1. Waut haft Jehova fa die jedonen?

WOO wortst du eent von Jehova siene Zeijen? Veleicht hieezhd du daut ieeschte von diene Elren von “daut Evangelium” ooda von eenen Oabeitspoatna, Schoolpoatna ooda von wäm, dee von Hus to Hus prädjen deed (Mar. 13:10). Dan neem sikj eena väl Tiet un strenjd sikj sea aun, met die de Bibel to studieren. Bie dit Studium lieezhd du Jehova to leewen un wortst en, daut hee die uk leewd. Jehova trock die no de Woarheit un nu best du eent von Jesus siene Nofolja un hast de Hopninj fa emma to läwen (Joh. 6:44). Secha best du Jehova sea dankboa, daut hee wäm bat doa jebrocht haft, die de Woarheit to lieren, daut du am deenen kaust.

2. Waut woa wie en disen Artikjel seenen?

² Nu, wiels wie de Woarheit kjanen, hab wie de Iea, aundre to halpen, uk opp dän Läweswajch to gonen. Veleicht jeit ons daut scheen, von Hus to Hus to prädjen, oba ons es daut schwoa, wäm een Bibelstudium auntobeeden ooda daut to leiden. Jeit die daut uk soo? Dan kaun de Rot en disen Artikjel die secha halpen. Wie woaren seenen, waut ons bat doa brinjt, daut wie Jinja moaken wellen. Un wie woaren uk seenen, woo wie met Schwierichkjeiten foadich woaren kjennen, waut ons doavon trigjhoolen. Oba ieescht mol woa wie seenen, wuarom wie de goode Norecht nich bloos prädjen sellen, oba aundre dee uk lieren.

3. Wuarom doo wie prädjen?

³ Aus Jesus oppe Ieed wia, jeef hee siene Nofolja tweeatlei opp. Ieeschtens, daut dee de goode Norecht von daut Kjennichrikj prädjen sullen. Un hee wees dee uk, woo see daut doonen kunnen (Mat. 10:7; Luk. 8:1). Jesus lieed siene Jinja biejlikj, waut see doonen sullen, wan doa wäa nich no de goode Norecht horcht ooda wan doa wäa horcht (Luk. 9:2-5). Jesus säd uk verut, daut see väl Menschen un opp väl Städen prädjen wudden, soo “daut aule Velkja daut hieren” wudden (Mat. 24:14; Apj. 1:8). Dee sullen de Menschen sajen, waut Gott sien Kjennichrikj wia un waut daut doonen wudd, endoont aus dee doano horchten ooda nich.

4. Waut mott wie no Matäus 28:18-20 no noch doonen, aus bloos von daut Kjennichrikj prädjen?

⁴ Waut wia daut tweede, waut Jesus siene Nofolja oppjeef? Hee säd, dee sullen de Menschen lieren, aules to doonen, waut hee an befolen haud. Eenje säden, daut sull bloos en de Aposteltiet jedonen woaren. Oba es daut soo? Nä, wiels Jesus jeef auntovestonen, daut dit wichtje Woakj bat vondoag dän Dach jedonen sull, soogoa “batem Enj von de Welt” (läs Matäus 28:18-20). Woomäajlich jeef Jesus dit Jeboot, aus hee sikj von äwa 500 Jinja seenen leet (1. Kor. 15:6). Un en de Openboarunk, waut Jesus Johanes seenen leet, jeef hee gaunz kloa auntovestonen, daut aul siene Nofolja aundre halpen sullen, Jehova kjanen to lieren (Opb. 22:17).

5. Woo wiest Paulus sien Jlikjnis en 1. Korinta 3:6-9, daut wie prädjen un lieren sellen?

⁵ De Apostel Paulus vejlikjt daut Jinja moaken met de Oabeit oppe Stap un muak dietlich, daut wie nich bloos plaunten sullen. Hee säd to de Korinta: “Ekj deed plaunten, Apollos goot Wota, . . . jie sent Gott sien Akawoakj” (läs 1. Korinta 3:6-9). Wie sent Oabeida en “Gott sien Akawoakj” un doonen nich bloos de Sot plaunten, oba uk jeeten un ons pinkjlich doarom kjemren, daut daut waussen kaun (Joh. 4:35). Oba wie weeten, daut Gott daut waussen lat.

6. Bie waut sell wie de Menschen halpen, wan wie dee lieren?

⁶ Wie sieekjen no soone, waut “to daut eewje Läwen rajcht enjestalt” sent (Apj. 13:48, NW). Daut dee kjennen Jesus siene Nofolja woaren, mott wie dee halpen, daut dee daut, waut dee von de Schreft lieren, (1) vestonen, (2) aunnämen un (3) daut nokomen (Joh. 17:3; Kol. 2:6-7; 1. Tess. 2:13). Aule von de Vesaumlunk kjennen de Bibelstudiums halpen, wan see fa dee een goodet Biespel sent, dee Leew wiesen un dee bie de Toopkomes fein oppnämen (Joh. 13:35). De Bibelliera brukt veleicht een deel Tiet un Krauft, om sienen Bibelschiela to halpen, von orrajchte Glooweslieren un Jewanheiten loostokomen, wua dee “sea faust” aun es (2. Kor. 10:4-5). Wie motten eenen Bibelschiela veleicht Moonaten halpen, daut dee sikj kaun endren un met de Tiet deepen loten. Oba daut loont sikj!

7. Wuarom doo wie prädjen un Jinja moaken?

⁷ Wuarom doo wie prädjen un Jinja moaken? Ieeschtens, wiels wie Jehova leewen. Wan du daut Jeboot, to prädjen un Jinja to moaken, soo goot aus mäajlich nokjemst, dan wiest du, daut du Gott leefst (1. Joh. 5:3). Du deist je aul von Hus to Hus prädjen, wiels du Jehova leefst. Wia daut leicht fa die? Secha nich. Wieescht du jerettelt, aus du daut ieeschte Mol aun eene Däa  wieescht? Gaunz secha! Oba du wist daut, daut Jesus die dit Jeboot oppjejäft haud, un doawäajen deetst du daut. Un met de Tiet wia daut prädjen fa die secha leichta. Oba woo es daut, wan du een Bibelstudium leiden saust? Woascht du aul nerwees, wan du doa noch mau bloos aun denkjst? Veleicht. Oba du kaust Jehova no Help froagen, daut du nich soo nerwees best un die daut woachst, wäm een Bibelstudium auntobeeden. Dan woat Jehova die uk doabie halpen.

8. Waut kaun ons noch bat doa brinjen, aundre to lieren, soo aus Markus 6:34 wiest?

⁸ Waut es daut tweede, wuarom wie aundre de Woarheit lieren? Wiels wie de Menschen leewen. Jesus un siene Jinja wieren mol gaunz meed, wäajen see sea jeprädicht hauden. See wullen sikj eene Städ sieekjen toom vereiwen, oba eene Häad Menschen kjeemen doahan. Jesus jaumad daut äwa dee un funk aun, dee een deel to lieren (läs Markus 6:34). Wuarom strenjd Jesus sikj soo sea aun? Wiels hee krakjt wist, woo de Menschen daut jinkj. Hee sach, woo sea dee lieden musten un daut dee eene Hopninj brukten, un hee wull dee halpen. De Menschen vondoag dän Dach jeit daut krakjt soo, wan dee daut uk nich auntoseenen es. Dee sent soo aus Schop, waut sikj vebeiselt haben un kjeenen Hoad haben, waut an halpt. Paulus säd, daut soone Menschen kjeene Hopninj hauden un onen Gott enne Welt wieren (Efs. 2:12). Dee sent opp dän “Wajch . . ., dee en daut vedoawen fieet”! (Mat. 7:13). Wan wie doaräwa nodenkjen, woo needich de Menschen daut aun Gott fält, dan woa wie dee halpen wellen, wiels wie dee leewen un ons daut äwa dee jaumat. Un daut baste, woo wie dee halpen kjennen, es, wan wie dee een Bibelstudium aunbeeden.

9. Woo kaun Jehova ons no Filippa 2:13 no halpen?

⁹ Veleicht wäascht du die, wäm een Bibelstudium auntobeeden, wiels du weetst, woo väl Tiet die daut kosten woat. Wan daut soo es, dan vetal Jehova daut. Froag dän no Help, daut du dän Wensch kjrichst, een Bibelstudium auntofangen un daut uk derchtofieren (läs Filippa 2:13). De Apostel Johanes vesechat ons, daut Gott no ons horchen woat, wan wie am no waut froagen, waut no sienen Wellen es (1. Joh. 5:14-15). Du kaust die aulsoo secha sennen, daut Jehova die halpen woat, dän Wensch to kjrieen aundre to lieren.

10-11. Wuarom denkjen eenje, daut see nich met wäm de Bibel studieren kjennen?

¹⁰ Wie weeten, daut daut needich es, aundre to lieren. Oba daut jeft Schwierichkjeiten, waut ons doabie brikjen kjennen. Well wie mol seenen, waut daut fa Schwierichkjeiten sent un woo wie doamet kjennen foadich woaren.

¹¹ Veleicht kjenn wie nich soo väl doonen, aus ons wudd jankren. Eenje Vekjindja sent biejlikj aul ella ooda nich jesunt. Es daut bie die soo? Dan kaun die eenatlei halpen, waut wie en de Tiet von de COVID-19-Krankheit jelieet haben. Wie haben rutjefungen, daut wie äwa Fon ooda Internet fein met de Menschen de Bibel studieren kjennen. Du kaust veleicht uk von tus een Bibelstudium aunfangen un derchfieren. Wuarom es daut soo hendich? Wiels eenje wudden daut jleichen, de Bibel to studieren, un haben oba nich dan Tiet, wan de Breeda jeweenlich prädjen. Veleicht haben dee bloos tiedich zemorjes ooda lot zeowes Tiet. Wurscht du die dan kjennen aunbeeden, met dee to studieren? Jesus  lieed Nikodemus de Nacht, wiels dee daut soo wull (Joh. 3:1-2).

12. Waut wiest ons, daut wie uk goode Liera sennen kjennen?

¹² Veleicht äwanäm wie ons daut nich, met wäm de Bibel to studieren. Veleicht denkj wie, daut wie selfst ieescht mol mea lieren motten un bätre Liera woaren, ea wie met wäm de Schreft studieren. Wan daut bie die soo es, dan denkj doch mol äwa dreeatlei no, waut die doabie halpen kaun. Ieeschtens: Jehova trut die daut too, daut du aundre lieren kaust (2. Kor. 3:5). Tweedens: Jesus haft “aule Jewault . . . em Himmel uk oppe Ieed” un haft die daut oppjejäft, to lieren (Mat. 28:18). Un dreddens kaust du die doaropp veloten, daut aundre die halpen. Aus Jesus aundre lieren deed, veleet hee sikj opp daut, waut hee von sienen Voda jelieet haud, un krakjt soo kaust du daut uk (Joh. 8:28; 12:49). Du wurscht uk aundre froagen kjennen, aus see die halpen wellen, een Bibelstudium auntofangen un daut to leiden. Daut kaun biejlikj de Oppsechta von diene Deenstgrupp ooda een erfoarna Pionia ooda Vekjindja sennen. Un wan soone die dan mol metnämen no äare Bibelstudiums, dan kaun die daut halpen, daut du die daut uk woachst.

13. Wuarom sell wie ons to waut aundret wanen?

¹³ Veleicht es ons daut schwoa, opp eene aundre Wajch met de Menschen to studieren ooda aundre Sachen to brucken. Woo wie nu met de Menschen studieren es aundasch. Nu bruck wie jeweenlich daut Buak Een scheenet Läwen fa emma!. Doawäajen mott wie ons aundasch reedmoaken un aundasch met de Menschen studieren, aus wie daut bat nu jedonen haben. Wie läsen doa nich mea soo väl Varzhen un räden mea met dän Bibelschiela. Wan wie lieren, dan bruck wie mea Videos un Sachen von onse Websied un de JW Library^®-App. Wan du dise Sachen noch nich vesteist to brucken, dan lot die daut von aundre utlajen. Foaken well wie daut bloos soo hoolen, aus wie daut jewant sent. Daut es nich leicht, ons to waut nieet to wanen. Oba wan Jehova un aundre ons halpen, dan kjenn wie daut, un ons woat daut dan noch scheena gonen, met aundre to studieren. Een Pionia säd, daut et “fa dän Bibelliera un fa dän Schiela intressaunt es”, opp dise Wajch to studieren.

14. (a) Aun waut kjenn wie denkjen, wan de Menschen goanich horchen wellen? (b) Woo kaun ons 1. Korinta 3:6-7 Moot jäwen?

¹⁴ Veleicht won wie opp eene Städ, wua daut nich soo leicht es, Bibelstudiums auntofangen. Veleicht sent de Menschen endoontich ooda soogoa jäajen ons, wan wie prädjen. Waut kaun ons halpen nich mootloos to woaren? Wie kjennen doaraun denkjen, daut sikj bie de Menschen en dise orruje Welt haustich waut endren kaun. Dan woaren soone, waut ea nich intressieet wieren, daut veleicht en, daut an daut doch aun Gott fält (Mat. 5:3, NW). Eenje, waut ieeschtemma nuscht von onse Bieekja wullen, studieeden lota de Bibel. Wie weeten, daut Jehova de Har es, dän de Arnt jehieet (Mat. 9:38). Hee well, daut wie wieda plaunten un jeeten, oba hee es dee, waut daut waussen lat (1. Kor. 3:6-7). Un wan wie nu jroz kjeen Bibelstudium haben, dan woat ons daut Moot jäwen, doaraun to denkjen, daut Jehova ons doawäajen beloonen woat, daut wie ons aunjestrenjt haben. *

15. Woo denkjt Jehova äwa eenen, dee de Bibel studieet un daut dan nokjemt, waut dee lieet?

¹⁵ Jehova freit sikj, wan eena de Woarheit aunnemt un met aundre doaräwa rät (Spr. 23:15-16). Woo sea Jehova sikj doch freien mott, wan hee sitt, waut vondoag dän Dach aunjeit! Biejlikj en daut Deenstjoa 2020 worden 7  705  765 Bibelstudiums derchjefieet un 241  994 jeewen sikj Jehova han un leeten sikj deepen, wan doa uk oppe gaunze Welt eene schlemme Krankheit wia. Un dise Niee woaren uk noch met aundre de Bibel studieren un noch mea Jinja moaken (Luk. 6:40). Gaunz secha moak wie Jehova schaftich, wan wie bie dit Liawoakj metmoaken.

16. Waut kjenn wie ons väanämen?

¹⁶ Jinja moaken es väl Oabeit, oba met Jehova siene Help kjenn wie dee daut lieren, onsen himlischen Voda to leewen. Wudd wie ons daut kjennen väanämen, oppet weinichste met een Bibelstudium auntofangen un daut uk wiedatomoaken? Veleicht woa wie ons wundren, woo daut utkomen woat, wan wie opp jieda Jeläajenheit, wan daut paussent es, wäm froagen, aus dee met ons toop de Bibel studieren well. Wie kjennen ons secha sennen, daut Jehova onse Aunstrenjunk säajnen woat!

17. Waut woa wie beläwen kjennen, wan wie een Bibelstudium haben?

¹⁷ Waut vonne groote Iea daut nich es, daut wie aundre de Woarheit prädjen un lieren kjennen! Dit moakt ons werkjlich schaftich. De Apostel Paulus, waut en Tessalonich väle holp, de Woarheit kjanen to lieren, säd: “Wäa es onse Hopninj, onse Freid un onse Ierenkroon ver onsen Harn Jesus, wan hee wadakjemt? Sent daut nich uk jie? Jie sent je onse Iea un onse Freid” (1. Tess. 2:19-20; Apj. 17:1-4). Vondoag dän Dach jeit väle daut soo. Eene Sesta, waut Stéphanie heet, kunn met äaren Maun toop väle halpen sikj deepen to loten. See sajcht: “Daut jeft nich eene jratre Freid, aus Menschen to halpen, daut dee sikj kjennen Jehova hanjäwen.”