen haben, doano läft nu uk en am. Siet en am faustjewartelt un oppjebut un faust em Gloowen” (Kol. 2:6-7). Wan wie ons aunstrenjen, onsen Gloowen to stoakjen, dan kjennen de beesa Fient ooda siene Helpa ons nich von de Woarheit aufbrinjen (2. Joh. 8-9).

13. Opp waut sell wie ons reedmoaken, un wuarom?

¹³ Wie motten ons doaropp reedmoaken, daut de Welt ons schlajcht lieden kaun (1. Joh. 3:13). Johanes sajcht je, “daut de gaunze Welt vom beesen beharscht woat” (1. Joh. 5:19). Un je noda daut Enj kjemt, je wutja woat de Soton (Opb. 12:12). Hee prooft, ons hinjalestich opp siene Sied to kjrieen, biejlikj derch de Aufjefolne äare Läajes ooda doaderch, daut wie waut orreinet doonen. Un hee jript ons uk jlikjtoo aun, biejlikj derch groote Vefoljunk. De Soton weet, daut hee mau weinich Tiet haft, om ons Prädichtwoakj opptohoolen ooda ons vom Gloowen auftobrinjen. Doawäajen wundat ons daut nich, daut ons Woakj en väl Lenda veboden es ooda nich en aule Stekjen frie es. Oba onse Breeda un Sestren en dise Lenda bliewen doawäajen tru. Dee bewiesen, daut wie jewennen kjennen, endoont waut de Soton Jehova sien Volkj aundeit!

14. Woo kjenn wie onse Breeda un Sestren halpen, en de Woarheit to bliewen?

¹⁴ Daut wie onse Breeda un Sestren halpen kjennen, en de Woarheit to bliewen, mott wie dee Metjefeel wiesen (1. Joh. 3:10-11, 16-18). Wie motten ons en goode un uk en schwoare Tieden unjarenaunda leewen. Wurscht du biejlikj wäm treesten ooda halpen kjennen, waut truat, wäajen doa wäa jestorwen es? Ooda weetst du von Gloowesbreeda, waut derch een Owwada ooda Ieedbäben Schoden jekjräajen haben un Help brucken toom äare Hiesa ooda Vesaumlungshiesa wada oppbuen? Wie kjennen dee met Wieed wiesen, daut wie an leewen un Metjefeel haben, oba noch wichtja es, daut wie uk waut fa dee doonen.

15. Waut sell wie no 1. Johanes 4:7-8 no doonen?

¹⁵ Wan wie aundre Leew wiesen, dan doo wie krakjt daut, waut ons leeftolja himlischa Voda deit (läs 1. Johanes 4:7-8). Eene goode Wajch toom Leew wiesen es, daut wie ons unjarenaunda vejäwen. Veleicht  frajcht ons mol wäa om togoodhoolen, wäajen dee ons beleidicht haft. Dan kjenn wie dän Leew wiesen, wan wie dän vejäwen un von de Sach vejäten (Kol. 3:13). Een Brooda, waut Aldo heet, wia sea beleidicht, aus een aundra Brooda, waut hee väl räakjend, waut schlajchtet äwa siene Sort Menschen säd. Aldo sajcht: “Ekj bäd sea, daut Jehova mie halpen sull, nich schlajcht äwa disen Brooda to denkjen.” Oba Aldo deed noch waut. Hee fruach dän Brooda, aus see kunnen toop em Deenst gonen. Aus see doa dan toop wieren, vetald Aldo am daut, woo schlajcht hee sikj doaräwa feeld, waut de Brooda jesajcht haud. Aldo sajcht: “Aus de Brooda daut enwort, woo wee mie daut deed, fruach hee om togoodhoolen. Ekj kunn daut aun siene Stemm hieren, woo leet am daut wia. No daut wia wie wada goode Frind un kunnen von de Sach vejäten.”

16-17. To waut sell wie ons eenich sennen?

¹⁶ De Apostel Johanes räakjend siene Breeda sea väl un wull, daut dee eenen stoakjen Gloowen hauden. Daut es aun dän Rot to seenen, waut hee an derch siene dree Breew jeef. Es daut nich scheen to weeten, daut soone leeftolje Mana un Frues aus hee met dän heiljen Jeist jesaulft worden toom met Jesus toop em Himmel rejieren? (1. Joh. 2:27).

¹⁷ Well wie ons daut to Hoaten nämen, waut wie en disen Artikjel jelieet haben. Wie wellen no de Woarheit läwen un Jehova en aules jehorchen. Studia sien Wuat un vetru opp daut, waut daut sajcht. Stoakj dienen Gloowen aun Jesus. Pauss opp fa de menschelje Iedeeen un fa de Aufjefolne äare Läajes. Proow nich, plietsch waut orrajchtet to doonen, un horch nich no dee, waut die veleiden wellen. Läw soo, aus Jehova daut haben well. Doo dee vejäwen, waut die velazt haben, un halp deejanje, waut daut fält. Opp dee Wajch kjenn wie ons unjarenaunda halpen, em Gloowen stoakj to bliewen. Un dan woa wie wieda kjennen no de Woarheit läwen, wan doa uk Schwierichkjeiten oppkomen.