1. Woo kaun daut utkomen, wan eenje bäta sennen wellen aus de aundre?

VONDOAG dän Dach denkjen väle bloos aun sikj un wellen bäta sennen aus de aundre. Een Jeschaftsmaun es woomäajlich bloos doarom todoonen, aundre doltoranen, daut hee selfst no bowen kjemt. Een Sportspäla velazt veleicht eenen aundren, daut hee selfst jewennen kaun. Un een Schiela, waut bie eene bekaunde Uniwersität studieren well, es woomäajlich nich opprechtich, wan dee eenen Test utfelt. Wie weeten, daut soont gaunz orrajcht es un to de Woakjen von daut Fleesch jehieet (Gal. 5:19-21). Oba kaun daut sennen, daut eenje von Jehova siene Deena daut goanich enwoaren, daut see bäta sennen wellen aus de aundre, un aundre uk doatoo veuasoaken? Wie motten ons met dise Froag aufjäwen, wiels wan doa wäa soont deit, dan kaun daut Spoolungen en de Vesaumlunk jäwen.

2. Von waut haundelt dis Artikjel sikj?

² En disen Artikjel woa wie unjasieekjen, wuarom wie jewesset doonen. Wie woaren uk seenen, waut ons bat doa brinjen kaun, daut wie wellen bäta sennen aus onse Breeda. Un wie woaren von true Mana un Frues von de Bibeltiet räden, waut nich soo aus daut wieren.

3. Äwa waut vonne Froagen sell wie nodenkjen?

³ Daut es goot, wan wie emma wada mol doaräwa nodenkjen, wuarom wie jewesset doonen. Wie wudden kjennen  äwalajen: “Feel ekj mie bloos goot, wan ekj bäta sie aus de aundre? Schauf ekj sea fa de Vesaumlunk, wiels ekj doa de basta sennen well ooda weens bäta aus aundre Breeda un Sestren? Ooda well ekj Jehova mien bastet jäwen?” Wuarom sell wie äwa soont nodenkjen? See wie mol, waut Gott sien Wuat sajcht.

4. Wuarom sell wie ons nich met aundre mäten, soo aus Galata 6:3-4 sajcht?

⁴ De Schreft sajcht, daut wie ons nich met aundre mäten sellen (läs Galata 6:3-4). Wuarom nich? Wan wie denkjen, daut wie bäta sent aus onse Breeda, dan kjenn wie leicht stolt woaren. Oba wan wie ons fa schlajchta talen aus dee, dan woa wie secha mootloos. Beides wudd nich utjejlikjt sennen (Reem. 12:3, NW). Katerina * es eene Sesta, waut en Griechenlaunt wont. See sajcht: “Ekj deed mie emma met soone vejlikjen, waut schmocka leet ooda bäta prädjen kunnen ooda mea Frind hauden aus ekj. Un dan feeld ekj mie nuscht wieet.” Wie sellen em Denkj hoolen, daut Jehova ons no sikj jetrocken haft, wäajen wie am leewden un no sienen Sän horchen wullen un nich, wäajen ons soo schmock leet ooda wie soo fein räden kunnen ooda soo väl Frind hauden (Joh. 6:44; 1. Kor. 1:26-31).

5. Waut lia wie von daut, waut Hyun beläwd?

⁵ Wie wudden uk kjennen äwalajen: “Sie ekj doafäa bekaunt, daut ekj no Fräd sträw, ooda sie ekj mie foaken met aundre oneenich?” See wie mol, waut een Brooda beläwd, waut Hyun heet un en Sied-Korea wont. Hee sach eenje, waut veschiedne Oppgowen en de Vesaumlunk hauden, aus siene Jäajna aun. Hee sajcht: “Ekj grunzt äwa dise Breeda un wia foaken nich met daut envestonen, waut dee säden.” Waut kjeem doabie rut? Hyun sajcht: “Daut jeef Oneenichkjeit en de Vesaumlunk.” Eenje von siene Frind holpen am dan to vestonen, daut hee sikj endren must. Hee deed daut, un nu es hee een feina Eltesta. Wan wie enwoaren, daut wie bäta sennen wellen aus aundre, enne Städ no Fräd to sträwen, dan mott wie doa fuaz waut met doonen.

6. Waut kaun ons no Galata 5:26 no bat doa brinjen, daut wie ons met aundre mäten wellen?

⁶ Läs Galata 5:26. Waut kaun ons bat doa brinjen, daut wie ons met aundre mäten wellen? Wan wie ekjich un aufjenstich sent. Een ekja Mensch es stolt un denkjt bloos aun sikj. Un eena, waut aufjenstich es, well nich bloos daut haben, waut een aundra haft, oba dee well dän daut uk aufgonen. Ekjich sennen bediet en Werkjlichkjeit, daut eena dän aundren haust. Gaunz secha well wie nuscht met ekjich un aufjenstich sennen to doonen haben!

7. Wuarom kaun daut schlajcht utkomen, wan eena ekjich un aufjenstich es? Jeff een Biespel.

⁷ Daut kaun sea schlajcht utkomen, wan eena ekjich un aufjenstich es. Daut wudd een bät soo sennen, aus wan een Zhett schwienschet Brennstoff haud. Woomäajlich kaun dee fein oppflieejen, oba met de Tiet woaren de Ruakjes tooschlekjen un de Moota woat nich mea jenuach Krauft haben, daut de Zhett sikj fein saten kaun, un daut kaun een grootet Ojjlekj jäwen. Biejlikj soo jeft daut Menschen, waut Jehova aul een Stoot deenen. Oba wan dee ekjich un aufjenstich sent, dan woat daut schlajcht utkomen (Spr. 16:18). Dee woaren opphieren Jehova to deenen un an  selfst un aundre schoden. Waut kjenn wie doonen, daut ons daut nich passieet?

8. Waut kjenn wie doonen, daut wie nich ekjich sent?

⁸ De Rot, waut de Apostel Paulus de Filippa jeef, kaun ons halpen, nich ekjich to sennen. Hee säd: “Siet nich nosikj un ieajiezich, väl mea, acht dän näakjsten hecha aus junt selfst” (Filip. 2:3). Wan wie de aundre fa hecha talen aus ons selfst, dan woa wie ons nich met soone mäten, waut sikj met mea vestonen aus wie. Enne Städ daut woa wie ons fa dee freien, besonda wan dee äare Gow brucken, om Jehova to deenen un to lowen. Un wan de Breeda un Sestren, waut sikj met väl vestonen, Paulus sienen Rot nokomen, dan woaren dee bie ons uk no daut goode kjikjen. Dan woaren aule methalpen, daut doa en de Vesaumlunk Fräd un Eenichkjeit es.

9. Waut kjenn wie doonen, daut wie nich aufjenstich woaren?

⁹ Wie woaren nich soo leicht aufjenstich woaren, wan wie bescheiden sent un doaraun denkjen, daut wie ons nich met aules fein vestonen. Een bescheidna Mensch woat nich en eentwajch bewiesen wellen, daut hee bäta ooda kjlieekja es aus aule aundre. Enne Städ daut woat dee proowen, von soone to lieren, waut sikj met mea vestonen. Wan doa biejlikj een Brooda es, waut sea feine Räden haft, dan wudd wie dän kjennen froagen, woo hee dee reedmoakt. Ooda wan eene Sesta scheenet Äten moaken kaun, dan kjenn wie dee froagen, woo see daut deit. Un wan een Jugentlicha nich leicht Frind kjricht, dan kaun dee soone no Help froagen, waut leicht Frind kjrieen. Wan wie daut doonen, dan woa wie nich aufjenstich woaren un ons selfst vebätren kjennen.

10. Met waut fa eenen Trubbel must Gideon foadich woaren?

¹⁰ See wie mol, waut Gideon beläwd, aus de Mana vom Staum Efraim no am kjeemen. Gideon wia vom Staum Manasse un hee un siene 300 Mana hauden met Jehova  siene Help kunt een deel Fiend jewennen. Dee wudden leicht haben kunt stolt woaren. De Mana von Efraim kjeemen nich no Gideon, om am to lowen, oba om met am to strieden. Daut späat sikj soo, daut dee beleidicht wieren, wiels Gideon an nich fuaz jefroacht haud, aus see am halpen wullen, jäajen Gott siene Fiend to kjamfen. Dee wieren sea doarom todoonen, daut äa Staum jeieet wort. Oba dee dochten nich doaraun, daut Gideon metjeholpen haud, Jehova sienen Nomen to ieren un dän sien Volkj to beschitzen (Rech. 8:1).

11. Waut säd Gideon to de Mana von Efraim?

¹¹ Gideon säd deemootich to de Mana von Efraim: “Waut hab ekj nu jedonen, waut met junt to vejlikjen es?” Un dan räd hee von eene Sach, wua Jehova an jesäajent haud. “Aus hee daut säd, leet äa Oaja äwa am no” (Rech. 8:2-3). Gideon wia deemootich un schauft doaropp, daut doa Fräd mank Gott siene Deena wia.

12. Waut lia wie von de Efraimita un von Gideon?

¹² Waut lia wie von dise Jeschicht? Von de Efraimita lia wie, daut wie sellen dolla doano sträwen, daut Jehova jeieet woat, aus doano, daut wie selfst Iea kjrieen. Un wan wie een Famieljenhaupt ooda een Eltesta sent, dan kjenn wie waut von Gideon lieren. Wan sikj wäa oajat äwa daut, waut wie jedonen haben, dan sell wie proowen, dän to vestonen. Wie kjennen dän uk fa waut lowen, waut dee fein jedonen haft. Doatoo mott wie deemootich sennen, besonda wan deejanja nich em rajchten wia. Daut es wichtja, daut doa Fräd es, aus daut wie opp ons ieejnet Rajcht bestonen.

13. Waut fa eenen Trubbel haud Hana, un woo kunn see doamet foadich woaren?

¹³ See wie mol, waut Hana beläwd. See wia met dän Levit Elkana befriet. Oba Elkana haud noch eene aundre Fru, waut Peninna heet. Elkana räakjend Hana väl mea aus Peninna. “Peninna haud Kjinja oba Hana haud kjeen Kjint”. Doawäajen deed see “Hana sea veachten un beleidjen”. Woo wia daut fa Hana? Daut wia soo schlemm, “daut Hana nich äten kunn un eefach hielen must” (1. Sam. 1:2, 6-7). Oba de Schreft sajcht nich, daut see proowd, sikj aun Peninna auftorajchnen. Enne Städ daut schedd see sikj to Jehova ut un veleet sikj doaropp, daut hee de Sach trajchtstalen wudd. Wia Peninna met de Tiet leeftolja to Hana? Daut sajcht de Schreft nich. Oba wie weeten, daut Hana met de Tiet wada ennalichen Fräd haud un “nich mea soo truarich” wia (1. Sam. 1:10, 18).

14. Waut lia wie von Hana?

¹⁴ Waut kjenn wie von Hana lieren? Wan sikj bie die wäa äwahäwen well, dan denkj  doaraun, daut daut en diene Macht steit, waut du doamet deist. Proow nich, die met dän to mäten. Tol nich schlajchtet met schlajchtet trigj; proow leewa met dän aundren Fräd to moaken (Reem. 12:17-21). Dan woascht du ennalichen Fräd haben, endoont aus de aundra sikj endat ooda nich.

15. Waut wia bie Apollos un bie Paulus äwareen?

¹⁵ Tolatst well wie seenen, waut wie von dän Jinja Apollos un dän Apostel Paulus lieren kjennen. Dee beid kjanden de Schreft sea goot. Beid wieren sea bekaunt un wieren feine Liera. Un beid hauden aul väle kunt halpen Jesus siene Jinja to woaren. Oba kjeena von dee proowd bäta to sennen aus de aundra.

16. Woo wia Apollos?

¹⁶ Apollos wia “von Alexandria”. Daut wia ieeschtemma eene bekaunde Staut, wua de Menschen sikj huach utlieren kunnen. Daut lat soo, daut hee een feina Rädna wia, un hee wia “met de Schreft goot bekaunt” (Apj. 18:24). Aus hee en Korint wia, säden eenje von de Vesaumlunk, daut see am dolla jleichten aus aundre Breeda, biejlikj Paulus (1. Kor. 1:12-13). Haud Apollos doa waut met to doonen? Daut sitt doa nich no, wiels Paulus lota säd, daut Apollos sull wada no Korint reisen (1. Kor. 16:12). Daut wudd dee kjeenmol jesajcht haben, wan dee jedocht haud, daut Apollos doa Spoolungen veuasoakt haud. Apollos brukt siene Gow rajcht, biejlikj om de goode Norecht bekaunttomoaken un om de Breeda to stoakjen. Wie weeten uk, daut Apollos deemootich wia. De Schreft sajcht biejlikj noanich, daut hee beleidicht wia, aus Aquilla un Priszilla “am Gott sien Wajch noch jrintelja [utläden]” (Apj. 18:24-28).

17. Woo sträwd Paulus no Fräd?

 ¹⁷ De Apostel Paulus wist, daut Apollos eene goode Oabeit deed. Oba hee haud nich Angst, daut de Breeda met eenst wudden Apollos dolla jleichen aus am. Aun daut, waut Paulus no de Vesaumlunk en Korint schreef, es to seenen, woo deemootich, bescheiden un utjejlikjt hee wia. Hee feeld sikj nich jeieet, aus eenje säden: “Ekj hool daut met Paulus”. Enne Städ daut jeef hee Jehova Gott un Jesus Christus aule Iea (1. Kor. 3:3-6).

18. Waut kjenn wie no 1. Korinta 4:6-7 no von Apollos un von Paulus lieren?

¹⁸ Waut lia wie von Apollos un von Paulus? Veleicht schauf wie sea fa Jehova un kjennen väle halpen, sikj deepen to loten. Oba wie weeten, daut daut bloos mäajlich es, wiels Jehova ons halpt. Un wie kjennen noch waut von Apollos un von Paulus lieren. Je mea wie fa de Vesaumlunk doonen kjennen, je dolla kjenn wie doa no Fräd sträwen. Wie sent sea dankboa, wan de Eltestasch un Deenstaumthelpa ons halpen veeent to sennen un Fräd to haben. Daut doonen dee, wan dee ons Rot ut de Schreft jäwen un wan dee nich no Iea fa sikj sieekjen, oba ons halpen Jesus to jehorchen un sien Biespel notodoonen (läs 1. Korinta 4:6-7).

19. Waut kaun jieda eena von ons doonen? (See uk dän Kausten “ Veuasoak kjeenem, sikj met aundre to mäten”.)

¹⁹ Wie aula haben von Gott veschiedne Gowen jekjräajen un kjennen dee “brucken dän näakjsten toom gooden to deenen” (1. Pet. 4:10). Veleicht späat sikj ons daut soo, daut wie nich väl doonen kjennen. Oba soo aus een Kjleet nich bloos von eenen Stäakj toopjeneit es, soo brukt daut väl Kjlienichkjeiten, daut de Vesaumlunk veeent blift. Strenj wie ons aun, daut wie ons nich met aundre mäten. Well wie aules doonen, waut wie kjennen, daut doa Fräd un Eenichkjeit en de Vesaumlunk es (Efs. 4:3).